Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO OCTOBRE 2014

 LISORO NA MBENI ZO

Royaume ti Nzapa akomanse ti komande lawa? (Mbage 1)

Royaume ti Nzapa akomanse ti komande lawa? (Mbage 1)

Atënë so na gbe ni ge afa lisoro so mbeni Témoin ti Jéhovah alingbi ti sara na mbeni zo. Na tapande, mbeni Témoin ti Jéhovah, so e yeke iri lo Cameron, ayeke fa tënë na mbeni koli so e yeke iri lo Jean.

“GI” TI HINGA YE

Cameron: Jean, lisoro so mbi na mo e yeke sara ka lakue na ndo ti Bible so anzere na mbi mingi. * Na ngoi ti ndangba lisoro so mbi na mo e sara, mo hunda mbeni tënë na ndo ti Royaume ti Nzapa. Mo hunda lani ti hinga ngbanga ti nyen la aTémoin ti Jéhovah amä na bê so Royaume ti Nzapa akomanse ti komande na ngu 1914.

Jean: Ni la. Mbi diko mbeni mbeti ti ala, na a tene na yâ ni a tene Royaume ti Nzapa akomanse ti komande na ngu 1914. Mbi hinga li ti mbi na ni ape ngbanga ti so ala tene ka atene aye kue so ala mä na bê na ni alondo na yâ ti Bible.

Cameron: A yeke vrai, aye kue so e mä na bê na ni alondo na yâ ti Bible.

Jean: Bon, mbi wani mbi diko Bible kue ahunzi. Me lâ oko mbi wara mbeni versê oko tongaso so a sara tënë ti ngu 1914 dä ape. Mbi gue na yâ ti Bible ti ndo ti Internet mbi pika tënë, “ngu 1914.” Me, mbeni versê oko tongaso asigigi ape.

Cameron: Jean, mbi gonda mo mingi ndali ti araison use. Kozoni a yeke ndali ti so mo diko Bible kue ahunzi, a fa so mo ye Tënë ti Nzapa mingi.

Jean: Mbi ye ni mingi, mbeni mbeti ti lingbi na Bible ayeke dä ape.

Cameron: Mo yeke na raison. Use ni, mbi gonda mo ndali ti so tongana mo yeke na mbeni hunda, mo yeke gi ambeni versê ti wara na kiringo tënë na hunda ti mo ni. Mo sara tâ gi ye so Bible awa e ti sara la: Ti “gi” ti hinga ye. * Ye so mo sara so ayeke nzoni mingi.

Jean: Merci. Mbi ye vraiment ti gi ti hinga ye la. Mbi sara nga mbeni recherche ni, na mbi wara ambeni tënë na ndo ti ngu 1914 ni na yâ ti mbeti so mbi na mo e yeke manda ye na yâ ni so. A sara tënë ti bango li ti mbeni gbia so lani lo bâ li ti lo na ndo ti mbeni kota keke so a fâ ni a bi na sese, so na pekoni a kiri a kono, wala mbeni ye kâ tongaso.

Cameron: Ah, ni la. A yeke prophétie so a sara tënë ni na Daniel chapitre 4. A ndu mbeni bango li ti Nebucadnetsar, so ayeke lani gbia ti Babylone.

Jean: En, a yeke ni la. Mbi diko prophétie ni so fani mingi. Me sân ti honde na mo, juska fadeso ade mbi hinga ti mbi kamba so ayeke na popo ni na Royaume ti Nzapa wala ngu 1914 so ape.

Cameron: Jean, mo hinga, même prophète ni wani amä nga lani yâ ti ye ni so a hunda na lo ti sû ni so ape!

Jean: Vraie?

Cameron: En, mo bâ tënë so lo wani lo tene na Daniel 12:8, lo tene: “Mbi mä, me mbi hinga nda ni pëpe.”

Jean: Donc a yeke gi mbi oko ape! Bê ti mbi adë kamême.

 Cameron: Daniel amä lani yâ ti ye ni ape ngbanga ti so Nzapa abâ so lani ngoi ti tene azo amä yâ ti aprophétie ti buku ti Daniel kue ade ti si ape. Me laso na ngoi ti e so, e peut ti mä yâ ti atënë ni senge.

Jean: Mo tene tongaso ndali ti nyen?

Cameron: Bon voilà, bâ tënë ti versê so aga na pekoni. Daniel 12:9, a tene: ‘Akanga tënë so, a kanga na sceau, juska lâ ti nda ni.’ Donc azo ayeke mä yâ ti atënë ti prophétie ni gi ngu mingi na pekoni, na “lâ ti nda ni.” Nga, tongana ti so mbi na mo e ga nduru ti manda, aye mingi so ayeke si laso afa so lâ ti nda ni la e yeke dä so. *

Jean: Mo peut ti fa nda ti prophétie ti Daniel ni so kete na mbi?

Cameron: Mbi yeke fa ti so mbi hinga kamême kete so.

BANGO LI TI NEBUCADNETSAR

Cameron: Ti komanse, mbi yeke fa na mo, na nduru tënë, ye so Gbia Nebucadnetsar abâ na yâ ti bango li ti lo ni. Na pekoni awe si e yeke sara tënë na ndo ti nda ti bango li ti lo ni.

Jean: Nzoni.

Cameron: Na yâ ti bango li ni, Nebucadnetsar abâ mbeni kota keke so ayo juska na lê ti nduzu. Na pekoni lo mä ange ti Nzapa amû yanga ti tene a fâ keke ni na sese. Me, lo tene a zia gunda ti keke ni angbâ na yâ ti sese ni. Na peko ti “ngoi mbasambala”, keke ni ayeke kiri ti kono. * Prophétie ni so aga tâ tënë kozoni kue na ndo ti lo Gbia Nebucadnetsar ni wani. Atâa so lo yeke kota gbia, legeoko tongana keke so ayo juska na lê ti nduzu, a yeke zi komandema ni na tïtî lo teti “ngoi mbasambala”. Mo rappellé na ye so asi lani?

Jean: Ên-ën, mbi rappellé ape.

Cameron: Ok, Bible atene so fou atï na li ti Nebucadnetsar teti angu mbasambala tongaso. Na ngoi ni so, lo lingbi lani pëpe ti komande tongana gbia. Me, na ngoi so angu mbasambala ni ahunzi, fou ti Nebucadnetsar ni ahunzi si lo kiri lo komanse ti komande. *

Jean: Nzoni, juska ge mbi comprendre mo. Me, aye ni so kue abâ Royaume ti Nzapa nga na ngu 1914 ni tongana nyen?

Cameron: Na nduru tënë, prophétie ni so aga tâ tënë fani use. Kozoni a ga tâ tënë na ngoi so a kaï komandema ti Gbia Nebucadnetsar lani. Use ni, a ndu ngoi so komandema ti Nzapa akaï. Use ni so la abâ Royaume ti Nzapa ni.

Jean: Mo sara tongana nyen ti hinga mo tene use ni so la abâ Royaume ti Nzapa ni?

Cameron: Kozoni kue, mbeni tënë ti yâ ti prophétie ni wani la afa ni. Tongana ti so Daniel 4:17 ni atene, prophétie ni ayeke sara “si azo [so ayeke na] fini alingbi hinga Lo Ti Nduzu Ahon Kue akomande na royaume ti azo, na Lo mû royaume ni na zo so Lo ye ti mû na lo”. Mo bâ tënë so a tene “royaume ti azo” so?

Jean: En, a tene so “Lo Ti Nduzu Ahon Kue akomande na royaume ti azo”.

Cameron: Ni la. Me mo pensé “Lo Ti Nduzu Ahon Kue” ni so ayeke zo wa?

Jean: Mbi pensé a yeke Nzapa la.

Cameron: Tâ gi ni la. Déjà gi ge e bâ so prophétie ni asara gi tënë ti Nebucadnetsar lo oko ape. A sara nga tënë ti “royaume ti azo”, so aye ti sara tënë ti komandema ti Nzapa na ndo ti azo. Na atënë so angoro versê ni kue la amû lege na e ti tene tongaso.

Jean: Mo ye ti tene nyen la?

KOTA MAMA-TENE TI YÂ TI BUKU NI

Cameron: Buku ti Daniel asara tënë na ndo ti oko mama-tene fani mingi. Lo luti mingi na ndo ti Royaume ti Nzapa, so Nzapa azia Jésus, Molenge ti lo, Gbia ni. Na tapande, zia e kiri kete na peko e bâ. Mo peut ti diko Daniel 2:44?

Jean: Nzoni. Versê ni atene: “Na lâ ti agbia so, fade Nzapa ti yayu ayä royaume so afuti lâ oko pëpe, na Lo zia royaume ni na tïtî ambeni zo nde  pëpe; me fade royaume so afâ mbeni royaume so kue nduru nduru, na a sara si royaume nde nde so kue awe; na fade royaume so angbâ lakue lakue.”

Cameron: Merci. Mo pensé versê so aye ti sara tënë ti Royaume ti Nzapa la?

Jean: Hmm. Mbi yeke sûr ape.

Cameron: Mo bâ na yâ ti versê ni a tene so Royaume ni ayeke ‘ngbâ lakue lakue’, na e hinga so gi Royaume ti Nzapa la apeut ti ngbâ lakue lakue, me gouvernement ti azo ape, ni la ape?

Jean: Ni la.

Cameron: Bâ mbeni prophétie ti Daniel ni so asara tënë na ndo ti Royaume ti Nzapa. A yeke prophétie so e wara ni na Daniel 7:13, 14. A sara tënë na ndo ti mbeni fini gbia, a tene: ‘A mû na lo ngangu ti komande, na gloire, na royaume, si azo kue, amara kue, na azo ti yanga nde nde kue, asara na Lo; ngangu ti Lo ti komande ayeke ti lakue lakue, fade a hon pëpe, na a lingbi futi royaume ti Lo pëpe.’ Ambeni tënë ayeke na yâ ti prophétie so, so mo yeke mä ka ni?

Jean: En, a yeke tënë ti mbeni royaume.

Cameron: Ni la. Na, a yeke gi mbeni royaume kirikiri tongaso ape. Mo bâ a tene so Royaume ni so ayeke komande na ndo ti “azo kue, amara kue, na azo ti yanga nde nde kue”. So aye ti tene so Royaume ni ayeke komande na ndo ti dunia mobimba.

Jean: Mbi comprendre fade nda ti versê ni so tongaso ape, me mo yeke na raison. A tene tongaso.

Cameron: Nga, bâ tënë so prophétie ni atene: “Ngangu ti Lo ti komande ayeke ti lakue lakue, fade a hon pëpe, na a lingbi futi royaume ti Lo pëpe.” Mo pensé prophétie so akpa tere na lo ti so e diko ni fade na Daniel 2:44 so ape?

Jean: Ni la. Ala kpa tere.

Cameron: Zia e bâ, na nduru tënë, aye kue so e sara fade tënë na ndo ni juska fadeso so. A sû prophétie ti Daniel chapitre 4 ni so ti tene azo ahinga atene “Lo Ti Nduzu Ahon Kue akomande na royaume ti azo”. Tënë ni so afa polele so prophétie ni so andu nga mbeni zo nde, me a bâ gi Nebucadnetsar lo oko ape. Nga, na yâ ti buku ti Daniel ni kue, e yeke wara aprophétie so asara tënë na ndo ti Royaume ti Nzapa so lo zia Molenge ti lo tongana Gbia ni. Mo pensé so prophétie ti Daniel chapitre 4 so aye nga ti sara tënë ti Royaume ti Nzapa la ape?

Jean: Mbi pensé a yeke tongaso. Me, ade mbi bâ kamba so ayeke na popo ni na ngu 1914 so ape.

“ZIA NGOI MBASAMBALA AHON”

Cameron: Bon, zia e kiri kete na peko na ndo ti Gbia Nebucadnetsar. Girisa ape so, na yâ ti prophétie ni, keke ni so aye kozoni kue ti sara tënë ti Gbia Nebucadnetsar. A kaï komandema ti lo na ngoi so a fâ keke ni nga a zia keke ni tongaso teti ngoi mbasambala, so aye ti tene fou ayeke tï na li ti lo teti mbeni ngoi. Ngoi mbasambala ni so ahunzi na ngoi so fou ti Nebucadnetsar ni ahunzi nga lo komanse ti komande. Teti so prophétie ni andu nga komandema ti Nzapa, a ye ti fa so fade a yeke kaï komandema ti Nzapa teti mbeni ngoi, me a yeke pëpe ngbanga ti so komandema ni akara Nzapa.

Jean: Mo ye ti tene nyen la?

Cameron: Bible atene so, ândö, agbia so akomande na ndo ti azo ti Israël na Jérusalem aduti na ndo ti “trône ti L’Éternel”. * Ala komande lani na iri ti Nzapa na ndo ti azo ti lo. Ni la komandema ti agbia ni so ayeke lani tongana ti so Nzapa la ayeke komande na ndo ti azo ti lo. Me tongana angoi ayeke hon, mingi ti agbia ni asara kpengbango-li na  Nzapa même azo ti gbe ti ala kue atï na peko ti ala. Ndali ti kpengbango-li ti ala ni, Nzapa azia lege na azo ti kodoro ti Babylone ti ga ti futi gbata ti ala ni na ngu 607 kozo na Christ. A to nda ni na ngoi ni so, mbeni gbia oko tongaso, so akomande na iri ti Jéhovah na Jérusalem, ayeke dä ape. A yeke tongaso la a kaï komandema ti Nzapa. Mo comprendre mbi juska ge?

Jean: En, mbi comprendre mo.

Cameron: Donc, ngoi mbasambala ni wala ngoi so a kaï komandema ti Nzapa ato nda ni na ngu 607. Na hunzingo ti ngoi mbasambala ni, Nzapa ayeke zia mbeni fini gbia so ayeke sara kua na iri ti lo, me zo ni so ayeke duti na yayu. A yeke na ngoi ni so la ambeni prophétie ti Daniel so e diko ni fade ayeke ga tâ tënë. Me, kota hunda ni ayeke so: “Ngoi mbasambala ni ahunzi lawa?” Tongana e wara kiringo tënë na hunda ni so, ge la e yeke hinga ngoi so Royaume ti Nzapa akomanse ti komande.

Jean: Donc, mo ye ti tene so ngoi mbasambala ni ahunzi na ngu 1914?

Cameron: Tâ gi ni la mo tene so. Mo mä yâ ni awe.

Jean: Me, e yeke hinga ni tongana nyen?

Cameron: Lani na ngoi so Jésus ayeke na sese ge, lo fa so ngoi mbasambala ni ade ti hunzi ape. * So a ye ti fa so angoi ni so adoit ti ninga mingi. Ngoi mbasambala ni ato nda ni angu ngbangbo mingi kozo ti tene Jésus aga lani na sese, nga a yeke hunzi angu mingi na peko ti so lo kiri na yayu. Mo rappellé a tene fade so azo ayeke mä yâ ti aprophétie ti Daniel ni so ape juska na “lâ ti nda ni.” * Mbeni ye so ayeke nzoni e hinga ni ayeke so, na hunzingo ti angu 1800, ambeni zo so aye lani ti manda Bible nzoni amû tâ ngoi ti ala ti gi nda ti versê ni so nga na ambeni prophétie ni so nzoni. Ala ga ti bâ so ngoi mbasambala ni ayeke hunzi na ngu 1914. Na ndo ni, akota ye so asi na yâ ti dunia kue na ngu 1914 ni afa so Royaume ti Nzapa akomanse ti komande na yayu na ngu ni so. A yeke nga na ngu ni so la dunia so alï na yâ ti alango ti nda ni ti lo. Me mbi hinga so tënë ni so ayeke fini tënë na mo, a yeke hunda na mo ngoi ti gbu li na ndo ni . . .

Jean: A yeke vrai. Mbi yeke kiri ti diko atënë ni so encore si mbi comprendre ni nzoni.

Cameron: Me gi bê ti mo ape. Mbi nga kue lani mbi mä yâ ti aprophétie ni so hio ape. Me kamême mbi pensé lisoro so mbi na mo e sara laso so amû maboko na mo ti bâ so ye so aTémoin ti Jéhovah amä na bê na ni na ndo ti Royaume ti Nzapa aluti na ndo ti Bible.

Jean: Ti tâ tënë ni, so aye kue so ala mä na bê na ni aluti na ndo ti Bible, adö ka bê ti mbi mingi.

Cameron: Mbi bâ so mo nga kue mo ye ti mä na bê gi na aye so ayeke na yâ ti Bible. Tongana ti so mbi tene fade, afini tënë ni so ayeke mingi na a hunda na mo ngoi ti gbu li na ndo ni. Nga, mbi yeke sûr so mo yeke na ambeni hunda na ndo ni. Na tapande, e tene fade so angoi mbasambala ni andu Royaume ti Nzapa na so ala to nda ni na ngu 607 kozo na Christ. Me, e sara tâ tongana nyen ti hinga e tene angoi mbasambala ni ahunzi na ngu 1914? *

Jean: En. Mbi hunda tere ti mbi na ndo ni. *

Cameron: Bible la amû maboko na e ti hinga ni. Mo ye ti tene mbi ga ti peko ti tene e sara lisoro na ndo ni?

Jean: En. Mbi ye tongaso.

Mbeni tënë ti yâ ti Bible ayeke dä so agbu bê ti mo na so mo ye ti hinga ndani? Mo ye ti hinga ye na ndo ti mbeni ye so aTémoin ti Jéhovah amä na bê dä wala so ala yeke sara ni? Tongana a yeke tongaso, ti peko tongana mo tingbi na aTémoin ti Jéhovah, hunda tënë ni na ala. A yeke nzere ande na ala ti sara lisoro na mo na ndo ni.

^ par. 5 Na lege ti kapa ti mandango Bible so aTémoin ti Jéhovah ayeke sara, ala yeke soro mbeni tënë na ndo ti Bible si ala yeke pika patara na ndo ni na azo.

^ par. 11 A-Proverbe 2:3-5.

^ par. 21 Bâ chapitre 9 ti buku Bible afa nyen biani?, so aTémoin ti Jéhovah asigigi na ni. A yeke nga na ndo ti www.jw.org.

^ par. 27 Daniel 4:13-17.

^ par. 29 Daniel 4:20-36.

^ par. 57 1 Chronique 29:23.

^ par. 63 Na yâ ti prophétie ti Jésus so andu lâ ti nda ni, lo tene: “Fade amara ayeke doro Jérusalem na gere juska ngoi so a diko teti amara ahunzi.” (Luc 21:24). Ge, Jérusalem aye ti sara tënë ti komandema ti Nzapa. Tënë ti versê so aye ti fa so na ngoi so Jésus ayeke lani na sese ge, ade Nzapa akiri ti komande ape na a yeke gue juska na lâ ti nda ni.

^ par. 63 Daniel 12:9.

^ par. 67 Bâ lembeti 215-218 ti buku Bible afa nyen biani? A yeke nga na ndo ti www.jw.org.

^ par. 68 Ti peko, mara ti lisoro ni so ayeke luti mingi na ndo ti aversê ti Bible so andu angoi mbasambala ni.

TI HINGA AMBENI TËNË

Royaume ti Nzapa akomanse ti komande lawa? (Mbage 2)

Prophétie ti Bible nga na bango li so Nzapa afa ni na gbia ti Babylone afa ngu so ye ni asi na ni.