Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NOVEMBRE 2014

 KOTA MAMA-TENE NI | SATAN AYEKE DÄ BIANI?

Satan ayeke gi mbeni sioni ye?

Satan ayeke gi mbeni sioni ye?

A yeke ngangu na zo pëpe ti tene so Satan, so e yeke diko ka tënë ti lo na yâ ti Bible, ayeke gi asioni ye. Me a yeke biani ye so Bible afa la? Tongana a yeke tongaso, ka ngbanga ti nyen la si Bible atene so Satan asara lisoro lani na Jésus Christ nga na Nzapa ti ngangu ahon kue? Zia e bâ ambeni mara ti lisoro ni so use tongaso.

NGOI SO SATAN ASARA LISORO LANI NA JÉSUS

Lani, na ngoi so Jésus akomanse kua ti lo na sese ge, Zabolo atara lo fani ota. Kozoni, Satan atara ti pusu Jésus ti mû ngangu so Nzapa amû na lo ti kaï gi na nzara ti lo wani. Na pekoni, Zabolo ahanda Jésus ni ti zia fini ti lo na lê ti kuâ nga ti gboto lê ti azo na ndo ti lo wani. Na nda ni, Satan atene na Jésus so ni yeke mû na lo akomandema ti dunia ni kue, me gi tongana lo kuku lo voro gi ni kete awe. Me, Jésus ake atara ni ota kue, na lakue lo kiri tënë na Satan gi na lege ti Bible.—Matthieu 4:1-11; Luc 4:1-13.

Jésus ayeke sara lisoro lani na zo wa la? Na mbeni sioni ye so ayeke na yâ ti lo wani la? Tongana ti so Bible atene, “a tara lo [Jésus] na yâ ti aye kue legeoko tongana e, me a wara siokpari na yâ ti tere ti lo pëpe.” (aHébreu 4:15). Bible akiri atene: “Lo sara siokpari oko pëpe, na a wara tënë ti handango zo na yanga ti lo pëpe.” (1 Pierre 2:22). Jésus ayeke ti lo mbilimbili, na asarango ye ti lo ayeke lani gi na lege ni. Lo zia lege lâ oko ape na mbeni sioni ye ti tene amaï na yâ ti bê ti lo. A yeke polele so, Jésus ayeke sara lani lisoro pëpe na mbeni sioni ye so ayeke na yâ ti lo wani, me lo yeke sara lani lisoro na mbeni zo so ayeke dä biani.

Oko lisoro ni so afa polele so Satan ayeke mbeni zo so ayeke dä biani.

  • Dabe ti mo so Zabolo atene lani na Jésus so ni yeke mû na lo akomandema ti dunia kue tongana lo kuku lo voro ni (Matthieu 4:8, 9). Tongana Satan ayeke fade tâ zo ape, andâ nda ti tënë ni so ayeke nga dä ape. Na ndo ni, Jésus adë kite pëpe na komandema ti Satan so lo pika kate ti lo na ndo ni.

  • Na peko ti so Jésus ake atara ni kue awe, Zabolo azia “Jésus juska ti ku na mbeni ngoi so alingbi.” (Luc 4:13). Na yâ ti mbage so ge, Satan ayeke gi mbeni sioni ye? wala lo yeke mbeni wato so aye gi ti ngbâ ti sara sioni.

  • Bâ so “a-ange aga na ato nda ti sara kua” na Jésus (Matthieu 4:11). A-ange so ayeke lani biani zo ti yingo si ala ga ti kpengba Jésus nga ti mû maboko na lo so? Biani, ala yeke lani azo ti yingo. Tongana a yeke tongaso, ndani nyen ti tene so Satan ayeke mbeni ye nde me pëpe tâ zo ti yingo?

NGOI SO SATAN ASARA LISORO LANI NA NZAPA

Use lisoro ni so ayeke lani na ndo ti Job, mbeni koli so akpe mbeto ti Nzapa. Na yâ ti mbaï ni, a sara tënë  ti alisoro use so akporo lani na popo ti Zabolo na Nzapa. Na yâ ti alisoro ni use kue, Nzapa agonda Job ndali ti so lo ngbâ be-ta-zo na Nzapa ni. Satan atene lani so Job ayeke voro Nzapa gi ndali ti intérêt ti lo wani. Lo tene so Job angbâ be-ta-zo na Nzapa ndali ti so Nzapa amû na lo aye ti nzoni. Ti tâ tënë ni, Zabolo aye lani ti fa so ni la ni hinga Job nzoni mingi ahon Nzapa. Jéhovah azia lege na Satan ti ndu aye ti Job ni kue, amolenge ti lo, même tere ti Job ni wani. * Tongana ngoi ayeke hon, a ga ti bâ so Jéhovah ayeke na raison ti gonda Job, na Satan la ayeke zo ti mvene. Ni la, Nzapa airi tufa na ndo ti Job ndali ti so lo ngbâ be-ta-zo.—Job 1:6-12; 2:1-7.

Na yâ ti lisoro so Jéhovah Nzapa na Satan asara so, Jéhovah ni ayeke sara tënë lani na mbeni sioni ye so ayeke na yâ ti tere ti lo Jéhovah Nzapa ni wani la? Bible atene: “Lege ti Nzapa alingbi kue.” (2 Samuel 22:31). A tene nga, a tene: “Jéhovah Nzapa ayeke nzoni-kue, nzoni-kue, nzoni-kue; lo yeke Lo ti ngangu ahon kue.” (Apocalypse 4:8). Tënë nzoni-kue aye ti sara tënë ti ye so saleté andu ni ape, so siokpari ayeke na tere ni kete ape. Jéhovah ayeke mbilimbili-kue nga zo alingbi ti wara mbeni sioni ye kete tongaso na yâ ti tere ti lo ape.

Lisoro so Satan na Nzapa asara aga biani na akpale lani na ndo ti Job

Me, peut-être ambeni zo atene so même Job ni nga kue ayeke lani tâ zo pëpe, tongaso lisoro ni so kue ayeke nga lani tâ ye ape. Me tënë ti ala ni so agbu ngu la? Ambeni versê ti Bible afa Job tongana mbeni zo so ayeke lani biani na ndo ti sese. Na tapande, na Jacques 5:7-11, e yeke bâ so a sara tënë ti Job tongana mbeni nzoni tapande ti pusu aChrétien ti gbu ngangu na yâ ti aye ti ngangu. Nga, tapande ti lo ni alingbi ti dë bê ti e ti bâ so Jéhovah ayeke iri tufa na ndo ti mara ti gbungo ngangu ni so. Tongana Job ayeke lani mbeni tâ zo ape nga tënë ti tara so Satan aga na ni na ndo ti lo ayeke gi mbeni tënë ti tere senge, andâ tapande ti lo ni so ayeke sara ye oko na ndo ti zo pëpe, ni la ape? Nga, na Ézéchiel 14:14, 20, a sara tënë ti akoli ota so sarango ye ti ala ayeke lani mbilimbili, a yeke zo tongana Noé, Daniel nga na Job ni. Legeoko tongana Noé nga na Daniel, Job ayeke mbeni zo so ayeke biani lani dä, lo yeke mbeni koli so ayeke na kpengba mabe. Tongana Job ayeke lani dä, wato ti lo ni wala zo so atara lo lani so ayeke nga dä, ni la ape?

A yeke polele so, Bible afa Satan tongana mbeni zo ti yingo so ayeke dä biani. Peut-être mo hunda tere ti mo, mo tene, ‘Lo yeke sara sioni na mbi nga na afami ti mbi na yâ ti dunia so laso ape?’

KA TI NGOI TI E AYEKE TONGANA NYEN?

Tara ti bâ so, gi gbagburu tongaso, mbeni groupe ti asioni zo amû yâ ti gbata ti mo kue. Biani, nzoni duti ti azo ti yâ ti ndo ni nga na sarango ye ti tere ti ala ayeke buba kue. Bâ fadeso mara ti oko ye ni so: Satan na adémon ti lo, so ayeke azo ti yingo so ayeke dä biani na so asara kpengbango-li na Nzapa, ayeke fadeso nduru na tere ti sese. Ye ti pekoni alingbi ti duti so wa? Bâ gi asango ti aye so ayeke si na kodoro so mo yeke dä nga na ati so ayeke pasêe na ambeni kodoro nde:

  • Mo yeke bâ tongana nyen la asarango ye ti sioni nga na asarango ye ti ngangu na zo amû ndo laso, atâa so dunia mobimba ayeke gi ti kanga lege na ni?

  • Mo yeke bâ tongana nyen la tënë ti sarango yorö wala ti atoro amû yâ ti afilm laso, atâa so ababâ na amama ayeke gi bê ti ala mingi na ndo ni?

  • Mo yeke bâ tongana nyen la aye tongana ngu, gbako nga na anyama ayeke buba ti gue gi na ni, atâa ngangu kue so azo ayeke sara ti bata ni?

  • Eskê a kpa mo bâ mo tene mbeni sioni ye ayeke na yâ ti dunia ni so, so ayeke pusu azo ti sara gi sioni ye ti gue na ni?

Bâ tënë so Bible atene ti fa zo so ayeke na peko ti akpale ni so, a tene: “A bi kota sioni nyama so akpa ngbo so, ngbo ti giriri, lo so a iri lo Zabolo na Satan, lo so ayeke handa sese kue so azo ayeke dä; a bi lo na sese, na a bi nga a-ange ti lo ni legeoko na lo. . . . Mawa na sese nga na ngu-ingo, ngbanga ti so Zabolo azu na mbage ti ala, lo yeke na kota ngonzo, teti lo hinga so lo yeke na ngoi mingi pëpe.” (Apocalypse 12:9, 12). Na pekoni so azo mingi abâ aye ni so kue, ala ga ti bâ so Satan ayeke mbeni sioni zo ti yingo, so dunia ni kue ayeke na tïtî lo.

Peut-être mo yeke gi bê ti mo na ndo ti ye so mo lingbi ti sara ti bata tere ti mo. Mo yeke na raison ti gi bê ti mo tongaso. Article ti peko ayeke fa na mo ambeni ye so mo lingbi ti sara.

^ par. 12 Jéhovah ayeke iri ti Nzapa na yâ ti Bible.