Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO SEPTEMBRE 2015

 KOTA MAMA-TENE NI | ATÉMOIN TI JÉHOVAH AYEKE AZO WA?

A-Témoin ti Jéhovah ayeke tongana nyen?

A-Témoin ti Jéhovah ayeke tongana nyen?

E yeke mbeni bungbi so ayeke na ndo ti dunia mobimba, me e sara beoko pëpe na atanga ti abungbi ti nzapa. Atâa so kota ndokua ti e aTémoin ti Jéhovah ayeke na États-Unis, mo yeke wara e na yâ ti akodoro mingi. Wungo ti e asi million miombe tongaso, nga e yeke manda Bible na azo na yâ ti akodoro ahon 230. E yeke sara kua ni so ndali ti so Jésus atene: “A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue.”—Matthieu 24:14.

Na ando so e yeke dä, e yeke sara kue ti kpe andia ti kodoro, me e yeke yôro tere ti e na yâ ti politique pëpe. E sara tongaso ngbanga ti so Jésus amû yanga na aChrétien ti duti “ti dunia so pëpe”. Ni la, e yeke yôro tere ti e pëpe na yâ ti aye kue so andu politique nga e yeke sara bira pëpe (Jean 15:19; 17:16). A yeke ndali ni la si lani na ngoi ti Use Bira so Amû Sese Kue, a bi aTémoin ti Jéhovah na da ti kanga nga a sara pasi na ala mingi ngbanga ti so ala ke ti yôro tere ti ala na yâ ti politique. Mbeni ngbene évêque ti kodoro ti Allemagne atene: “Na gbe ti Hitler, gi ala la a lingbi biani ti tene so ala ke ti sara kua ti turugu ndali ti tënë ti mabe ti ala.”

“[A-Témoin ti Jéhovah] ayeke na anzoni sarango ye mingi. E peut fade ti mû akota kua ti politique na mara ti azo tongaso, so ahinga ti pensé na amba ti ala, me mawa ni ayeke so ala peut ti yeda ti sara kua ni so lâ oko ape. . . . Ala ne akota zo ti kodoro, me ala mä na bê so gi Royaume ti Nzapa oko la apeut ti leke akpale ti azo kue.”—Mbeti-sango Nová Svoboda, République tchèque.

Me, e yeke sara kodoro na azo kue. Jésus asambela Nzapa ndali ti adisciple ti lo, lo tene: “Mbi hunda mo ti zi ala na yâ ti dunia so pëpe.” (Jean 17:15). Ni la na ndo so e yeke dä, mo yeke bâ e na sarango kua, na vongo aye nga na guengo na ekole.