Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Décembre 2014

 KOTA MAMA-TENE NI | MO LINGBI TI GA NDURU NA NZAPA

Mo yeke sara ka lisoro na Nzapa?

Mo yeke sara ka lisoro na Nzapa?

Atâa a yeke lê na lê, na lege ti téléphone, Internet, vidéo wala mbeni lettre, akota kamarade ayeke sara lisoro lakue na popo ti ala tongana ala wara lege ti sara ni. Tongaso, ti ga nduru na Nzapa, e bezoin lakue ti sara lisoro na lo. Me, e yeke sara ni tongana nyen?

E lingbi ti sara tënë na Jéhovah na lege ti sambela. Me, ti sambela Nzapa ayeke nde na lisoro so e yeke sara na mbeni senge mba ti e zo. Na ngoi so e yeke sambela, a yeke nzoni e hinga so e yeke sara tënë na Zo so asara aye kue, so ayeke Lo ti nduzu ahon kue. Ni la, ye so ayeke pusu e ti sambela lo na nengo lo nga na kpengo mbeto ti lo. Nga, ti tene Nzapa ayeda na sambela ti e, a yeke nzoni e sara ye ague oko na ambeni ye so a hunda na e. Zia e bâ ambeni ye ni ota.

Kozo ni, a yeke nzoni ti sambela gi Jéhovah Nzapa lo oko, me pëpe Jésus, mbeni “saint” wala mbeni yanda (Exode 20:4, 5). Bible atene polele, a tene: “Na yâ ti aye kue, na lege ti sambela, na lege ti vorongo tere na Nzapa nga na sambela ti kiringo singila, ala hunda na Nzapa aye so agbu bê ti ala.” (aPhilippien 4:6). Use ni, a lingbi e sambela Nzapa gi na iri ti Molenge ti lo, so ayeke Jésus Christ. Jésus lo wani, lo tene: “Zo kue so aga na Babâ ayeke ga gi na lege ti mbi.” (Jean 14:6). Ota ni, asambela ti e adoit ti gue oko na ye so bê ti Nzapa aye. Bible atene: “Atâa ye wa e hunda, tongana a gue oko na ye so bê ti lo aye, lo yeke mä e.” *1 Jean 5:14.

Azo use so asara kamarade na popo ti ala ayeke sara lisoro lakue tongana lege ayeke dä

Ti tâ tënë ni, songo ti ambeni kamarade ayeke ninga tongana ala use kue ayeke sara tënë na mba. Tongana ti so akamarade ayeke na ngia ti sara lisoro na popo ti ala, a yeke nzoni e zia nga lege na Nzapa ti sara tënë na e. Nga, na ngoi so lo yeke sara tënë, a lingbi e mä lo. Mo hinga tongana nyen la Nzapa ayeke sara tënë na e?

Laso, Jéhovah Nzapa ayeke sara “tënë” na e na lege ti tënë ti lo, so ayeke na yâ ti Bible (2 Timothée 3:16, 17). E tene tongaso ngbanga ti nyen? Na tapande, tara ti bâ so mo wara mbeni lettre ti mbeni kota kamarade ti mo. Na ngoi so mo yeke diko ni, a yeke kpa mo bâ mo tene kamarade ti mo ni la angbâ ti sara tënë na mo, atâa so lo yeke na tere ti mo ge ape. Legeoko nga, na ngoi so mo yeke diko Bible, mo yeke zia lege na Jéhovah ti sara tënë na mo la. Ni la, Gina, so e sara fade tënë ti lo na kozo article ni so, atene: “Mbi pensé, tongana mbi ye ti tene Nzapa abâ mbi tongana kamarade ti lo, a lingbi mbi diko ‘lettre’ ti lo so lo tokua na e, so ayeke Bible.” Lo kiri, lo tene: “Dikongo Bible lakue asara si mbi ga nduru mingi na Nzapa.” Mo ye ti tene Jéhovah asara tënë na mo lâ na lâ? Tongana mo ye tongaso, e wa mo ti diko Bible lakue, a yeke mû maboko na mo ande ti ga nduru na Nzapa.

^ par. 5 Ti hinga ambeni tënë na ndo ti ye so mo lingbi ti sara ti ga nduru na Nzapa na yâ ti sambela, bâ chapitre 17 ti buku Bible afa nyen biani?, so aTémoin ti Jéhovah asigigi na ni.