Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

TOUR TI BA NDO DÉCEMBRE 2014

 KOTA MAMA-TENE NI | MO LINGBI TI GA NDURU NA NZAPA

Mo bâ so mo yeke nduru na Nzapa?

Mo bâ so mo yeke nduru na Nzapa?

“Ti duti na kpengba songo na Nzapa ayeke sara si mo yeke na siriri nga mo yeke gi bê ti mo ape. A kpa mo bâ mo tene Nzapa ayeke bibe ti lo lakue na nzoni duti ti mo.”—CHRISTOPHER, MBENI MASEKA-KOLI NA GHANA.

“Nzapa abâ mo na yâ ti akpale ti mo kue, lo ye mo mingi nga lo yeke bibe ti lo na mo atâa mo hunda ni lâ oko ape.” —HANNAH, SO AYEKE NA NGU 13, NA ALASKA, ÉTATS-UNIS.

“Tongana mo hinga so mo yeke na nzoni songo na Nzapa, a yeke dë bê ti mo mingi!”—GINA, MBENI WALI SO AYEKE NA NGU 40 NA NDO NI, NA JAMAÏQUE.

A yeke gi Christopher, Hannah nga na Gina la ayeke na mara ti bibe ni so ape. Azo mingi, na yâ ti dunia mobimba, ahinga so Nzapa abâ ala tongana akamarade ti lo. Ka ti mo? Mo bâ so mo yeke nduru na Nzapa? Wala mo ye ti gi ti ga nduru mingi na lo? Peut-être mo hunda tere ti mo, mo tene, ‘Senge zo alingbi tâ ti sara kamarade na Nzapa ti ngangu ahon kue la? Tongana a yeke tongaso, zo ni ayeke sara ni tongana nyen?’

ZO ALINGBI TI GA NDURU NA NZAPA

Bible afa so zo alingbi ti ga kamarade ti Nzapa. Na tapande, Bible atene so Nzapa airi lani Abraham “ndeko [wala kamarade] ti Mbi”. (Ésaïe 41:8). Bâ nga so, na Jacques 4:8, a tisa e, a tene: “Ala ga nduru na Nzapa, na fade lo yeke ga nduru na ala.” Tongaso, a yeke polele so zo alingbi biani ti lë kpengba songo na Nzapa, wala ti ga kamarade ti lo. Me, so zo abâ Nzapa ape so, mo yeke sara tongana nyen ti “ga nduru” na lo nga ti duti na nzoni songo na lo?

Ti kiri tënë na hundango ndo so, zia e bâ ye so ayeke pasêe ka na ngoi so ambeni zo aye ti sara kamarade. Mingi ni, a yeke to nda ni na popo ti azo use so ayeke gi ti hinga iri ti mba. Na pekoni, teti so lakue ala yeke sara lisoro na mba, ala yeke fa atënë ti bê ti ala na popo ti ala, ge la songo ti ala ni ayeke maï. Nga, tongana ala yeke gi ti sara ambeni ye ndali ti mba, songo ti kamarade ti ala ni ayeke kpengba. Ye so aye ti fa so tongana mbeni zo aye ti lë kpengba songo na Nzapa, a yeke nzoni ala sara mara ti aye ni so nga na popo ti ala. Zia e bâ tongana nyen ti sara ni.