Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO MAI 2014

 KOTA MAMA-TENE NI

Mbeni zo alingbi ti hinga ye so ayeke si kekereke?

Mbeni zo alingbi ti hinga ye so ayeke si kekereke?

E kue e yeke pensé ka na ndo ti gigi ti kekereke. E yeke gi ka ti hinga wala kekereke ti e nga na ti azo ti e ayeke duti ande tongana nyen. E yeke hunda ka atënë tongana: ‘Amolenge ti mbi ayeke duti ande na yâ ti mbeni nzoni dunia la? Sese so e yeke dö so ayeke buba ande? Nyen la a yeke nzoni mbi sara laso ti tene kekereke ti mbi aduti nzoni?’ Agingo bê ni so ayeke na lege ni, ngbanga ti so a dü e na nzara ti tene a dë bê ti e, na nzara ti tene aye atambela na lege ni si e duti na beku. Tongana e hinga tâ mbilimbili ye so ayeke si kekereke, e yeke leke tere ti e nga li ti e ayeke duti kpô.

Kekereke ti mo ayeke duti ande tongana nyen? Mbeni zo alingbi ti hinga ni? Ambeni zo atara ti fa ambeni ye so ayeke si kekereke, na ambeni ye ni asi, me ambeni mingi atï na ngu. Me, a tene so Nzapa ayeke na ngangu ti fa tâ na lege ni aye so ayeke si kekereke. Lo wani lo tene: “Mbi so mbi lingbi fa nda ti ye na lâ ni so ye ni akomanse; na lâ ti giriri, Mbi fa tënë ti ye so ade asi pëpe.” (Ésaïe 46:10). Ambeni ye so lo fa, so asi biani, ayeke so wa?

NDANI SO A LINGBI E MÄ NA BÊ NA ATËNË TI NZAPA

Ngbanga ti nyen a yeke nzoni mo gi ti hinga fani oke la aprophétie so Nzapa asara tënë ni ândö aga tâ tënë? Na tapande, tongana mo bâ so aye so mbeni zo ti météo ayeke fa ayeke si ka lakue, bê ti mo ayeke dö. A yeke sara si ti peko, ye kue so lo yeke tene na ndo ti ye so ayeke si kekereke mo yeke zia bê ti mo dä. Legeoko nga, tongana mo mä a tene aye  kue so Nzapa asara tënë ni ândö asi biani, a yeke sara si ye kue so lo tene na ndo ti kekereke ti mo, mo yeke zia bê ti mo na ni.

Mbeni mbage ti gbagba ti Ninive ti ândö so a kiri a leke ni

FUTINGO TI MBENI KOTA GBATA:

Na tapande, ti tene so a ga nduru ti futi mbeni kota gbata so ayeke ngangu teti angu ngbangbo mingi, kozo ti tene ye ni asi, adö bê mingi. Me lani Nzapa atene mara ti tënë ni so na lege ti mbeni prophète ti lo. A yeke tënë ti futingo ti gbata ti Ninive (Sophonie 2:13-15). Awandara atene nyen na ndo ni? Na ngu 632 kozo na Christ, peut-être angu 15 tongaso na peko ti so Nzapa atene tënë ni so, azo ti Babylone nga na ti Mède aga afuti gbata ti Ninive. Nga, Nzapa atene kozo atene Ninive ayeke ga “yangbato, ndo so ahule tongana yando.” Eskê ye ni asi tâ tongaso? En, a si tongaso. Atâa so gbata ni nga na ando so ayeke na tere ni akono mingi, azo ti mungo gbata ni abata gbata ni ape, tongana ti so azo apensé fade, me ala futi ni kue kue kue. Wandara wa na ndo ti sese ge alingbi ti fa mara ti ye ni so na asi tâ gi tongana ti so lo tene?

A YEKE ZÖ ANDE BIO TI AZO:

Zo wa la akpa ti fa iri ti mbeni zo so ayeke zö ande bio ti azo na ndo ti mbeni gbalaka angu 300 kozo ti tene ye ni asi? Nga ti fa iri ti kotara ti zo ni so même na iri ti gbata so gbalaka ni ayeke duti ande dä? Tongana mara ti zo ni so ayeke dä, iri ti lo ayeke wu mingi. Lani, mbeni wakua ti Nzapa atene so “fade mbeni zo ti da ti David” ayeke dü molenge, na a yeke iri lo “Josias” na fade lo yeke “zö bio ti azo” na ndo ti mbeni gbalaka na gbata ti Béthel (1 aGbia 13:1, 2). Angu ngbangbo ota tongaso na pekoni, mbeni gbia so iri ti lo ayeke Josias (mbeni iri so aJuif ayeke na ni ândö mingi ape) abâ gigi na yâ ti sewa ti David. Tâ gi tongana ti so a tene ni kozo, Josias atokua “azo si ala gue ala lungula bio ti azo so ayeke na ndo ti akuâ . . . , na lo zö bio so na ndo gbalaka” na Béthel (2 aGbia 23:14-16). Mbeni zo alingbi ti fa anzene nzene ye tongaso sân ti tene Nzapa la afa ni na lo?

Aprophète ti Nzapa asara tënë ti tingo ti Babylone na ye ni asi tâ gi tongana ti so a fa

TINGO TI MBENI NGANGU KODORO:

Tongana mbeni zo afa iri ti mbeni koli, aninga kozo ti tene a dü lo, lo tene koli ni so la si ayeke kinda ande kodoro so ayeke ngangu ahon tanga ti akodoro kue, na même lo fa  mara ti kode so zo ni ayeke sara na kua ni, a yeke duti ande ye ti dongo bê mingi. Nzapa atene lani so mbeni koli so iri ti lo ayeke Cyrus ayeke mû li ni ti gue ti kinda mbeni kodoro. Oko lo Cyrus ni so la ayeke zi ande aJuif na ngbâa nga lo yeke mû maboko na ala ti kiri ti leke temple ti ala so ayeke nzoni-kue. Na ndo ni, Nzapa afa so Cyrus ni ayeke sara ande si bale ni ahule nga lo tene so ayanga ti gbagba ni ayeke ngbâ na zingo ni, tongaso si ala mû kodoro ni hio (Ésaïe 44:27–45:2). Anzene nzene tënë so Nzapa atene so aga biani tâ tënë lani? Awandara ayeda so aye ni asi biani. Cyrus na aturugu ti lo asigigi na mbeni pendere kode so ayeke ti zi lege ti ngu ti Babylone ni si asua ahon nde, tongaso si bale ni ahule. Nga, aturugu ni awara ayanga ti gbagba ni na zingo ni, a mû lege na ala ti lï na yâ ti kodoro ni. Na pekoni, Cyrus azi aJuif na ngbâa nga lo mû yanga na ala ti kiri ti leke temple ti ala ni na Jérusalem. Bango mara ti ye ni so la, teti so Cyrus avoro lani Nzapa ti aJuif ape (Esdras 1:1-3). Zo wa, nde na Nzapa, akpa ti fa anzene nzene ye ni so kue kozo zo wa?

E londo ti bâ atapande ota so afa tongana nyen aye so Nzapa asara tënë ni kozo aga lani tâ tënë. Ambeni mingi ayeke dä nga. Josué, mokonzi ti aJuif ti ândö, atene tënë na ndo ti mbeni ye so gbâ ti azo so ayeke mä lo lani ahinga ni. Lo tene: “I hinga na bê ti i kue na âme ti i kue, ye oko atï pëpe ti nzoye kue so L’Éternel Nzapa ti i azê na i; ye ni kue aga tâ tënë awe, mbeni tënë oko ti tënë so kue atï na sese senge pëpe.” (Josué 23:1, 2, 14). Azo ni ahinga so azendo ti Nzapa nga na aprophétie ti lo kue aga lani tâ tënë, ala lingbi ti bere ape. Me Nzapa asara ti lo tongana nyen si aye ni kue asi tongana ti so lo tene? Kota kangbi ayeke mingi na popo ti fason so Nzapa ayeke sara na aye nga na ti azo. A yeke kota ye ti tene mo hinga tënë so nzoni, ngbanga ti so Nzapa asara nga tënë ti ambeni ye so aga nduru ti si awe na so abâ mo nga.

APROPHÉTIE TI NZAPA AYEKE NDE NA TI AZO

Na azo, tongana ala tene mbeni ye tongaso ayeke si ande, a yeke mingi ni grâce na arecherche ti awasenda-ye, grâce na atondo ti aye so ayeke dä awe wala na lege ti azo so atene ala yeke na pouvoir ti hinga aye so ayeke si kekereke. Tongana ala fa aye ni awe, ala yeke kanga maboko ti ala, ala duti ti ku ti bâ ye so alingbi ti si na pekoni.—aProverbe 27:1.

Me ti Nzapa, lo hinga ti lo aye kue. Lo hinga tâ azo nzoni mingi, même apensé ti ala. Ni la, tongana Nzapa aleke ti sara mbeni ye, lo lingbi ti hinga tâ sarango ye ti zo ni kozo awe wala ti azo ti mbeni kodoro ni. Me Nzapa angbâ gi ge ape. Lo lingbi même ti changé yâ ti ambeni ye so asi ti lingbi na ti so lo ye. Lo tene: “Fade tënë so asigigi na yanga ti Mbi . . . akiri na Mbi senge pëpe, . . . na fade tënë ni awu na kusala.” (Ésaïe 55:11). Na ambeni ngoi, aprophétie ti Nzapa ayeke ti fa gi na e ye so lo yeke sara ande. Me, lo yeke sara kue ti tene ye ni asi biani.

GIGI TI MO TI KEKEREKE

Mo hinga mbeni ye so nyen na nyen ayeke si ande so abâ mo na azo ti mo nga kue? Tongana mo hinga mo tene mbeni sioni ye ayeke hara mo, mo yeke sara mbeni ye ti bata na tere ti mo. A yeke nzoni mo sara nga tongaso na ye so Bible asara tënë ni. Nzapa atene so ambeni kota changement aga nduru ti si na ndo ti dunia kue awe. (Bâ encadré: “ Aye so Nzapa afa na ndo ti kekereke.”) Ye ni so ayeke tâ nde mingi na ati so azo so atene ani yeke awandara ayeke fa ni.

Peut-être mo tene ti mo, mo tene, ‘Ka ye kue la a fa awe na ndo ti ye so ayeke si na dunia so, mbi hinga tongana nyen la a yeke hunzi ande.’ Me Nzapa atene: “Mbi so mbi lingbi fa nda ti ye na la ni so ye ni akomanse; . . . Mbi tene, fade wango ti mbi angbâ na fade mbi sara ye kue so bê ti mbi aye.” (Ésaïe 46:10). Mbeni nzoni ye ayeke ku mo na sewa ti mo kue. Ti hinga ni, hunda na aTémoin ti Jéhovah na ala yeke fa na mo aye so Bible atene ayeke si kekereke. A-Témoin ti Jéhovah ayeke pëpe azo so atene ala yeke na pouvoir ti hinga ye so ayeke si kekereke, ala tene nga ape so yingo la asara tënë na ala. Ala yeke manda gi Bible, na ala lingbi ti fa na mo anzoni ye so Nzapa ayeke sara ndali ti mo ande.