Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO MAI 2014

 LISORO NA MBENI ZO

A-Témoin ti Jéhovah amä na bê ka na Jésus la?

A-Témoin ti Jéhovah amä na bê ka na Jésus la?

Atënë so na gbe ni ge afa lisoro so mbeni Témoin ti Jéhovah alingbi ti sara na mbeni zo. Na tapande, mbeni Témoin ti Jéhovah, so e yeke iri lo Antoine, ayeke fa tënë na mbeni koli so e yeke iri lo Timothée.

A YEKE TÂ KOTA YE TI MÄ NA BÊ NA JÉSUS

Antoine: Bara mo, Timothée.

Timothée: Merci.

Antoine: Tongana nyen?

Timothée: Ye ayeke dä ape.

Antoine: Mbi yeke na ngia ti kiri ti bâ mo.

Timothée: Mbi kue.

Antoine: Mbi ga na mo afini Tour ti Ba Ndo na Réveillez-vous! Mbi pensé atënë ti yâ ni ayeke nzere ande na mo mingi.

Timothée: Merci. Tere ti mbi anzere so mo ga laso so, ngbanga ti so mbi yeke na mbeni tënë ti hunda na mo.

Antoine: En-ên-en! Hunda ni ayeke so wa?

Timothée: Lani, tongana mbi causé na mbeni collègue ti mbi ti place ti kua, mbi sara na lo tënë ti ambeti ti ala so mo mû na mbi so. Mbi tene na lo so ambeti ni ayeke pendere mingi, me lo tene a yeke nzoni mbi diko ambeti ti aTémoin ti Jéhovah ape ndali ti so ala mä na bê ka na Jésus ape. Tâ tënë la? Mbi tene na lo so tongana mo ga ande ti peko, mbi yeke hunda mo.

Antoine: Ye so mo sara so ayeke nzoni. Mo sara nzoni ti hunda gi mbeni Témoin ti Jéhovah, ngbanga ti so tongana mo ye ti hinga ye so mbeni zo amä na bê na ni, a yeke nzoni mo hunda gi zo ni wani.

Timothée: Ye so mbi pensé lani la.

Antoine: E aTémoin ti Jéhovah, ti tâ tënë ni e mä na bê na Jésus. E hinga so a lingbi zo amä na bê na Jésus si lo wara salut.

Timothée: Mbi pensé lani tongaso, me na ngoi so collègue ti mbi ni atene ala mä na bê na Jésus ape, ge la mbi ye ti hinga tënë na ndo ni. Ade e sara lisoro na ndo ni lâ oko ape!

Antoine: Tongana mo ye, mbi peut ti fa na mo ambeni versê so afa ndani so a yeke kota ye ti mä na bê na Jésus. A-Témoin ti Jéhovah ayeke sara kua na aversê so mingi.

Timothée: Nzoni.

Antoine: Kozoni kue, mbi ye ti fa na mo tënë so Jésus wani atene na Jean 14:6. A yeke lani na ngoi so lo sara lisoro na mbeni bazengele ti lo. E diko ni, atene: “Jésus atene na lo: ‘Mbi yeke lege ni, tâ tënë na fini. Zo kue so aga na Babâ ayeke ga gi na lege ti mbi.’” Tongana ti so versê so afa, zo ayeke ga na Babâ ni gi na lege ti zo wa?

Timothée: Gi na lege ti Jésus.

Antoine: Ni la. A-Témoin ti Jéhovah nga kue abâ ni tongaso. Mbi ye ti hunda na mo mbeni tënë: Tongana ti so mo manda na yâ ti Bible, Nzapa aye ti tene tongana mbeni zo asambela, a yeke nzoni lo sambela na iri ti zo wa?

Timothée: Na iri ti Jésus.

Antoine: A yeke tongaso. Ndani la tongana mbi sambela, mbi yeke tene ni na iri ti Jésus. A-Témoin ti Jéhovah kue ayeke sara gi tongaso.

Timothée: Merci so mo fa na mbi ni.

Antoine: Mbeni versê so e lingbi ti bâ ni ayeke na Jean 3:16. Kota tënë ayeke na yâ ti versê so, a sara si azo airi ni kete Évangile. So aye ti fa so  tongana mo mû aye kue so a sû na ndo ti fini ti Jésus nga na fango tënë so lo fa na ndo ti sese ge, mo bungbi ni kue na yâ ti mbeni versê oko, a yeke versê ti Jean 3:16 ni. Mo ye ti diko ni?

Timothée: Nzoni. A tene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.”

Antoine: Merci. Mo hinga ka versê so?

Timothée: En, mbi yeke mä ka ni na eglize.

Antoine: Azo ahinga ka ni mingi. Tongana mo bâ ni nzoni, Jésus atene so ndoye ti Nzapa ayeke mû lege na azo ti wara fini ti lakue lakue, me gi tongana azo ni asara nyen?

Timothée: Ala mä na bê.

Antoine: Ni la. Gi tongana ala mä na bê na Jésus Christ, ngengele Molenge ti Nzapa oko. Na ndo ti tënë so, tongana mo bâ na lembeti 2 ti Tour ti Ba Ndo so mbi ga na ni na mo, a fa na yâ ni so ti mä na bê na Jésus la ayeke zi lege ti fini ti lakue lakue. Mo bâ na mbage so atene, Nda ti Tour ti Ba Ndo, a tene Tour ti Ba Ndo asara si “zo amä na bê na Jésus Christ, so akui si e lingbi ti wara fini ti lakue lakue nga so [lo yeke] komande fadeso tongana Gbia so Nzapa azia lo na ndo ti Royaume so”, wala Royaume ti Nzapa ni.

Timothée: Mo yeke na raison. Mbeti ti ala nga kue afa so ala aTémoin ti Jéhovah amä na bê na Jésus.

Antoine: Ni la mo tene so.

Timothée: Ka ngbanga ti nyen azo atene ala mä na bê na Jésus ape so?

Antoine: Bon, araison ni ayeke peut-être mingi. Ti ambeni zo ni, ala tene gi peko ti yanga ti ambeni zo. Wala akota zo ti eglize ti ala la atene na ala ni.

Timothée: Hinga ape ambeni zo ni atene ala mä na bê na Jésus ape ndali ti so ala tene ala yeke aTémoin ti Jéhovah me pëpe aTémoin ti Jésus.

Antoine: A peut ti duti mbeni raison ni nga la.

Timothée: Me ndali ti nyen la ala yeke di iri ti Jéhovah gbani gbani tongaso?

“MBI SARA SI ALA HINGA IRI TI MO”

Antoine: Mbeni raison ni ayeke so e bâ so a yeke kota ye ti di iri ti Nzapa, so ayeke Jéhovah, tongana ti so Jésus, Molenge ti lo wani, asara lani. Bâ tënë so Jésus atene na yâ ti sambela na Babâ ti lo na Jean 17:26. Mo peut ti diko ni?

Timothée: A tene: “Mbi sara si ala hinga iri ti mo na fade mbi yeke sara si a hinga ni, tongaso si ndoye so mo ndoye na mbi aduti na popo ti ala nga mbi duti beoko na ala.”

Antoine: Merci. Mo bâ, Jésus atene ni sara si azo ahinga iri ti Nzapa. Ti mo, lo sara ni ndali ti nyen?

Timothée: Hmm. Mbi hinga ape.

A lingbi zo amä na bê na Jésus si lo wara salut

Antoine: Nzoni, peut-être e bâ mbeni versê ni nde so ayeke vuru lê ti tënë ni. Versê so mbi pensé na ni ayeke Kusala 2:21. E diko, a tene: “Fade a yeke sö zo kue so airi ndo na Jéhovah na iri ti lo.” Donc, ti wara salut, a yeke nzoni ti iri ndo na Jéhovah na iri ti lo. Mo pensé Jésus kue ahinga ni lani ape?

Timothée: Lo hinga ni.

Antoine: Tongaso, tënë ti salut ti adisciple ti lo la ayeke oko raison so ndali ni Jésus abâ so a yeke kota ye ti tene ala hinga iri ti Nzapa na ala di ni. Ndali ni la si e nga kue e yeke sara tënë na ndo ti Jéhovah mingi so. E hinga so a yeke nzoni e fa tâ iri ti Nzapa na amba ti e nga e mû maboko na ala ti di iri ni so.

Timothée: Me même si azo ahinga iri ti Nzapa ni ape wala ala di ni ape, ala hinga kamême Nzapa so ala yeke sara tënë ti lo so-aa!

Antoine: A peut ti duti ni. Me tongana Nzapa  ayeda ti fa na e iri ti lo, a yeke ti mû lege na e ti ga nduru mingi na lo.

Timothée: Ti tongana nyen ni la?

Antoine: Bâ kete si: E bezoin ti hinga nga iri ti Moïse ape. E peut fade ti hinga gi lo tongana mbeni koli so akangbi lani yâ ti kota Ngu-Bengba wala so Nzapa amû na lo aCommandement Bale-oko awe. Même ti Noé, e bezoin ti hinga iri ti lo ape! A peut lani ti sara gi tënë ti lo tongana mbeni koli so aleke lani arche ti bata na sewa ti lo nga na anyama. Ti Jésus nga kue, a peut fade ti sara tënë ti lo gi tongana mbeni zo so alondo lani na yayu aga akui ndali ti asiokpari ti e awe, ni-aa ape?

Timothée: En.

Antoine: Me Nzapa asara lani kue si e hinga iri ti azo ni so. Iri ayeke sara ye mingi na ndo ti mbeni zo. Atâa so e bâ Moïse lâ oko ape, e bâ Noé ape na Jésus nga ape, gi hingango iri ti ala asara si e bâ ala tongana atâ zo na lê ti e.

Timothée: Tënë ti mo ni agbu ngu. Mbi pensé kozo tongaso ape.

Antoine: Mbeni raison so ndali ni e aTémoin ti Jéhovah e yeke di iri ti Nzapa mingi mingi so la. E ye ti mû maboko na azo ti hinga so Jéhovah Nzapa ayeke dä biani nga ala lingbi ti ga nduru na lo. Na oko ngoi ni, e yeke fa nga tënë ti kota ye so Jésus asara ndali ti salut ti e. Tongana mo ye, e peut ti diko mbeni versê oko so andu tënë ni so.

Timothée: Nzoni.

Antoine: E diko fade Jean 14:6. Na yâ ni Jésus atene ni yeke “lege ni, tâ tënë na fini.” Bon, zia e kiri kete na peko ti bâ tënë so ayeke na Jean 14:1. Mo peut ti diko tënë so Jésus atene na ndangba mbage ti versê ni so?

Timothée: Nzoni. Versê ni atene: “Ala mä na bê na Nzapa, ala mä na bê na mbi nga.”

Antoine: Merci. Mo pensé tâ mabe ayeke ti tene zo ayeda gi na Jésus me na Jéhovah ape?

Timothée: Oko ape. Jésus atene e bezoin ti mä na bê na ala use kue.

Antoine: Ni la. Me ti tene gi na yanga so e mä na bê na Nzapa nga na Jésus, a lingbi awe ape. Asarango ye ti e adoit ti fa so e mä na bê biani na ala.

Timothée: A yeke tongaso.

Antoine: Me zo alingbi ti sara nyen ti fa so lo mä na bê biani na Nzapa nga na Jésus? Peut-être ti peko, e peut ti sara lisoro na ndo ni. *

Timothée: Nzoni.

Mbeni tënë ti yâ ti Bible ayeke dä so agbu bê ti mo na so mo ye ti hinga ndani? Mo ye ti hinga ye na ndo ti mbeni ye so aTémoin ti Jéhovah amä na bê dä wala so ala yeke sara ni? Tongana a yeke tongaso, hunda tënë ni na aTémoin ti Jéhovah. A yeke nzere ande na ala ti sara lisoro na mo na ndo ni.

^ par. 64 Ti hinga tënë mingi na ndo ni, bâ chapitre 12 ti buku Bible afa nyen biani?, so aTémoin ti Jéhovah asigigi na ni.

TI HINGA AMBENI TËNË