Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO AVRIL 2014

Mo lingbi biani ti luti na lê ti tara!

Mo lingbi biani ti luti na lê ti tara!

“Mbi leke fade na bê ti mbi ti bâ porno ape. Me tongana mbi gue na ndo ti Internet, mbeni message ti publicité asigigi. Mo ye ti bâ! mbeni ye nde asigigi na lê ti écran, mbi cliqué ni, a zi.”—CODY. *

“Lani, mbeni pendere wali na place ti kua asara nzara ti mbi. Mbeni lâ, lo hunda ti tene mbi na lo e gue na mbeni hôtel e ‘sara ngia kete.’ Mbi hinga ye so lo ye biani.”—DYLAN.

“MBI lingbi ti luti na lê ti aye kue, me tara ape.” Tënë so afa tâ nzoni mingi bango ndo ti ambeni zo na ndo ti atara. A fa so na yâ ti bê ti ala kâ, ala ye ni. Me na lê ti ambeni zo ni, tara ayeke tongana mbeni wato so ayeke gi dä lakue na so ala yeke gi ti dö sese na ni. Ka mo, mo bâ ti mo tara tongana nyen? Mo yeke tï na yâ ni? wala mo yeke luti na lê ni.

Ambeni tara ayeke dä so tongana mo tï na yâ ni, mbilimbili ati so ague na zo ti sara lango-sioni, aye ti pekoni alingbi ti duti tâ sioni mingi. Ni la si Bible atene: “Zo so asara lango-sioni . . . , lo hinga ye pëpe; zo so asara ye tongaso, lo ye ti futi âme ti lo mveni.”aProverbe 6:32, 33.

Tongana gi gbagburu tongaso mbeni sioni tara asi na mo, mo yeke sara ye tongana nyen? Bible akiri tënë, atene: “Ye so Nzapa aye ayeke ti tene ala ga nzoni-kue, ala gbanzi tere ti ala na lango-sioni, lo ye si zo oko oko na popo ti ala ahinga ti kanga nzara ti tere ti lo wani si lo duti nzoni-kue nga na nengo tere.” (1 aThessalonicien 4:3, 4). Mo yeke sara tongana nyen ti dö sese na ni? Bâ aye ota so alingbi ti mû maboko na mo.

Kozo ye ni: Sara hange na lê ti mo

Ti bâ afoto so ayeke zingo nzara ti tere ti zo alingbi ti gue na e ayo. Jésus afa so kamba ayeke na popo ti ye so lê ti zo abâ na sarango nzara ti ye ni. Lo tene: “Zo kue so angbâ ti bâ mbeni wali si lo sara nzara ti wali ni so, andâ lo gi lo na wali na yâ ti bê ti lo awe.” Na pekoni, lo mû wango so: “Ni la, tongana lê ti mo ti mbage ti koli ayeke sara ti tene mo tï, gboto ni na bi ni yongoro na mo.” (Matthieu 5:28, 29). Nyen la Jésus atara ti fa na e ge? Lo ye ti fa so, tongana e ye ti luti na lê ti tara, e doit ti sara mbeni ye nga tongana  lê ti e atï na ndo ti mara ti afoto tongaso, e bi lê ti e na ngonda.

Tongana lê ti mo atï na ndo ti afoto so ayeke zingo nzara ti tere ti zo, bi lê ti mo na ngonda

Zia e mû gi mbeni tapande: Lê ti mo atï na ndo ti wâ ti azo ti sarango soudure so ayeke vuko ka lê ti azo sioni, mo yeke ngbâ gi ti bâ ni? Oko ape! Mo yeke turnê lê ti mo hio wala mo yeke gi ti kanga lê ti mo na mbeni ye. Legeoko nga, tongana lê ti mo atï na ndo ti mbeni foto so ayeke zingo nzara ti tere ti zo, atâa na lê ti mbeti, na lê ti écran wala mo bâ tâ gi zo ni vîi vîi vîi tongaso, bi lê ti mo hio na ngonda. Yôro asioni ye na yâ ti li ti mo ape. Juan, mbeni ngbene zo ti bango porno, atene: “Tongana lê ti mbi atï na ndo ti mbeni pendere wali, mingi ni ka mbi yeke na nzara ti kiri ti bâ lo aninga. Me, mbi yeke sara kue ti bi lê ti mbi ayo, nga mbi yeke tene na bê ti mbi wani, mbi tene: ‘Sambela Jéhovah! Ku ape. Sambela lo fafadeso!’ Tongana mbi sambela awe, nzara ni so ahon.”Matthieu 6:9, 13; 1 aCorinthien 10:13.

Bâ nga tënë so Job, kota wakua ti Nzapa ti ândö, atene: “Mbi te mbele na lê ti mbi, tongaso, mbi lingbi bâ masia tongana nyen?” (Job 31:1). Mo yeke sara tongana ti lo?

Tara ti sara ye so: Tongana lê ti mo atï na ndo ti mara ti afoto ni so, ku ape, bi lê ti mo na ngonda. Sara ye tongana ti wasungo Psaume so atene: “Zi lê ti mbi na tere ti ye so ayeke senge senge.”Psaume 119:37.

Use ye ni: Sara hange na aye so mo yeke pensé na ndo ni

So e kue e yeke na siokpari na tere ti e, ngoi na ngoi e yeke tiri na asioni nzara ti bê. Bible atene: “Zo oko oko ayeke wara tara tongana nzara ti bê ti lo agboto lo na ahanda lo. Na pekoni, tongana nzara ti bê ni amû ngo awe, ayeke dü siokpari.” (Jacques 1:14, 15). Mo lingbi ti sara nyen ti tï pëpe na yâ ti mara ti ye tongaso, so a yeke ngangu na zo ti sigigi dä?

Tongana asioni pensé aga na li ti mo, ngbâ na ndo ni ape nga sambela

Tongana asioni nzara aga na yâ ti bê ti mo, girisa ape so a yeke na mo ti soro ye so mo lingbi ti sara. Tiri na asioni nzara ni. Zi ni na yâ ti li ti mo. Ngbâ ti pensé na ndo ni ape. Pakara Troy, so aye ka lani ti bâ porno na ndo ti Internet, atene: “Mbi yeke tiri  lani ti zi asioni pensé na yâ ti li ti mbi na lege so mbi yeke gi ti pensé gi na ndo ti anzoni ye. A yeke lani kete ye ape teti fani mingi mbi kiri mbi tï na yâ ni. Me fadeso, mbi hinga tongana nyen ti tomba asioni pensé ni na yâ ti li ti mbi.” Yapakara Elsa, so lani na maseka ti lo lo tiri na nzara ti tere ti lo, adabe ti lo, lo tene: “So mbi yeke lani na gbâ ti ye ti sarango ni nga mbi yeke sambela Jéhovah, li ti mbi angbâ na ndo ti asioni ye ni so ngbii ape.”

Tara ti sara ye so: Na ngoi so asioni pensé aga na li ti mo, ngbâ na ndo ni ape na sambela na lê ni lê ni. Tomba asioni pensé ni na yorongo ambeni nzoni ye na yâ ti li ti mo, ‘aye so ayeke tâ tënë, aye so zo ayeke ne ni, aye so ayeke mbilimbili, aye so ayeke nzoni-kue, aye so zo alingbi ti ye ni, aye so a sara nzoni tënë ni, atâa a yeke ye so ayeke nzoni mingi, wala ye so a lingbi ti gonda ni.’aPhilippien 4:8.

Ota ye ni: Sara hange na tere ti mo

Tongana nzara ti mbeni ye agbu mo, si mo yeke na lê ti ye ni nga lege azi na mo, kpale alingbi ti si na pekoni (aProverbe 7:6-23). Mo lingbi ti sara nyen ti tï dä ape?

“Mbi yeke gue na ndo ti Internet gi na ngoi so azo ayeke dä”

Bible amû wango ti ndara so, lo tene: “Zo ti ndara abâ ye ti sioni, na lo honde tere ti lo, me azo so li ti ala ayeke dä pëpe, ala hon, na ala wara ngbanga.” (aProverbe 22:3). Tongaso, sara hange na tere ti mo. Gi ti hinga aye so alingbi ti ga na mo akpale, na kpe ni (aProverbe 7:25). Pakara Filipe, so azia lege ti bango porno, atene: “Mbi zia ordinateur ti e na ndo so zo kue alingbi ti bâ ni. Nga, mbi zia mbeni programme na ndo ni so ayeke kanga lege na asioni ye ti sigigi na lê ti écran. Nga, mbi yeke gue na ndo ti Internet gi na ngoi so azo ayeke dä.” Legeoko nga, Troy, so e sara fade tënë ti lo, atene: “Mbi yeke bâ pëpe afilm so ayeke zingo nzara ti tere ti zo, nga mbi yeke duti pëpe place oko na azo so ayeke tene abuba tënë. Mbi ye ti zia tere ti mbi na lê ti sioni ye ape.”

Tara ti sara ye so: Bâ tâ mbilimbili ndo so mo woko dä, nga gi ti hinga aye so alingbi ti sara si mo tï na yâ ti tara, na kpe ni.Matthieu 6:13.

ZIA SI BÊ TI MO ANZE APE

Ka tongana mo sara gbä, mo kiri mo tï na yâ ti tara ni, zia si bê ti mo anze ape. Bible atene: “Zo ti mbilimbili atï lege mbasambala, na lo kiri lo londo.” (aProverbe 24:16). Babâ ti e ti yayu awa e ti “londo.” Mo yeke yeda na mungo maboko ti lo ni? Ni la, ngbâ lakue ti sambela lo. Manda Bible lakue ti kpengba mabe ti mo. Gue lakue na abungbi ti tene mo ngbâ lakue na ndo ti desizion ti mo ni. Zia lakue na li ti mo zendo so Nzapa amû, so lo tene: “Fade Mbi sara si mo kpengba; biani, fade Mbi sara na mo.”Ésaïe 41:10.

Cody, so e sara fade tënë ti lo na tongo nda ni, atene: “A yeke lani kete ye na mbi ape ti zia lege ti bango porno. Mbi tï na yâ ni fani mingi, me na ngangu ti Nzapa, mbi zia lege ni biaku.” Dylan, so e sara nga fade tënë ti lo, atene: “Mbi lingbi lani ti sigigi na wali ti place ti kua ti mbi so. Me, mbi ke na lo vîi!’ Ti duti na nzoni yingo-ti-hinga, a yeke tâ nzoni mingi. Nga kota ye ni ahon kue ayeke so mbi hinga mbi tene mbi zia ngia na bê ti Jéhovah.”

Mo nga kue tongana mo luti nganganga na lê ti tara, hinga so mo yeke zia ngia na bê ti Nzapa nga.aProverbe 27:11.

^ par. 2 A changé a-iri ni.

TI HINGA AMBENI TËNË

Tongana nyen andia ti Nzapa ayeke sara nzoni na e?

Jésus afa ndani so e bezoin ti tene Bible afa lege na e. Lo fa nga akota ndia ni use.