Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Octobre 2015

 KOTA MAMA-TENE Ni | ZO AYEKE TÂ NA BEZOIN TI SAMBELA?

Azo ayeke sambela ka ngbanga ti nyen?

Azo ayeke sambela ka ngbanga ti nyen?

“Mbi yeke sara ka lani ajeu ti nginza mingi. Mbi yeke sambela ka ti tene mbi wara gbâ ti nginza. Me lâ oko mbi wara ni ape.”—Samuel, * Kenya.

“Na ekole, e kue e doit ti tene gi peko ti asambela so a fa na e fango.”—Teresa, Philippines.

“Mbi yeke sambela ka na ngoi so mbi yeke na yâ ti kpale. Mbi yeke sambela ti hunda pardon ti asiokpari ti mbi nga ti duti mbeni nzoni Chrétien.”—Magdalene, Ghana.

Atënë so Samuel, Teresa nga na Magdalene atene so afa so azo ayeke sambela ka ndali ti araison nde nde, ambeni raison ni ayeke nzoni mingi ahon ambeni. Ambeni zo ayeke sambela na bê ti ala kue. Ti ambeni, ala yeke sambela gi tongaso. Me, wala ala yeke sambela kozo ti tene ala sara examen na ekole, wala ti tene équipe ti ala agagné, wala ti tene Nzapa afa lege na afami ti ala wala ndali ti ambeni raison nde, azo kutu mingi abâ so ala yeke na bezoin ti sambela. Ni la, ambeni sango afa so même ambeni zo so lâ oko ague na eglize ape ayeke sambela ka.

Mo yeke sambela ka? Tongana a yeke tongaso, mo yeke sambela ka ndali ti aye wa? Atâa mo yeke sambela ka wala pëpe, mo peut ti hunda tere ti mo, mo tene: ‘A yeke bien ti sambela? Zo wa la ayeke mä asambela ni?’ Mbeni wandara atene so sambela ayeke sara si yâ ti li ti mbeni zo adë kamême na ndo ti kpale so lo yeke na ni. Ambeni docteur ayeke na oko bango ndo ni so, ala tene sambela ayeke “mbeni fason ti soignengo na azo la.” So ti tene raison so azo ayeke sambela ka ndali ni ayeke dä ape? Wala ala yeke sambela ka gi ti tene tere ti ala ayapu? Ên-ën.

Bible afa na e so sambela ayeke kota ye mingi, a yeke gi pëpe mbeni ye so asara si tere ti zo ayapu. A fa nga na e so mbeni zo ayeke mä biani asambela so e yeke sara ni na lege ni nga ndali ti aye so ayeke nzoni. A yeke tâ tënë la? Zia e bâ aye so Bible afa.

^ par. 3 A changé ambeni iri ni.