Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO JANVIER 2015

 KOTA MAMA-TENE NI | MBENI GOUVERNEMENT SO PETENGO GORO AYEKE NA YÂ NI APE

Royaume ti Nzapa: Mbeni gouvernement so aye tënë ti petengo goro ape

Royaume ti Nzapa: Mbeni gouvernement so aye tënë ti petengo goro ape

Mbeni kota zo ti kodoro ti Nicaragua afa ye so apusu lo ti pensé so a yeke ngangu ti kanga lege na tënë ti petengo goro na yâ ti andokua ti Letäa. Lo tene so akota zo ti kodoro ayeke nga amolenge ti kodoro, na tongana a yeke pete goro na amolenge ti kodoro, a yeke sara nga mara ni na akota zo ti kodoro.

Tongana a yeke pete ka goro na azo, na yâ ti andokua ti Letäa, so azo la ayeke sara kua na yâ ni, tënë ti goro alingbi ti manke dä ape. A yeke tongaso ape? Ni la, ti wara mbeni gouvernement so tënë ti goro ayeke na yâ ni ape, gouvernement ni so adoit ti duti ti azo ape. Bible afa mara ti gouvernement ni so: a yeke Royaume ti Nzapa, so ayeke gouvernement so Jésus afa lani na adisciple ti lo ti sambela ndali ni.—Matthieu 6:9, 10.

Royaume ti Nzapa ayeke mbeni gouvernement so aduti na yayu kâ si lo yeke sara na kua ti lo. A yeke ga ande ti mû place ti agouvernement ti azo kue (Psaume 2:8, 9; Apocalypse 16:14; 19:19-21). Na popo ti aye ti nzoni so Royaume ni ayeke ga ande na ni na azo, lo yeke hunzi tënë ti petengo goro ti andokua ti Letäa. Zia e bâ aye omene so afa so Royaume ni ayeke sara ni ande.

1. NGANGU NI

KPALE NI: Amolenge ti kodoro la ayeke ga ka na nginza na yâ ti agouvernement ti azo, mingi ni, na lege ti impôt nga na akua so ala yeke sara. Teti so anginza ni ayeke lï gbani, ye so asara si ambeni kota zo ti kodoro ni ayeke nzi ye. Na tapande, tongana ambeni zo aye ti pete goro na ala ti tene a kiri na wungo ti impôt ti ala na gbe ni wala ti futa ambeni ye nde so gouvernement ahunda na ala, akota zo ti kodoro ni ayeke mû goro ni. Ye so ayeke sara si kpale ni so ayeke hunzi ape, ngbanga ti so agouvernement  ni ayeke zia lakue wungo ti impôt na nduzu ti kanga na dû ti aye so ala sara so. A sara si tënë ti petengo goro ayeke gbâ lakue ti gue na li ni. Na yâ ti mara ti aye tongaso, azo so aye ti ala ti sara ye na lege ni la ayeke bâ pasi mingi.

YORÖ NI: Royaume ti Nzapa awara ngangu na mbage ti Jéhovah, * Nzapa so ngangu ti lo ahon angangu kue (Apocalypse 11:15). Royaume ni so abezoin ti ro nginza ti impôt si lo sara na akua ti lo ape. Me, na “lege ti kota ngangu” ti Nzapa nga na bibe ti mungo ye so lo yeke na ni, e hinga so Royaume ni ayeke mû ande, na azo ti gbe ti lo, ye kue so ala yeke na bezoin ni.—Ésaïe 40:26; Psaume 145:16.

2. GBIA NI

KPALE NI: Susan Rose-Ackerman, so e sara tënë ti lo na yâ ti article so ahon, atene so tongana a ye ti kanga lege na tënë ti goro, “a doit ti komanse na popo ti azo ti li ni kâ.” Tongana agouvernement aye ti kanga lege na tënë ti goro na popo ti azo ti lapolice wala ala ti douane me si ala kanga lê na ndo ni na popo ti akota zo ni, a yeke sara si azo ayeke sara confiance na ala encore ape. Nga, même akota zo ti komande ni ayeke na siokpari na tere ti ala. Bible atene: “Zo oko ti mbilimbili, so asara nzoni na lo sara siokpari pëpe, ayeke na sese so pëpe.”—Zo-ti-fa-tene 7:20.

Jésus ake lani ti yeda na kota goro so a mû na lo

YORÖ NI: Nde na azo so ayeke mbilimbili pëpe, Jésus Christ, lo so Nzapa asoro lo ti duti Gbia ti Royaume ni so, alingbi pëpe ti zia si mbeni ye ahanda lo ti sara sioni ye. Jésus afa ni na lege so lo ke lani ti yeda na kota goro so a mû na lo, so ayeke “aroyaume kue ti sese na gloire ti ala.” Zabolo, so ayeke mokonzi ti dunia ni, la amû zendo ti mû na lo aye ni so kue tongana lo kuku lo voro ni (Matthieu 4:8-10; Jean 14:30). Même na ngoi so Jésus ayeke bâ pasi lani ti kui, lo sara kue ti ngbâ be-ta-zo. Ni la, lo ke ti nyon sengo ye so alingbi lani ti kaï songo ti pasi ti lo ni, me so alingbi lani ti sara si lo girisa tere ti lo (Matthieu 27:34). Nzapa azingo Jésus na kuâ awe na lo yeke fadeso na tere ti Nzapa na yayu, lo fa lani so lo lingbi biani ti duti gbia ti Royaume ni.—aPhilippien 2:8-11.

3. NINGANGO NI

KPALE NI: Akodoro mingi ayeke sara vote lakue lakue, so mingi ni a yeke ti mû lege na azo ti zi akota zo ti kodoro so aye goro. Me, ti tâ tënë ni, na ngoi ti dengo-gaba ti gango président nga na ngoi ti avote ni, tënë ti petengo goro ahon ndo ni, même na yâ ti akodoro so a tene ala yeke na mosoro mingi. Na angoi ni so, awamosoro ayeke mû anginza nga ala yeke sara ambeni ye ti woko na akota zo ti kodoro ni nga na afini ni so ayeke ga.

John Paul Stevens, mbeni juge ti Kota da-ngbanga ti États-Unis, atene so mara ti asarango ye tongaso ayeke ga na kpale na ndo ti aGouvernement, ngbanga ti so a yeke bi nengo ti ala na sese nga azo alingbi ti sara confiance na ala ape. A yeke ye ti dongo bê pëpe ti bâ so azo mingi, na ndo ti dunia mobimba, apensé so bungbi so tënë ti petengo goro ahon ndo ni dä a yeke abungbi ti akama-poroso.

YORÖ NI: Royaume ti Nzapa ayeke kanga ande lege na atënë ti dengo-gaba wala ti sarango vote so tënë ti nzi  ahon ndo ni dä, na lege so, komandema ti lo ayeke ngbâ ande gi lakue lakue (Daniel 7:13, 14). Teti so Nzapa la asoro Gbia ti Royaume ni, a bezoin pëpe ti tene azo la avoté lo, nga ala yeke na droit ti zi lo ape. Teti so Royaume ni ayeke ngbâ ande gi lakue lakue, ye so ayeke sara si, anzoni ye so lo yeke ga na ni na azo, ayeke ngbâ gi lakue lakue.

4. ANDIA NI

Royaume ti Nzapa ayeke mbeni tâ gouvernement so ayeke duti na yayu kâ si lo yeke sara na kua ti lo

KPALE NI: Mo lingbi ti pensé so tongana a sigigi na ambeni fini ndia, aye ni ayeke ga nzoni. Ye oko, awandara abâ so, na yâ ti aye mingi, gbâ ti andia akiri azi lege mingi na tënë ti petengo goro. Na ndo ni, ti andia so a yeke sigigi ka na ni ti sara si tënë ti petengo goro aduti mingi ape, a yeke hunda aye mingi ti sara ye alingbi na ni, me ye ti peko ni ayeke gi kete.

YORÖ NI: Andia ti Royaume ti Nzapa ayeke nzoni mingi ahon ti agouvernement ti azo. Na tapande, ahon ti tene Jésus azia na sese ambeni molongo ti andia, lo mû lani gi mbeni ndia so azo ahinga ni mingi, so lo tene: “Ye kue so ala ye azo asara na ala, a lingbi ala sara na azo ni nga.” (Matthieu 7:12). Mbeni ye ni ayeke so, andia ti Royaume ni aluti mingi na ndo ti ye so ayeke pusu zo ti sara mbeni ye nga na sarango ye ni. Jésus atene: “Mo ndoye mba ti mo tongana mo wani.” (Matthieu 22:39). Ti tâ tënë ni, Nzapa, so alingbi ti diko ye so ayeke na yâ ti bê ti azo, ayeke na ngangu ti gue na azo ti sara ye alingbi na andia ni so.—1 Samuel 16:7.

5. BIBE NI

KPALE NI: Tâ ye so ayeke na gunda ti goro ayeke kota bê ti warango ye nga na gingo intérêt ti zo lo wani. Akota zo ti kodoro nga na amolenge ti kodoro ayeke ka na amara sarango ye ni so. Azo ti lekengo da ti magasin so akungbi lani na gbata ti Séoul, so e sara tënë ni na yâ ti article so ahon, apete goro na akota zo ti kodoro ni ngbanga ti so ala hinga atene, tongana a zia lege na ala ti sara kua na agbakuru so ayeke na lege ni ape, a yeke hunda na ala nginza mingi ape. Mawa ni ayeke so, akota zo ti kodoro ni ayeda na goro ni.

Tongana a ye ti kanga lege na tënë ti goro, a lingbi a fa na azo ti zi asioni nzara so na yâ ti bê ti ala, anzara tongana  kota bê ti warango ye nga na gingo intérêt ti zo lo wani. Ye oko, agouvernement ti azo aye pëpe ti zia na sese mara ti kapa ti fango ye ni so, nga ala lingbi pëpe ti sara ni.

YORÖ NI: Royaume ti Nzapa awara lege ti hon ndo ti kpale ti petengo goro so na lege so lo yeke fa na azo tongana nyen ti zi asioni nzara ni so. * Fango ye ni so amû maboko na ala ti “kiri gi fini ni na yâ ti ngangu so ayeke fa lege na bibe ti ala”. (aÉphésien 4:23). Ahon ti sara kota bê ti aye nga ti duti na bibe ti pensé gi na ala wani, ala manda ti zia bê ti ala gi na ndo ti ye so ala yeke na ni nga ti bi bê na amba ti ala.—aPhilippien 2:4; 1 Timothée 6:6.

6. AZO NI

KPALE NI: Ambeni zo ni la ayeke soro na mbana ti bê ti ala ti sara ambeni ye so ayeke na lege ni ape nga ti pete goro, même si ala yeke na yâ ti mbeni ndo so ayeke nzoni wala ala wara anzoni fango ye na ndo ti anzoni sarango ye. Awandara atene so a yeke ndali ti mara ti aye tongaso la si agouvernement alingbi pëpe ti zi tënë ti goro. Mingi ti ala apensé so ala lingbi ti kiri na tënë ti petengo goro nga na akpale ti pekoni na gbe ni.

YORÖ NI: Mbeni bungbi so ayeke tiri ndali ti tënë ti petengo goro, na États-Unis, atene so ti tiri ndali ni, a yeke nzoni agouvernement awa azo ti “sara ye nzoni, ti nzi pëpe nga ti sara ye tongana azo so ahinga ti gbu li ti ala.” Royaume ti Nzapa awa azo ti sara aye so, me nga a yeke aye so lo hunda na azo ti gbe ti lo ti sara la. Bible atene so “azo ti sarango bê ti ye” nga na “azo ti mvene” ayeke ga ahéritier ti Royaume ni ape.—1 aCorinthien 6:9-11; Apocalypse 21:8.

Azo alingbi ti manda ti duti na anzoni sarango ye ni so tongana ti aChrétien ti ândö. Na tapande, lani na ngoi so mbeni disciple, so iri ti lo ayeke Simon, aye ti vo yingo vulu na tïtî abazengele, ala ke ti yeda na goro ni nga ala tene na lo: “Changé bê ti mo ndali ti sioni ti mo so.” Na ngoi so Simon ni abâ kpale so sioni nzara ni so aye ti ga na ni, lo hunda na abazengele ni ti sambela ndali ti lo si lo lingbi ti hon ndo ni.—Kusala 8:18-24.

YE SO MO LINGBI TI SARA TI DUTI ANDE NA GBE TI ROYAUME NI

Atâa mo yeke ti mara wa, mo nga kue mo lingbi ti duti ande na gbe ti Royaume ti Nzapa (Kusala 10:34, 35). Kapa ti fango ye so Royaume ni azia na sese, na ndo ti dunia mobimba kue laso, alingbi ti fa na mo ye so mo lingbi ti sara. A-Témoin ti Jéhovah ayeke duti ande na ngia ti fa na mo tongana nyen la ala yeke manda Bible, senge senge, na azo na yanga-da ti ala. Mandango ye ni so alingbi ti mû gi penze-ngbonga bale-oko awe, yenga na yenga. Na popo ti aye so mo yeke manda ande, mo lingbi nga ti hinga ambeni tënë na ndo ti “nzoni tënë ti royaume ti Nzapa”, so a ndu nga ye so Royaume ni ayeke sara ande ti zi tënë ti petengo goro ti andokua ti Letäa (Luc 4:43). E wa mo ti bâ aTémoin ti Jéhovah ti ndo so mo yeke dä wala ti gue na ndo ti site ti e, jw.org.

Mo ye ti tene a ga a manda Bible na mo, na da ti mo, senge senge?

^ par. 8 Jéhovah ayeke iri ti Nzapa na yâ ti Bible.

^ par. 22 Na tapande, bâ Tour ti Ba Ndo ti 1 octobre 2012, na Français, na mbage so atene “Peut-on être honnête dans un monde corrompu ?”

TI HINGA AMBENI TËNË

Nzoni tënë ni ayeke so wa?

Gi ti hinga tënë ti Nzapa ni ayeke so wa, ndani so a yeke kota ye ti fa ni hio nga na ye so mo lingbi ti sara.