Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO AOÛT 2014

 KOTA MAMA-TENE NI | NZAPA AYEKE BI BÊ TI LO NGA NA MO LA?

Nzapa alingbi ti dë bê ti mo

Nzapa alingbi ti dë bê ti mo

“Nzapa, lo so ayeke dë bê ti ala so vundu ahon ndo ti ala, adë bê ti e.”2 ACORINTHIEN 7:6.

“Molenge ti Nzapa . . . andoye mbi na lo kä tere ti lo na kuâ ndali ti mbi.”AGALATE 2:20

YE SO ASARA SI AMBENI ZO AYEKE NA KITE: Même na ngoi so azo ayeke na kota nzara mingi ti tene a dë bê ti ala, ambeni zo ni apensé so ti tene zo asambela Nzapa ti tene lo mû maboko na lo na yâ ti akpale, a fa so lo yeke pensé gi na lo wani la. Mbeni wali so iri ti lo ayeke Raquel atene: “Tongana mbi bâ gbâ ti azo nga na akota kpale so ala yeke wara ni, mbi bâ so akpale ti ti mbi ni ayeke ye oko ape, a sara si mbi ye ka ti sambela Nzapa hio na ndo ni ape.”

YE SO BIBLE ATENE: Nzapa amû maboko awe na mbeni lege so apika bê mingi ti dë bê ti azo. Laso na ndo ti sese kue azo ayeke na siokpari na tere ti ala na ala lingbi lâ oko ape ti bata andia ti Nzapa mbilimbili. Me, Nzapa “andoye e na lo tokua Molenge ti lo [Jésus Christ] tongana sandaga so amû lege ti leke songo na popo ti zo na Nzapa, sandaga ndali ti asiokpari ti e.” (1 Jean 4:10). Kuâ ti Jésus amû lege na Nzapa ti pardone asiokpari ti e si bê ti e adë nga si e wara beku ti ngbâ na fini lakue lakue na yâ ti mbeni fini dunia so siriri ayeke duti na yâ ni. * Me kuâ ti Jésus so ayeke ndali ti azo kue? wala afa so Nzapa abi bê ti lo tâ gi na mo wani?

Bâ tapande ti bazengele Paul. Kuâ ti Jésus so apika bê ti lo mingi si lo tene: “Mbi yeke na [fini] ndali ti mabe ti mbi na Molenge ti Nzapa, lo so andoye mbi na lo kä tere ti lo na kuâ ndali ti mbi.” (aGalate 2:20). Tâ tënë, Jésus akui lani kozo ti tene Paul aga Chrétien. Ye oko, Paul abâ kuâ ti Jésus so tongana mbeni matabisi so Nzapa wani la amû ni na lo.

Kuâ ti sandaga ti Jésus so, a yeke mbeni matabisi so Nzapa wani la amû ni na mo nga. Matabisi ni so afa so Nzapa abâ mo na nene ni mingi. A lingbi ti mû na mo “dengo bê ti lakue lakue nga na nzoni beku”, nga a yeke sara si mo “luti ngangu na yâ ti nzoni kusala nga na nzoni tënë kue.”—2 aThessalonicien 2:16, 17.

Ye oko, Jésus amû fini ti lo na sandaga a sara ngu 2000 tongaso awe. Me nyen la afa so laso Nzapa aye si mo ga nduru na lo?

^ par. 5 Ti hinga tënë mingi na ndo ti sandaga ti Jésus, bâ chapitre 5 ti buku Bible afa nyen biani?, so aTémoin ti Jéhovah asigigi na ni.