Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO JUILLET 2015

 BIBLE ACHANGÉ FINI TI AZO

Gigi ti mbi ayeke ga gi lani sioni sioni

Gigi ti mbi ayeke ga gi lani sioni sioni
  • A DÜ LO NA NGU: 1952

  • NA KODORO TI: ÉTATS-UNIS

  • LO YEKE ÂNDÖ: ZO SO ANINGA NA NGONZO APE

GIGI TI MBI ÂNDÖ:

Mbi kono na Los Angeles, Californie, na États-Unis, na mbeni ndo so abandit na azo ti nyongo mbangi asi singo dä. A dü e omene, na mbi yeke use molenge ni.

Mama ti mbi asara Eglize évangélique, na e kono na yâ ni. Me, tongana mbi kono awe, mbi sara lani double vie. Na adimanche mbi yeke he bia na yâ ti chorale ti eglize ni. Me, na asenge lango ni, mbi yeke gi na yâ ti amatanga, nyongo mbangi nga na gingo awali.

Mbi ninga lani na ngonzo ape. Ye kue so mbi wara, mbi yeke mû ni ti sara na sioni na zo. Aye so mbi manda lani na eglize a-aidé mbi kete ape. Mbi yeke tene lani, mbi tene “Futango kula ayeke ti Seigneur, na mbi la lo yeke sara kua na mbi ti futa na kula ni!” Na ngoi so mbi gue na lycée, na yâ ti angu 1960, mara ti abibe ti mbeni kama-poroso (Black Panthers) so ayeke tiri ndali ti adroit ti azo la mbi kue mbi yeke na ni. Ni la mbi lï na yâ ti mbeni bungbi so a-élève la azia ni na sese ti tiri ndali ti adroit ti azo. E sigigi na ndo ti lege fani mingi, na lakue so e sigigi, e yeke kanga yanga ti ekole teti mbeni ngoi.

Sigingo na ndo ti lege ni alingbi mbi ape. Tongaso, mbi komanse ti ke azo tënë ti mara ti ala. Na tapande, na mbeni ngoi mbi na akamarade ti mbi e bâ afilm so a fa tongana nyen la a sara pasi na azovuko so a gue na ala na ngbâa na États-Unis. Na bango aye ni so, ngonzo amû e, na e londo na tere ti amunzu so ayeke na yâ ti da ti film ni. Na pekoni, e sigigi e gue na yâ ti aquartier so amunzu ayeke dä ti tene e pika ala.

Na ngoi so mbi ga nduru ti wara ngu 20, mbi na aita ti mbi ti koli e sara aye ti ngangu na azo mingi. Ye so asara si e wara tënë na akota zo ti kodoro. Mbeni ita ti mbi ti koli ni ayeke lani na yâ ti mbeni sioni groupe ti abandit, na mbi nga kue mbi lï na popo ti ala. Ye so asara si gigi ti mbi ayeke ga gi lani sioni sioni.

LEGE SO BIBLE ACHANGÉ FINI TI MBI:

Babâ na mama ti mbeni kamarade ti mbi ayeke lani aTémoin ti Jéhovah. Mbeni lâ, ala tisa mbi ti gue na bungbi ti ala, na mbi yeda. Gi na kozo singo ti mbi so, mbi bâ tongana nyen la aTémoin ti Jéhovah ayeke ti ala nde. Zo kue ayeke na Bible nga ala yeke sara kua na ni na ngoi ti bungbi ni. Même amaseka afa tënë ti Nzapa na ngoi ti bungbi ni so! Bê ti mbi adö ti mä so iri ti Nzapa ayeke Jéhovah, nga ti bâ so a yeke di ni (Genèse 22:14). Azo so ayeke na yâ ti bungbi ni so, mara ti ala ayeke nde nde, me mo yeke bâ tâ polele so tënë ti mara ayeke na popo ti ala ape.

 Na tongo nda ni, mbi ye ti tene aTémoin ti Jéhovah amanda Bible na mbi ape, me mbi ye gi ti gue na abungbi ti ala. Na mbeni bï, na ngoi so mbi gue na bungbi ti aTémoin ti Jéhovah ni, ambeni kamarade ti mbi ague na mbeni concert. Kâ, ala pika mbeni maseka juska na kuâ, ndali ti so lo ke ti mû na ala ngangu veste ti lo. Na ndade ni, ala pika kate na ye so ala sara so. Na ngoi so a gue na ala na ngbanga, ala bâ atene ye ti ngia la ala sara so. Me, a dë ngbanga na li ti ala, na a tene mingi ti ala ayeke sara tanga ti gigi ti ala kue gi na da ti kanga. A nzere lani na mbi mingi so mbi yeke na popo ti ala na bï ni so ape so. Ge la mbi mû desizion ti changé fini ti mbi, na mbi komanse ti manda Bible.

Azo ake mbi lani mingi ndali ti mara ti mbi, me mbi bâ ambeni ye na popo ti aTémoin ti Jéhovah so asara si li ti mbi akpe. Na tapande, na ngoi so mbeni Témoin ti Jéhovah, so ayeke munzu, aye ti gue na kodoro wande, lo zia amolenge ti lo na mbeni sewa ti azovuko ti bâ lege ti ala. Nga, mbeni sewa ti amunzu ayeda ti mû na da ti ala mbeni maseka zovuko so ayeke na ndo ti lango ape. Mbi ga ti bâ biani so aTémoin ti Jéhovah ayeke sara ye alingbi na tënë ti Jésus so ayeke na Jean 13:35, so atene: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” Mbi bâ so mbi wara tâ sewa ti aita awe.

Na mandango Bible, mbi bâ so mbi doit ti changé pensé ti mbi. Mbi doit ti changé pensé ti mbi si mbi duti na bibe ti siriri, nga mbi bâ so a yeke nzoni ye so zo adoit ti sara na yâ ti gigi ti lo la (aRomain 12:2). Yeke na yeke, mbi gue na li ni. A si na janvier ti ngu 1974, mbi wara batême, mbi ga Témoin ti Jéhovah.

Mbi doit ti changé pensé ti mbi si mbi duti na bibe ti siriri, nga mbi bâ so a yeke nzoni ye so zo adoit ti sara na yâ ti gigi ti lo la

Me, même na peko ti batême ti mbi, a hunda ti tene mbi ngbâ ti tiri na bibe ti sarango ye na ngonzo. Na tapande, na mbeni ngoi so mbi ngbâ ti fa tënë ti Nzapa da na da, mbeni zo aga anzi radio ti yâ ti oto ti mbi, mbi ngbâ mbi tomba peko ti lo. Tongana mbi ga nduru ti gbu lo, lo bi radio ni na sese, lo kpe. Na ngoi so mbi fa na amba ti mbi ye so mbi sara ti mû radio ti mbi ni, mbeni ancien so ayeke na popo ti e ahunda mbi, lo tene, “Stephen, ka tongana fade mo gbu lo, mo yeke sara nyen na lo?” Hunda ti lo ni asara si mbi kiri mbi gbu li ti mbi, nga a pusu mbi ti ngbâ lakue ti gi siriri.

Na octobre ti ngu 1974, mbi komanse ti sara kua ti ngoi kue, so ti tene nze na nze, mbi yeke mû l’heure 100 ti fa tënë ti Nzapa na azo. Na pekoni, mbi wara pasa ti sara kua tongana volontaire na kota ndokua ti aTémoin ti Jéhovah, so ayeke na Brooklyn, na New York. Na ngu 1978, mbi kiri na Los Angeles ti bâ lege ti mama ti mbi so tere ti lo ason. Ngu use na pekoni, mbi sara mariage na wali ti mbi, Aarhonda. Lo aidé mbi mingi ti bâ lege ti Mama juska na kuâ ti lo. A si na mbeni ngoi, a tisa mbi na Aarhonda na Ekole ti Galaad ti Mandango Bible ti Société Watchtower, na pekoni a tokua e, tongana amissionnaire, na Panama, na e ngbâ ti sara kua kâ juska laso.

Depuis so mbi wara batême, mbi tingbi na aye mingi so alingbi fade ti sara si mbi sara ye na ngangu. Mbi manda ti kiri tënë pëpe na azo so ayeke gi yanga ti mbi wala ti sara si tënë ni akaï na mbeni lege nde. Azo mingi, même wali ti mbi, agonda mbi na fason so mbi leke na atënë ni so. Même mbi kue mbi croire ape! Me, mbi he bia ti achangement so mbi sara so ape. Mbi hinga mbi tene, so ayeke ngangu so Bible ayeke na ni ti changé fini ti azo la.—aHébreu 4:12.

NZONI YE SO MBI WARA NA PEKONI:

Grâce na Bible, mbi hinga ndani so mbi yeke na fini, nga mbi hinga tongana nyen ti duti na siriri na azo. Mbi yeke pika azo encore ape; me, mbi yeke mû maboko na ala ti tene ala hinga tënë ti Nzapa. Mbi manda même Bible na mbeni ngbene wato ti mbi ti lycée! Na peko ti batême ti lo, mbi na lo e lango chambre oko teti mbeni ngoi. Depuis na lango ni so, e ga akota kamarade. Juska laso, mbi na wali ti mbi e mû maboko na azo ahon 80, na ala ga aTémoin ti Jéhovah.

Merci mingi na Jéhovah so lo sara si mbi hinga ndani so mbi yeke na fini nga mbi duti na ngia na yâ ti tâ sewa ti aita.