Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO MARS 2015

Kiringo tënë na ahunda ti azo

Kiringo tënë na ahunda ti azo

Ngbanga ti nyen a yeke nzoni e dabe ti e na kuâ ti Jésus?

Kuâ ti Jésus amû na e beku wa? —Ésaïe 25:8; 33:24

Kuâ ti Jésus ayeke kota ye so asi na yâ ti mbaï ti azo. Lo kui lani ti mû na azo fini so ala lingbi fade ti duti na ni. A leke lani zo ti tene lo duti na nzara ti sara aye ti sioni ape, ti tï kobela ape wala ti kui ape (Genèse 1:31). Me, siokpari alï na yâ ti dunia na lege ti kozo koli, Adam. Ni la, Jésus amû fini ti lo ti zi e na gbe ti siokpari na kui.—Diko Matthieu 20:28; aRomain 6:23.

Nzapa afa kota ndoye ti lo na lege so lo tokua Molenge ti lo na sese ti kui ndali ti e (1 Jean 4:9, 10). Jésus atene na adisciple ti lo ti dabe ti ala na kuâ ti lo na sarango mbeni matanga so ahunda aye mingi ape, so na yâ ni a sara kua na mapa nga na vin. Ti sara ni ngu oko oko a yeke mbeni lege ti fa singila ti bê ti e ndali ti ndoye so Nzapa nga na Jésus afa ni.—Diko Luc 22:19, 20.

Azo wa la ayeke te mapa ni na ayeke nyon vin ni zo wa?

Na ngoi so Jésus atene lani ti kozoni na adisciple ti lo ti tene ala dabe ti ala na kuâ ti lo, lo sara lani tënë ti mbeni mbele, wala mango tere (Matthieu 26:26-28). Mbele ni so ayeke mû ande beku na adisciple ni so, nga na ambeni zo so wungo ti ala ayeke kete, ti ga agbia na aprêtre na tere ti lo na yayu. Atâa so a yeke azo kutu mingi la si ayeke sara matanga ti dango bê na kuâ ti Jésus, a yeke gi ala so ayeke na yâ ti mbele ni so la si ayeke te mapa na ayeke nyon vin ni.—Diko Apocalypse 5:10.

A sara nduru na ngu 2000 awe la si Jéhovah angbâ ti soro ala so ayeke ga ande agbia ni so (Luc 12:32). Wungo ti ala ayeke kete tongana a haka ni na ti ala so ayeke duti ande na fini lakue lakue na ndo ti sese.—Diko Apocalypse 7:4, 9, 17.

 

TI HINGA AMBENI TËNË

Dango bê na kuâ ti Jésus

Ngu oko oko azo kutu na kutu ayeke dabe na kuâ ti Jésus. A iri mo ti ga ti bâ tongana nyen la dango bê so abâ mo.