Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO AVRIL 2014

 BIBLE ACHANGÉ FINI TI AZO

Ala mû gi Bible si ala kiri tënë na ahunda ti mbi ni kue

Ala mû gi Bible si ala kiri tënë na ahunda ti mbi ni kue
  • A DÜ LO NA NGU: 1950

  • NA KODORO TI ESPAGNE

  • LO YEKE ÂNDÖ MBENI SOEUR TI CATHOLIQUE

GIGI TI MBI ÂNDÖ:

Na tango so a dü mbi, babâ na mama ti mbi alango na mbeni kete ferme na kete kodoro ti gbata ti Galice, na banga-do ti Espagne. A dü e miombe, na mbi yeke osio molenge ni. E yeke lani na ngia mingi. Na tango ni kâ, sewa oko oko ayeke tokua kamême molenge oko na séminaire wala na couvent. Na yâ ti sewa ti e nga kue, amolenge ota asara tongaso.

Tongana mbi wara ngu 13, mbi nga kue mbi lï na couvent na peko ti yaya ti mbi ti wali na Madrid. Na couvent kâ, sarango songo ayeke dä ape. Kamarade ayeke dä ape, gi andia na asambela. Na akota ndapre, e yeke bungbi tere na yâ ti chapelle ti sambela, atâa so ye oko ayeke ga na li ti mbi ape. Na pekoni, e yeke he abia ti nzapa nga e yeke sara Messe, kue gi na Latin. Mbi mä ti mbi lani yâ ti ye oko ape na mbi bâ so Nzapa ayo na mbi mingi. Ti londo na ndapre ti si na lakui, mbi peut nga ti zi yanga ti kete ape. Même tongana mbi na yaya ti mbi ni e tingbi tere, e yeke tene gi, “Marie mbi bara mo.” Asoeur ni amû gi na e penze-ngbonga 30 ti sara lisoro na peko ti tengo ye. Ye ni ayeke tâ nde mingi na ti so mbi hinga na yanga-da ti e. Mbi bâ tere ti mbi, mbi yeke gi mbi oko nga mbi yeke toto ka mingi.

Atâa so mbi lë kpengba songo na Nzapa lâ oko ape, mbi deba yanga kamême na mbi ga soeur na ngu 17. Lani mbi sara gi ye so a hunda na mbi ti sara. Me kete na pekoni, mbi gi bê ti mbi, mbi tene, ‘Nzapa asoro tâ mbi biani ti sara kua ni so la?’ Asoeur ni atene so, zo so ayeke na mara ti gingo bê ni so, lo yeke gue na lê ti wâ. Me so kue gbä. Mbi hinga lani so Jésus Christ ahonde tere ti lo hondengo ape, me lo fa tënë na azo nga lo mû maboko na ala (Matthieu 4:23-25). Na ngoi so mbi wara ngu 20, mbi bâ so mbeni raison ti tene mbi ngbâ soeur ni ayeke dä encore ape. Mo ye ti bâ! soeur so ayeke na li ti couvent ni atene na mbi so tongana mbi bâ gbä, mbi sigigi na yâ ti couvent ni. Âmanke lo sara mbeto ti tene mbi buba li ti atanga ni. Tongaso, mbi sigigi na couvent ni.

Tongana mbi kiri na kodoro, babâ na mama ti mbi acomprendre mbi nzoni mingi. Me teti so kua ayeke na kete kodoro ti e ni ape, mbi gue na Allemagne, na ndo ti ngambe ti mbi  ti koli. Ita ti mbi ni ayeke na yâ ti mbeni groupe ti azo ti poroso so aye si kangbi aduti ape na popo ti azo ti mosoro na awayere na so gi aEspagnol la ayeke dä. A nzere na mbi lani ti duti na popo ti azo ni so, so ala yeke tiri ndali ti adroit ti azo so ayeke sara kua nga na droit ti awali. Ni la mbi nga kue mbi lï na yâ ni, nga mbi na mbeni zo ni e mû tere. Na mbi, mbi yeke sara lani mbeni nzoni ye la, mbi yeke kangbi ambeti ti aCommuniste nga mbi yeke sara amarche.

Me a si na mbeni ngoi, mbi kiri mbi découragé. Mbi bâ so fani mingi azo ni ayeke sara ye alingbi na ye so ala yeke fa so ape. Ye so akiri azia vundu na bê ti mbi mingi ayeke ye so asi lani na ngu 1971 na ngoi so ambeni maseka ti yâ ti groupe ni ague agbi Consulat ti Espagne so ayeke na Francfort. Ala sara tongaso ti fa ngonzo ti ala ndali ti sioni komandema ti gouvernement ti Espagne. Me ti mbi, fason ti fango ngonzo ti ala ni so ayeke na lege ni ape.

Tongana mbi dü kozo molenge ti mbi, mbi tene na koli ti mbi so mbi yeke zia lege ti guengo na abungbi ti azo ti poroso ni so. Ye so asara si mbi ngbâ gi mbi oko, angbene kamarade ti mbi aga nga ti bâ mbi na bébé ti mbi ni ape. Tongaso, mbi hunda tere ti mbi, mbi tene, ‘E yeke na fini ngbanga ti nyen? Nzoni ti nyen la zo ayeke wara na peko ti ngangu so lo sara ti leke dutingo ti azo na yâ ti kodoro?’

LEGE SO BIBLE ACHANGÉ FINI TI MBI:

Na ngu 1976, aTémoin use, aEspagnol, aga na yanga-da ti e ala mû na mbi ambeni mbeti ti Nzapa. Mbi mû ni. Na use gango ti ala ni, mbi hunda gbâ ti tënë na ala na ndo ti pasi, kangbi so ayeke na popo ti azo nga na sarango sioni na azo. Bê ti mbi adö lani ti bâ so ala mû gi Bible si ala kiri tënë na ahunda ti mbi ni kue. Ni la, hio mbi yeda ti manda Bible.

Na tongo nda ni, mbi ye ti manda gi ye awe. Me na ngoi so mbi na koli ti mbi e komanse ti gue na Da ti Royaume ti aTémoin ti Jéhovah, ge la aye ni achangé. Andâ na tango ni so, e yeke na amolenge use awe. A-Témoin ni aga amû ka e na yanga-da ague na e na bungbi. Nga na ngoi ti abungbi ni, ala yeke bâ lege ti amolenge ti e. Ye so asara si mbi komanse ti ye aTémoin ni mingi.

Me atâa so kue, mbi ngbâ lakue ti gi bê ti mbi na ndo ti abungbi ti Nzapa. Tongaso mbi gue na Espagne ti bâ afami. Babâ kete ti mbi, so ayeke mbeni prêtre, atene na mbi ambeni tënë ti tene mbi zia lege ti mandango Bible ni. Me, aTémoin ti ndo ni so amû maboko na mbi mingi. Ala nga kue akiri tënë na ahunda ti mbi gi na lege ti Bible, tongana ti aTémoin ti Allemagne ni. A sara si étude so mbi zia ni lani, mbi ye ti kiri dä tongana mbi kiri na Allemagne. Atâa so koli ti mbi azia ti lo mandango Bible ni, mbi ngbâ ti mbi dä. A si na ngu 1978, mbi wara batême, mbi ga Témoin ti Jéhovah.

NZONI YE SO MBI WARA NA PEKONI:

Tâ hingango ye so mbi wara na yâ ti Bible amû lege na mbi ti sara tâ nzoni ye na yâ ti gigi ti mbi. Na tapande, na 1 Pierre 3:1-4 a wa awali ti “woko tere na gbe” ti akoli ti ala ‘na nengo ala mingi’ nga na sarango ye na “ngangu pëpe, so ayeke ye ti kota ngere na lê ti Nzapa.” Awango ni so amû maboko na mbi mingi ti sara kua ti mbi ti wali Chrétien nga na ti mama nzoni.

Mbi ga Témoin asara ngu 35 tongaso awe, na mbi yeke na ngia mingi ti duti na yâ ti sewa ti aita so ayeke voro Nzapa na ndo ti sese mobimba. Mbi yeke nga na ngia so na popo ti amolenge ti mbi oku, osio aga Témoin ti Jéhovah nga.