Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NOVEMBRE 2015

 KOTA MAMA-TENE NI

Bango ndo ti Nzapa na ndo ti bira ayeke tongana nyen?

Bango ndo ti Nzapa na ndo ti bira ayeke tongana nyen?

Kiringo tënë ti mo ayeke so wa? Azo mingi apensé so Nzapa aye tënë ti bira. Ala tene so, ândö, Nzapa ahunda na awakua ti lo ti tiri bira, na même ambaï ti yâ ti Bible nga kue ayeda na ni. Me ambeni zo ni atene so Jésus, so ayeke Molenge ti Nzapa, afa lani na adisciple ti lo ti ndoye awato ti ala (Matthieu 5:43, 44). Tongaso ala tene so, bango ndo ti Nzapa achangé na ndo ti tënë ti bira, nga laso, lo ye bira encore ape.

Ka ti mo? Nzapa aye tënë ti bira? Tongana lo ye bira, azo wa la lo yeke gbu part ti ala na yâ ti abira ti laso? Kiringo tënë na ahunda so apeut ti changé bango ndo ti mo na ndo ti tënë ti bira. Na tapande, tongana ambeni zo ayeke tiri bira, na mo mû part ti ambeni zo ni, nga mo hinga so Nzapa aye tënë ti bira, na lo nga kue lo mû part ti azo so mo ye ala, a yeke sara mo nzoni, ngbanga ti so mo yeke sûr so azo ti mo ni la ayeke sö ande benda. Me, tongana mo bâ so Nzapa amû gi part ti awato ti mo, a yeke sara mo tongana nyen? Peut-être mo yeke changé ti gue na peko ti azo so Nzapa amû part ti ala so.

Mbeni tënë ayeke dä so ayeke kota mingi. Ti hinga bango ndo ti Nzapa na ndo ti bira apeut ti sara ye mingi na ndo ti bango ndo ti mo na ndo ti Nzapa. Tongana mo kue mo yeke na popo ti azo mingi mingi so ayeke bâ pasi ndali ti bira, kite ayeke dä ape so mo bezoin ti wara kiringo tënë na ahunda so ge: Eskê biani Nzapa la azia lege na azo ti sara abira so wala même lo la lo yeke pusu ka ala ti sara ni? Lo yeke bâ gi azo na lê tongaso nga lo yeke pensé na nzoni duti ti ala so ayeke bâ pasi so ape?

Peut-être li ti mo ayeke kpe ande tongana mo ga ti bâ so kiringo tënë ti Bible ayeke tâ nde mingi na abango ndo so e londo ti bâ ni so. Na ndo ni, depuis ândö juska laso, bango ndo ti Nzapa na ndo ti bira achangé ape. E yeke gue ti bâ ye so Bible afa na ndo ti bango ndo ti Nzapa na ndo ti bira na ngoi ti azo ti Israël ândö nga na ngoi so Jésus ayeke lani na sese ge. Ye so ayeke aidé e ti hinga bango ndo ti Nzapa na ndo ti tënë ti bira laso, nga ti hinga wala abira ni ayeke ngbâ ande gi tongaso, wala a yeke hunzi ande.