Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO FÉVRIER 2015

 LISORO NA MBENI ZO

A yeke nzoni ti manda Bible ngbanga ti nyen?

A yeke nzoni ti manda Bible ngbanga ti nyen?

Atënë so na gbe ni ge afa lisoro so mbeni Témoin ti Jéhovah alingbi ti sara na mbeni zo. Na tapande, mbeni Témoin ti Jéhovah, so e yeke iri lo Brian, ayeke fa tënë na mbeni koli so e yeke iri lo Eric.

AMBAÏ TI YÂ TI BIBLE AYEKE TÂ YE

Eric: Pardon, mbi hinga ka ti mbi tënë ti Nzapa mingi ape. Donc, mbi pensé e yeke na tënë mingi ti tene na ndo ni ape.

Brian: A nzere na mbi so mo tene na mbi tâ tënë so. Me kozoni kue, iri ti mbi ayeke Brian. Ka ti mo?

Eric: Ti mbi ayeke Eric.

Brian: A nzere na mbi so mbi na mo e wara tere, Eric.

Eric: Mbi nga kue.

Brian: Mbi peut ti hunda mo kete, mo kono na yâ ti sewa so amä na bê na Nzapa?

Eric: En. Me, lani na ngoi so mbi gue na université, mbi zia lege ti sarango kua ti Nzapa.

Brian: Mbi comprendre. Me, mo manda lani nyen na université ni?

Eric: Mbi manda ye lani na ndo ti dutingo ti azo nga na mbaï ti ala. Mo hinga, mbi ye ka tënë ti ambaï mingi, ti hinga tënë na ndo ti mbaï ti azo na ndo ti sese anzere ka na mbi mingi.

Brian: Atënë ti ambaï ayeke ka pendere mingi. Bible nga kue ayeke mbeni buku ti ambaï. Eskê mo sara ambeni recherche ti mo na yâ ti Bible lâ oko awe?

Eric: Ade mbi sara ni lâ oko ape. Mbi hinga so Bible ayeke mbeni nzoni buku, me ti tâ tënë ni, mbi hinga lâ oko ape so a yeke mbeni buku ti ambaï.

Brian: Mo kpa mbeni zo so aye ti hinga ye na ndo ti Bible. Ni la, tongana mo yeke na kete ngoi, mbi yeke fa na mo gi ambeni tapande so afa so ambaï so ayeke na yâ ti Bible ayeke tâ ye.

Eric: Nzoni. Me mbi yeke na Bible ape.

Brian: Tënë ayeke dä ape. Mbi peut ti fa na mo ni na yâ ti ti mbi so senge. Kozo tapande ni ayeke ge na 1 Chronique chapitre 29, versê 26 nga na 27. Aversê ni atene: “David molenge ti Isaï akomande azo ti Israël kue. Ngu kue so lo komande azo ti Israël ayeke ngu bale-osio. Lo komande na Hébron ngu mbasambala, na lo komande na Jérusalem ngu bale-ota na ndo ni ota.”

Eric: Me, nyen la afa atene mbaï ni so ayeke tâ ye?

Brian: Mo bâ, lani na mbeni ngoi awandara atene so Gbia David ni so ayeke dä lâ oko ape.

Eric: Tâ tënë? Me ka ala tene tongaso ngbanga ti nyen?

Brian: Nde na Bible, aye so afa atene mbeni zo tongaso ayeke dä ândö ayeke mingi ape. Me na ngu 1993, mbeni groupe ti azo ti gingo nda ti ye na gbe ti sese awara mbeni tênë so a sû mbeni tënë na ndo ni giriri a tene, “Da ti David.”

Eric: So pendere tënë!

Brian: Mbeni zo ni so a sara tënë ti lo na yâ ti Bible si ambeni zo ayeke na kite na ndo ti lo ayeke Ponce Pilate, mbeni gouverneur so akomande lani  na ngoi ti Jésus. A di iri ti lo ge na Luc chapitre 3, versê 1 na popo ti agouverneur so akomande lani na ngoi ni kâ.

Eric: En, mbi bâ ni. A tene so “tongana Ponce Pilate ayeke Gouverneur ti Judée, na Hérode ayeke Komanda ti Galilée.”

Brian: Merci. Teti angu mingi, ambeni wandara adë kite so Ponce Pilate ayeke dä lâ oko ape. Me, a sara angu 50 tongaso awe, na mbage ti Asie, a wara lani mbeni tênë so a sû iri ti lo na ndo ni.

Eric: Hmm. Ade mbi mä mara ti atënë ni so kozo ape.

Brian: A nzere na mbi ti fa ni na mo.

Eric: Ti honde na mo ape, depuis ka la mbi bâ Bible gi tongana mbeni senge mbeti awe, mbi pensé lâ oko ape so Bible angbâ lakue kota ye na ngoi ti e so. Ambaï ti yâ ni alingbi ti duti tâ ye, me mbi pensé Bible apeut ti ga nga na nzoni ye na e laso ape.

BIBLE: MBENI NGBENE BUKU, ME SO A YEKE MÛ MABOKO NA E LASO

Brian: Azo mingi apensé tongaso. Me pensé ti mbi ayeke ti lo nde. Zia mbi fa na mo raison ni: Depuis so e azo e bâ gigi juska laso, aye so e yeke ka na bezoin ni achangé ape. Na tapande, e yeke lakue na bezoin ti kobe, bongo nga na ndo ti lango. E yeke lakue na nzara ti sara lisoro na popo ti e nga ti wara mbeni sewa so ayeke na ngia. Zo kue aye aye ni so, ni la ape?

Eric: Ni la.

Brian: Bible alingbi ti mû maboko na e na yâ ti aye ni so. E lingbi ti tene so Bible ayeke mbeni ngbene buku, me ti tâ tënë ni, a yeke mû maboko na e laso.

Eric: A yeke mû maboko na e tongana nyen?

Brian: Mo bâ, depuis so a sû na Bible ândö a sara angu ngbangbo mingi awe juska laso, andia so ayeke na yâ ti Bible ni angbâ lakue kota ye.

Depuis so a sû na Bible ândö a sara angu ngbangbo mingi awe juska laso, andia so ayeke na yâ ti Bible ni angbâ lakue kota ye

Eric: OK. Me na yâ ti aye wa?

Brian: Bible alingbi ti mû maboko na e ti duti na nzoni bango ndo na ndo ti nginza, na ndo ti aye so e lingbi ti sara ti duti na ngia na yâ ti sewa ti e wala ye so e lingbi ti sara ti duti mbeni nzoni kamarade. Bible ayeke tongana mbeni ye so alingbi ti mû maboko na e ti duti na ngia. Mo bâ na tapande, laso na ngoi so e yeke dä so, ti duti mbeni nzoni koli ti wali nga mbeni nzoni babâ ayeke kete ye?

Eric: A yeke kete ye ape. Mo bâ, mbi na wali ti mbi e sara mariage a sara ngu oko tongaso awe, me lakue la e yeke mä ka tere ape.

Brian: A yeke ye so ayeke si ka la. Me na yâ ti Bible, e yeke wara anzoni wango so akpengba ape. Na tapande, zia e diko aÉphésien chapitre 5, aversê 22, 23 nga na 28. Tongana mo ye, mo peut ti diko ni.

Eric: Nzoni. A tene: “Zia awali awoko tere na gbe ti akoli ti ala tongana ti so ala yeke woko tere na gbe ti Seigneur, teti koli ayeke li ti wali ti lo tongana ti so Christ nga ayeke li ti congrégation, so ayeke tere ti lo na so lo yeke sauveur ni.” Versê 28 ni atene: “A yeke tongaso si a lingbi akoli andoye awali ti ala tongana tere ti ala wani. Zo so andoye wali ti lo andoye tere ti lo wani.”

Brian: Nzoni. Merci. Mo pensé tongana koli na wali asara ye alingbi na wango so, sewa ti ala ayeke ga nzoni ape?

Eric: Mbi pensé a yeke ga nzoni. Me ti sara ni ayeke kete ye ape.

Brian: Tâ tënë; e kue e yeke na siokpari na tere ti e. Na ndo ni, gi na yâ ti oko chapitre so, mbeni versê ayeke dä so awa e ti sara ye ahon ndo ni ape. * Koli na wali adoit ti hunda ye na mba ahon ndo ni ape nga ti duti nduru ti mä tere na popo ti ala. Mbi na wali ti mbi e bâ so Bible alingbi ti mû maboko na e ti duti na mara ti abango ndo ni so.

Eric: Mo yeke na raison.

Brian: A-Témoin ti Jéhovah ayeke na mbeni site ti Internet, so na ndo ni a yeke wara ambeni pendere  sango na ndo ti mariage nga na ndo ti dutingo ti sewa. Tongana mo yeke na mbeni kete ngoi, mbi peut ti fa na mo gi kete mbage ni.

Eric: Tënë ayeke dä ape. Mbi yeke na ngoi.

Brian: Nzoni. Adresse ti site ni ayeke http://www.jw.org/sg/. Ge so ayeke kozo place ni la.

Eric: Afoto ni ayeke pendere-ein!

Brian: So ayeke afoto ti kua ti fango tënë so e yeke sara ni na ndo ti dunia mobimba kue la. Ah, e si na place ni so awe. E yeke na bibliothèque ge so e lingbi ti sara recherche dä na ndo ti mariage. Tongana e pika gi tënë “mariage”, a yeke fa na e atënë nde nde na ndo ni. Mbeni oko ayeke dä so anzere na mo?

Eric: En, ti so asara tënë na ndo ti “Wango ti ndara ndali ti akoli na awali so amû tele.”

Brian: Article so amû na e awango ti Bible so afa na e aye so e lingbi ti sara ti duti na ngia na yâ ti mariage ti e. Bâ paragraphe so. Mo ye ti diko ni?

Eric: Nzoni. A tene: “Tongana nyen akoli alingbi ti yekia awali ti ala? Ti yekia wali ti mo aye ti tene ti sala ye na lo na ndoye, ti ne lo.”

Brian: Merci na dikongo ye ti mo ni. A fa nga tënë ti yâ ti mbeni versê na li ni ge. Mo ye ti diko ni nga?

Eric: En, mbi bâ ni. A-Éphésien 5:22, 25. A tene: “Awali, i mä tënë ti akoli ti i mveni, legeoko tongana i mä tënë ti Seigneur. Akoli, i ndoye awali ti i.”

Brian: Atâa so a sû tënë so a sara angu 2000 tongaso awe, awango ni andu koli na wali ala use kue, na tongana ala sara ye alingbi na awango ni so, ala yeke wara aye ti nzoni na pekoni. Nga, tongana ti so e londo ti diko ni fade na nduzu ge, ti tene zo ayekia wali ti lo aye ti tene ti sara ye na lo na ndoye, nga ti ne lo.

Eric: Ti tâ tënë ni, aye ayeke mingi na yâ ti Bible, me mbi pensé lani tongaso ape.

Brian: Mbi yeke na ngia ti mä mo tongaso, Eric. Mbi ye ande ti kiri ti bâ mo, na ti hinga bango ndo ti mo na ndo ti article ti “Wango ti ndara ndali ti akoli na awali so amû tele”, so ayeke na yâ ti oko article so na ndo ti site ti e. *

Eric: Nzoni. Mbi na wali ti mbi e yeke bi lê ti e ande dä.

Mbeni tënë ti yâ ti Bible ayeke dä so agbu bê ti mo na so mo ye ti hinga ndani? Mo ye ti hinga ye na ndo ti mbeni ye so aTémoin ti Jéhovah amä na bê dä wala so ala yeke sara ni? Tongana a yeke tongaso, hunda tënë ni na aTémoin ti Jéhovah. A yeke nzere ande na ala ti sara lisoro na mo na ndo ni.

^ par. 57 Ti hinga tënë mingi na ndo ni, bâ chapitre 14 ti buku Bible afa nyen biani?, so aTémoin ti Jéhovah asigigi na ni.

TI HINGA AMBENI TËNË

Tongana nyen andia ti Nzapa ayeke sara nzoni na e?

Jésus afa ndani so e bezoin ti tene Bible afa lege na e. Lo fa nga akota ndia ni use.

Ndani nyen ti manda Bible?

Bible ayeke mû maboko laso na azo kutu na kutu na yâ ti dunia kue ti wara akiringo tënë na angangu tënë so ala yeke hunda na yâ ti gigi ti ala. Mo nga kue mo ye ti duti na popo ti ala?