Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO OCTOBRE 2014

 KOTA MAMA-TENE NI | ROYAUME TI NZAPA AYEKE GA NA MO ANZONI YE WA?

Royaume ti Nzapa: Ndani so a yeke kota ye na lê ti Jésus

Royaume ti Nzapa: Ndani so a yeke kota ye na lê ti Jésus

Na ngoi ti kua ti Jésus na sese ge, lo sara tënë lani na ndo ti aye mingi. Na tapande, lo fa na adisciple ti lo tongana nyen ti sambela, tongana nyen ti nzere na lê ti Nzapa nga tongana nyen ti wara tâ ngia (Matthieu 6:5-13; Marc 12:17; Luc 11:28). Me, ye so lo sara tënë na ndo ni mingi ahon atanga ni kue ayeke Royaume ti Nzapa, na a yeke ye so agbu bê ti lo lani mingi la. —Luc 6:45.

Tongana ti so e bâ na yâ ti article so ahon, fini ti Jésus aluti lani mingi gi na ndo ti fango nzoni tënë ti Royaume ti Nzapa (Luc 8:1). Lo tambela lani na gere akilomètre ngbangbo mingi na yâ ti kodoro ti Israël kue ti fa ye na azo na ndo ti Royaume ti Nzapa. E yeke wara mbaï ti fango tënë ti Jésus na yâ ti aÉvangile osio ti yâ ti Bible, so tënë Royaume asigigi na yâ ni ahon fani 100 tongaso. Mingi ti atënë ni so asigigi na yâ ti fango tënë ti Jésus, me so ayeke gi kete mbage ti atënë so lo tene na ndo ti Royaume ti Nzapa la. —Jean 21:25.

Tënë ti Royaume ni agbu lani bê ti Jésus mingi tongaso ngbanga ti nyen? A yeke ngbanga ti so lo hinga so lo la Nzapa asoro lo ti duti tongana Gbia ti Royaume ni (Ésaïe 9:5; Luc 22:28-30). Me, Jésus agi lani pëpe ti wara kota ndo na popo ti azo wala ti gi gloire ti lo wani (Matthieu 11:29; Marc 10:17, 18). Lo fa tënë ti Royaume ni ti gi gi na nzoni ti lo wani ape. Me, tënë ti Royaume ni agbu bê ti lo ngbanga ti so lo hinga ye so Royaume ti Nzapa ni * ayeke sara ande ndali ti azo so lo ye ala, so ti tene Babâ ti lo ti yayu nga na adisciple ti lo.

AYE SO ROYAUME NI AYEKE SARA ANDE NDALI TI IRI TI BABÂ TI JÉSUS

Jésus aye Babâ ti lo ti yayu mingi (aProverbe 8:30; Jean 14:31). Apendere sarango ye ti tere ti Babâ ti lo ni anzere na lo mingi, asarango ye tongana ndoye, bango mawa ti zo nga na sarango ye ti mbilimbili (Deutéronome 32:4; Ésaïe 49:15; 1 Jean 4:8). Tongana Jésus amä atënë ti mvene so a yeke tene na ndo ti Babâ ti lo, a doit ti son bê ti lo mingi. Na tapande, amvene so a tene apasi so azo ayeke bâ asara ye oko na ndo ti Nzapa ape nga so a tene Nzapa la aye si e yeke bâ pasi so. A yeke ndali ti amara ti mvene tongaso la si Jésus ayeke lani na kota nzara ti “fa nzoni tënë ti royaume”, ngbanga ti so lo hinga lo tene Royaume ni la ayeke sara ande si iri ti Babâ ti lo aga nzoni-kue (Matthieu 4:23; 6:9, 10). Me, Royaume ni ayeke sara ande ni tongana nyen?

Na lege ti Royaume ni so, Jéhovah ayeke ga ande na akota changement ndali ti nzoni ti azo kue. “Lo yeke mbô [ande] ngu ti lê kue” na lê ti azo so ayeke be-ta-zo na lo. Lo yeke zi ande aye kue so asara si ngu ti lê ti azo asigigi, so aye ti fa so “kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.” (Apocalypse 21:3, 4). A yeke na lege ti  Royaume ni so la si Nzapa ayeke zi ande pasi ti azo kue. *

So Jésus ayeke lani na kota nzara ti fa tënë na azo na ndo ti Royaume ni so adö bê ti e ape. Lo hinga lo tene a yeke na lege ti Royaume ni la si azo ayeke hinga ande atene Babâ ti lo ayeke tâ na ngangu mingi nga so lo yeke zo so ahinga ti bâ mawa ti azo (Jacques 5:11). Jésus ahinga nga so azo so lo ye ala, wala azo so amä yanga ti Nzapa ayeke wara ande anzoni ye grâce na Royaume ni.

AYE SO ROYAUME NI AYEKE SARA ANDE NDALI TI AZO SO AMÄ YANGA TI NZAPA

Jésus ayeke lani na yayu na tere ti Babâ ti lo, angu mingi, kozo ti tene lo ga na ndo ti sese ge. A yeke na lege ti Molenge ni la si Babâ ni asara atanga ti aye kue, aye tongana yayu nga na atongoro gbani gbani, so zo alingbi ti diko ni kue ape, nga na pendere sese ti e juska na anyama nga na tanga ti aye kue so ayeke na fini na ndo ti sese ni (aColossien 1:15, 16). Na yâ ti aye ni so kue, a yeke azo la Jésus awara lani “ngia na popo ti” ala. —aProverbe 8:31.

Ndoye so Jésus ayeke na ni lani na mbage ti azo la apusu lo ti fa tënë na ala. Gi na tongo nda ni, lo tene na azo polele so ni ga na sese ti “fa nzoni tënë” na azo so ayeke na bezoin ni (Luc 4:18). Me Jésus atene gi tënë ni na yanga awe ape. Fani mingi, lo sara ambeni ye so afa biani so lo ye azo. Na tapande, mbeni lâ tongana azo abungbi ti mä fango tënë ti Jésus, “mawa ti ala asara lo na lo sava azo ti ala so ayeke na kobela.” (Matthieu 14:14). Lani tongana mbeni koli, so abâ pasi na kobela sioni, afa na Jésus so lo mä na bê so Jésus alingbi biani ti sava lo, mawa asara Jésus ni. Lo tene na lo: “Mbi ye. Zia tere ti mo aga nzoni”; na tere ti koli ni aga nzoni (Luc 5:12, 13). Nga, tongana Jésus abâ kamarade ti lo Marie ayeke toto kuâ ti ita ti lo Lazare, Jésus ‘adema na yâ ti bê ti lo na vundu asara lo.’ Nga, lo ‘toto na ngu ti lê.’ (Jean 11:32-36). Me na pekoni, lo sara mbeni ye so adö bê ti azo kue: Lo zingo Lazare ni na kuâ atâa so lo kui asara lango osio awe. —Jean 11:38-44.

Lani Jésus ahinga so azo kue so lo sava kobela ti ala lani ayeke kiri ti tï kobela mbeni lâ, nga ala so lo zingo ala na kuâ ayeke kiri ti kui mbeni lâ. Me, Jésus ahinga nga so ande Royaume ti Nzapa ayeke ga ti hunzi amara ti akpale ni so biaku biaku. A yeke ndali ni la, Jésus asara gi amiracle awe ape, me lo fa nga “nzoni tënë ti royaume” na bê ti lo kue (Matthieu 9:35). Amiracle ni afa gi kete yanga ti aye so Royaume ti Nzapa ayeke ga ande ti sara na ndo ti dunia mobimba kue. Bâ azendo so Bible amû na ndo ti ngoi ni so.

  •  Kobela ayeke hunzi ande.

    “Na lâ ni kâ, fade lê ti awaziba alungula, na mê ti awambongi alungula nga. Na lâ ni kâ, fade zo so azin ahuru tongana tagba, na menga ti awabuburu asara bia.” Nga “Fade wakodoro atene pëpe, Mbi yeke na kobela.” —Ésaïe 33:24; 35:5, 6.

  • Kuâ ayeke duti ande dä ape.

    ‘Sese ni aga ye ti héritier ti azo ti mbilimbili, na fade ala duti dä lakue.’ Psaume 37:29.

    “Lo hunzi kui teti lakue lakue; fade Seigneur L’Éternel ambô ngule na lê ti azo kue.” —Ésaïe 25:8.

  • A yeke zingo ande azo so akui.

    “Ala kue so ayeke na yâ ti [adû] ti kuâ ayeke mä ande go ti lo na ala yeke sigigi.” —Jean 5:28, 29.

    “A yeke zingo ande [azo] na kuâ.” —Kusala 24:15.

  • Azo kue ayeke wara ande da ti lango nga na kua ti sarango ni.

    “Fade azo asara da, na ala duti na yâ ni; fade ala lu vigne na yaka, na ala te lê ni. Fade azo asara da si mbeni zo aduti na yâ ni pëpe; fade ala lu ye si mbeni zo ate pëpe; . . . azo ti Mbi so Mbi iri ala, fade ala wara ngia na kusala ti maboko ti ala teti lâ mingi.” —Ésaïe 65:21, 22.

  •  Bira ayeke hunzi ande.

    “Lo sara si bira awe juska na nda ti sese.” —Psaume 46:10.

    “Fade mara ayä épée na tere ti mbeni mara pëpe, na fade ala manda lege ti sara bira mbeni pëpe.” —Ésaïe 2:4.

  • Nzara ayeke hunzi ande.

    “Sese alë lengo; fade Nzapa, même Nzapa ti e, airi tënë nzoni na ndo e.” —Psaume 67:7.

    “Fade le-kobe ayeke mingi na sese na li ti ahoto.” —Psaume 72:16.

  • Yere ayeke hunzi ande.

    “Azo so ye amanke ala mingi, fade A girisa ala lakue pëpe.” —Psaume 9:19.

    “Fade Lo sö zo so ye amanke lo mingi tongana lo toto na Lo. Fade Lo sara be-nzoni na wanzinga na zo so ye amanke lo mingi, na Lo sö âme ti ala so ye amanke ala mingi.” —Psaume 72:12, 13.

So mo bâ aye so Royaume ti Nzapa ayeke sara ande so, mo hinga fadeso ndani so Royaume ni ayeke kota ye na lê ti Jésus so? Na ngoi so lo yeke lani na sese ge, lo ye lani mingi ti fa tënë ti Royaume ni na azo so aye ti mä ni, ngbanga ti so lo hinga lo tene Royaume ni la alingbi ti hunzi akpale kue so ayeke si laso.

Azendo so Bible asara tënë ni na ndo ti Royaume ni so anzere na mo? Tongana a yeke tongaso, mo yeke sara tongana nyen ti hinga ambeni tënë na ndo ti Royaume ni? Nga, nyen la mo lingbi ti sara ti tene mo nga kue mo wara anzoni ye ni so? Article so ayeke ga na peko so ayeke kiri tënë na ahunda ni so.

^ par. 5 Laso, Jésus ayeke dä na yayu, nga depuis so lo kiri kâ, e yeke sûr so tënë ti Royaume ni angbâ lakue ti gbu bê ti lo. —Luc 24:51.

^ par. 8 Ti hinga ndani so Nzapa azia si azo ayeke bâ pasi, bâ chapitre 11 ti buku Bible afa nyen biani?, so aTémoin ti Jéhovah asigigi na ni. A yeke nga na ndo ti www.jw.org.

TI HINGA AMBENI TËNË

Ngbanga ti nyen Nzapa azia lege na aye ti sioni nga na pasi?

Sioni abâ gigi tongana nyen, na ndali ti nyen si Nzapa azia lege na ni juska laso? Pasi ayeke hunzi ande la?