Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO SEPTEMBRE 2015

Mo découragé na tere ti Nzapa?

Mo découragé na tere ti Nzapa?

“NGBANGA TI NYEN la a si gi na mbi? Nzapa azia si ye ni so asi na mbi ngbanga ti nyen?” So ayeke ahunda ti Sidnei la, mbeni maseka-koli ti Brésil. Lo hunda atënë ni so na ngoi so lo yeke lani na ngu 24. A yeke na peko ti mbeni sioni accident so lo sara lani, na lo peut ti bougé encore ape, lo yeke gi na yâ ti puse ti azo ti bubango gere.

Pasi so azo ayeke bâ ndali ti accident, kobela, kuâ ti mbeni zo so ala ye lo mingi, aye tongana yengingo ti sese, sukungo ti ngu wala bira, a peut ti sara si, gi tongana ye ti ngia tongaso, azo adécouragé na tere ti Nzapa. Me, a yeke fini ye ape. Ândö, Job, so ayeke mbeni wakua ti Nzapa, atingbi na ambeni ye ti ngangu na peko ti tere. Lo hinga ti lo ape, lo bi tënë ni na li ti Nzapa, lo tene: “Mbi toto na mo, na mo kiri tënë na mbi pëpe; mbi luti, na mo bâ mbi mingi. Mo kiri, Mo sara sioni na mbi; Mo tiri na mbi na ngangu ti tïtî mo.”—Job 30:20, 21.

Job ahinga lani ndo so akpale ti lo ni alondo dä so ape, nga lo hinga ndani so si aye ni so asi na lo tongaso so ape. Me, merci so Bible afa na e ngbanga ti nyen la aye tongaso ayeke si, nga ye so e lingbi ti sara na devant ti mara ti akpale tongaso.

ESKÊ NZAPA ALEKE AZO TI TENE ALA BÂ PASI?

Na ndo ti Nzapa, Bible atene: “Kusala ti Lo alingbi kue, lege ti Lo kue ayeke mbilimbili; Lo yeke Nzapa ti be-biani, Lo yeke na sioni oko pëpe, Lo yeke mbilimbili na nzoni-kue.” (Deutéronome 32:4). Tongana a yeke tongaso, eskê a yeke tâ na lege ni ti tene Nzapa, so ayeke “mbilimbili na nzoni-kue”, aleke azo ti tene ala bâ pasi wala ti tene lo punir ala na asioni ye?

Ên-ën, Bible atene na e, a tene: “Tongana mbeni zo ayeke na yâ ti tara, zia lo tene pëpe: ‘Nzapa si ayeke tara bê ti mbi so.’ Teti aye ti sioni alingbi ti tara bê ti Nzapa pëpe na lo wani lo yeke tara bê ti mbeni zo na aye tongaso pëpe.” (Jacques 1:13). Na yâ ti Bible, e manda so, na tongo nda ni, Nzapa asara lani azo nzoni mingi. Lo zia lani Adam na Ève na yâ ti mbeni pendere ndo, lo mû na ala aye kue so ala yeke na bezoin ni nga lo mû na ala nzoni kua ti sarango ni. Nzapa atene na ala, lo tene: “I dü amolenge mingi, i wu, i si singo na sese, i sara si ye kue aga na gbe gere ti i.” Adam na Ève ayeke lani na mbeni raison oko pëpe ti découragé na tere ti Nzapa.—Genèse 1:28.

Mawa ni ayeke so, laso duti ti azo ayeke nzoni oko ape. Depuis na yâ ti mbaï, kpale ti azo ahon ndo ni. Tënë so Bible atene so ayeke vrai, so atene: “Création kue angbâ gi ti dema legeoko na ti bâ pasi legeoko.” (aRomain 8:22). Me, nyen la apassé?

AZO AYEKE BÂ PASI NGBANGA TI NYEN?

Ti hinga ngbanga ti nyen la azo ayeke bâ pasi, a yeke nzoni e kiri na peko na ngoi so pasi ni akomanse. Lani, mbeni ange ti kpengba-li, so na pekoni a iri lo Satan Zabolo, apusu Adam na Ève ti ke ndia so Nzapa alu. Nzapa alu ndia ni na lege so lo tene na ala ti te pëpe “lê ti keke ti hinga nzoni na ti hinga sioni”. Zabolo atene lani na Ève so, tongana ala ke yanga ti Nzapa, ala yeke kui ape; lo ye ti fa so Nzapa ayeke zo ti mvene. Satan atene nga so Nzapa ayeke kanga lege na azo ti gbe ti lo ti hinga nzoni na sioni (Genèse 2:17; 3:1-6). Satan aye ti fa so azo alingbi ti duti nzoni, sân ti tene Nzapa akomande ala. Aye ni so kue asara si mbeni kota hunda abâ gigi: Eskê Nzapa la alingbi ti komande e azo?

Zabolo akiri abi mbeni tënë ni na sese. Lo tene so azo ayeke sara na Nzapa gi ndali ti intérêt. Na ndo ti Job, Zabolo atene na Nzapa, lo tene: “Mo sara gbagba na tere ti lo, na tere ti da ti lo, na tere ti ye ti lo kue, na mbage kue pëpe? . . . Me fadeso Mo ye tïtî Mo, Mo ndu ye ti lo kue, na fade lo zonga Mo na tâ lê ti Mo.” (Job 1:10, 11). Na lege ti atënë so Satan atene na ndo ti Job so, lo ye ti tene so azo kue ayeke sara na Nzapa gi ndali ti intérêt.

NZAPA ALEKE TËNË NI TONGANA NYEN?

Nzoni kode ti leke na akota tënë so, biaku biaku, ayeke so wa? Nzapa, so ndara ti lo ayeke kota mingi, ahinga nzoni kode ni; na tongana e hinga kode ni so, a yeke sara si e découragé na tere ti lo ape (aRomain 11:33). Lo décidé ti zia lege na azo ti komande tere ti ala, teti mbeni ngoi, na aye so ayeke si na pekoni la ayeke fa wala zo wa la komandema ti lo ayeke nzoni ahon ti mba ti lo.

 Dutingo ti azo na ndo ti dunia laso afa polele so komandema ti azo ayeke nzoni ape. Na ndo ti dunia kue, mbeni gouvernement oko tongaso ti ga na siriri, nzoni duti nga na ngia ayeke dä ape. Aye so ala yeke sara ayeke buba encore gi sese ni bubango. Ye so afa biani so tënë so Bible atene ayeke tâ tënë, so a tene: “A yeke na bê ti zo so atambela ti fa lege na gere ti lo nga pëpe.” (Jérémie 10:23). Gi komandema ti Nzapa la apeut ti ga na tâ siriri, ngia nga na nzoni duti na azo, ngbanga ti so a yeke ye so Nzapa aye ti sara la.—Ésaïe 45:18.

Me, Nzapa ayeke sara ande tongana nyen si ye so lo leke lani ndali ti azo aga tâ tënë? Girisa pëpe so Jésus afa lani na adisciple ti lo ti tene ala sambela, ala tene: “Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.” (Matthieu 6:10). Biani, na yâ ti kete ngoi, Nzapa, na lege ti Royaume ti lo, ayeke zi aye kue so ayeke sara si e bâ pasi (Daniel 2:44). Yere, kobela nga na kuâ ayeke ga ande gi angbene ye. Na ndo ti yere ni, Bible atene so fade Nzapa asö ande “zo so ye amanke lo mingi tongana lo toto na lo”. (Psaume 72:12-14). Ti kobela, Bible atene: “Fade wakodoro atene pëpe, Mbi yeke na kobela.” (Ésaïe 33:24). Même na ndo ti azo ti e so e ye ala mingi si akui, so Nzapa agirisa ala ape, Jésus atene: “Ngbonga ni ayeke ga so ala kue so ayeke na yâ ti asende [wala adû] ti kuâ ayeke mä ande go ti lo na ala yeke sigigi.” (Jean 5:28, 29). Azendo ni so ayeke tâ aye so azia ngia na bê ti zo biani!

Tongana e mä na bê na azendo ti Nzapa, a yeke aidé e ti hon ndo ti découragement kue so e lingbi ti wara na tere ti lo

LEGE TI HON NDO TI DÉCOURAGEMENT

Ngu 17 tongaso na peko ti accident ti lo, Sidnei, so e sara fade tënë ti lo na tongo nda ni, atene: “Lâ oko mbi bi tënë ti accident ti mbi ni na ndo ti Nzapa ape, me ti tâ tënë ni, lani na tongo nda ni, mbi découragé na tere ti lo. Teti angoi mingi, vundu asara mbi mingi, nga tongana mbi pensé na kpale ti seni ti mbi ni, mbi yeke toto. Me, grâce na Bible, mbi ga ti hinga so accident so mbi sara ayeke punition ti Nzapa pëpe. Bible atene: ‘Lâ na pasa [wala aye so zo aku tere ti lo na ni ape] asi na e kue.’ Sambela nga na dikongo ambeni versê la ayeke kpengba mbi na lege ti yingo nga ayeke aidé mbi ti duti na nzoni bango ndo.”—Zo-ti-fa-tene 9:11; Psaume 145:18; 2 aCorinthien 4:8, 9, 16.

Tongana e bata na li ti e araison so ndali ni Nzapa azia si azo ayeke bâ pasi, nga so lo ga nduru awe ti zi aye kue so ayeke sara si e bâ pasi, ayeke aidé e ti hon ndo ti découragement kue so e lingbi ti wara na tere ti Nzapa. Bible atene na e so Nzapa ayeke “zo ti futango azo so ayeke gi lo ngangu.” Zo kue so ayeke na mabe na Nzapa nga na Molenge ti lo alingbi ti wara vundu ande ape.—aHébreu 11:6; aRomain 10:11.

 

TI HINGA AMBENI TËNË

Ndani nyen ti manda Bible?

Bible ayeke mû maboko laso na azo kutu na kutu na yâ ti dunia kue ti wara akiringo tënë na angangu tënë so ala yeke hunda na yâ ti gigi ti ala. Mo nga kue mo ye ti duti na popo ti ala?