Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO OCTOBRE 2015

 KOTA MAMA-TENE Ni | ZO AYEKE TÂ NA BEZOIN TI SAMBELA?

Sambela: Anzoni ye ti pekoni

Sambela: Anzoni ye ti pekoni

Mingi ni, kozo ti tene e komanse ti sara mbeni kua, peut-être e hunda ka tere ti e, e tene: ‘Nyen la mbi yeke wara na pekoni? Me so e tene tongaso, a ye ti fa so e yeke mbeni zo so e ye ka gi intérêt ti e? A yeke lakue tongaso ape. Mingi ni, e ye gi ti hinga wala ye so e sara ayeke nzoni. Même Job so ayeke mbeni nzoni zo ahunda tënë so, lo tene: ‘Tongana mbi iri lo, fade lo mä tënë ti mbi?’—Job 9:16, Tene ti Nzapa, Kozo Mbouki.

Na yâ ti ambage so ahon, e kue e bâ aye so afa so sambela ayeke pëpe gi mbeni senge mbage ti vorongo Nzapa tongaso wala gi mbeni ye so apeut ti aidé e ti yapu, me sambela ayeke kota ahon aye ni so. Tâ Nzapa ayeke mä asambela ti e. Tongana e sambela na mbeni lege so ayeke nzoni nga ndali ti aye so ayeke nzoni, lo yeke mä e. Ni la, Nzapa atisa e ti ga nduru na lo (Jacques 4:8). Tongaso, nyen la e lingbi ti wara tongana e yeke sambela ka lakue? Zia e bâ gi ambeni nzoni ye ti pekoni.

Siriri ti bê.

Tongana mo tingbi ka na akpale, bê ti mo ayeke gi ka mo mingi? Na yâ ti mara ti angoi tongaso, Bible awa e ti “ngbâ ti sambela lakue”, nga ti “hunda na Nzapa aye so agbu bê ti [e].” (1 aThessalonicien 5:17; aPhilippien 4:6). Bible atene so tongana e sambela Nzapa, “fade siriri ti Nzapa so ahon ndo ti bibe kue ayeke bata bê ti [e] nga na lege ti hingango ndo ti [e]”. (aPhilippien 4:7). E peut ti wara dengo bê tongana e fa atënë ti bê ti e na Babâ ti e ti yayu. Ni la, tongana ti so a fa na Psaume 55:23, Nzapa awa mo lo tene: “Mo zia kungba ti mo na ndo L’Éternel, na fade Lo bata mo.”

“Mo zia kungba ti mo na ndo L’Éternel, na fade Lo bata mo.”—Psaume 55:23

Azo mingi awara mara siriri ti bê ni so. Hee Ran, na  Corée du Sud, atene: “Atâa so akpale ti mbi ayeke kota mingi, na peko ti so mbi sambela ngbanga ni, mbi bâ so mbi yapu nga mbi wara ngangu ti gbu ngangu na yâ ni.” Cecilia, na Philippines, atene: “So mbi yeke mama, a sara si mbi yeke gi ka bê ti mbi mingi na ndo ti molenge ti mbi ti wali nga na mama ti mbi, so kobela asara si lo hinga mbi encore ape. Me, teti so mbi yeke sambela ka lakue, a sara si mbi yeke gi bê mingi encore ape na ndo ti akpale so mbi yeke tingbi na ni lâ oko oko. Mbi hinga so Jéhovah ayeke mû maboko na mbi ti bâ lege ti ala.”

Dengo bê nga na ngangu na ngoi ti akpale.

Eskê kota mbeto asara mo awe? Peut-être ngbanga ti so fini ti mo ayeke na lê ti kuâ wala ndali ti so mbeni ye ti ngangu asi na mo? Ti sambela “Nzapa ti dengo bê kue” ayeke sara si mo wara ngangu. Bible atene so lo  yeke dë “bê ti e na yâ ti ye ti vundu kue so e wara”. (2 aCorinthien 1:3, 4). Na tapande, na ngoi so Jésus agi bê ti lo ngangu mingi, Bible atene so “lo kuku na likuni ti lo na lo to nda ti sambela”. Ye ti pekoni ayeke so wa? “Mbeni ange alondo na yayu asi na tere ti lo, na ange ni akpengba lo.” (Luc 22:41, 43). Ambeni sioni zo agi lani ti zia mbeto na yâ ti Néhémie, so ayeke wakua ti Nzapa, si lo sara kua ti Nzapa pëpe. Lo sambela, lo tene: “Me fadeso, O Nzapa, Mo sara si mbi wara ngangu.” Ye so asi na pekoni afa so Nzapa a-aidé lo biani ti hon ndo ti mbeto ti lo nga ti hunzi kua ti lo ni (Néhémie 6:9-16). Reginald, na Ghana, afa ye so asi na lo tongana lo sambela. Lo tene: “Tongana mbi sambela, mbilimbili na ngoi so akpale ahon ndo ti mbi, mbi bâ so kamême mbi fa kpale ti mbi ni na mbeni zo so apeut ti aidé mbi nga so adë bê ti mbi so a lingbi mbi gi bê ti mbi encore ape.” Biani, Nzapa apeut ti dë bê ti e tongana e sambela lo.

Ndara so alondo na Nzapa.

Ambeni desizion so e yeke mû apeut ti sara ye na ndo ti e nga na ndo ti azo so e ye ala mingi. Nyen la apeut ti aidé e ti mû anzoni desizion? Bible atene: “Tongana ndara amanke mbeni zo na popo ti ala [mbilimbili na ngoi ti atara], zia lo ngbâ ti hunda ni na Nzapa, teti Nzapa ayeke mû ye na azo kue na lo yeke suku ngbanga ni pëpe; na a yeke mû ni na lo.” (Jacques 1:5). Tongana e sambela ti wara ndara, Nzapa apeut ti sara kua na yingo vulu ti lo ti aidé e ti mû anzoni desizion. Ni la, e peut ti hunda yingo vulu ti Nzapa ndali ti so Jésus atene: “Fade Babâ so ayeke na yayu ayeke mû yingo vulu na ala so ahunda ni na lo.”—Luc 11:13.

“Mbi sambela Jéhovah mingi ti tene lo aidé mbi ti mû nzoni desizion.”—Kwabena, Ghana

Même Jésus nga kue abâ so lo yeke na bezoin ti hunda Babâ ti lo ti aidé lo na ngoi so lo ye lani ti mû akota desizion. Na tapande, na ngoi so lo ye ti soro akoli 12 ti ga abazengele ti lo lani, Bible atene so “lo sambela Nzapa na bï ni so kue.”—Luc 6:12.

Legeoko tongana Jésus, bê ti azo mingi laso adë ti bâ so Nzapa akiri tënë na asambela ti ala so ala tene ni na lo ti hunda mungo maboko ti lo na yâ ti adesizion ti ala. Regina, na Philippines, afa akpale nde nde so lo tingbi na ni, na tapande, bango lege ti lo wani nga na ti sewa ti lo na peko ti kuâ ti koli ti lo, zingo lo na kua nga na kpale ti batango amolenge ti lo. Me nyen la a-aidé lo ti mû anzoni desizion? Lo tene: “Grâce na sambela, Jéhovah a-aidé mbi.” Kwabena, na Ghana, afa raison so lo hunda na Nzapa ti aidé lo, lo tene: “Mbi girisa kua ti nginza ti mbi so a payé mbi dä bien.” Na ngoi so lo yeke gbu li ti lo lani na ndo ti aye so lo doit ti sara, lo tene: “Mbi sambela Jéhovah mingi ti tene lo aidé mbi ti mû nzoni desizion.” Lo kiri, lo tene: “Mbi wara ngangu na ngoi so mbi bâ so Jéhovah a-aidé mbi ti soro mbeni kua so apeut ti aidé mbi ti wara aye so mbi yeke na bezoin ni nga ti sara na lo.” Mo nga kue, Nzapa apeut ti aidé mo, tongana mo sambela lo na ndo ti aye so alingbi ti sara mbeni ye na ndo ti songo ti mo na lo.

So gi kete mbage ti anzoni ye so sambela alingbi ti ga na ni na mo la. (Ti wara ambeni tapande ni, bâ encadré, “ Anzoni ye ti peko ti sambela.”) Me, ti wara anzoni ye ni so, kozoni kue mo yeke na bezoin ti hinga Nzapa nga ti hinga ye so bê ti lo aye. Tongana a yeke ye so mo ye la, e wa mo ti hunda aTémoin ti Jéhovah ti aidé mo ti manda Bible. * A yeke duti ande kozo ye so mo yeke sara ti ga nduru na ‘Lo so ayeke mä asambela’.—Psaume 65:3.

^ par. 14 Ti hinga atënë mingi na ndo ni, bâ aTémoin ti Jéhovah ti ndo so mo yeke dä wala gue na ndo ti site Internet ti e, www.jw.org.

TI HINGA AMBENI TËNË

Nzoni tënë ni ayeke so wa?

Gi ti hinga tënë ti Nzapa ni ayeke so wa, ndani so a yeke kota ye ti fa ni hio nga na ye so mo lingbi ti sara.

A-Témoin ti Jéhovah ayeke azo wa?

A-Témoin ti Jéhovah oke la mo hinga ala? Nyen la mo hinga biani na ndo ti e?