Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Juillet 2014

 KOTA MAMA-TENE NI | NYEN LA ASIONI YE AYEKE SI KA NA ANZONI ZO?

Asioni ye ayeke si ka na anzoni zo: Ngbanga ti nyen?

Asioni ye ayeke si ka na anzoni zo: Ngbanga ti nyen?

Teti so Jéhovah Nzapa * ayeke Wasarango ye kue nga lo yeke na ngangu na ndo ti aye kue, azo mingi alingbi ti tene so lo la lo yeke na peko ti aye kue so ayeke si na yâ ti dunia, même ala ti sioni ni. Me, bâ ye so Bible atene na ndo ti tâ Nzapa:

  •  ‘L’Éternel ayeke mbilimbili na lege ti Lo kue.’Psaume 145:17.

  •  ‘Lege ti [Nzapa] kue ayeke mbilimbili; Lo yeke Nzapa ti be-biani, Lo yeke na sioni oko pëpe, Lo yeke mbilimbili na nzoni-kue.’Deutéronome 32:4.

  •  “Jéhovah ayeke tâ na ndoye mingi nga lo yeke sara nzoni bê na zo.”Jacques 5:11.

Nzapa la ayeke na gunda ti asioni ye so ayeke si so ape. Me, lo la lo yeke pusu azo ti sara sioni ye? Oko ape. Bible atene: “Tongana mbeni zo ayeke na yâ ti tara, zia lo tene pëpe: ‘Nzapa si ayeke tara bê ti mbi so.’” Ndali ti nyen? Ndali ti so “aye ti sioni alingbi ti tara bê ti Nzapa pëpe na lo wani lo yeke tara bê ti mbeni zo na aye tongaso pëpe.” (Jacques 1:13). Nzapa ayeke tara zo ape na pusungo ala ti sara sioni ye. Nzapa ayeke nga pëpe na gunda ti asioni ye so ayeke si, lo yeke pusu nga azo ti sara asioni ye ape. Me, zo wa wala ye wa la ayeke na gunda ti asioni ye ni?

YE NI ASI GI GBAGBURU TONGASO

Bible afa mbeni oko ti araison so ndali ni azo ayeke bâ pasi, lo tene: “Lâ na pasa asi na ala kue.” (Zo-ti-fa-tene 9:11). Tongana mbeni ye so zo aku tere ti lo na ni ape asi wala mbeni ndao asi, ndo so zo ni ayeke fade dä nga ngoi so ye ni asi na ni la ayeke sara si zo ni akui wala pëpe. A sara nduru na ngu 2000 tongaso awe, Jésus Christ asara lani tënë ti mbeni ye ti ngangu so asi, na so azo 18 awara kuâ na yâ ni. Mbeni tour la atuku lani na ndo ti azo ni so (Luc 13:1-5). So ala wara kuâ so a yeke pëpe ndali ti aye so ala sara na yâ ti gigi ti ala, me a yeke gi ngbanga ti so ala ayeke lani na tere ti tour ni na ngoi so tour ni akungbi. Na janvier 2010 sese ayengi lani ngangu na kodoro ti Haïti, na gouvernement ti kodoro ni afa atene azo ahon 300000 la awara kuâ. Yengingo ti sese so asoro yâ ti azo sorongo ape. Kobela nga kue alingbi ti mû zo kue na ngoi kue.

Ngbanga ti nyen Nzapa azia si asioni zo asara sioni na anzoni zo?

Peut-être ambeni zo ahunda tere ti ala, atene: ‘Nzapa alingbi fade ti kanga lege na amara ti aye ni so ape? Lo lingbi fade ti bata anzoni zo na yâ ti aye ni so ape?’ Tongana Nzapa akanga fade lege na ni, andâ lo hinga kozo awe so asioni ye so ayeke si. Ti tâ tënë ni, Nzapa ayeke na ngangu ti hinga ye so ayeke si ande. Me, kota tënë ni ayeke so: Na yâ ti aye kue la si Nzapa ayeke gi ti hinga kozo aye so ayeke si so?Ésaïe 42:9.

Bible atene: “Nzapa . . . ayeke na yayu; Lo sara  ye so bê ti Lo aye.” (Psaume 115:3). Jéhovah apeut ti sara ye kue, mbeni ye ti karango lo ayeke dä ape. Me lo yeke sara gi ye so na lê ti lo lo bâ a lingbi lo sara ni. A yeke nga tongaso na aye so lo soro ti bâ kozo si aye ni asi. Na tapande, na peko ti so sioni amû ndo na yâ ti agbata ti Sodome na Gomorrhe, Nzapa atene na Abraham, atene: ‘Mbi yeke zu fadeso, Mbi ye ti bâ tongana ala sara ye kue na lege ti totongo so Mbi mä; tongana a yeke tongaso pëpe, fade Mbi hinga.’ (Genèse 18:20, 21). Na tongo nda ni, Jéhovah agi pëpe ti hinga wala sioni ti ala ni ayeke kete wala ayeke kota. Ye so afa na e atene Jéhovah lo wani la lo yeke soro ti hinga aye so ayeke si ande (Genèse 22:12). A ye pëpe ti fa so mbeni ye akara lo la wala so lo yeke na ngangu ti sara ni ape. Teti so “kusala ti [Nzapa] alingbi kue,” tongana mbeni ye so aye ti si ague oko na ye so lo leke ti sara, ge la lo yeke gi ti hinga ni kozo. Lo yeke gbu zo gbungo na ngangu ape ti sara mbeni ye (Deutéronome 32:4). * E lingbi ti tene nyen na nda ni? E lingbi gi ti tene so aye so Nzapa ayeke gi ti hinga ni kozo ayeke dä, lo soro yâ ni sorongo.

Ngbanga ti nyen Nzapa azia si asioni zo asara sioni na anzoni zo?

FAUTE NI AYEKE TI AZO NI WANI?

Azo nga kue ayeke na gunda ti asioni ye so ayeke si. Bâ ye so Bible atene na ndo ti ye so ayeke gue na mbeni zo ti sara sioni ye. A tene: “Zo oko oko ayeke wara tara tongana nzara ti bê ti lo agboto lo na ahanda lo. Na pekoni, tongana nzara ti bê ni amû ngo awe, a yeke dü siokpari; na siokpari nga, tongana a hunzi ti sara ni awe, a dü kuâ.” (Jacques 1:14, 15). Tongana zo azia si asioni nzara ti bê ti lo apusu lo ti sara ye, lo yeke bâ gi pasi na pekoni (aRomain 7:21-23). Tongana ti so mbaï ti azo afa, azo asara asioni ye mingi, na ala bâ pasi na pekoni mingi. Na ndo ni, asioni zo ayeke pusu amba ti ala ti mû sioni lege, ye so asara si sioni ye ayeke gue gi guengo na li ni.aProverbe 1:10-16.

Azo asara asioni ye mingi, na ala bâ pasi na pekoni mingi

A yeke na lege ni ti tene Nzapa akanga lege na azo na ngoi so ala ye ti sara sioni ye? Bâ tongana nyen la Nzapa asara zo. Bible atene so Nzapa asara zo na image ti lo wani, so ti tene zo asara ye tongana ti Nzapa (Genèse 1:26). Nzapa amû na azo liberté ti mû desizion ti bê ti ala na ti soro ti ye Nzapa nga ti mä yanga ti lo na sarango ye so Nzapa ni aye (Deutéronome 30:19, 20). Tongana Nzapa agbu azo fade gbungo na ngangu ti sara mbeni ye, andâ lo gue nde na tënë ti liberté so awe la ape? Andâ azo aga tongana amachine awe, ala yeke sara gi ye so a leke ala ti sara. A yeke duti legeoko na ti tënë so a tene aye kue so ayeke si na e so a diko ni kozo awe la ayeke si so. E yeke na ngia mingi so e ne na lê ti Nzapa, si lo mû lege na e ti soro ye so bê ti e wani aye. Ye so aye ti fa so  asioni ye so ayeke si ndali ti afaute ti azo nga na asioni desizion so ala mû ayeke ngbâ gi ti sara pasi na azo ngbii ape.

MBENI SIOKPARI SO ZO ASARA ÂNDÖ LA SI AMÛ PEKO TI LO SO?

Tongana mo hunda na mbeni Hindu wala mbeni Bouddhiste mara ti tënë so ayeke na ndo ti Tour ti Ba Ndo so, peut-être lo yeke tene na mo so asioni ye ayeke si na anzoni zo ngbanga ti so ala sara ândö ambeni sioni ye si na peko ti so a kiri a dü ala na yâ ti mbeni fini tere nde, sioni ti ala ni amû gi peko ti ala. *

Na ndo ti mara ti tënë so, a yeke nzoni ti hinga ye so Bible afa na ndo ti kuâ. Nzapa azia Adam lani na yaka ti Eden, na lo tene na lo: “Mo lingbi te le-keke kue ti yaka tongana bê ti mo aye; me lê ti keke ti hinga nzoni na ti hinga sioni, mo te pëpe; teti na lâ ni so mo te lê ni so, fade mo kui biani.” (Genèse 2:16, 17). Tongana lani Adam ake yanga ti Nzapa ape, ka lo ngbâ lakue lakue. Me zo akui ndali ti so lo doro ndia ti Nzapa. Mbeni ye ni nga ayeke so tongana Adam adü amolenge, “kuâ amû azo kue”. (aRomain 5:12). Ndani la si a tene so “futa ti peko ti siokpari ayeke kuâ”. (aRomain 6:23). Bible atene nga so “zo so akui awe, a zi siokpari ti lo na li ti lo awe.” (aRomain 6:7). Tënë so aye ti tene so tongana zo akui, andâ lo futa asiokpari kue so lo sara na yâ ti gigi ti lo awe.

Azo kutu mingi laso amä na bê na tënë ti siokpari so azo asara ândö si amû peko ti ala so. A sara si ala bâ so pasi so ala yeke bâ ni so wala so ambeni zo nde ayeke bâ ni so, mbeni ye ti sarango ni ayeke ti lo dä ape. A sara nga si ala yeke gi ti sigigi na yâ ni ape. Na ala, a yeke gi tongana a kiri a dü mo na yâ ti mbeni sewa nde wala na mbeni kota hingango ndo si mo lingbi ti sigigi dä. Ti tâ tënë ni, abango ndo so ayeke ti lo tâ nde mingi na ti so Bible afa. *

TÂ ZO SO AYEKE NA GUNDA TI ASIONI YE NI

Mo hinga so asioni ye so ayeke si na azo, “mokonzi ti dunia so”, wala Satan Zabolo, la ayeke na pekoni?Jean 14:30

Tongana a bâ ni nzoni, zo na sese ge la ayeke tâ na gunda ti sioni ye ape, me a yeke Satan Zabolo. Lo yeke ândö mbeni ange be-ta-zo, ye oko “lo ngbâ na yâ ti tâ tënë pëpe,” na tongaso lo ga na siokpari na yâ ti dunia (Jean 8:44). Lo la lani lo mû li ni ti ke yanga ti Nzapa na yaka ti Eden (Genèse 3:1-5). Jésus Christ airi lo “Zo ti sioni” nga “mokonzi ti dunia so”. (Matthieu 6:13; Jean 14:30). Ni la si azo ayeke sara gi tongana lo, ala ke anzoni fango lege ti Jéhovah (1 Jean 2:15, 16). Bible atene nga atene: “Dunia so kue ayeke na gbe ti Zo ti sioni.” (1 Jean 5:19). Ambeni ange nga kue atï na peko ti Satan, ala ga sioni. Ni la si Bible afa so Satan na a-ange so ayeke “handa sese kue so azo ayeke dä”, ye so asara si ‘mawa ayeke na sese’. (Apocalypse 12:9, 12). Aversê so afa na e biani so tâ zo so ayeke na gunda ti asioni ye ayeke gi lo Satan Zabolo.

A yeke polele so Nzapa ayeke pëpe na gunda ti asioni ye so ayeke si na azo. Lo nga la si lo ga na ala pasi ape. Nde na so, lo mû yanga so lo yeke zi ande asioni ye kue, na article ti peko ayeke fa tënë na ndo ni.

^ par. 3 Jéhovah ayeke iri ti Nzapa na yâ ti Bible.

^ par. 11 Ti hinga ndani so Nzapa angbâ ti zia lege na asioni ye ti si, bâ chapitre 11 ti buku Bible afa nyen biani?, so aTémoin ti Jéhovah asigigi na ni.

^ par. 16 Ti hinga ndo so mara ti afango ye ni so abâ gigi dä, gue na lembeti 8-12 ti brochure Tongana E kui Ye Wa Asi na E?, so aTémoin ti Jéhovah asigigi na ni.

^ par. 18 Ti hinga ye so Bible afa na ndo ti dutingo ti azo so akui nga na beku so ayeke dä ndali ti ala, bâ chapitre 6 nga na 7 ti buku Bible afa nyen biani?

TI HINGA AMBENI TËNË

GOOD NEWS FROM GOD!

Ngbanga ti nyen Nzapa azia lege na aye ti sioni nga na pasi?

Sioni abâ gigi tongana nyen, na ndali ti nyen si Nzapa azia lege na ni juska laso? Pasi ayeke hunzi ande la?