Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO MAI 2014

 KOTA MAMA-TENE NI | MBENI ZO TI HINGA YE SO AYEKE SI KEKEREKE AYEKE DÄ?

Ambeni ye ni asi vrai, me ambeni mingi atï na ngu

Ambeni ye ni asi vrai, me ambeni mingi atï na ngu

Mo ye ti hinga kekereke ti mo? Azo mingi aye ti hinga ni. Azo mingi afa aye so ayeke si kekereke, me aye ti pekoni ayeke nde nde. E yeke bâ ambeni tapande ni na gbe ni ge.

  • AWASENDA-YE. Ala sara kua na angangu gbakuru nga na gbâ ti nginza ti hinga na aye so ayeke si kekereke. Na tapande, ala yeke gi ti hinga kpale so sioni ngu wala sioni pupu alingbi ti ga na ni na ndo ti sese, wala ngu ayeke pika kekereke wala ayeke pika ape.

  • AWANDARA. Ambeni na popo ti ala ayeke bâ ye so alingbi ti si na konomi wala poroso ti mbeni kodoro. Pakara Warren Buffett, mbeni oko ti azo so ayeke na nginza mingi na yâ ti dunia mobimba, ayeke fa lani ye na ndo ti konomi na aye ni asi tâ gi tongana ti so lo tene, ye so asara si azo airi lo prophète. Ti Pakara Nate Silver, lo sara kua na atondo so lo wara ti fa na aye so ayeke si na ndo ti aye kue, même na ndo ti poroso ti États-Unis wala na ndo ti azo so asara afilm ti a-Américain so ayeke wara ande apalata.

  • ANGBENE MBETI. Azo abâ atënë ti yâ ni tongana aprophétie. Na tapande, aye so ayeke si laso so, ambeni zo abâ so Pakara Michel de Notredame asara tënë ni kozo awe na yâ ti ambeti so lo sigigi na ni, so atënë ti yâ ni ayeke nga polele ape, na popo ti ngu 1500 ti si na ngu 1599. Ambeni zo apensé ti ala lani atene, so calendrier ti aMaya ahunzi na 21 décembre 2012, a ye ti fa so ambeni ye ti ngangu ayeke si.

  • AKOTA ZO TI NZAPA. Ala yeke sara ka tënë ti aye ti ngangu so ayeke si ande na ndo ti sese mobimba ti gboto mê ti azo nga ti gi adisciple na peko ti ala. Na tapande, Pakara Harold Camping nga na ambeni disciple ti lo ni atene na ndo kue so na ngu 2011, sese ayeke buba. Me, depuis juska laso, sese la angbâ so.

  • AZO SO ATENE ALA YEKE NA POUVOIR TI HINGA AYE SO AYEKE SI KEKEREKE. Pakara Edgar Cayce na Yapakara Jeane Dixon asara lani tënë ti aye so ayeke si na popo ti ngu 1900 ti si na ngu 1999, na ambeni ye ni asi tongana ti so ala tene. Me mingi ti atënë ti ala ni atï na ngu. Na tapande, Yapakara Dixon atene lani so na ngu 1958, Ota Bira so Amû Ndo ti Sese Kue ayeke sungba, nga Pakara Cayce atene ti lo so na yâ ti angu 1970, kota ngu-ingo ayeke mene gbata ti New York.

Tâ mbeni lege ti hinga na ye so ayeke si kekereke ayeke dä ape la ma? Hundango ndo so ayeke kota mingi ngbanga ti so tongana mo zo mo hinga aye so ayeke si kekereke, a yeke sara ye mingi na ndo ti gigi ti mo.