Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO MARS 2015

 GIGI TI MBENI ZO

Jairo avoro Nzapa na sarango kua na lê ti lo

Jairo avoro Nzapa na sarango kua na lê ti lo

Tara ti bâ so mo yeke na yâ ti mbeni kobela so asara si mo paralysé kue, gi lê ti mo la mo peut ti bougé ni. A yeke mara ti kpale so ita ti mbi Jairo ayeke na yâ ni la. Me, lo ye ti sara kamême mbeni ye na yâ ti gigi ti lo. Kozoni si mbi fa na mo ngbanga ti nyen la lo bâ so a yeke nzoni ti ngbâ na fini, zia mbi fa na mo mbaï ti lo.

A dü Jairo na mbeni kobela so abuba cerveau ti lo, so a iri ni quadriplégie spastique. * Ye so asara si lo paralysé kue. Cerveau ti lo alingbi pëpe ti tokua asango na yâ ti tere ti lo, teti so tere ti lo azin, so ti tene a yeke sara kua ape. Na ambeni ngoi, gi gbotongo yâ ti tere ti lo na ngangu tongaso apeut ti sara si lo wara mbeni ye ti sioni. Ni la, na angoi ni so, tongana azo asara hange ape ala kue alingbi ti wara nga mbeni ye ti sioni tongana ala yeke na tere ti lo. Mawa ni ayeke so, a yeke kanga ka lakue amaboko nga na agere ti lo na tere ti puse ti lo ti kpe ti tene amara ti aye ni so asi.

NA NGOI SO LO YEKE KONO, YE NI AKIRI AGA NGANGU

Na ngoi so Jairo ayeke kono, kpale ti lo ni akiri aga ngangu mingi. Lani tongana lo yeke na nze ota, lo wara kobela so ayeke bi lo tongana kobela ti makako na so ague na lo juska ti évanouir. A yeke si ka mingi so, Mama ayeke yô ka lo na loro ti gue na ni na hôpital, na pensengo so Jairo ni akui awe la.

Ndali ti so aye ti tere ti Jairo kue ayeke kpengba kpengbango, a si na mbeni ngoi, abio ti lo ayeke ba gi bango. Na ngoi so lo wara ngu 16, bassin ti lo azi na lê ti tere, na a hunda ti tene a sara mbeni kota opération na cuisse, hanche nga na bassin ti lo. Mbi ngbâ ti rappelé tongana nyen la lani Jairo ayeke dema lakue na bï na peko ti opération so a sara na lo.

Dutingo ti Jairo so asara si lo yeke gi na bezoin ti azo ti sara kua na lo lakue. Na tapande, ti zia kobe na yanga ti lo, ti yu na lo bongo nga ti zia lo na gbogbo. Babâ na mama ti e la ayeke sara ka akua ni so lakue. Me atâa so Jairo abezoin ti tene azo aduti na tere ti lo lakue, babâ na mama ti e ayeke fa na lo lakue so fini ti lo adépend gi na azo ape me nga na Nzapa.

MBENI LEGE TI SARANGO TËNË AZI NA LO

Babâ na mama ti e ayeke aTémoin ti Jéhovah, na ala yeke diko Bible lakue na Jairo ngbene ye so lo de bébé. Ala hinga so, mbeni zo ayeke duti na ngia mingi na yâ ti gigi ti lo gi tongana lo yeke na songo na Nzapa. Jairo ayeke na mbeni tere so awoko na so asara si lo yeke tï kobela lakue, me lo nga kue lo lingbi ti duti na mbeni kpengba beku ndali ti gigi ti kekereke. Me, lani babâ na mama ti e ayeke hunda ka tere ti ala wala mbeni lâ Jairo ayeke gbu ande nda ti Bible nga la?

Mbeni lâ, na ngoi so Jairo angbâ kete, Papa ahunda lo, a tene: “Jairo, pardon, sara tënë na mbi ma!” Na pekoni, lo kiri lo tene: “Tâ tongana mo ye mbi mingi, mo yeke sara ni!” Teti so Papa avoro tere na lo ti tene lo sara kamême mbeni tënë kete na lo, ngu ti lê ti Jairo  akomanse ti sigigi. Atâa so lo sara lani effort ti sara tënë, lê ti atënë so lo tene asigigi nga nzoni ape. Tënë ni asara lani Papa nzoni ape, ngbanga ti so lo ga ti bâ so lo la lo sara si Jairo atoto. Me so Jairo atoto so, a fa so lo mä atënë so Papa atene lani na lo so. Kpale ni ayeke gi so lo peut lani ti sara tënë ape.

Kete na pekoni, babâ na mama ti e aga ti bâ so, tongana Jairo aye ti fa apensé ti lo na ndo ti ambeni ye, lo yeke pika lê ti lo na loro. A yeke son ka Jairo mingi ti bâ so a yeke lakue ngangu na azo ti mä yâ ti atënë ti lo. Me na ngoi so babâ na mama ti e aga ti hinga ndani so Jairo ayeke pika ka lê ti lo na ala ga na lo aye so lo ye, lo he ngia. So ayeke fason ti lo ti tenengo merci la.

Mbeni wanganga atene na e so, ti tene lisoro ti e na Jairo akiri aduti nzoni mingi, a yeke nzoni e yô amaboko ti e use kue na lê ti nduzu, tongana e ye ti hunda mbeni tënë so a hunda ti tene lo tene En wala Ên-ën. Maboko ti e ti koli aye ti tene En, ti wali aye ti tene Ên-ën. Tongana e sara tongaso, lo peut ti fa na e aye so lo ye na bango maboko so ague oko na atënë ti bê ti lo ni.

MBENI KPENGBA YE SO ASI NA YÂ TI GIGI TI JAIRO

Fani ota na yâ ti ngu oko, aTémoin ti Jéhovah ayeke sara ambeni kota bungbi, so na ngoi ni ayeke fa tënë ti Nzapa na gbele gbâ ti azo so aga. Lakue, tongana a si na ngoi ti fango tënë ti Nzapa so abâ azo so aye ti wara batême, tere ti Jairo ayeke nzere gi nzerengo. Mbeni lâ, na ngoi so Jairo ayeke na ngu 16, Papa ahunda lo, a tene: “Jairo, mo ye ti wara batême?” Hio, lo yô lê ti lo na nduzu ti gi ti bâ maboko ti Papa, ti mbage ti koli, ti fa so lo yeke na nzara ti wara ni. Na pekoni, Papa akiri atene: “Mo mû zendo na Nzapa na yâ ti sambela ti sara na lo teti lakue lakue awe?” Ti so encore, Jairo abâ gi maboko ti Papa ti mbage ti koli. A yeke polele so Jairo amû lani tere ti lo na Jéhovah awe.

Na peko ti so a sara na lo gbâ ti lisoro na ndo ti Bible, a bâ so Jairo agbu nda ti batême nzoni. Tongaso, na ngu 2004, lo kiri tënë na mbeni hundango ndo so ayeke kota ahon atanga ni kue, so lâ oko ade a hunda ni na lo ape, so a tene: “Mo ye ti mû tere ti mo kue na Nzapa ti sara gi ye so bê ti lo aye?” Jairo akiri tënë na hunda so na yongo lê ti lo na nduzu. A leke kozoni awe ti tene lo tene ti lo En ni na fason ni so. Ni la, na ngu 17, lo wara batême, lo ga Témoin ti Jéhovah.

LO ZIA LÊ TI LO NA NDO TI AYE SO AYEKE TI NZAPA

Na ngu 2011, mbeni kode ti sarango tënë azi na Jairo. A yeke kode ti sarango kua na ordinateur na lege ti lê ti e. Tongana lo bougé lê ti lo, ordinateur ni ayeke fa na lo ambeni image na lê ti écran ni ti tënë lo soro. Tongana lo pika lê ti lo na ndo ti mbeni image ni oko wala lo bâ gi ni ngbii, ordinateur ni ayeke fa na lo aye so ayeke na yâ ti image ni legeoko tongana ti so zo ayeke cliqué na ndo ti mbeni image na ndo ti ordinateur. Me ti Jairo, a leke na lo ambeni image ni nde so ayeke mû na lo lege ti sara lisoro nzoni. Tongana lo pika lê ti lo na ndo ti mbeni oko ti a-image ni so, mbeni logiciel ayeke sara si ye so lo soro ni atoto mo bâ mo tene mbeni zo la asara tënë.

 Teti so Jairo amä yâ ti Bible ahon ti kozo, nzara so lo yeke na ni ti mû maboko na azo na lege ti yingo akiri aga kota. Na ngoi so e yeke manda Bible na sewa yenga na yenga, lo yeke bâ mbi ngbii lo bâ ordinateur ti lo, lo kiri lo bâ mbi ngbii lo bâ ordinateur ti lo ni. So mbeni fason ti tenengo na mbi so a lingbi mbi sara na lo mbeni commentaire so lo lingbi ti mû ni ande na ngoi ti ahundango tënë na akiringo tënë so a yeke sara ka na abungbi ti e ti congrégation.

Na ngoi ti bungbi, lo yeke gi image so lo ye ti soro ni, yeke yeke, na ndo ti écran ni. Tongana lo wara ni, lo yeke pika lê ti lo, na pekoni azo kue ayeke mä atënë so lo ye ti tene na lege ti ordinateur ni. Lakue tongana lo sara kua na fason ni so ti mû maboko na aita ti congrégation, lo he ngia. Alex, so ayeke mbeni kamarade ti Jairo so angbâ maseka, atene: “Bê ti mbi adö mingi tongana mbi yeke mä ka kiringo tënë ti Jairo na ndo ti ambeni tënë ti Bible.”

Jairo asara kua na ordinateur ti lo nga na go so ayeke na ndo ni ti mû na acommentaire na angoi ti abungbi nga ti fa na azo tënë ti Nzapa

Jairo asara nga kua na alê ti lo ti fa na azo aye so lo mä na bê na ndo ni. Mbeni lege so lo sara na kua ayeke so lo yeke pika lê ti lo na ndo ti mbeni image, so na yâ ni a yeke wara afoto ti mbeni pendere ndo. Na yâ ti image ni so, a yeke wara anyama nga na azo ti amara kue place oko, so siriri ayeke na popo ti ala. Tongana lo pika lê ti lo na ndo ti image ni, go so ayeke na ndo ti ordinateur ni ayeke sara tënë, a tene, “Beku so Bible amû na e ayeke so sese ayeke ga ande mbeni paradis, so na yâ ni kobela nga na kuâ ayeke duti ande dä mbeni pëpe, Apocalypse 21:4.” Tongana tënë ni anzere na zo ni, lo kiri lo pika lê ti lo na ndo ti mbeni tënë, na ordinateur ni ayeke sara tënë, a tene: “Mo ye ti manda Bible legeoko na mbi?” Ye ti dongo bê ni ayeke so âta ti e ti koli ayeda lani na tisango ndo so. A yeke nzere ka mingi ti bâ Jairo, na mbeni mba ti lo Témoin so ayeke na tere ti lo, na mandango Bible yeke yeke na Âta-koli. E yeke na ngia ti bâ so Âta-koli awara batême na kota bungbi ti e ti lango ota so a sara ni na gbata ti Madrid na nze ti août ngu 2014.

Awafango mbeti na Jairo na ekole nga abâ kota nzara so Jairo ayeke na ni ti sara na Nzapa. Rosario, so ayeke mbeni wanganga ti lo, atene: “Tongana mbi pensé mbeni lâ ti gue na yâ ti mbeni bungbi ti vorongo Nzapa, mbi yeke ga ti mbi gi Témoin ti Jéhovah awe. Mbi bâ tongana nyen la mabe ti Jairo asara si lo yeke na ngia na yâ ti fini ti lo, atâa so lo yeke na yâ ti ngangu kpale.”

Lê ti Jairo ayeke za ka lakue tongana mbi yeke diko na lo zendo so Bible amû, so a tene: “Fade zo so azin ahuru tongana tagba, na menga ti awabuburu asara bia.” (Ésaïe 35:6). Jairo ayeke bata ngia ti lo lakue atâa so na ambeni ngoi lo yeke découragé ka kete. A yeke senge ape, ngbanga ti so fini ti lo kue angoro gi na tere ti aye so ayeke ti Nzapa nga na tere ti akamarade ti lo so ayeke aChrétien. Nzoni bango ndo so lo yeke na ni na ndo ti gigi nga na kpengba mabe so lo yeke na ni afa so ti sara na Jéhovah ayeke sara si e yeke wara ngia, atâa e yeke na yâ ti ngangu kpale wa.

^ par. 5 Paralysie Cérébrale (PC) ayeke iri so a mû ka na akobela so ayeke ndu cerveau ti zo na so ayeke sara si aye ti tere ti zo ni ayeke sara kua nzoni ape. Ye so alingbi nga ti bi zo ni tongana kobela ti makako, ti sara si lo te ye na lege ni ape nga lo lingbi ti sara tënë nzoni ape. Quadriplégie spastique ayeke mbeni mara ti kobela ni so la, me lo yeke ti lo sioni mingi. A yeke sara si gere na maboko ti zo ni ayeke kpengba kpengbango, nga go ti lo ayeke woko wokongo.