Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO DÉCEMBRE 2014

 KOTA MAMA-TENE NI | MO LINGBI TI GA NDURU NA NZAPA

Mo hinga iri ti Nzapa nga mo yeke sara kua na ni?

Mo hinga iri ti Nzapa nga mo yeke sara kua na ni?

Eskê mo peut ti fa mbeni kota kamarade ti mo so mo hinga iri ti lo ape? A yeke duti ngangu. Irina, mbeni wali ti kodoro ti Bulgarie, atene: “Tongana mo hinga iri ti Nzapa ape, a yeke duti ngangu na mo ti ga nduru na lo.” Me ye ti nzoni ni ayeke so, e bâ fade na yâ ti article so ahon atene Nzapa aye si mo ga nduru na lo. Ni la, na lege ti Bible, lo fa tere ti lo wani na mo, lo tene: “Mbi yeke L’Éternel [wala “Jéhovah”, FD], so ayeke iri ti Mbi.”—Ésaïe 42:8.

Na lege ti Bible, Nzapa afa tere ti lo wani na e, lo tene: “Mbi yeke L’Éternel [wala “Jéhovah”, FD], so ayeke iri ti mbi.”—Ésaïe 42:8.

Eskê Jéhovah aye biani ti tene mo hinga iri ti lo nga mo sara kua na ni, wala lo ye ape? Zia e bâ ye so: Iri ti Nzapa, so a sû ni na agere-mbeti osio ti yanga ti Hébreu, asigigi fani 7000 na yâ ti mbage ti Bible so alondo na Genèse ti si na Malachie. Ye so afa so iri ti Nzapa ayeke mingi ahon ambeni iri so a sara tënë ni na yâ ti Bible. A yeke polele so Jéhovah aye si e hinga iri ti lo nga e sara kua na ni. *

Mingi ni ka, sarango kamarade ayeke to nda ni na popo ti azo use so ayeke gi ti hinga iri ti mba. Mo hinga iri ti Nzapa?

Ye oko, ambeni zo alingbi ti pensé so, teti so Nzapa ayeke nzoni-kue nga ngangu ti lo ahon ti aye kue, tongana e sara kua na iri ti lo, andâ e ne lo ape la. Ti tâ tënë ni, a yeke na lege ni ape ti sara kua na iri ti Nzapa kirikiri, legeoko tongana ti so mo lingbi nga pëpe ti sara kua kirikiri na iri ti kota kamarade ti mo. Me, Jéhovah aye si azo so aye lo ane iri ti lo nga ala sara kua na ni (Psaume 69:31, 32; 96:2, 8). Girisa ape so Jésus afa lani na adisciple ti lo ti sambela tongaso: “Babâ ti e so mo yeke na yayu, zia a sara si iri ti mo aga nzoni-kue.” E lingbi ti sara si iri ti Nzapa aga nzoni-kue na sarango si azo ahinga ni. Sarango tongaso ayeke sara si e ga nduru mingi na lo.—Matthieu 6:9.

Bible afa so Nzapa ayeke bi bê ti lo mbilimbili na “ala [so abi bê] ti ala na iri ti Lo.” (Malachie 3:16). Na ndo ti mara ti azo tongaso, Jéhovah amû zendo so, lo tene: “Fade Mbi yä lo na nduzu teti lo hinga iri ti Mbi. Fade lo di iri ti Mbi, na fade Mbi kiri tënë na lo; fade Mbi yeke na lo na yâ ye ti vundu.” (Psaume 91:14, 15). Ti hinga iri ti Jéhovah nga ti sara kua na ni ayeke biani kota ye tongana e ye ti lë kpengba songo na lo.

^ par. 4 Mawa ni ayeke so, na yâ ti aBible mingi so a kiri peko ni, a zia iri ti Nzapa dä pëpe, atâa so a sigigi mingi na yâ ti mbage ti Bible so alondo na Genèse ti si na Malachie, so azo mingi airi ni Testament ti Giriri. Me, ala zi iri ti Nzapa ni na ala zia “Seigneur” wala “Nzapa” na place ni. Ti hinga ambeni tënë na ndo ti tënë so, bâ lembeti 195-197 ti buku Bible afa nyen biani?, so aTémoin ti Jéhovah asigigi na ni.