Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO JUILLET 2015

Eskê e peut ti zia ngia na bê ti Nzapa?

Eskê e peut ti zia ngia na bê ti Nzapa?

A si na mo awe ti diko mbaï ti azo so a sara nzoni tënë ti ala na yâ ti Bible, na pekoni mo tene, ‘Mbi peut ti ga tongana ala ape’? Peut-être, mo tene: ‘Mbi yeke ti mbi mbilimbili ape, nga mbi peut lâ oko ti sara ye kue gi na lege ni ape.’

Job ayeke lani mbeni zo so ‘alingbi kue na lo yeke mbilimbili’. —Job 1:1

Bible atene so Job ‘alingbi kue na lo yeke mbilimbili’. (Job 1:1). A iri Lot “zo ti mbilimbili”. (2 Pierre 2:8). Nga, a tene David asara “gi ye so ayeke mbilimbili” na lê ti Nzapa (1 aGbia 14:8). Me, zia e bâ ambeni ye so asi na yâ ti fini ti ala. E yeke bâ ande so (1) ala nga kue asara lani afaute, (2) e lingbi ti manda aye mingi na lege ti tapande ti ala nga (3) e azo e lingbi biani ti zia ngia na bê ti Nzapa.

ALA SARA LANI AFAUTE

“[Nzapa azi] Lot so ayeke zo ti mbilimbili, lo so vundu asara lo mingi ndali ti asarango ye ti azo so ayeke buba ndia ti Nzapa si ayeke sara sioni ye na kamene pëpe.”—2 Pierre 2:7

Job abâ lani pasi mingi. Aye ti ngangu nde nde asi na lo na peko ti tere; na bango ni, a yeke na lege ni ape. Lo pensé ti lo so Nzapa ayeke gi nga pëpe ti hinga wala ni Job ni ngbâ na mabe na mbage ti Lo Nzapa ni wala pëpe (Job 9:20-22). Job ayeke tâ sûr so lo sara ye ti sioni oko ape, a sara si ambeni zo apensé so Job aye ti fa so lo yeke mbilimbili ahon Nzapa.—Job 32:1, 2; 35:1, 2.

Lot amû lani desizion hio ape, atâa so desizion ni ayeke ngangu ape. Vundu asara lo mingi ti bâ asioni sarango ye ti azo ti Sodome na Gomorrhe,  na même “âme ti lo so ayeke mbilimbili awu pono” ndali ti sarango ye ti azo ni so (2 Pierre 2:8). Nzapa afa na Lot so lo yeke futi asioni gbata so, nga lo yeke sö fini ti Lot na ti sewa ti lo. E peut ti pensé so Lot la ayeke duti fade kozo zo ti sigigi na yâ ti kodoro ni. Me, atâa so a hunda na lo ti yapu tere ti lo, lo ngbâ gi ti nguru. A-ange, so a tokua ala ti sö Lot na sewa ti lo, abâ gbä ala gbu maboko ti ala, asigigi na ala zê na yâ ti gbata ni.—Genèse 19:15, 16.

David atambela “na peko ti [Nzapa] na bê ti lo kue, na lo sara gi ye so ayeke mbilimbili na lê ti [Nzapa].”—1 aGbia 14:8

David asara lani mbeni ye so afa so lo hinga ti kanga nzara ti bê ti lo ape, lo sara lango-sioni na wali ti mbeni koli. Ti honde ndo ni, lo fâ koli ti wali ni (2 Samuel, chapitre 11). Bible atene so ye so David asara lani “ayeke sioni na lê ti L’Éternel.”—2 Samuel 11:27.

Job, Lot na David asara lani afaute, na ambeni faute ni ayeke lani kota mingi. Me, tongana ti so e yeke bâ ande, ala ye lani ti sara na Nzapa na bê ti ala kue. Ala fa so ala regretté aye so ala sara so, nga ala ye ti changé sarango ye ti ala. Ndali ni la si Nzapa abâ ala na nzoni lê, nga Bible atene so ala yeke akota wakua ti Nzapa.

E LINGBI TI MANDA NYEN DÄ?

Teti so e yeke azo, nyen na nyen, e yeke sara faute (aRomain 3:23). Me, tongana a si tongaso, a yeke nzoni e fa so e regretté afaute so e sara, nga na pekoni e sara ye kue so e peut ti sara ti tene e kiri e sara ye na lege ni.

Job, Lot nga na David asara ti ala lani tongana nyen? Ti Job, na bê ti lo, lo ye lani ti sara ye mbilimbili. Ni la, na peko ti so Nzapa asara tënë na lo, Job achangé sioni bango ndo ti lo nga lo regretté atënë so lo tene (Job 42:6). Ti Lot, fason so lo yeke bâ lani asioni sarango ye ti azo ti Sodome na Gomorrhe ague oko na andia ti Nzapa.  Me, kpale ti lo ayeke so lo hinga ti sara ye hio hio ape. Ye oko, lo sigigi na yâ ti asioni gbata so, nga lo wara ngbanga ti Nzapa ape. Na ngoi so lo yeke kpe, lo mä ndo, lo turnê lo bâ ndo na peko ti lo ape. Ti David, atâa so lo sara lani mbeni kota faute tongana lo sara ye ague nde na ndia ti Nzapa, ti fa tâ ye so ayeke na yâ ti bê ti lo, lo changé bê ti lo nga lo toto ti tene Nzapa abâ mawa ti lo.—Psaume 51.

Fason so Nzapa abâ na Job, Lot na David ague oko na ye so lo yeke ku na mbage ti e azo so e yeke na siokpari na tere ti e. Nzapa ahinga “tere ti e, Lo dabe Lo na lege so e yeke pupu-sese.” (Psaume 103:14). So Nzapa ahinga so nyen na nyen kue e yeke sara faute, nyen la lo yeke ku na mbage ti e?

Nzapa ahinga “tere ti e, Lo dabe Lo na lege so e yeke pupu-sese.”—Psaume 103:14

E AZO E LINGBI TI ZIA NGIA NA BÊ TI NZAPA TONGANA NYEN?

Wango so David amû lani na molenge ti lo, Salomon, afa na e kota ye so e lingbi ti sara ti zia ngia na bê ti Nzapa. Lo tene: “Mo, molenge ti mbi Salomon, a lingbi mo hinga Nzapa ti babâ ti mo, mo sara na Lo na bê ti mo kue.” (1 Chronique 28:9). “Bê” so lo sara tënë ni ge so ayeke mara ti bê wa? A yeke bê so aye Nzapa, na so aye ti hinga aye so bê ti Nzapa aye nga so aye gi ti sara ye alingbi na ni. A yeke pëpe bê so alingbi kue, me a yeke bê so aye biani ti mä yanga ti Nzapa nga a yeke nduru ti changé tongana a mû wango na lo. Teti so Job, Lot na David aye Nzapa nga ala ye biani ti mä yanga ti lo, ni la Nzapa abâ Job tongana zo so “alingbi kue”, lo bâ Lot tongana “zo ti mbilimbili” nga lo bâ David tongana zo so asara “gi ye so ayeke mbilimbili” na lê ti Lo. Atâa so ala sara faute, ala wara lege ti zia ngia na bê ti Nzapa.

Ti sara na Nzapa na bê kue aye ti tene ti gi ti hinga ye so bê ti Nzapa aye nga ti duti na kota nzara ti mä gi yanga ti lo

Ni la tongana asioni pensé aga na li ti e, e tene mbeni tënë so e ye fade ti tene ape, wala e sara mbeni ye so na pekoni e ga ti bâ so ayeke sioni, zia si e découragé ape, e sara ye tongana ti azo so e bâ tapande ti ala fade. Nzapa ahinga so, laso, a yeke ngangu na e ti sara ye kue tâ gi na lege ni. Me, lo yeke ku ti tene e ye lo nga e sara kue ti mä yanga ti lo. Tongana e sara na lo na bê ti e kue, e lingbi ti duti na confiance so e nga kue e lingbi ti zia ngia na bê ti Nzapa.

TI HINGA AMBENI TËNË