Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO SEPTEMBRE 2015

 GIGI TI MBENI ZO

Mbi wara mbeni ye so ayeke pendere ahon aye kue

Mbi wara mbeni ye so ayeke pendere ahon aye kue

Na mbeni bï ti ngu 1984, mbi so mbi yeke gi mbeni senge maseka mbi ga mbeni zo so iri ti lo awu. Na bï ni so, mbi ga Miss ti Hong Kong. A zia foto ti mbi na ndo ti ambeti-sango. Mbi yeke he abia, mbi yeke mû adiskur, mbi yeke sara akuasinga na télé, mbi yeke yü gi apendere bongo nga a yeke bâ mbi gi na akota zo ti kodoro, na tapande gouverneur ti Hong Kong.

A si na ngu ti peko, mbi komanse ti joué afilm, na mingi ni, mbi la mbi yeke vainqueur ti yâ ti afilm ni. Ajournaliste aye gi ti hinga tënë na ndo ti mbi, aphotographe nga kue aye gi ti sara na mbi foto, azo aye ti tene mbi duti dä na ngoi so ala yeke fa na azo afini film so ala ye ti sigigi na ni. Ti ambeni, ala ye gi ti tene mbi la mbi zi yanga ti afini ndokua so ala sigigi na ni. Nga, ambeni ayeke tisa mbi ti te kobe place oko na ala. Azo aye gi ti yôro mbi lakue na yâ ti aye so ala yeke sara.

Mbi, na yâ ti mbeni film

Yeke yeke, mbi ga ti bâ so aye ni so kue ayeke pëpe anzoni ye, tongana ti so mbi pensé fade. Mbi sara asongo film. Nde na ti Hollywood, azo ti Hong Kong aye ka pëpe ti mû mbeni zo nde ti joué ambeni parti ti film so risque ayeke dä mingi na place ti avrai zo so ajoué film ni. Tongaso, mbi wani la mbi doit ti mû risque ti sara ambeni ye, na tapande kpengo na moto na ndo ti oto. Mingi ti afilm so mbi joué ayeke afilm ti sarango aye ti kirikiri nga na sarango ye ti ngangu na zo; ambeni andu aye ti asioni yingo.

Na ngu 1995, mbi na mbeni zo ti sigingo na afilm e sara mariage. Atâa so azo apeut ti pensé so mbi yeke na ye kue so apeut ti sara si mbi duti na ngia, aye tongana yango-iri, mosoro nga na nzoni koli, mbi yeke na ngia oko ape. Mbi décidé ti zia lege ti jouengo afilm ni.

MBI RAPPELÉ NA NZAPA SO MBI SARA LANI NA KETE TI MBI

Mbi komanse ti rappelé na Nzapa so mbi sara lani na kete ti mbi. Lani, na asamedi, mbi na yaya ti mbi ti wali e yeke gue ka ti bâ mbeni sewa so ayeke aTémoin ti Jéhovah. Babâ ni, so iri ti lo ayeke Joe McGrath, ayeke manda lani Bible na e na amolenge ti lo ti wali ota. Ndoye nga na ngia ayeke lani na yâ ti sewa ni, nga “Papa Joe” ayeke ne lani wali ti lo nga na amolenge ti lo. A nzere nga lani na mbi ti tene mbi na ala e gue na abungbi ti ala. Na ambeni ngoi, e gue même na akota bungbi, na a yeke lani mbeni ngoi ti ngia. Mbi yeke lani na siriri na popo ti aTémoin ti Jéhovah.

Me na yâ ti sewa ti mbi, siriri ayeke dä ape. Asarango ye ti babâ ti mbi asara si mama ti mbi ayeke gi na vundu.  Na ngoi so mbi wara ngu bale-oko tongaso, Mama azia lege ti guengo na bungbi ti aTémoin ti Jéhovah. Me mbi ngbâ ti mbi ti gue lani, me na bê ti mbi kue ape. Na ngoi so mbi wara ngu 17, mbi wara batême. Me kete na pekoni, mbi komanse ti sara aye ti kirikiri, ye so asara si mbi ngbâ na yâ ti bungbi ni ape.

MBI MÛ DESIZION TI KIRI

Kete na peko ti mariage ti mbi, a-ancien use ti congrégation ti aTémoin ti Jéhovah ti ndo so mbi yeke dä aga abâ mbi. Ala ga afa na mbi aye so mbi peut ti sara ti kiri na mbage ti Jéhovah Nzapa. Nga, ala leke ti tene mbeni missionnaire, so iri ti lo ayeke Cindy, aga a-aidé mbi. Andâ na ngoi ni so, mbi girisa mingi ti atënë ti Nzapa so mbi manda lani. Ni la, mbi hunda na Cindy ni ti fa tâ na mbi aye so afa atene Bible ayeke Mbeti ti Nzapa. Lo fa na mbi atapande ti aprophétie ti Bible so aga tâ tënë awe. Yeke yeke, e komanse ti ga akota kamarade, na lo tisa mbi ti tene e manda akota fango ye ti Bible. Mbi yeda, na gi na tongo nda ni, mbi ga ti bâ so Jéhovah ayeke Nzapa ti ndoye, na so lo ye si mbi duti na ngia.

Na ngoi so mbi kiri mbi komanse ti gue na abungbi ti aTémoin ti Jéhovah, mbi ye mingi ti duti na popo ti ala ahon ti duti na popo ti azo ti sarango afilm. Me, aye so asi na mbi na kete ti mbi asara si mbi yeke lani na confiance na zo oko ape, nga mbi bâ tere ti mbi so mbi yeke ye oko ape. Mbeni Témoin ti Jéhovah ni a-aidé mbi, lo fa na mbi tongana nyen ti hon ndo ti mara ti bibe ni so, nga ti wara anzoni kamarade.

MBENI YE SO AHON AYE KUE

A si na ngu 1997, mbi na koli ti mbi e quitté e gue na Hollywood, Californie, na États-Unis. Kâ, mbi aidé azo mingi ti tene ala wara nzoni na lege ti ndara so ayeke na yâ ti Bible. Ti manda Bible na azo aga na mbi ngia mingi ahon yango-iri so mbi wara na kua ti jouengo afilm. Na tapande, na ngu 2002, mbi tingbi na Cheri, so mbi na lo e hinga tere lani na Hong Kong. Mbaï ti lo na ti ti mbi akpa tere. Lo ga lani Miss ti Hong Kong, ngu oko kozo na mbi. Nga, na ngoi so mbi ga Miss, lo la lo yü na mbi couronne ni. Lo nga kue lo joué afilm nga na pekoni lo ga mbeni zo ti sigingo na afilm, na lo sara kua mingi lo na akota zo ti sarango afilm. Lo kue lo quitté lo gue na Hollywood.

Na ngoi so mbi mä a tene fiancé ti Cheri akui na peko ti so bê ti lo aluti, mawa asara mbi mingi. Nzapa ti aBouddhiste, so lo sara, apeut ti mû na lo dengo bê ape. Legeoko tongana mbi, lo wara aye kue so azo ayeke na nzara ti wara ni, me vundu ahon ndo ti lo nga lo yeke na confiance na zo oko ape. Mbi fa na lo aye so mbi manda na yâ ti Bible, me aye so a fa na lo kozo na bungbi ti aBouddhiste ni asara si a yeke lani ngangu na lo ti yeda na ti so mbi fa na lo.

Cheri na aye ti sarango film na tere ti lo

Mbeni lâ, na ngu 2003, Cheri airi mbi, andâ lo yeke na Vancouver, na Canada, ndo so lo ngbâ ti sara mbeni film dä. Na nzerengo tere, lo tene na mbi so na ngoi so ni ngbâ ti kpe na oto, ti fono ti bâ yâ ti kodoro ni, gi gbagburu tongaso, ni komanse ti sambela Nzapa na kota go, ni tene: “Tene na mbi, mo yeke tâ Nzapa? Iri ti mo ayeke nyen?” Andâ na ngoi ni so, lo yeke hon na ndo so mbeni Da ti Royaume ayeke dä, na lê ti lo atï na ndo ti iri “Jéhovah.” Lo bâ so a yeke Nzapa la akiri tënë na sambela ti lo so, ni la lo ye ti wara tere hio na aTémoin ti Jéhovah. Mbi sara kue ti tene lo gue na bungbi, na kete lango na pekoni, lo gue na bungbi ti aTémoin ti Jéhovah so a yeke sara ni na yanga ti Chinois, na Vancouver.

Cheri atene na mbi, lo tene: “Azo ni so abibe ti ala na mbi mingi, mbi peut ti fa atënë ti bê ti mbi na ala.” A  nzere tâ lani na mbi mingi ti mä mara ti tënë ni so, ngbanga ti so, lani na ngoi so Cheri ayeke sara afilm, lo sara kamarade na zo oko ape. Cheri angbâ lakue ti gue na abungbi. Me a si na ngu 2005, lo signé mbeni con-trat ti sigingo na ambeni yongoro film use na Chine. Ye so asara si lo doit ti kiri na Hong Kong. Na ngu 2006, Cheri amû tere ti lo na Jéhovah nga lo wara batême na ngoi ti mbeni kota bungbi na Hong Kong. Atâa so lo ye lani mingi ti sara na Jéhovah, kua ti sarango afilm ni asara si a yeke lani ngangu mingi na lo, na lo yeke lani na ngia ape.

NGIA SO MBI WARA NA MUNGO MABOKO NA AMBENI ZO

Na ngu 2009, gigi ti Cheri achangé. Lo décidé ti zia lege ti kua ti sarango afilm, tongaso si lo mû ngoi ti lo kue ti sara na Jéhovah. Lo wara gbâ ti akamarade na yâ ti bungbi. Lo mû tere ti lo ti fa nzoni tënë ti Royaume teti al’heure mingi, nga lo yeke biani na ngia ti aidé azo ti wara mbeni nzoni gigi.—Matthieu 24:14.

Cheri adécidé ti manda yanga ti Népalais, ti aidé groupe ti aTémoin ti Jéhovah, so ayeke tene yanga ti Népalais, na Hong Kong. Na Hong Kong, azo ayeke pensé ka pëpe na azo so ayeke tene yanga ti Népalais, wala même a yeke bâ ala tongana ambumbuse zo ndali ti so ala hinga Anglais wala Chinois nzoni ape. Cheri atene na mbi so a nzere na lo mingi ti aidé ala ti hinga Bible. Na tapande, mbeni lâ lo tingbi na mbeni wali ti kodoro ti Népal so ahinga tënë kete na ndo ti Jésus me lo hinga ye oko na ndo ti tâ Nzapa, Jéhovah, ape. Cheri asara kua na Bible ti fa na wali ni so, Jésus ayeke sambela lani Babâ ti lo so ayeke na yayu. Na ngoi so wali ni aga ti hinga so lo peut ti sambela tâ Nzapa, so iri ti lo ayeke Jéhovah, lo yeda ti mä nzoni tënë. Kete na pekoni, koli ti lo nga na molenge ti lo ti wali nga kue akomanse ti manda Bible.—Genèse 22:14; Luc 22:41, 42.

Cheri laso

Tongana mbi bâ tongana nyen la Cheri aye fango tënë, mbi hunda tere ti mbi, mbi tene, ‘Me nyen la akanga lege na mbi ti sara mara ye so lo yeke sara so?’ Andâ na ngoi ni so, mbi nga kue mbi kiri na Hong Kong awe. Mbi décidé ti leke aye na yâ ti gigi ti mbi, tongaso si mbi fa tâ tënë ti Bible mingi na azo. Mbi ga ti bâ so, so mbi mû ngoi ti mä azo nga ti aidé ala ti mä yâ ti Mbeti ti Nzapa, a sara si mbi yeke tâ na ngia.

Mbi bâ so, so mbi aidé azo ti mä yâ ti Mbeti ti Nzapa asara si mbi yeke tâ na ngia

Na tapande, mbi aidé lani mbeni wali ti kodoro ti Vietnam, so ayeke lakue gi na vundu nga lo yeke manke ti toto ape. Fadeso, lo yeke na ngia na yâ ti gigi ti lo, nga lo yeke na ngia ti duti na popo ti aita ti congrégation.

Mbi na Cheri e wara mbeni ye so ayeke pendere ahon aye kue. Atâa so kua ti sarango afilm ayeke sara si lani tere ti e anzere nga iri ti e awu, ti fa ye na azo na ndo ti Jéhovah Nzapa asara si e yeke na tâ ngia, ndali ti so a yeke mû gonda na iri ti lo. E wani e bâ tongana nyen la tënë ti Jésus so ayeke tâ tënë, so lo tene: “Ngia ayeke mingi tongana zo amû ye na zo ahon ti wara ye na maboko ti zo.”—Kusala 20:35.