Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO JUILLET 2015

 KOTA MAMA-TENE NI | TONGANA NYEN TI HON NDO TI GINGO BÊ

Gingo bê na ndo ti nginza

Gingo bê na ndo ti nginza

Paul, so ayeke na wali nga na amolenge use, atene: “Na ngoi so ngere ti aye amontê na yâ ti kodoro ti e, kobe aga cher nga warango ni kue aga ngangu. E yeke kpo molongo teti al’heure mingi, me mingi ni akobe ni ayeke hunzi kozo ti tene a si na e. Azo angen sioni ndali ti nzara, na même ambeni ayeke tï na ndo ti lege. Ngere ti aye asi million, na pekoni milliard. Na nda ni, valeur ti nginza ti kodoro ti e atï kue. Mbi perdre nginza ti mbi na banque, assurance nga na pension ti mbi.”

Paul

Paul ahinga lani so, ti tene sewa ti lo angbâ na fini, a lingbi lo sara ye na “tâ ndara”. (aProverbe 3:21). Lo tene: “Mbi yeke zo ti lekengo wâ, me kua kue so mbi wara, mbi sara ni atâa a futa mbi alingbi na ni ape. Ambeni zo ni afuta mbi gi na kobe wala na aye so ala yeke na ni na da. Tongana a mû na mbi ngbongboro savon osio, mbi yeke bata use, na mbi kä tanga ni. A si na mbeni ngoi, mbi wara amolenge ti kondo 40. Na ngoi so ala kono, mbi kä ala, na mbi vo ambeni 300 tongaso. Na pekoni, mbi na ambeni zo e mä tere ti tene, tongana mbi mû na ala akondo 50, ala mû na mbi kilo 50 ti asac ti fuku ti nzö na place ni. Grâce na asac ti nzö so, sewa ti mbi nga na ambeni sewa nde awara ye ti tengo ni a ninga.”

Paul ahinga nga so kota ye ni ayeke ti sara confiance na Nzapa. Tongana e sara ye so Nzapa ahunda, lo yeke aidé e. Ti aye so e yeke na bezoin ni, Jésus atene: “Ala zia ti duti na bê so ayeke gi na nduzu, [ngbanga ti so] . . . Babâ ti ala so ayeke na yayu ahinga so ala yeke na bezoin ti aye so.”Luc 12:29-31.

Mawa ni ayeke so, Satan, so ayeke kota wato ti Nzapa, ague na azo mingi ti pensé gi na aye ti sese. Azo ayeke fâ tere ti ala ti wara aye so ala yeke na bezoin ni nga na ati so ala yeke nga même na vrai bezoin ni ape. Azo mingi amû bon, na ala bâ tongana nyen la “zo so amû bon ayeke ngbâa ti zo so asara na lo bon ni.”aProverbe 22:7FD.

 Ambeni zo ni amû asioni desizion. Paul atene: “Avoizin ti mbi mingi adö asewa ti ala nga na akamarade ti ala azia ti gue ti gi vrai kua na kodoro wande. Ambeni ague na afaux papier, na ala lingbi ti wara kua ape. Mingi ni, ala yeke honde tere ti ala ngbanga ti apolicier, na ala yeke lango gi na bê ti lege. Ala gi mungo maboko ti Nzapa ape. Me ti mbi na sewa ti mbi, e leke na bê ti e ti hunda na Nzapa ti mû maboko na e na yâ ti kpale ti nginza ni.”

SARA YE ALINGBI NA AWANGO TI JÉSUS

Paul akiri atene: “Jésus atene: ‘Ala gi bê ti ala lâ oko pëpe ngbanga ti kekereke, teti fade kekereke ayeke na agingo bê ti lo wani. Akpale ti lango oko oko alingbi na lango ni.’ Ni la, lango oko oko mbi yeke sambela gi ti tene Nzapa ‘amû na e kobe ti e ti lango ni’, tongaso si e ngbâ na fini; na lo sara na e tâ gi tongana ti so Jésus atene. A yeke lakue la si e wara ye so e ye ti te so ape. Mbeni lâ, mbi kpo molongo ti vo kobe, me mbi hinga kobe ni so a yeke kä so ape. Na ngoi so a si na mbi, mbi bâ so a yeke yaourt. Mbi ye ka yaourt ape. Me, teti so a yeke ye ti tengo, e nyon ni na bï ni so. Mbi kiri singila na Nzapa, so na yâ ti angoi so kue, sewa ti mbi alango nzara ape.” *

Nzapa amû zendo, lo tene: “Fade mbi yeke zia mo lâ oko pëpe nga mbi yeke girisa mo lâ oko pëpe.”—aHébreu 13:5

“Ti ndembe so, e yeke na kpale ti nginza mingi ape. Me, na lege ti aye so asi na e, e manda so kota yorö ti gingo bê ayeke ti sara confiance na Nzapa. Tongana e ngbâ lakue ti sara ye so Jéhovah * aye, lo yeke aidé e lakue. E bâ tongana nyen la tënë ti Psaume 34:9 so aga tâ tënë: ‘Tara L’Éternel, na fade mo bâ Lo yeke nzoni! Ngia ayeke na zo so akpe na Lo ti bata tere ti lo.’ Ye so asara si tongana e tingbi na kpale ti nginza, e yeke sara mbeto ape.”

Nzapa ayeke mû maboko na awakua ti lo so ayeke be-ta-zo na lo ti wara ‘kobe ti lango ni’

“Fadeso e hinga polele so, ye so azo ayeke na bezoin ni ti ngbâ na fini a yeke kua wala nginza ape, me kobe. E yeke ku kungo ti bâ ngoi so Nzapa amû zendo ni, lo tene: ‘Fade le-kobe ayeke mingi na sese.’ Me ti ku na ngoi ni so, ‘tongana e yeke na kobe, bongo na ndo ti lango, so alingbi na e awe.’ E wara ngangu na lege ti tënë ti Bible, so a tene: ‘Ala zia si ndoye ti nginza aduti na yâ ti sarango ye ti ala pëpe, me zia aye so ayeke dä alingbi na ala. Teti lo tene: “Fade mbi yeke zia mo lâ oko pëpe nga mbi yeke girisa mo lâ oko pëpe.” Tongaso zia e duti na mbeto oko pëpe na e tene: “Jéhovah ayeke zo ti mungo maboko na mbi; fade mbeto ayeke sara mbi pëpe.”’” *

Ti ‘tambela na Nzapa’ ahunda tâ mabe, mara ni so Paul na sewa ti lo ayeke na ni so (Genèse 6:9). Atâa e yeke laso na yâ ti kpale ti nginza wala e yeke tingbi na ni kekereke, e lingbi ti manda ye na lege ti tapande ti Paul so, so lo sara ye na mabe nga na tâ ndara.

Me ka tongana akpale ti sewa la ayeke ga na e gingo bê, e yeke sara tongana nyen?

^ par. 10 Jéhovah ayeke iri ti Nzapa na yâ ti Bible.