Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO AOÛT 2015

 KOTA MAMA-TENE NI | TONGANA ZO AKUI NYEN LA AYEKE SI NA PEKONI?

Zingongo ti akuâ: Nyen la afa biani so a yeke duti ande dä?

Zingongo ti akuâ: Nyen la afa biani so a yeke duti ande dä?

Tongana mbeni zo apensé ti lo so a yeke zingo ande akuâ, a ye ti fa so hingango ndo la amanke lo? Bazengele Paul apensé ti lo tongaso ape. Lo tene: “Tongana a yeke gi na yâ ti fini so la si e yeke na beku na Christ, andâ e yeke azo so mawa ti e ahon ti tanga ti azo kue. Me, biani a zingo Christ na kuâ awe, na lo yeke kozo li ni ti azo so akui.” (1 aCorinthien 15:19, 20). Paul ahinga biani so a yeke zingo ande akuâ. Ye so amû lege na lo ti duti sûr na ni ayeke zingongo ti Jésus na kuâ (Kusala 17:31). * Ndali ni la Paul airi Jésus “kozo li ni”, so ti tene lo la lo yeke kozo zo so a zingo lo ti wara fini ti lakue lakue. Tongana a tene Jésus la ayeke kozo zo so a zingo lo na kuâ, a ye ti fa so na peko ti lo a yeke zingo nga ambeni zo.

Job atene na Nzapa: “Mo yeke ku kungo ti bâ kusala ti maboko ti mo.”Job 14:14, 15FD.

Mbeni raison so afa so zingongo ti akuâ ayeke duti ande dä ayeke so Jéhovah ayeke Nzapa ti tâ tënë. Bible atene: “Nzapa . . . alingbi ti tene mvene pëpe.” (Tite 1:2). Lâ oko Jéhovah atene mvene ape, nga lo yeke sara ande ni lâ oko ape. Lo mû zendo ti zingo akuâ, nga lo zingo lani ambeni zo ti fa so lo peut ti sara ni, mo pensé lo yeke sara ande ye alingbi na zendo ti lo ni ape? Lo yeke sara ni!

Ngbanga ti nyen la Jéhovah aleke ti zingo ande azo na kuâ? Ngbanga ti so lo ye ala. Job ahunda, a tene: “Tongana zo akui, fade lo kiri na fini mbeni?” Lo kiri lo tene: “Fade mo iri ndo, na mbi yeda. Mo yeke ku kungo ti bâ kusala ti maboko ti mo.” (Job 14:14, 15, FD). Job ahinga biani so Babâ ti lo ti yayu aye lo mingi nga lo yeke ku kungo ti zingo Job na kuâ. Me eskê Nzapa achangé? Lo wani lo tene: “Mbi, L’Éternel, Mbi changé pëpe.” (Malachie 3:6). Nzapa ayeke na kota nzara ti zingo akuâ, ti tene ala duti na nzoni seni nga na ngia. A yeke ye so ababâ na amama kue so agirisa amolenge ti ala aye la. Me nde na ababâ na amama, Nzapa ayeke ti lo na ngangu ti sara ye so lo ye ti sara.Psaume 135:6.

Kuâ ayeke mbeni kota kpale, me Nzapa ayeke na vrai yorö ni

Jéhovah ayeke mû ande ngangu na Molenge ti lo ti zi  kota vundu so ayeke na bê ti azo so agirisa azo ti ala, so ala ye ala mingi, na ti sara si ala kiri awara ngia teti lakue lakue. Me eskê tënë ti zingongo ti akuâ agbu nga bê ti Jésus? Lani, kozo ti tene lo zingo Lazare na kuâ, Jésus abâ vundu ti aita ti Lazare ni nga na ti akamarade ti lo, na lo nga kue lo “toto na ngu ti lê.” (Jean 11:35). Na mbeni ngoi ni nde, Jésus atingbi na mbeni womua ti kodoro ti Naïn, so agirisa oko molenge ti lo. Bible atene: “Mawa ti womua so asara [Jésus] na lo tene na lo: ‘Kaï toto ni.’” Gi na lê ni lê ni, lo zingo molenge ni (Luc 7:13). Ye so aye ti fa so tënë ti vundu so kuâ ayeke ga ka na ni nga na kuâ ni lo wani asara Jésus nzoni ape. Ni la, a yeke nzere ande mingi na Jésus ti bâ tongana nyen la azo ayeke duti na ngia mingi ahon ti tene ala duti na vundu.

Eskê mo girisa mbeni zo ti sewa ti mo lâ oko awe? Mo peut ti bâ so kuâ ayeke mbeni kpale so yorö ni ayeke dä ape. Me, hinga so yorö ni ayeke dä, a yeke so Nzapa ayeke mû ande ngangu na Molenge ti lo ti zingo akuâ. Hinga so Nzapa aye si mo kue mo ande tongana nyen la lo yeke sara ni. Lo ye si mo kue mo duti ande dä ti gbu na kate ti mo azo so mo ye ala mingi si a yeke zingo ala so. Tara ti bâ so mo na ala yeke duti ande ndo oko teti lakue lakue, na mbeni ye ti kangbi popo ti ala ayeke encore dä ape!

Lionel, so e sara fade tënë ti lo kozo, atene: “A si na mbeni ngoi, a sara na mbi tënë na ndo ti zingongo ti akuâ. Na tongo nda ni, a yeke lani ngangu na mbi ti yeda na ni, nga mbi yeke sûr na tënë ni so azo ni so atene na mbi so ape. Me, na ngoi so mbi tara ti gi ni na yâ ti Bible, mbi ga ti bâ so tënë ni so ayeke vrai. Mbi yeke ku kungo ti kiri ti bâ ande âta ti mbi.”

Mo ye ti hinga ye mingi na ndo ni? A-Témoin ti Jéhovah ayeke duti ande na ngia ti fa na mo na yâ ti Bible ti mo wani ngbanga ti nyen la ala hinga biani so a yeke zingo ande azo na kuâ. *

^ par. 3 Ti hinga tënë na ndo ti aye so afa atene a zingo Jésus lani na kuâ, bâ buku Bible: A Yeke Tene ti Nzapa Wala ti Azo? na lembeti 78-86, so aTémoin ti Jéhovah asigigi na ni.

^ par. 9chapitre 7 ti buku Bible afa nyen biani?, so aTémoin ti Jéhovah asigigi na ni.

TI HINGA AMBENI TËNË