Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO JANVIER 2015

Mo hinga?

Mo hinga?

Na yâ ti Bible, tënë “eunuque” aye ti tene nyen?

Mbeni eunique ti kodoro ti Assyrie

Ngoi na ngoi, tënë “eunuque” ni aye peut-être ti sara tënë ti mbeni koli so a zi para ti kolobo ti lo. Na ngoi ti ândö, a yeke zi para ti korobo ti ambeni koli ti punir ala wala na ngoi so a mû ala na ngbâa. Akoli so a yeke na confiance na ala nga so a zi para ti kolobo ti ala, a yeke zia ala ti bâ ndo na ndo ti awali ti gbia. Na tapande, Hégaï nga na Saasgaz, so ayeke lani ambeni eunuque, asara kua na da ti Assuérus, gbia ti Perse, so a tene lo yeke Xerxes I. Kua ti ala ni ayeke ti bâ ndo na ndo ti awali ti Gbia ni, so ayeke agbia-wali nga na ala ti so ayeke agbia-wali ape.—Esther 2:3, 14.

Me, a yeke pëpe azo kue so a iri ala a-eunuque, na yâ ti Bible, la si a zi para ti kolobo ti ala. Ambeni wandara atene so a lingbi nga ti sara kusala na tënë “eunuque” ni ti sara na tënë ti mbeni kota zo so ayeke sara kua na yâ ti yangbo ti gbia. Tongana e bâ tapande ti Ebed-melech, so asara kua lani legeoko na Jérémie, nga na ti zo ti kodoro ti Éthiopie, so a fa iri ti lo ape si Philippe afa lani tënë na lo, e lingbi ti tene so tënë ni so ayeke na lege ni. Ebed-melech ayeke lani mbeni kota zo ti kodoro, ndali ti so lo yeke sara lani lisoro, lê na lê, na Gbia Sédécias (Jérémie 38:7, 8). Nga, a fa zo ti kodoro ti Éthiopie so, so ayeke gue lani “na Jérusalem ti voro Nzapa”, tongana mbeni zo ti batango amosoro ti da ti gbia.—Kusala 8:27.

Aberger ti ândö ayeke kangbi lani popo ti ataba nga na angasa ndali ti nyen?

Na ngoi so Jésus ayeke sara lani tënë ti lâ ti fango ngbanga so ayeke ga ande, lo tene: “Na ngoi so Molenge ti zo ayeke ga na yâ ti gloire ti lo . . . lo yeke kangbi popo ti azo tongana ti so berger ayeke kangbi popo ti angasangbaga [wala ataba] na angasa.” (Matthieu 25:31, 32). Aberger ayeke kangbi ka popo ti anyama so ngbanga ti nyen?

Mingi ni ka, ataba nga na angasa ayeke tambela na groupe nga ala yeke te pere place oko na kota lâ. Na bï, a yeke bungbi ala na yâ ti agbagba ti bata ala ndali ti asioni nyama ti ngonda, azo ti nzi nga na dê (Genèse 30:32, 33; 31:38-40). A yeke kangbi yâ ti ataba ni nga na angasa ni na yâ ti agbagba nde nde ti bata ataba so ayeke sara ka ti ala ye na ngangu pëpe, mbilimbili awali ni nga na akete ni, si angasa so ayeke sara ka ye na ngangu mingi asara sioni na ala ape. Mbeni buku (All Things in the Bible) atene so aberger ayeke kangbi nga popo ti ataba na angasa na ngoi so “a ye ti tene ala bungbi, a ye ti pete ngu ti më ti ala nga ti fâ kuä ti tere ti ala.” Tapande so Jésus amû so aluti na ndo ti aye so azo ti Israël ti ândö ayeke bâ ka wala ayeke sara ka lani, ngbanga ti so ataba nga na aberger ayeke lani ka mingi.