Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

TOUR TI BA NDO JUILLET 2014

Mo lingbi ti bâ Nzapa so lê abâ lo ape so?

Mo lingbi ti bâ Nzapa so lê abâ lo ape so?

“NZAPA ayeke mbeni Yingo,” zo alingbi ti bâ lo ape (Jean 4:24). Me, Bible afa so ândö, ambeni zo abâ Nzapa (aHébreu 11:27). Ala bâ Nzapa ni tongana nyen? Mo lingbi biani ti bâ “Nzapa so lê abâ pëpe” so?—aColossien 1:15.

E lingbi ti haka dutingo ti e na ti mbeni zo so a dü lo na kangango lê. So lê ti lo akanga so, lo hinga ye oko so ayeke pasêe na tere ti lo ape? Ên-en, lo hinga kamême. Zo so lê ti lo akanga ayeke wara asango na alege nde nde so ayeke mû lege na lo ti hinga na azo nga na aye nde nde so ayeke pasêe na tere ti lo.Mbeni koli so lê ti lo akanga atene: “Bango ndo ayeke pëpe gi na lê, me ayeke nga aye so ayeke na yâ ti li ti zo.”

Legeoko nga, atâa so mo lingbi pëpe ti bâ Nzapa na tâ lê ti mo tongaso, mo lingbi ti bâ lo na “lê ti bê”. (aÉphésien 1:18). Zia e bâ aye ota so na lege ni mo lingbi ti bâ Nzapa.

“ASIGIGI POLELE NGBENE YE SO A LEKE DUNIA”

Zo so lê ti lo akanga, mê ti lo aza ka mingi nga gi na ndungo aye na maboko ti lo, lo yeke hinga aye ni hio. Ye so asara si lo hinga aye so lê ti lo alingbi ti bâ ni ape. Legeoko nga, mo lingbi ti sara kua na lê ti mo, na mê ti mo nga na ambeni ye ti tere ti mo ti hinga na aye so ayeke na yâ ti dunia so angoro mo nga ti bâ Nzapa so lê abâ lo ape, so lo la lo sara aye ni so. “Asarango ye ti tere ti Nzapa so lê abâ ni pëpe asigigi polele ngbene ye so a leke dunia ti ga na ni, ngbanga ti so a bâ ni na lege ti aye so lo sara”.—aRomain 1:20.

Na tapande, gbu li na ndo ti sese so e yeke na ndo ni so. A leke sese ni ti tene e duti gi na ndo ni awe ape, me ti tene e hinga nzerengo ti gigi. Tongana pendere pupu ayeke ya, tongana e yeke lango lâ, wala e yeke te mbeni nzerengo lê ti keke wala e yeke mä pendere bia ti andeke, tere ti e ayeke nzere. Apendere ye ni so afa so Nzapa, lo so asara e, ayeke pensé na e, lo ye e nga lo hinga ti mû ye na azo, ni la ape?

Nyen la e lingbi ti manda na ndo ti Nzapa tongana e bâ gbâ ti atongoro na lê ti nduzu? Kozoni kue, a fa na e so Nzapa ayeke na ngangu mingi. Na peko ti gingo nda ti aye so awasenda-ye asara ade ti ninga ape, ala fa so yâ ti dunia ni ayeke kono gi konongo nga na loro loro. Tongana mo bâ lê ti nduzu na bï, hunda tere ti mo: ‘Tâ gi nyen la asara si dunia ni angbâ gi ti kono gi na loro loro ti gue na ni guengo so?’ Bible afa so Nzapa so asara atongoro ni so ayeke “na ngangu” mingi (Ésaïe 40:26). Aye so lo créé afa na e so lo yeke “Lo Ti Ngangu Ahon Kue,” nga “ngangu ti Lo . . . ayeke kota mingi”.—Job 37:23.

‘LO SO LO FA NZAPA NA E’

Mbeni mama ti amolenge use so lê ti ala abuba atene: “Sarango lisoro la ayeke mû lege na ala mingi ti manda ye. Fa na ala aye kue so mo yeke bâ nga mo yeke mä, [nga] leke tere ti mo ti fa pekoni na ala na loro loro. Mo la mo yeke lê ti ala.” Legeoko nga, atâa so “mbeni zo ade abâ Nzapa lâ oko pëpe”, Jésus, Molenge ti Nzapa, “lo so lo yeke na nzoni ndo na tere ti Babâ ni, lo si afa Nzapa na e nzoni.” (Jean 1:18). Teti so Jésus la Nzapa asara lo kozo ti aye kue nga lo yeke oko Molenge ti Nzapa, lo la lo yeke tongana lê ti e na yayu kâ. Gi lo oko la alingbi ti mû na e anzoni sango na ndo ti Nzapa so lê abâ lo ape so.

Bâ ambeni ye so Jésus, lo so ayeke depuis giriri na tere ti Babâ ti lo, afa na e na ndo ti Nzapa, Babâ ti lo ni:

  • Nzapa angbâ lakue ti sara kua. “Babâ ti mbi angbâ ti sara kua juska fadeso.”—Jean 5:17.

  • Nzapa ahinga aye so e yeke na bezoin ni. “Babâ ti ala, ahinga aye so ala yeke na bezoin ni kozoni si ala hunda ni na lo.”—Matthieu 6:8.

  •  Nzapa amû na e ye mingi. ‘Babâ ti ala so ayeke na yayu, asara si lâ ti lo asu na ndo ti azo ti sioni nga na azo ti nzoni. Na lo sara si ngu-nzapa apika na ndo ti azo ti mbilimbili nga na azo ti mbilimbili pëpe.’—Matthieu 5:45.

  • Nzapa ayeke bâ e oko oko kue na nene ni. “A yeke kä anzërê use na senge lê ti pata oko pëpe? Me mbeni oko ti anzêrë so ayeke tï na sese pëpe sân ti tene Babâ ti ala ahinga ni. A diko même kuä ti li ti ala oko oko kue awe. Tongaso, ala sara mbeto pëpe: ngere ti ala ahon ngere ti gbâ ti anzêrë.”—Matthieu 10:29-31.

ZO SO AMÛ TÂ GI ASARANGO YE TI TERE TI NZAPA

Azo so lê ti ala akanga ayeke bâ ka aye na mbeni fason so ayeke nde na ti azo so ayeke bâ ndo. Na tapande, na zo ti kangango lê, gbe ti dê ayeke pëpe mbeni vukongo ndo so lâ ayeke su dä ape, me ayeke tongana mbeni pendere dede ndo so zo alingbi ti duti dä si lâ azö lo ape. Legeoko tongana ti so zo ti kangango lê ayeke bâ gbe ti dê ape nga na sungo ti lâ ape, e nga kue e lingbi ti hinga Jéhovah e wani ape. Ndani la si Jéhovah amû na e mbeni zo so amû tâ gi sarango ye ti tere ti lo wani, si na lege ti zo ni so e hinga lo Nzapa ni.

Zo ni so ayeke Jésus (aPhilippien 2:7). Jésus asara na e tënë ti Babâ ti lo, nga lo fa asarango ye ti tere ti Nzapa ni. Philippe, mbeni disciple ti Jésus, ahunda lo lani, atene: “Seigneur, fa na e Babâ ni.” Jésus atene na lo: “Zo so abâ mbi abâ nga Babâ awe.” (Jean 14:8, 9). Tongana mo bâ asarango ye ti tere ti Jésus, mo lingbi ti bâ nyen na ndo ti Babâ ni?

Jésus aye azo lani mingi, lo sara tere ti lo kete nga azo akpe lo ape (Matthieu 11:28-30). Apendere sarango ye ti tere ti lo ni agboto lani azo nduru na lo. Tongana azo ayeke na yâ ti vundu, lo nga kue vundu agbu lo. Nga, tongana ala yeke na ngia, lo kue lo yeke na ngia (Luc 10:17, 21; Jean 11:32-35). Na ndembe so mo yeke diko Bible na ndo ti mbaï ti Jésus wala mo yeke mä ni mango, tara ti bâ aye ni na yâ ti li ti mo nga zia tere ti mo na place ni kâ. Tongana mo gbu li na ndo ti sarango ye ti tere ti Jésus na mbage ti azo na tango ni kâ, mo yeke bâ nga apendere sarango ye ti tere ti Nzapa nzoni nga mo yeke ye lo.

BUNGBI ASANGO SO MO WARA TI HINGA NA NZAPA

Na ndo ti fason so mbeni zo ti kangango lê ayeke hinga na aye so ayeke na tere ti lo, mbeni wali atene: “Lo yeke ro kete kete asango so lo wara na alege nde nde (na lege ti maboko ti lo, hôn ti lo, mê ti lo), lo bungbi ni kue oko.” Legeoko nga, tongana mo bâ aye so Nzapa acréé, mo diko aye so Jésus atene na ndo ti Babâ ti lo nga mo bâ tongana nyen la Jésus amû tâ gi asarango ye ti tere ti Nzapa, pendere image ti Jéhovah ayeke ga na li ti mo. Lo yeke ga tâ zo biani na lê ti mo.

Job, so ayeke mbeni zo ti giriri, abâ nga ye ni lani tongaso. Na tongo nda ni, lo sara tënë sân ti “hinga nda ni”. (Job 42:3). Me na peko ti so lo mû ngoi ti bâ apendere ye so Nzapa acréé, lo wani lo tene: “Giriri mbi mä tënë ti Mo na mê ti mbi; me ti fadeso lê ti mbi abâ Mo.”—Job 42:5.

‘Tongana mo gi Jéhovah, fade mo wara Lo’

Mo nga kue a lingbi ti si na mo tongaso. “Tongana mo gi [Jéhovah], fade mo wara lo.” (1 Chronique 28:9). A-Témoin ti Jéhovah ayeke duti ande na ngia ti mû maboko na mo ti gi Nzapa so lê abâ lo pëpe so na ti wara lo.