Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NOVEMBRE 2014

 LISORO NA MBENI ZO

Royaume ti Nzapa akomanse ti komande lawa? (Mbage 2)

Royaume ti Nzapa akomanse ti komande lawa? (Mbage 2)

Atënë so na gbe ni ge afa lisoro so mbeni Témoin ti Jéhovah alingbi ti sara na mbeni zo. Na tapande, mbeni Témoin ti Jéhovah, so e yeke iri lo Cameron, aga ti bâ mbeni koli, so lo fa tënë na lo kozo awe, so iri ti lo ayeke Jean.

NDURU TËNË NA NDO TI BANGO LI TI NEBUCADNETSAR

Cameron: Jean, a nzere na mbi mingi ti kiri ti bâ mo. Nga mbi yeke na ngia so yenga na yenga e yeke manda Bible so. * Tongana nyen, mo yeke nzoni?

Jean: Mbi yeke nzoni, merci.

Cameron: A nzere na mbi so mo yeke nzoni so. Lani, e sara tënë na ndo ti ndani so aTémoin ti Jéhovah atene Royaume ti Nzapa akomanse ti sara kua na ngu 1914. * Tongana ti so e bâ lani, a yeke mbeni prophétie ti yâ ti chapitre 4 ti buku ti Daniel la amû lege na e ti tene tongaso. Mo rappelé na tënë so a tene na yâ ni?

Jean: En, a sara tënë ti bango li ti Gbia Nebucadnetsar na ndo ti mbeni kota keke.

Cameron: A yeke ni la. Na yâ ti bango li ni, Nebucadnetsar abâ mbeni kota keke so ayo juska na yayu. Lo mä mbeni ange ti Nzapa so amû yanga ti tene a fâ keke ni na sese, me a zia gunda ti keke ni nga na agere ni angbâ na yâ ti sese ni. Na peko ti “ngoi mbasambala,” keke ni ayeke kiri ti kono. * E sara nga lani tënë na ndo ti ndani so e tene prophétie ni aga tâ tënë fani use. Mo rappelé na kozo mbage ti prophétie ni so?

Jean: Kozo mbage ti prophétie ni andu Nebucadnetsar ni wani, ni la? Fou atï lani na li ti lo a sara ngu mbasambala.

Cameron: Tâ gi ni la. Fou atï na li ti Nebucadnetsar teti mbeni ngoi, na a zi komandema na tïtî lo. Me kota mbage ti prophétie ni aga tâ tënë na ndo ti komandema ti Nzapa, so a kaï ni teti ngoi mbasambala tongaso. Tongana ti so e bâ lani, ngoi mbasambala ni akomanse na ngoi so a futi Jérusalem na ngu 607 kozo ti Christ. Ti to nda ni na ngoi ni so, mbeni gbia oko tongaso, so akomande na iri ti Jéhovah Nzapa na ndo ti azo ti lo na sese ge, ayeke dä ape. Me, na hunzingo ti ngoi mbasambala ni, Nzapa ayeke zia mbeni fini Gbia na yayu ti tene akomande na ndo ti azo ti lo so ayeke na ndo ti sese ge. So aye ti tene so, na ngoi so ngoi mbasambala ni ayeke hunzi, Royaume ti Nzapa, so ayeke na yayu, ayeke to nda ti sara kua. Ti fadeso, e hinga ngu so ngoi mbasambala ni so ato nda ni dä awe. Me, tongana e hinga ngu so ngoi mbasambala ni ahunzi dä, ge la si e yeke hinga ngoi so Royaume ti Nzapa ni akomanse ti sara kua. Juska ge mo mä yâ ni?

Jean: En, mbi mä yâ ni, a mû maboko na mbi ti rappelé na aye so mbi manda lani so.

Cameron: Nzoni. Zia e to nda ti lisoro ti e ni ti hinga ngu so ngoi mbasambala ni ahunzi dä. Mbi diko fade ambeni ye na ndo ti tënë ni so ti rappelé tere ti mbi na ambeni kota tënë ti yâ ni. Mbi yeke tara ti fa na mo ni.

Jean: Nzoni.

 NGOI MBASAMBALA NI AHUNZI, LÂ TI NDA NI AKOMANSE

Cameron: So lani prophétie ni aga tâ tënë na ndo ti Nebucadnetsar, angoi mbasambala ni aye lani ti sara tënë ti angu mbasambala. Me ti so aga tâ tënë na ndo ti Royaume ti Nzapa, ngoi mbasambala ni aye pëpe ti sara tënë ti tâ ngu mbasambala.

Jean: Mo tene tongaso ngbanga ti nyen?

Cameron: Mbeni ye so apusu mbi ti tene tongaso ayeke so, e bâ fade awe so ngoi mbasambala ni ato nda ni lani na ngoi so a futi Jérusalem na ngu 607 kozo ti Christ. Tongana e komanse ti diko ye ni na ngu ni so, ngu mbasambala ni ayeke hunzi na ngu 600 kozo ti Christ. Me mbeni ye oko so asi na yâ ti ngu ni so, so andu komandema ti Nzapa, ayeke ti lo dä ape. Na mbage, tongana ti so e bâ ni lani awe, angu ngbangbo mingi na pekoni, na ngoi so Jésus aga na ndo ti sese ge, lo fa lani so ngoi mbasambala ni ade ti hunzi ape.

Jean: Oui, mbi rappelé na ni fadeso awe.

Cameron: Ni la, angoi mbasambala ni aye pëpe ti sara tënë ti tâ ngu mbasambala. Me, a ye ti sara tënë ti mbeni ngoi so aninga.

Jean: A ninga ngu oke?

Cameron: Buku ti Apocalypse, so ague oko na buku ti Daniel, amû maboko na e ti hinga mbilimbili lawa la ngoi mbasambala ni ayeke hunzi. A sara tënë ti mbeni ngoi ota na ndambo so ayeke lango 1260. * Tongaso, tongana a mû ngoi ota na ndambo so fani use, a yeke wara ngoi mbasambala wala lango 2520. Mo mä yâ ni?

Jean: En. Me mbi bâ ti mbi ye so afa atene Royaume ti Nzapa akomanse ti sara kua na ngu 1914 so ape.

Cameron: Bon, zia e bâ wala e lingbi ti tingbi aye ni. Na ambeni ngoi, na yâ ti aprophétie ti Bible, lango oko aye ti sara tënë ti ngu oko. * Tongana e diko lango oko teti ngu oko, ngoi mbasambala ni ayeke sara angu 2520. Tongana e komanse ti diko angu 2520 na ngu 607 kozo ti Christ, a yeke gue na e ti si na ngu 1914. * So e si na ngu 1914, a fa so ngoi mbasambala ni ahunzi lani na ngu 1914 ni, na a yeke na ngu 1914 ni so la Jésus akomanse ti komande tongana Gbia ti Royaume ti Nzapa. Nga a yeke nzoni e hinga so, depuis ngu 1914 la akota kpale akomanse ti si na yâ ti dunia so, na Bible asara tënë ti akpale ni so kozo awe, so a tene a yeke si na lâ ti nda ni.

Jean: Akpale ni so ayeke so wa?

Cameron: Bâ tënë so Jésus atene, si a sû ni na Matthieu 24:7 so. Na ndo ti ngoi so Jésus ayeke komanse ti komande na ni na yayu, lo tene: “Fade mara ayeke londo na bira na tere ti mbeni mara, na royaume ayeke londo na bira na tere ti mbeni royaume. Fade kota nzara ayeke tï nga sese ayeke yengi, na aye so ayeke si na ando nde nde na peko ti tere.” Bâ so Jésus atene, na yâ ti angoi ni so, kota nzara ayeke tï nga sese ayeke yengi. Kite ayeke dä ape so amara ti akpale ni so asi na yâ ti dunia kue, a yeke ni la ape?

Jean: A yeke ni la.

Cameron: Na yâ ti versê ni so, Jésus asara nga tënë ti bira so ayeke tï na ngoi so lo ga Gbia ti Royaume ti Nzapa. Nga, buku ti Apocalypse asara tënë ti bira so ayeke tï na ndo kue na lâ ti nda ni, me pëpe gi na mbeni ndo oko. * Kozo bira so amû lani ndo ti sese kue akomanse na ngu wa, mo rappelé na ni?

Jean: A yeke na ngu 1914, oko ngu so mo tene  Jésus akomanse ti komande na ni so la! Mbi hinga ni kozo tongaso ape.

Cameron: Tongana e bungbi aye ni so kue ndo oko, so ti tene e mû prophétie so asara tënë ti ngoi mbasambala e tingbi ni na ambeni prophétie ti Bible so andu ngoi ti lâ ti nda ni, e yeke bâ so atënë ni ayeke biani na lege ni. A-Témoin ti Jéhovah amä na bê so Jésus akomanse ti komande tongana Gbia ti Royaume ti Nzapa na ngu 1914, nga so lâ ti nda ni akomanse na oko ngu ni so. *

Jean: Mbi ngbâ ti gi ti mä yâ ni nzoni.

Cameron: Mbi hinga. Tongana ti so mbi tënë lani na mo, mbi nga kue a hunda lani na mbi angoi mingi ti tene mbi mä yâ ti aye ni kue. Me kamême mbi pensé lisoro so e sara so amû maboko na mo ti bâ so, atâa so a sû ngu 1914 na yâ ti Bible ape, ye so aTémoin ti Jéhovah amä na bê na ni na ndo ti ngu ni so aluti gi na ndo ti Bible.

Jean: Ti tâ tënë ni, so aye kue so ala yeke fa aluti na ndo ti Bible, adö ka bê ti mbi mingi. Ala yeke fa ka gi tënë ti li ti ala ape. Me, mbi hunda ka tere ti mbi, mbi tene, ngbanga ti nyen la aye ni ayeke compliqué tongaso. Ngbanga ti nyen la Nzapa atene gi na e, na yâ ti Bible, atene ngu 1914 la ayeke ngu so Jésus akomanse ti komande na yayu awe ape?

Cameron: Hundango ndo ti mo ni ayeke pendere mingi, Jean. Nga, aye mingi ayeke dä na yâ ti Bible so a sara tënë polele na ndo ni kue ape. Me, ngbanga ti nyen la Nzapa asara lani Bible na mbeni lege so a hunda ti tene azo apika li ti ala si ala mä yâ ni? Peut-être e lingbi ti sara tënë na ndo ni mbeni lâ.

Jean: Mbi ye tongaso.

Mbeni tënë ti yâ ti Bible ayeke dä so agbu bê ti mo na so mo ye ti hinga ndani? Mo ye ti hinga ye na ndo ti mbeni ye so aTémoin ti Jéhovah amä na bê dä wala so ala yeke sara ni? Tongana a yeke tongaso, ti peko tongana mo tingbi na aTémoin ti Jéhovah, hunda tënë ni na ala. A yeke nzere ande na ala ti sara lisoro na mo na ndo ni.

^ par. 5 Na lege ti kapa ti mandango Bible so aTémoin ti Jéhovah ayeke sara, ala yeke soro mbeni tënë na ndo ti Bible si ala yeke pika patara na ndo ni na azo.

^ par. 7Tour ti Ba Ndo ti 1 octobre 2014 na mbage so atene, “Lisoro na mbeni zo: Royaume ti Nzapa akomanse ti komande lawa?Mbage 1.

^ par. 9Daniel 4:23-25.

^ par. 24Nombre 14:34; Ézéchiel 4:6.

^ par. 24 Bâ tableau so atene “Bango li ti Nebucadnetsar.”

^ par. 30 Bâ chapitre 9 ti buku Bible afa nyen biani?, so aTémoin ti Jéhovah asigigi na ni. A yeke nga na ndo ti www.jw.org.

TI HINGA AMBENI TËNË