Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO FÉVRIER 2015

 KOTA MAMA-TENE NI | LEGE TI WARA NGIA NA YÂ TI KUA TI MO

Akua ti maboko: A ga ngbene ye awe?

Akua ti maboko: A ga ngbene ye awe?

Alex ayeke dema na ngoi so lo yeke yô mbeni kungba ti zia na ndo ti kota oto ti place ti kua ti lo. Lo hunda tere ti lo, lo tene, ‘So mara ti kua ti nyen la zo apeut ti ga nga kota zo na yâ ni ape so? Lawa la mbi yeke wara mbeni kua so ayeke futa mbi dä nzoni? Tongana mbi sara fade kua ape ka gigi ti mbi ayeke duti nzoni mingi!’

Legeoko tongana ti Alex so, azo mingi laso aye ti sara kua ti maboko ape. Aaron, mbeni mécanicien ti oto, atene: “Azo mingi apensé atene tongana ala sara kua ti ‘maboko,’ a yeke bi nengo ti ala na sese. Ala tene ti ala, a tene: ‘Mbi sara gi ni tongaso ti ku na mbeni nzoni kua.’”

Ngbanga ti nyen mingi ti azo apensé so kua ti maboko ayeke kua ti ala ape? Peut-être a yeke aye so a fa na télé, na radio wala na yâ ti ambeti-sango nga na ambeni ye ni nde la ayeke handa azo ni so. A yeke fa na ala so “nzoni” gigi ayeke mbeni gigi so na yâ ni zo ayeke na gbâ ti nginza na so zo abezoin ti sara gbâ ti effort ape. Matthew, so ayeke bâ lege ti ada ti tene angbâ nzoni, atene: “Azo apensé ti ala atene tongana mo sara kua ti maboko ti wara na nginza, mo yeke duti na ngia mingi ape.” Shane, so lo nga kue lo yeke sara kua ti bango lege ti ada ti tene angbâ nzoni, ayeke na oko bango ndo ni so. Lo tene: “Azo aye encore ape ti sara kua nzoni alingbi na nginza so a yeke futa na ala.”

Me na mbeni mbage, azo mingi laso ayeke na ngia na sarango akua ti maboko. Daniel, so ayeke na ngu 25 na so asara kua ti lekengo ada, atene: “Mbi pensé ti mbi so akua ti maboko ayeke ga na zo aye ti nzoni mingi, mbilimbili tongana lo wara tâ ye so lo yeke gi ni.” Andre, so ayeke na ngu 23, nga kue ayeda na tënë so. Lo tene: “Mbi pensé so ti tene zo awara ngia ayeke nzoni lo sara kua. Tongana zo asara kua gi kete, ngia ti lo ayeke mingi ape nga lo yeke hinga ye so lo peut ti sara ape.”

Tongana ti Daniel na Andre, nyen la amû maboko na ambeni zo ti duti na nzoni bango ndo na ndo ti akua ti maboko? A yeke gi sarango ye alingbi na awango ti Bible na yâ ti fini ti ala. Ahon ti tene Bible amû asioni wango na ndo ti akua ti maboko, lo yeke wa azo mingi ti sara kua nzoni nga ti tene ala kanga bê na yâ ni. Me Bible ni angbâ gi ge ape. Lo yeke fa nga na e tongana nyen ti wara ngia na yâ ti akua ti e.

Awango wa ti Bible alingbi ti mû maboko na mo ti wara ngia na yâ ti akua ti mo? E wa mo ti bâ ambeni wango ni na yâ ti article so ayeke ga na peko.