Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO MAI 2015

 KOTA MAMA-TENE NI

Ngoi ti nda ni aga nduru awe?

Ngoi ti nda ni aga nduru awe?

Nzapa ayeke zia ande si azo angbâ ti komande na ndo ti amba ti ala nga ti buba kekereke ti azo kue? Ên-ën. Tongana ti so e bâ fade, Nzapa ayeke kaï nga lo yeke zi ande yere nga na pasi so azo asara na amba ti ala depuis so. Nzapa, lo so asara azo nga na sese, aye si mo hinga so lango so lo ga ti sara na aye ni so apusu nduru awe. Tongana nyen la lo fa ni na e?

Bâ tapande so: Tongana mo yeke sara voyage na oto, peut-être mo yeke sara kua kozoni na Internet, acarte nga na ambeni mbeti nde ti fa na mo ye na ndo ti lege so mo ye ti mû ni. Na peko ti so mo si na ando so mo bâ ni na lê ti carte ni na mo hinga so a yeke ni la, mo yeke wara confiance so mo ga nduru ti si na ndo so mo ye ti gue dä so awe. Legeoko nga, Nzapa amû na e Bible si afa na e aye so ayeke si ande na yâ ti dunia kue, so azo ayeke bâ ni polele. Na ngoi so e yeke bâ aye ni so, e yeke duti ande sûr so e yeke na ngoi so aga kozo na ngoi ti nda ni.

Bible asara tënë ti ambeni kota ye so ayeke si ande na yâ ti mbaï ti azo kozoni si ngoi ti nda ni aga. Na ngoi ni so, e yeke bâ ande akota ye nde nde so ayeke si na ndo ti dunia kue, na so mara ni ade ti si lâ oko ape na yâ ti mbaï ti azo. Zia e bâ ambeni ye ni so Bible asara tënë ni.

1. AWUSUWUSU NA YÂ TI DUNIA: Prophétie so e wara na Matthieu chapitre 24 afa na e ambeni molongo ti aye so ayeke si ande na ndo ti sese. Aye ni so la ayeke mû lege na azo ti hinga “ngoi so aye ti ngoi so ayeke gue ti hunzi” na so ayeke gue juska ti si na ngoi so “nda ni ayeke ga.” (Versê 2, 14). Na popo ti aye ni so, e yeke wara akota bira, akota nzara, yengingo ti sese so ayeke si na ambeni ndo na peko ti tere, kpengo ndia pëpe so ayeke wu mingi, ndoye so ayeke dä mingi ape nga akota zo ti nzapa so ayeke handa azo (Versê 6-26). A yeke tâ tënë so, a sara angu ngbangbo mingi awe la amara ti aye ni so ayeke si. Me, tongana ngoi ti nda ni ayeke pusu nduru, aye ni so kue ayeke si na oko ngoi. Ambeni ye ota tongaso ayeke si nga legeoko na aye ni so.

2. ASARANGO YE TI TERE TI AZO: Bible atene so “alango ti nda ni”, so ayeke mbeni ngoi so aga kozo na ngoi ti nda ni, ayeke duti mbeni ngoi so, na yâ ni, sarango ye ti tere ti gbâ ti azo ayeke buba mingi. A tene: “Azo ayeke duti ande azo so andoye gi tere ti ala wani, azo so andoye nginza, azo so abâ tere ti ala kota na ndo ti amba ti ala, azo ti baba, azo ti zongango ndo, azo so ake yanga ti ababâ na amama ti ala, azo so ahinga ti kiri singila pëpe, azo so ayeke abe-ta-zo pëpe, azo so aye amba ti ala zo pëpe, azo so aye oko pëpe ti mä tere na amba ti ala, azo ti pango amba ti ala, azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, azo ti kango amba ti ala, azo so li ti ala akpengba, azo so wuma ti ala ahon ndo ni, azo so andoye angia ahon ti ndoye Nzapa.” (2 Timothée 3:1-4). Tâ tënë, kpengbango-li ti azo ayeke fini ye ape. Me a yeke gi na “alango ti nda ni” la mara ti sarango ye ni so ayeke kiri ti ga sioni mingi. Ye so asara si a iri angoi ni so “angoi ti akpale so ayeke ngangu na zo ti kanga bê na yâ ni”. Eskê mo kue mo bâ mara ti asioni ye so na yâ ti sarango ye ti tere ti azo?

3. AZO AYEKE BUBA SESE: Bible atene so fade Nzapa ayeke futi “azo so ayeke buba sese.” (Apocalypse 11:18). Azo ayeke buba sese ni tongana nyen? A fa lani ngoi ti Noé tongaso: “Sese so afuti na gbele Nzapa; sese so asi na sioye ti ngangu. Nzapa abâ sese ni, bâ, a futi.” Na ndo ti azo ti sioni so, Nzapa atene: “Fade Mbi futi ala.” (Genèse 6:11-13). Eskê mo kue mo bâ so dunia ti laso asi singo na sarango ye ti ngangu na azo? Na ndo ni, azo asi na mbeni ndo so lâ oko ade a si dä ape: Ala yeke na ngangu ti buba sese na fango azo kue na ndo ni, ngbanga ti so ala yeke na aye ti bira na maboko ti ala. Me ala yeke buba nga sese na ambeni lege nde. Aye so ayeke bata aye kue so ayeke na fini na ndo ti sese, na tapande pupu so e yeke wu, anyama, akeke nga na akota ngu-ingo, ayeke buba yeke yeke ngbanga ti so azo asara kua na ni nzoni ape.

 Hunda tere ti mo: ‘Eskê na yâ ti ngu ngbangbo oko so ahon, azo ayeke lani na ngangu ti buba aye kue kue kue na ndo ti sese?’ Me laso, ala wara ngangu ni so na lege so ala wara gbâ ti afini kota ye ti bira nga ala yeke buba aye so angoro e. Na bango ni, maïngo ti kode ti sigingo na afini ye ague na li ni na loro mingi; a sara si azo alingbi ti comprendre ni ape nga ala lingbi pëpe ti hinga akpale so ayeke ga na pekoni. Me, azo la adoit ti mû desizion na ndo ti kekereke ti sese ape. Kozo ti tene azo abuba ye kue na ndo ti sese, Nzapa ayeke ga ti futi ala kue. A yeke zendo so lo mû la!

4. A YEKE FA TËNË NA NDO TI SESE KUE: Mbeni ye so afa atene ngoi ti nda ni aga nduru awe ayeke so, a fa kozo awe so fade a yeke sara mbeni kota kua so ade a sara mara ni lâ oko ape. A tene: “A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.” (Matthieu 24:14). Kapa ti fango tënë so ayeke duti nde mingi na ati so gbâ ti abungbi ti Nzapa ayeke sara teti angu ngbangbo mingi awe. Na yâ ti alango ti nda ni, mbeni sango so ayeke nde mingi la ayeke mû ande ndo kue: a yeke “nzoni tënë ti royaume”. Eskê mo hinga mbeni bungbi ti Nzapa so afa sango ni so mingi na azo? Na même si ambeni zo ayeke sara ni, eskê ala yeke fa ni gi na ndo so ala yeke dä awe, wala ala yeke fa nzoni tënë ni so “na ndo ti sese kue so azo ayeke dä tongana mbeni tënë ti témoin ndali ti amara kue”?

A yeke fa tënë ti Royaume ti Nzapa na ndo ti dunia kue na ayanga ti kodoro ngbangbo mingi

Site Internet www.jw.org ayeke sara tënë mingi na ndo ti “nzoni tënë ti royaume so”. Mingi ti aye so ayeke na ndo ti site so ayeke ambeti so azi nda ti sango so na ayanga ti kodoro ahon 700 tongaso. Eskê mo hinga ambeni zo nde so amû bê ti ala kue ti fa nzoni tënë ti Royaume na azo kue na mara ti wungo ti ayanga ti kodoro tongaso? Kozo si Internet abâ gigi, a hinga aTémoin ti Jéhovah tongana azo so ayeke sara ngangu kue ti fa nzoni tënë ti Royaume ti Nzapa na azo kue. Depuis 1939 la a zia na ndo ti Tour ti Ba ndo oko oko atënë so: “Afa Tene ti Royaume ti Jéhovah.” Mbeni buku so asara tënë na ndo ti abungbi ti Nzapa atene so, kua ti fango tënë so aTémoin ti Jéhovah ayeke sara ni so ayeke mbeni ye so ade a sara ni mingi nga na ando mingi tongana ti so ala sara so ape. So a yeke fa tënë mingi tongaso, a ye ti fa so Royaume ti Nzapa aga nduru awe ti sara si ‘nda ni aga.’

MBENI NGOI SO AYEKE NDE MINGI NA YÂ TI MBAÏ TI AZO

Mo kue mo bâ so aye osio so Bible asara tënë ni, na so e fa peko ni na yâ ti article so, ayeke si biani na ngoi ti e ti laso? Ahon ngu ngbangbo oko tongaso awe la Tour ti Ba Ndo ayeke fa asango so andu aye so  ayeke si na yâ ti dunia so, ti mû maboko na azo so ayeke diko ni ti tene ala wani abâ so e yeke nduru na ngoi ti nda ni. Me, ambeni zo ti dengo kite ake ni, ala tene so aye ni nga na atondo ni so ayeke gi abango ndo ti ambeni zo la nga ayeke gi atënë ti mvene la. Ala tene nga so, teti so kode so azo ayeke kangbi na asango na popo ti ala angbâ ti gue na li ni, a sara si mo bâ mo tene aye so ayeke si na yâ ti dunia ayeke ga gi sioni ahon ti kozo. Me atâa so kue, aye mingi so ayeke si afa biani so ngoi ti e, so ayeke ti lo nde mingi na yâ ti mbaï ti azo, aga nduru ti hunzi awe.

Ambeni wandara abâ so e ga nduru ti bâ ambeni kota changement na ndo ti sese so awe. Na tapande, na ngu 2014, mbeni mbeti-sango (The Bulletin of the Atomic Scientists) agboto mê ti azo ti Bendo ti Gigi na ndo ti akota kpale so alingbi ti si so apeut ti ndu fini ti azo. Awandara so afa atene: “Gbungo li na ndo ti aye ni so apusu e ti tene so, mbeni lâ aye so azo asigigi na ni na lege ti senda-ye alingbi ti kiri ti sara sioni na ala.” Wungo ti azo so abâ so e yeke na mbeni ngoi so ayeke nde mingi na yâ ti mbaï ti azo ayeke gue gi na li ni. Azo so asigigi na Tour ti Ba ndo so nga na ambeni zo so ayeke diko ka ni ayeke na kite oko ape so e yeke na alango ti nda ni nga ngoi ti nda ni aga nduru awe. Me ahon ti sara mbeto ti aye so ayeke si ande, mo lingbi ti duti na ngia ndali ti aye so ayeke ga ande na pekoni. Ngbanga ti nyen? Ngbanga ti so mo lingbi ti sö kuâ na ngoi ti nda ni!