Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO AVRIL 2015

 LISORO NA MBENI ZO

Ngbanga ti nyen a yeke nzoni ti dabe na kuâ ti Jésus?

Ngbanga ti nyen a yeke nzoni ti dabe na kuâ ti Jésus?

Atënë so na gbe ni ge afa lisoro so mbeni Témoin ti Jéhovah alingbi ti sara na mbeni zo. Na tapande, mbeni Témoin ti Jéhovah, so e yeke iri lo Megan, ayeke fa tënë na mbeni wali so e yeke iri lo Shirley.

“ALA NGBÂ TI SARA YE SO TI DABE TI ALA NA MBI”

Megan: Bara mo, Shirley. A nzere na mbi ti bâ mo lani na Matanga ti dango bê na kuâ ti Jésus Christ so e sara na yenga so ahon so. * Mo bâ bungbi ni lani tongana nyen?

Shirley: Bungbi ni anzere na mbi lani, me ti honde na mo ape, atënë kue so a tene ni lani kâ so, mbi comprendre ye oko dä ape. Mbi yeke mä ka so azo ayeke sara matanga ti dungo Jésus na ngoi ti Noël, na matanga ti zingongo ti lo na kuâ na ngoi ti Pâques, me ti mbi mango ti tene a sara matanga ti kuâ ti Jésus la.

Megan: Tâ tënë, Noël na Pâques ayeke amatanga so azo ayeke sara ni na ndo ti dunia kue. Me, aTémoin ti Jéhovah abâ so a yeke kota ye ti tene ala dabe ti ala na kuâ ti Jésus. Tongana mo yeke na kete ngoi, mbi yeke fa na mo araison so apusu e ti sara tongaso.

Shirley: Nzoni, mbi yeke na kete ngoi.

Megan: Na nduru tënë, aTémoin ti Jéhovah ayeke sara matanga ti kuâ ti Jésus ngbanga ti so Jésus ni wani la ahunda na adisciple ti lo ti sara ni. Zia e bâ ambeni ye so asi lani na bï so aga kozoni na kuâ ti Jésus. Mo mä tënë na ndo ti mbeni kobe so ayeke nde mingi, so lo na adisciple ti lo ate ni lani?

Shirley: Mo ye ti sara tënë ti Sainte cène la?

Megan: Tâ gi ni la. A yeke iri ni nga Kobe ti Seigneur. Lani na ngoi ti tengo kobe ni so, Jésus afa ambeni ye polele na adisciple ti lo. Mo ye ti diko tënë so lo tene ge na Luc 22:19 so?

Shirley: Nzoni. A tene: “Nga, lo mû mbeni mapa, lo kiri singila na Nzapa, lo kungbi yâ ni na lo mû ni na ala, lo tene: ‘So ayeke fä ti tere ti mbi so a yeke mû ni ndali ti ala. Ala ngbâ ti sara ye so ti dabe ti ala na mbi.’”

Megan: Merci. Mo bâ Jésus atene na hunzingo ni, a tene: “Ala ngbâ ti sara ye so ti dabe ti ala na mbi.” Nga, kozo ti tene Jésus ahunda na adisciple ti lo ti dabe ti ala na lo, lo fa na ala polele ndani so a yeke nzoni ala dabe ti ala na lo ni. Lo tene so lo yeke mû fini ti lo ndali ti adisciple ti lo. Tënë ti lo ni ague oko na ye so e yeke wara na Matthieu 20:28. Versê ni atene: ‘Molenge ti zo aga ti tene azo asara kua na lo pëpe, me lo ga ti sara kua na azo na ti mû âme ti lo tongana ngere so a futa ti zi na azo mingi.’ Bâ ndani so na yâ ti ngu oko oko, e aTémoin ti Jéhovah e yeke sara mbeni bungbi ti dabe ti e na kua ti Jésus la. E ye ti dabe ti e na fini ti lo so lo mû lani na sandaga. Grâce na kuâ ti Jésus ni so, azo kue so amä yanga ti Nzapa alingbi ande ti wara fini.

NGBANGA TI NYEN A BEZOIN TI FUTA MBENI NGERE?

Shirley: Mbi yeke mä azo ayeke tene so Jésus akui ti mû lege na e ti wara fini. Me ti honde na mo ape, mbi mä ka yâ ti tënë so nzoni ape.

Megan: A yeke mo oko ape, Shirley. Tënë ti sandaga ti Jésus so alï mingi. Me, a yeke nga mbeni oko ti apendere tâ tënë so ayeke na yâ ti Mbeti ti Nzapa. Mbi hinga ape, wala mo yeke encore na mbeni kete ngoi?

 Shirley: En, mbi yeke encore na kete ngoi.

Megan: Nzoni. Mbi diko fade mbeni ye na ndo ti tënë ti sandaga ti Jésus ni, na mbi yeke tara ti zi ndani na mo na mbeni lege so akpengba ape.

Shirley: Nzoni.

Megan: Ti mû lege na e ti mä yâ ti tënë ti kota ngere ni so nzoni, a lingbi e hinga tënë nzoni na ndo ti dutingo so Adam na Ève azia lani azo na yâ ni na peko ti so ala sara siokpari na yaka ti Éden. Ti mä yâ ti aye ni, zia e diko aRomain 6:23. Mo peut ti diko ni?

Shirley: Nzoni. Versê ni atene: “Futa ti peko ti siokpari ayeke kuâ, me matabisi so Nzapa amû ayeke fini ti lakue lakue na lege ti Christ Jésus Seigneur ti e.”

Megan: Merci. Zia e hasa yâ ti atënë ni so nzoni si. Kozoni kue, bâ tongana nyen la versê ni ato nda ni. A tene: “Futa ti peko ti siokpari ayeke kuâ.” A yeke mbeni ndia so Nzapa azia na sese na tongo nda ti mbaï ti azo, a tene futa, wala ye ti peko ti siokpari ayeke kuâ. Tâ tënë, lani na tongo nda ni, zo oko ayeke na siokpari na tere ti lo ape. Nzapa aleke lani Adam na Ève na siokpari na tere ti ala ape, na amolenge so ala yeke dü lani adoit fade ti duti nga na siokpari na tere ti ala ape. Tongaso, mbeni raison ti tene azo akui ayeke lani dä ape. Adam na Ève nga na amolenge ti ala ayeke lani na beku ti ngbâ na fini lakue lakue. Me tongana ti so e hinga, aye ni apasêe tongaso ape, ni la ape?

Shirley: Ni la. Adam na Ève ate lani lê ti keke so a ke na ala ti te ni so.

Megan: A yeke tongaso. Na ngoi so Adam na Ève ate lê ti keke ni so, so ti tene na ngoi so ala soro ti ke yanga ti Nzapa, ala sara siokpari la. Ala soro ti ga azo so siokpari ayeke na tere ti ala. Ye so ala soro so aga na ala akota kpale mingi na pekoni, me na amolenge ti ala nga.

Shirley: Mbi comprendre ni nzoni ape.

Megan: Ok. Peut-être mbi yeke mû na mo mbeni tapande. Mo yeke zö ka mapa?

Shirley: En, a yeke mbeni ye so mbi ye ni mingi.

Megan: Tara ti bâ so mo wara mbeni pendere fini ye ti zongo na mapa. Me kozo ti tene mo komanse ti sara kua na ni, a tï na sese, na a ba mingi. Fadeso, tongana mo ga ti zö mapa na yâ ni, nyen la ayeke si na amapa ni oko na oko kue? Amapa ni ayeke ba ape?

Shirley: En, ala kue ayeke ba.

Megan: Legeoko nga, na ngoi so Adam na Ève asoro ti ke yanga ti Nzapa, siokpari asara si ala “ba”, wala a zia mbeni tache na tere ti ala. Nga, teti so ala wara siokpari na tere ti ala kozo ti tene ala dü amolenge, na ngoi so ala ga ti dü amolenge, siokpari ni asara nga si amolenge ti ala kue “aba”. A dü ala kue na yâ ti siokpari. Na yâ ti Bible, tënë “siokpari” aye pëpe ti sara gi tënë ti mbeni sioni ye so e sara, me a ye nga ti sara tënë ti dutingo so a dü e na yâ ni. Ye ti pekoni ayeke so, atâa so mbi na mo e sara mbeni sioni ye oko ape, na ngoi so Adam na Ève asara lani siokpari, ala mû na e nga na amolenge ti yâ ti ala kue, nga na ala ti ti e kue, mbeni fini so siokpari ayeke na yâ ni, so ayeke hunzi gi na kuâ. Ni la, tongana ti so e diko fade na aRomain 6:23, futa ti peko ti siokpari ayeke kuâ.

Shirley: Na bango ni, a yeke na lege ni ape ti tene azo kue abâ pasi ndali ti siokpari so Adam na Ève asara.

Megan: Mo yeke na raison, na bango ni, a yeke na lege ni ape. Me tënë ni ayeke gi so ape. Teti so Nzapa ayeke mbilimbili, lo tene so Adam na Ève ayeke kui ndali ti siokpari so ala sara. Me, lo yeke zia e amolenge ti yâ ti ala tongaso ape, lo mû na e mbeni beku. Nzapa aleke mbeni ye, so na lege ni e lingbi ti sigigi na yâ ti sioni dutingo so e yeke na yâ ni so. A yeke ge la si tënë ti sandaga ti Jésus abâ gigi. Zia e kiri e bâ encore aRomain 6:23. Na peko ti so versê ni atene “futa ti peko ti siokpari ayeke kuâ,” a kiri a tene encore: “Me matabisi so Nzapa amû ayeke fini ti lakue lakue na lege ti Christ Jésus Seigneur ti e.” Tongaso, a yeke kuâ ti Jésus la ayeke zi lege na e ti sigigi na gbe ti siokpari nga na kuâ. *

 NGERE SO NZAPA AFUTA TI ZI NA E: TÂ KOTA CADEAU SO AHON ATANGA NI KUE

Megan: Mbeni tënë ayeke na yâ ti versê so, so mbi ye ti gboto lê ti mo na ndo ni.

Shirley: Tënë wa?

Megan: Mo bâ versê ni atene: “Matabisi so Nzapa amû ayeke fini ti lakue lakue na lege ti Christ Jésus Seigneur ti e.” Bon, tongana Jésus la ayeke zo so abâ pasi lani nga akui ndali ti e, lo mû fini ti lo ndali ti e, me ka ngbanga ti nyen la a tene ngere so a futa ti zi e so ayeke “matabisi so Nzapa amû”, me pëpe “matabisi so Jésus amû”? *

Shirley: Hmm. Mbi hinga ape.

Megan: Nzoni. Mo bâ, Nzapa la aleke lani Adam na Ève, na ngoi so ala ke yanga ti lo na yâ ti yaka ti Éden, a yeke gi lo oko la ala sara siokpari so na tere ti lo. Na ngoi so akozo molenge ti lo so ayeke na sese ge asara kpengbango-li na tere ti lo, vundu adoit ti gbu lo lani mingi. Me, gi na lê ni lê ni, Jéhovah aleke mbeni ye ndali ni. * Lo leke ti tene mbeni créature ti lo ti yingo aga na sese ge tongana zo so siokpari ayeke na tere ti lo ape, na ti tene na nda ni lo mû fini ti lo na sandaga. Tongaso, ti tâ tënë ni, aye kue so a leke ndali ti ngere so a futa ti zi na azo, a yeke lani mbeni matabisi so Nzapa la amû ni. Me, mbeni ye ni nde ayeke nga dä so afa so ngere so a futa ti zi na azo ayeke mbeni matabisi so Nzapa la amû. Mo pensé lâ oko awe na ndo ti ye so kuâ ti Jésus asara lani na ndo ti Nzapa?

Shirley: Ên-ën, ade mbi pensé na ni lâ oko ape.

Megan: Mbi bâ ambeni jouet ge na yâ ti lacour so. Mbi pensé mo yeke na amolenge.

Shirley: En, mbi yeke na ala use: koli oko na wali oko.

Megan: So mo yeke mama, tara ti gbu li ti mo kete na ndo ti ye so asi lani na Jéhovah Nzapa, so ayeke Babâ ti Jésus, na lango so Jésus akui lani. Mbi ye ti tene so, na ngoi so lani lo duti na yayu kâ si lo yeke bâ tongana nyen la a yeke gbu Molenge ti lo, a yeke he lo nga a yeke boxé lo, mo pensé a sara nyen na ndo ti Babâ ni? Nga, na ngoi so a kanga Molenge ti lo na nduzu na keke, nga si a zia lo kâ ti tene lo bâ pasi ngbii si lo ga ti kui so, mo pensé a sara nyen na ndo ti Babâ ni?

Shirley: Vundu adoit ti gbu lo lani mingi. Mbi pensé na so lâ oko ape dê!

Megan: Tâ tënë, a yeke ngangu na e ti fa tâ mbilimbili ye so ayeke lani na yâ ti bê ti Nzapa na lango ni so. Me, e hinga so lo nga kue vundu ayeke gbu ka lo, na e hinga ndani so lo zia si aye ni so kue asi lani tongaso. A fa ni na e pendere mingi na yâ ti mbeni versê so azo mingi ahinga ni, so a yeke na Jean 3:16. Mo ye ti diko ni?

Shirley: En, a tene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.”

Ngere so a futa ti zi na azo ayeke kota ndoye so ahon atanga ni kue

Megan: Merci. Zia e kiri e bâ tongo nda ti versê ni so. A tene: ‘Nzapa andoye azo ti dunia so.’ Kota tënë ni la: ndoye. Ndoye la apusu lani Nzapa ti tokua Molenge ti lo na sese ge ti kui ndali ti e. Biani, ngere so a futa ti zi na azo ayeke kota ndoye so ahon atanga ni kue. A yeke ndali ni la si aTémoin ti Jéhovah ayeke sara ka mbeni bungbi ngu oko oko, na lango ti kuâ ti Jésus, ti dabe ti ala na kuâ ti lo ni so. Lisoro ni amû maboko na mo?

Shirley: En, a mû maboko na mbi. Merci so mo mû ngoi ti mo ti zi na mbi nda ti tënë ni so.

Mbeni tënë ti yâ ti Bible ayeke dä so agbu bê ti mo na so mo ye ti hinga ndani? Mo ye ti hinga ye na ndo ti mbeni ye so aTémoin ti Jéhovah amä na bê dä wala so ala yeke sara ni? Tongana a yeke tongaso, hunda tënë ni na aTémoin ti Jéhovah. A yeke nzere ande na ala ti sara lisoro na mo na ndo ni.

^ par. 5 Ngu oko oko, aTémoin ti Jéhovah ayeke sara ka mbeni bungbi na lango ti kuâ ti Jésus, ti dabe ti ala na sandaga so lo mû lani. Na ngu so, matanga ni atï na vendredi lango 3 ti avril.

^ par. 32 Ti peko, mara ti lisoro ni so ayeke sara tënë na ndo ti tongana nyen la sandaga ti Jésus ayeke zi e na gbe ti siokpari, nga a yeke fa na e ye so e doit ti sara ti bâ nzoni na lege ti sandaga so.

^ par. 36 Na yâ ti Bible, Nzapa na Jésus ayeke azo use so ayeke nde nde. Ni la, tongana mo ye ti hinga tënë mingi na ndo ni, bâ chapitre 4 ti buku Bible afa nyen biani?, so aTémoin ti Jéhovah asigigi na ni.

^ par. 38Genèse 3:15.

TI HINGA AMBENI TËNË

Ngbanga ti nyen la Jésus abâ pasi na lo kui?

Kuâ ti lo alingbi ti ga na mo ye ti nzoni tongana nyen?