Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO JUILLET 2014

 BIBLE ACHANGÉ FINI TI AZO

Mbi fono lâ oko sân ngombe ti mbi ape

Mbi fono lâ oko sân ngombe ti mbi ape
  • A DÜ LO NA NGU: 1958

  • NA KODORO TI: ITALIE

  • LO YEKE ÂNDÖ: NA YÂ TI MBENI GROUPE TI ABANDII

GIGI TI MBI ÂNDÖ:

A dü mbi na yâ ti mbeni vaka so ayeke nduru na Rome, na mbeni ndo so awayere la ayeke lango dä na mbi kono kâ. Gigi ti mbi ayeke lani ngangu. Mbi hinga mama ti dungo mbi lâ oko ape, na mbi na babâ ti mbi e mä ka lani tere ape. Mbi kono lani na yâ ti aye ti sioni.

Na tango so mbi wara ngu 10, mbi komanse ti nzi ye. Na ngu 12, mbi kpe da ti babâ ti mbi. Mbi kiri mbi sara gi tongaso lege mingi, na babâ ague lakue amû mbi na commissariat akiri na mbi na yanga-da. Mbi na azo gi papa, mbi yeke lani sioni mingi nga mbi sara ngonzo na tere ti azo kue. Tongana mbi wara ngu 14, mbi zia da ti e mbi hon biani biani. Mbi komanse ti nyon ambangi nga ti lango na bê ti lege. Teti so mbi yeke na ndo ti lango ape, mbi yeke fâ yanga ti mbeni oto mbi lango na yâ ni juska na yanga ti ndapre. Na pekoni, mbi gi place ti mbeni ngu ti tene mbi sukula na tere ti mbi.

Mbi ga tâ kota zo ti nzi. Mbi yeke nzi abozo na maboko ti azo juska mbi gue mbi nzi aye na yâ ti akota da na bï. Iri ti mbi akomanse ti buba na kete na pekoni mbeni groupe ti akota bandii ahunda mbi ti ga oko ti ala. Ye so amû lege na mbi ti kono “kamba” ti mbi na nzingo abanque. Teti so mbi yeke sara ye na ngangu mingi, hio azo akpe mbi mingi na yâ ti groupe ni. Mbi fono lani lâ oko sân ngombe ti mbi ape. Mbi ga ti lango, mbi yeke zia ni na gbe ti coussin ti mbi. Sarango ye na ngangu, nyongo mbangi, nzi, sioni yanga nga na lango-sioni aga aye ti tere ti mbi. Lapolice ayeke gi mbi lakue. Ala gbu mbi lege mingi na mbi lï kanga fani mingi.

LEGE SO BIBLE ACHANGÉ FINI TI MBI:

Mbeni lâ, na ngoi so mbi sigigi na da ti kanga, mbi gue ti bâ mbeni mama-kete ti mbi. Andâ mama-kete ti mbi ni nga na amolenge ti lo use aga aTémoin ti Jéhovah na mbi hinga kozo ape. Ala tisa mbi ti gue na bungbi ti ala. Teti so mbi ye ti hinga ye so ayeke pasêe kâ, mbi yeda ti gue na ala. Na ngoi so e si na Da ti  Royaume ni, mbi ye gi ti duti na peko nduru na yanga ti porte ni tongaso si lê ti mbi ayeke na ndo ti azo kue so ayeke lï na ayeke sigigi. So kue, na ngombe ti mbi na tere ti mbi.

Bungbi ni so achangé fini ti mbi. Na ngoi ni kâ, ye ni ayeke mo bâ mo tene mbi yeke na yâ ti mbeni dunia nde. Azo ni kue abara mbi na ngia na yanga. A-Témoin ni asara ye na nzoni bê nga na bê ti ala oko, na aye ni so angbâ lakue na yâ ti li ti mbi. Sarango ye ti ala ayeke tâ nde mingi na ti so mbi kono na yâ ni.

Mbi komanse ti manda Bible, mbi na aTémoin ni. Na ngoi so mandango ye ni ayeke gue na li ni, aye ni aga polele na li ti mbi si mbi bâ so a lingbi mbi changé aye na yâ ti fini ti mbi kue kue kue. Wango so ayeke na aProverbe 13:20 apika bê ti mbi, a tene: “Zo so atambela na awandara, fade lo ga wandara, me zo so aga ndeko ti awabuba, fade lo wara vundu dä.” Mbi bâ so a lingbi mbi sigigi na yâ ti groupe ni. A yeke lani kete ye ape, me na ngangu ti Jéhovah, mbi sigigi dä.

Tâ kozo ti tene, na yâ ti gigi ti mbi, mbi zia anzara ti bê ti mbi ahon ndo ti mbi ape

Mbi changé nga asarango ye ti tere ti mbi. Mbi sara effort ti zia lege ti nyongo manga nga na mbangi. Mbi fâ yongoro kuä ti li ti mbi, mbi zia lege ti yungo aye ti mê nga na sioni yanga. Tâ kozo ti tene, na yâ ti gigi ti mbi, mbi zia anzara ti bê ti mbi ahon ndo ti mbi ape.

Mbi ye ka lani dikongo mbeti nga na mandango mbeti ape, tongaso a hunda lani na mbi ti sara kota effort ti zia li ti mbi kpô na ndo ti mandango Bible so mbi yeke manda. A yeke ye so mbi sara, na yeke yeke mbi komanse ti ye Jéhovah, me na yâ ti bê ti mbi mbeni ye akomanse ti changé, bê ti mbi ato nda ti fâ ngbanga na ndo ti mbi. Mbi tene ka ti mbi, mbi tene, mbi kpa zo ti tene Jéhovah apardone lo ape ndali ti asioni ye kue so mbi sara kozo so. Me na angoi ni so, mbi diko ye na ndo ti Jéhovah, so lo pardone Gbia David na peko ti akota siokpari so lo sara, na ye so la adë bê ti mbi mingi.—2 Samuel 11:1–12:13.

Mbeni kota kpale ti mbi ni ayeke ti fa tënë ti mabe ti mbi na azo da na da (Matthieu 28:19, 20). Mbi yeke lani na mbeto ti tingbi na ambeni zo so mbi sara sioni na ala. Me yeke yeke mbi hon ndo ti mbeto ni so. Tongana angoi ayeke hon, mbi wara ngia na mungo maboko na azo ti manda ye na ndo ti nzoni Babâ ti e ti yayu, so ayeke pardone zo na bê ti lo kue.

NZONI YE SO MBI WARA NA PEKONI:

Ye so mbi manda na ndo ti Jéhovah asö fini ti mbi. Mingi ti angbene kamarade ti mbi akui wala ala yeke na da ti kanga, me mbi yeke na tâ ngia laso nga mbi yeke ku kungo pendere gigi ti kekereke so ayeke ku e. Mbi manda ti sara tere ti mbi kete, ti mä yanga nga ti hon ndo ti kota ngonzo ti mbi ni. Ye ti pekoni ayeke so mbi na azo e yeke mä tere fadeso nzoni. Mbi na pendere wali ti mbi, Carmen, e yeke na ngia na yâ ti mariage ti e. A nzere na e mingi ti fa tënë na azo li ti e use ti mû maboko na ala ti manda Bible.

Hé! Mbeni ye angbâ: mbi yeke sara nzoni kua fadeso. Atâa so ngoi na ngoi kua ni andu abanque, a yeke ti nzi aye dä ape, me ti sukula yâ ni.