Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NOVEMBRE 2014

 KOTA MAMA-TENE NI | SATAN AYEKE DÄ BIANI?

A yeke nzoni e sara mbeto ti Satan?

A yeke nzoni e sara mbeto ti Satan?

Legeoko tongana ti sioni gaz so lê abâ ni ape, Satan nga kue zo alingbi ti bâ lo ape na lo yeke sioni mingi

Mbeni sioni gaz ayeke dä so a iri ni monoxyde de carbone, na a yeke ngangu na zo ti bâ ni ndali ti so couleur ni ayeke dä ape nga fion ni ayeke dä ape, na lo lingbi ti sara sioni na azo sân ti tene ala hinga. Sioni gaz ni so la ayeke peut-être na gunda ti kuâ ti azo mingi, na yâ ti dunia mobimba, so akui kuâ ti poison. Me, mo bezoin ti sara mbeto ape. Aye mingi ayeke dä so alingbi ti mû maboko na mo ti hinga gaz ni so nga ti bata tere ti mo. Na lege ti ndara, azo mingi azia ambeni alarme na yâ ti da ti ala nga ala yeke duti nduru ti dengi mê na toto ti alarme ni.

Legeoko tongana ti sioni gaz so, Satan nga kue zo alingbi ti bâ lo ape, a yeke ngangu na azo ti hinga lo nga lo yeke sioni mingi. Me, Nzapa azia e gi tongaso ape. Tongana mo sara kua na aye so Nzapa amû ni na e, mbeto ti Satan ayeke sara mo pëpe. Zia e bâ aye ni:

Liberté ti soro ye ti bê ti mo. Jacques 4:7 atene na e, a tene: “Ala ke Zabolo, na fade lo yeke kpe yongoro na tere ti ala.” Atâa so Satan ayeke na ngangu, ye so mo ye ape, lo lingbi pëpe ti gbu mo na ngangu ti sara ni. Mo yeke na liberté ti soro ye so bê ti mo aye. Kozo Pierre 5:9 atene: “Ala luti ti ke [Zabolo], ala kpengba na yâ ti mabe.” Girisa ape so, lani tongana Satan atara Jésus fani ota, Jésus adö sese na lo, a sara si lo zia lege ti Jésus ni (Matthieu 4:11). Mo nga kue mo lingbi ti soro ti dö sese na Satan ni.

Sarango kamarade na Nzapa. Jacques 4:8 awa e ti “ga nduru na Nzapa”. Jéhovah wani atisa mo ti sara kamarade na lo. Mo yeke sara ni tongana nyen? Kozo ye so a yeke nzoni mo sara ayeke ti manda ti hinga aye mingi na ndo ti Nzapa na lege ti Bible (Jean 17:3). Aye so mo manda na ndo ti Jéhovah ayeke pusu ande mo ti ye lo, na pekoni, a yeke pusu mo ti sara ye so bê ti lo aye (1 Jean 5:3). Tongana mo ga nduru na Nzapa, Babâ ti mo ti yayu, lo yeke sara ti lo tongana nyen? Jacques atene so Nzapa ‘ayeke ga nduru na mo.’

Jéhovah aleke ambeni ye na lege ti yingo ti bata na mo

Lo mû yanga ti bata e. A-Proverbe 18:10 atene: “Iri ti L’Éternel ayeke tour ti ngangu; zo ti mbilimbili akpe dä na lo bata tere ti lo.” Tënë so aye ti tene pëpe so iri ti Nzapa ayeke mbeni ye ti magie so zo ayeke mû ni ti bata na tere ti lo. Me, a ye ti fa so azo so ane iri ti Nzapa alingbi ti iri ndo na lo na ngoi kue ti tene lo bata ala.

Mbeni nzoni tapande. Kusala 19:19 asara tënë na e na ndo ti azo so aga lani aChrétien fini fini na Éphèse, a tene: “Gbâ ti azo so ayeke sara lani aye ti magie aga na abuku ti ala legeoko, na ala zö ni na lê ti azo kue. A diko ngere ni na a bâ so a lingbi na alê  ti nginza ti argent saki bale-oku.” * A-Chrétien ni so azö aye ti ala kue so andu aye ti asioni yingo, atâa so a yeke aye ti nginza mingi. Tapande ti ala ni so alingbi ti mû maboko mingi na e laso. Sarango aye ti magie nga na aye ti asioni yingo amû yâ ti dunia kue laso. Même aye kue so andu asioni yingo nga na ambeni sarango yorö, so akpa ye so ayeke sioni ape, alingbi ti pusu azo ti tï na gbe ti asioni yingo. Ni la, a yeke kota ye ti sara kue ti ndu mara ti aye tongaso ape.—Deutéronome 18:10-12.

Teti angu 50 tongaso, Rogelio, so e sara fade tënë ti lo na kozo article ni so, amä na bê kozo ape so Zabolo ayeke dä. Me na pekoni, lo kiri lo bâ yâ ti bango ndo ti lo ni. Ngbanga ti nyen? Rogelio atene: “Mbi wara mbeni Bible, na kozo ti tene mbi wara ni na yâ ti gigi ti mbi la. Aye so mbi manda na yâ ti Bible ni la asara si mbi yeda na bê ti mbi kue so Zabolo ayeke dä biani. Nga, a bata mbi si mbi tï pëpe na yâ ti ahanda ti lo.”

“Aye so mbi manda na yâ ti Bible la asara si mbi yeda na bê ti mbi kue so Zabolo ayeke dä biani. Nga, a bata mbi si mbi tï pëpe na yâ ti ahanda ti lo”

Mo ye ti bâ lango so Satan ayeke duti ande dä encore ape? Biani, mo lingbi ti bâ ni. Bible asara tënë ti mbeni ngoi so ayeke ga, so a yeke bi Zabolo, lo so ayeke handa azo mingi, “na yâ ti lac ti wâ na soufre”. (Apocalypse 20:10). Me, wâ na soufre alingbi pëpe ti sara mbeni sioni ye na acréature ti yingo so lê abâ ala pëpe. Tongaso, lac ti wâ ni aye gi ti sara tënë ti futingo Satan biaku biaku. Satan ayeke duti ande dä mbeni pëpe biani biani. So ngia si ayeke duti ande na popo ti azo so aye Nzapa!

Me kozo ti si na lango ni so, a lingbi mo ngbâ ti manda ye na ndo ti Jéhovah nga na ndo ti alege ti lo kue. * Tara ti bâ so mo yeke ande na fini na ngoi so a yeke tene na mo a tene, “Satan ayeke dä ape!”

^ par. 8 Tongana nginza ti argent so a sara tënë ni ge ayeke denier ti azo ti Rome, andâ wungo ti nginza ni so alingbi na nginza so a yeke futa na azo 50000 tongaso na yâ ti lango oko. Wungo ti nginza ni akono mingi!

^ par. 11 Ti hinga tënë mingi na ndo ti Satan nga na sarango yorö, bâ chapitre 10 ti buku Bible afa nyen biani? Hunda ni na tïtî mbeni Témoin ti Jéhovah wala diko ni na ndo ti www.jw.org.

TI HINGA AMBENI TËNË

Ye so Nzapa aye ti sara teti sese ayeke nyen?

Bible afa ndani so Nzapa aleke sese, nga lawa si pasi ayeke hunzi. A fa nga sese ni ayeke ga ande nyen nga azo wa la ayeke duti ande na ndo ni.