Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO AVRIL 2015

 BIBLE ACHANGÉ FINI TI AZO

Ahundango ndo ota achangé lani gigi ti mbi

Ahundango ndo ota achangé lani gigi ti mbi
  • A DÜ LO NA NGU 1949

  • NA KODORO TI ÉTATS-UNIS

  • LO YEKE ÂNDÖ ZO SO AYEKE GI TI HINGA NDA TI GIGI TI ZO

GIGI TI MBI ÂNDÖ:

Mbi kono na Ancram, mbeni kete gbata ti New York, na États-Unis. Aferme ti gbotongo ngu ti me ti abagara la ahon ndo ni na yâ ti gbata ni. Ni la, na yâ ti gbata ni, awali-bagara la ayeke mingi ahon azo.

Sewa ti e ayeke gue lani gi na eglize oko so ayeke na yâ ti gbata ni so. Lakue na Dimanche na ndapre, âta-koli ayeke ciré poro ti mbi, nga na pekoni, mbi yeke leke tere ti mbi ti gue na Ekole ti dimanche na kete vuru Bible so âta-wali amû lani na mbi. Mbi yeke na angambe use, oko ayeke koli nga oko ayeke wali. A fa na e ti sara kua ngangu, ti kpe azo nga ti mû maboko na ala. Nga, a fa na e ti tene tongana a mû na e mbeni ye, e tene merci.

Na ngoi so mbi kono, mbi quitté sewa ni na mbi ga maître. Mbi yeke lani na gbâ ti ahundango ndo na ndo ti Nzapa nga na ndo ti fini. Na popo ti a-élève so mbi fa mbeti na ala, mo yeke wara ala so ahinga mbeti mingi, na ala so ahinga mbeti ape me so ala yeke sara kua ngangu mingi. Ti ambeni, mbage ti tere ti ala abuba, me ambeni ayeke ti ala na nzoni tere. Na bango aye ni tongaso, mbi bâ so aye ni ayeke na lege ni ape. Ngoi na ngoi, ambeni babâ na mama ti a-élève ni so ayeke na akpale ni so ayeke tene: “Nzapa la ayeda ti tene molenge ti mbi aduti tongaso.” Mbi hunda tere ti mbi lani, mbi tene ngbanga ti nyen la Nzapa azia si a dü ambeni molenge na ambeni mbage ti tere ti ala so abuba, so ala sara ti ala nga mbeni sioni ye ape so?

Mbi yeke hunda nga lani tere ti mbi, mbi tene: ‘Mbeni nzoni kua wa la mbi lingbi ti sara na yâ ti gigi ti mbi?’ Mbi bâ so gigi ti mbi ayeke hon gi na loro loro. Mbi kono lani na yâ ti mbeni nzoni sewa, mbi sara lani anzoni ekole na mbi yeke sara mbeni kua so mbi ye ni mingi. Me na bango ni, tanga ti aye so mbi sara na yâ ti gigi ti mbi aga na mbi mbeni ye ti nzoni ape. Mbi yeke pensé lani ti sara ande mariage, ti wara mbeni nzoni da, ti dü amolenge, ti ngbâ ti sara kua juska na retraite nga na pekoni ti gue na ndo so a yeke bata ambakoro dä. Mbi hunda lani tere ti mbi wala mbeni nzoni ye ayeke dä na yâ ti gigi ti zo wala ye ni kue awe la.

LEGE SO BIBLE ACHANGÉ FINI TI MBI:

Mbeni lâ, mbi na ambeni mba ti mbi wafango mbeti e gue na ambeni kodoro ti Poto ti bâ ndo. E gue na Abbaye de Westminster, Notre-Dame de Paris, Vatican nga na gbâ ti ambeni kete eglize. Na ando kue so mbi yeke gue lani dä, mbi yeke gi ti hunda atënë na ndo ti ndani so zo  ayeke na fini. Na peko ti so mbi kiri na kodoro ti mbi na Sloatsburg, New York, mbi gue lani na yâ ti a-eglize mingi. Me, na popo ti ala kue, oko tongaso amû na mbi mbeni kiringo tënë so adë bê ti mbi ape.

Mbeni lâ, mbeni élève ti ngu 12 aga nduru na mbi na lo hunda na mbi ambeni tënë ota. Kozoni, lo hunda mbi wala eskê mbi hinga so lo yeke Témoin ti Jéhovah. Mbi tene En, mbi hinga. Use ni, eskê mbi ye ti hinga ye mingi na ndo ti aTémoin ti Jéhovah? Mbi kiri mbi tene En. Ota ni, lo hunda mbi wala mbi lango na ndo wa. Na ngoi so mbi fa na lo ndo so mbi lango dä, mbi bâ so mbi lango gi nduru na tere ti da ti lo. Mbi pensé lani kete ape so a yeke ahunda ota ti molenge-wali so la ayeke changé ande tanga ti gigi ti mbi kue.

Kete na pekoni, lo ga na yanga-da ti mbi na vélo ti lo, na lo komanse ti manda Bible na mbi. Mbi ngbâ mbi hunda na lo atënë so mbi yeke hunda lani na gbâ ti amokonzi ti bungbi ti vorongo Nzapa. Nde na ala, lo fa na mbi akiringo tënë so ayeke polele, nga so adë bê ti mbi, na yâ ti Bible ti mbi wani. Akiringo tënë ni so ade mbi wara ni lâ oko ape.

Aye so mbi manda lani na yâ ti Bible amû na mbi ngia nga adë bê ti mbi mingi. Bê ti mbi adö lani na ngoi so mbi diko 1 Jean 5:19, so a tene: “Dunia so kue ayeke na gbe ti Zo ti sioni.” Tere ti mbi anzere ti hinga so a yeke pëpe Nzapa la ayeke na gunda ti akpale so kue angoro e, me a yeke Satan. Me, Nzapa ayeke leke ande akpale ni so kue (Apocalypse 21:3, 4). Ni la, mbi ga ti bâ so tongana a zi nda ti Bible na mo polele, mo yeke bâ so atënë ti yâ ni ayeke na lege ni. Atâa so Témoin ti Jéhovah so amanda Bible na mbi ayeke gi lani na ngu 12, mbi bâ so, tâ tënë ayeke gi tâ tënë awe, atâa zo wa la afa ni na mo.

Atâa so kue, mbi ye lani ti bâ wala aTémoin ti Jéhovah ayeke sara ka ye alingbi na aye so ala yeke fa na azo. Na tapande, kete maseka-wali so atene na mbi so, a lingbi atâ Chrétien aduti na amara ti asarango ye tongana kangango bê ti ku nga na sarango nzoni na zo (aGalate 5:22, 23). Mbi leke na bê ti mbi ti tara lo na ti bâ wala lo kue lo yeke fa ande asarango ye ni so. Mbeni lâ, mbi sara malin mbi ga na l’heure ape na mandango ye ni. Mbi hunda lani tere ti mbi, mbi tene: ‘Eskê lo yeke ngbâ ti ku nga ande mbi la? Na même si lo ku mbi, lo yeke sara ande ngonzo ape? Gi na ngoi so mbi ngbâ na lege ti ga, mbi bâ lo, lo yeke luti na devant ti da ti mbi. Lo mû loro lo ga nduru na tere ti oto ti mbi, na lo tene: “A ngbâ kete mbi gue na yanga-da ti gue ti tene na mama ti mbi ti tene e iri ndo na yâ ti ahôpital nga na lapolice ti bâ wala mbeni ye ti sioni asi na mo ape, ngbanga ti so lâ oko mo ga na retard na étude ti mo ape. Mbi yeke gi fade bê ti mbi mingi ndali ti mo!”

Na mbeni ngoi ni nde, mbi hunda na lo mbeni tënë so mbi pensé so ayeke duti ande ngangu na mbeni molenge ti ngu 12 ti kiri tënë na ni. Mbi ye lani ti bâ wala lo yeke créé ande gi mbeni kiringo tënë tongaso. Na ngoi so mbi hunda na lo tënë ni, lo bâ lê ti mbi ngbii na lo tene: “Tënë ni ayeke ngangu. Mbi yeke sû ni na mbeti na mbi yeke gue ti hunda ni na babâ na mama ti mbi.” Tâ gi tongana ti so lo tene, na ngoi ti mandango ye ti peko, lo ga na mbi mbeni article ti Tour ti Ba Ndo so akiri tënë na hunda ti mbi ni. Ye so anzere na mbi na tere ti aTémoin ti Jéhovah ayeke so, ambeti ti ala akiri tënë na ahunda ti mbi kue. Maseka-wali so angbâ ti manda Bible na mbi, ngu oko na pekoni mbi wara batême, mbi ga Témoin ti Jéhovah. *

NZONI YE SO MBI WARA NA PEKONI:

Na nda ni, na ngoi so mbi wara akiringo tënë na ahunda ti mbi ni awe, mbi ye ti kangbi ni na azo (Matthieu 12:35). Na tongo nda ni, afami ti mbi akanga lege na mbi. Me tongana ngoi ayeke hon, ala sara ni encore tongana ti kozo ape. Mama ti mbi akomanse ti manda Bible aninga ape la si lo kui. Atâa so lo kui sân ti wara batême, mbi hinga na bê ti mbi kue so lo ye lani ti sara na Jéhovah.

Na ngu 1978, mbi sara mariage na mbeni Témoin ti Jéhovah, so iri ti lo ayeke Elias Kazan. Na ngu 1981, a tisa mbi na Elias ti ga ambeni membre ti Béthel ti États-Unis. * Mawa ni ayeke so, na peko ti ngu osio so e sara kâ, Elias akui. Atâa so mbi ngbâ lani gi mbi oko, mbi ngbâ ti sara kua ti mbi na Béthel. Kua ni so amû lege na mbi ti zia lê ti mbi na ndo ti mbeni ye, na a mû na mbi ngangu mingi.

Na ngu 2006, mbi sara mariage na Richard Eldred, so ayeke mbeni membre ti sewa ti Béthel. Mbi na Richard e yeke na ngia ti ngbâ ti sara kua na Béthel. So mbi hinga tâ tënë na ndo ti Nzapa, mbi bâ biani so mbi wara akiringo tënë so mbi yeke gi ni depuis so, me nga mbi hinga ndani so zo ayeke na fini. Aye ni so kue ato nda ni lani gi na ahunda ota so mbeni kete molenge-wali ahunda na mbi.

^ par. 16 Maseka-wali ni na aita ti lo amanda Bible na amaître ti ala oku so na pekoni ala komanse ti voro Jéhovah.

^ par. 18 “Béthel” aye ti tene “Da ti Nzapa,” na a yeke iri so aTémoin ti Jéhovah azia na ndo ti afiliale ti ala na ndo ti dunia kue la (Genèse 28:17, 19). Azo ti sewa ti Béthel ni ayeke sara akua nde nde so ayeke sara si kua ti fango ye so aTémoin ti Jéhovah ayeke sara ague na li ni.