Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Mars 2014

 GIGI TI MBENI ZO

Atâa so mbi woko, mbi yeke na ngangu

Atâa so mbi woko, mbi yeke na ngangu

Na bango mbi, zo alingbi ti pensé ape so mbi yeke na ngangu ngbanga ti so mbi ne gi kilo 29 nga mbi duti gi na yâ ti mbeni puse ti azo ti bubango gere. Me atâa so tere ti mbi awoko, mbi yeke na mbeni ngangu na yâ ti tere ti mbi so amû maboko na mbi. Zia mbi fa tongana na nyen la wokongo ti mbi nga na ngangu so mbi yeke na ni asara ye na ndo ti gigi ti mbi.

Na tango so mbi yeke na ngu osio

Tongana li ti mbi atï na ndo ti ngoi so mbi de lani kete, mbi yeke pensé na angoi ti ngia so mbi yeke na ni lani na mbeni kete kodoro ti mbongo ti France, so babâ na mama ti mbi ayeke lani dä. E duti lani nzoni mingi kâ. Babâ ti mbi aleke na mbi mbeni balançoire nga mbi ye ka lani ti kpe loro na tere ti jardin ti e. Na ngu 1966, ambeni Témoin ti Jéhovah aga na yanga-da ti e, ala sara lisoro na babâ ti mbi a ninga. Nze mbasambala na pekoni, babâ ayeda ti ga Témoin ti Jéhovah. Hio na pekoni, mama kue amû peko ti lo, a sara si ala bata mbi lani na yâ ti mbeni sewa so ayeke na ngia mingi.

Kpale ti mbi ni akomanse gi kete na peko ti so e kiri na Espagne, kodoro ti babâ na mama ti mbi. Yâ ti amaboko ti mbi nga na agere ti mbi akomanse ti son ngangu. Na peko ti so e gue e bâ gbâ ti awanganga nde nde teti angu use, e tingbi na mbeni wanganga ni so lo yeke bâ tënë na ndo ti asongo ti yâ ti abio. Me lo tene, “Mbeni ye ti sarango ni encore ayeke dä ape.” Mama ti mbi atï na toto. Wanganga ni atene so mbi yeke na mbeni ngangu kobela ti yâ ti bio so asara si ambeni ye ti tere ti mbi ayeke buba bubango, nga so ando so abio ti mbi atingbi tere dä ayeke suku sukungo na ason mingi. Mbi mä lani yâ ti atënë ni kue ape teti so mbi yeke lani gi na ngu baleoko, me mbi hinga so a yeke lani nzoni sango ape.

Wanganga ni ahunda ti tokua mbi na mbeni ndo so a yeke soigné ka amolenge dä. Na tango so mbi si kâ, tâ gi bango da ni azia vundu na bê ti mbi. Andia ni kâ ayeke ngangu: Asoeur ti eglize Catholique ti ndo ni afâ kuä ti li ti mbi nga ala yü na mbi mbeni uniforme so ayeke nga pendere ape. Mbi toto si mbi tene na bê ti mbi, mbi tene ‘Mbi yeke gbu ande lê ni la?

JÉHOVAH AMÛ MABOKO NA MBI

Teti so babâ na mama ti mbi afa na mbi ti voro gi Jéhovah, mbi ke ti mû mbage ti mbi na aye ti vorongo ti Eglize Catholique so ala yeke sara na ndo ni kâ. Asoeur ni ahinga li ti ala na ndani so mbi ke so ape. Mbi toto na Jéhovah ti tene lo zia mbi ape, na gi hio tongaso mbi bâ maboko ti lo na ndo ti mbi, tongana ti mbeni babâ so aye molenge ti lo si lo yeke gbu molenge ni na yâ ti maboko ti lo.

A yeda na babâ na mama ti mbi ti ga ti bâ mbi kete gi na asamedi. Ala ga na mbi ambeti ti bungbi ti e ti tene mbi diko ti kpengba na mabe ti mbi. Na ndo ni  kâ, a ke ka na amolenge ti duti na ambeti ti ala wani, me ti mbi, asoeur ni ake na mbi ape ti bata ambeti ni nga na Bible ti mbi na tere ti mbi ti tene mbi diko ni lango oko oko. Mbi fa nga tënë ti beku ti mbi na ambeni mba ti mbi maseka ni, beku ti fini ti lakue lakue na yâ ti Paradis na ndo ti sese ge, so na ngoi ni kâ ande mbeni zo ti tï kobela ayeke dä ape (Apocalypse 21:3, 4). Atâa so na ambeni ngoi mbi yeke na vundu nga mbi bâ so mbi yeke gi mbi oko, mbi yeke lani na ngia ti bâ so mabe ti mbi ayeke kpengba kpengbango.

Na peko ti so mbi sara nze omene kâ, awanganga ni ahunda na mbi ti kiri na yanga-da. Kobela ti mbi ni ahunzi ape, me tere ti mbi anzere ti kiri na tere ti babâ na mama ti mbi. Tongana angu ayeke hon, abio ti mbi ayeke ba gi bango, na a kiri a son sioni. Na tango so mbi yeke kono ti ga wali, mbi woko kue. Me, na ngoi so mbi yeke na ngu 14, mbi wara batême, mbi leke na bê ti mbi ti sara na Babâ ti mbi ti yayu alingbi na ngangu ti mbi. Ye oko, na ambeni ngoi, vundu ahon ndo ti mbi si mbi sambela Nzapa, mbi tene: “Ye ni so asi gi na mbi ndali ti nyen? Pardon, mû maboko na mbi. Mo bâ pasi so mbi yeke bâ so ape?”

Ngoi ti maseka ti mbi ayeke lani ngangu na mbi mingi. A yeke na mbi lani ti hinga so mbeni ye ti sarango ni ndali ti mbi ayeke dä ape. Nga, tongana mbi gi ti haka tere ti mbi na akamarade ti mbi, so ala yeke ti ala na nzoni seni nga na ngia na yâ ti gigi ti ala, a yeke sara mbi nzoni ape. Mbi bâ tere ti mbi so mbi lingbi ape, nga mbi ke ti zi yanga na azo. Me, babâ na mama ti mbi nga na akamarade ti mbi amû maboko na mbi mingi. Mbi dabe ti mbi na kota kamarade ti mbi Alicia, so lo hon mbi lani na ngu 20. Lo mû lani maboko na mbi ti zia li ti mbi gi na ndo ti kobela ti mbi ape, nga ti pensé gi na akpale ti mbi ape, me ti bibe na azo.

YE SO AMÛ LEGE NA MBI TI DUTI NA NGIA NA YÂ TI GIGI TI MBI

Na tango so mbi wara ngu 18, songo tere ti mbi ni akiri aga tâ ngangu si guengo na abungbi kue afatigué mbi ngangu. Me, mbi mû angoi so mbi ngbâ na yanga-da ti manda na Bible nzoni. Mbeti ti Job nga na aPsaume amû maboko na mbi ti hinga mbilimbili so laso Jéhovah Nzapa ayeke bâ lege ti e mingi na lege ti yingo ahon ti mitele. So mbi yeke sambela lakue, a sara si mbi wara “ngangu so ahon ti so zo ayeke na ni” nga mbi wara “siriri ti Nzapa so ahon ndo ti bibe kue”.2 aCorinthien 4:7; aPhilippien 4:6, 7.

Tongana mbi wara ngu 22, a tene na mbi so mbi yeke duti fadeso gi na yâ ti puse. Mbi gi bê ti mbi mbi tene azo ayeke bâ mbi encore ape me ala yeke bâ gi mbeni puse so mbeni zo ti kobela la ayeke na yâ ni. Me, puse ni asara si na ambeni ngoi mbi bezoin ti tene mbeni zo aduti lakue na tere ti mbi ape. Ye so mbi pensé kozo mbi tene ayeke sioni so aga mbeni nzoni ye ndali ti mbi. Mbeni kamarade ti mbi, so iri ti lo ayeke Isabel, atene na mbi ti mû mbeni nze oko ti tene mbi na lo e fa tënë teti l’heure 60.

Na ngoi so lo sara tënë ni na mbi kpâ, mbi bâ so mbi kpa ti sara kua ni so ape. Me mbi sambela Jéhovah ti mû maboko na mbi, nga na mungo maboko ti sewa ti mbi na akamarade ti mbi, mbi sara kua ni. Teti so mbi yeke na ye ti sarango ni, nze ni ahon gi na loro loro, nga mbeto na kamene kue ahon. Kua ni so anzere na mbi mingi si na ngu 1996, mbi yeda ti mû kua ti pionnier permanent, so ti tene mbi yeke fa tënë teti l’heure 90 nze oko oko. Desizion so mbi mû so, a yeke nzoni mingi teti so a sara si mbi ga nduru mingi na Nzapa, a sara nga si mbi wara ngangu na yâ ti tere ti mbi. Kua ti fango tënë ni amû lege na mbi ti fa tënë ti mabe ti mbi na gbâ ti azo nga ti mû maboko na ambeni zo ni ti ga kamarade ti Nzapa.

JÉHOVAH ANGBÂ GI TI KPENGBA MBI

Na ngu 2001, mbi sara ndao ti oto na gere ti mbi use kue afâ. Na tango so mbi yeke bâ pasi na ndo ti gbogbo ti kobela na hôpital, mbi sambela na yâ ti bê ti mbi, mbi tene: “Pardon Jéhovah, zia mbi ape.” Mo ye ti bâ! mbeni wali, so gbogbo ti lo ayeke na tere ti ti mbi, ahunda mbi atene: “Mo yeke Témoin ti Jéhovah?” Me, mbi yeke na ngangu kete ti zi yanga ape, mbi yengi gi li ti mbi. Wali ni angbâ atene: “Mbi hinga ala! Mbi yeke diko ka ambeti ti ala.” Tënë ti lo ni akpengba mbi mingi. Atâa na yâ ti dutingo ti mbi ti mawa ni, mbi lingbi kamême ti fa tënë ti Jéhovah. So pasa!

Na ngoi so mbi wara ngangu kete, mbi leke ti mû encore ambeni ngoi ti fa tënë. Mama apusu mbi na yâ ti asalle ti hôpital ni na plâtre na gere ti mbi use kue. Lango oko oko, e yeke gue ti bâ ambeni zo ti kobela ni ti hunda ala wala ala yeke nzoni, nga e yeke zia na ala ambeni mbeti ti Nzapa. Tambela ni afatigué  mbi, me Jéhovah amû na mbi ngangu so mbi yeke na bezoin ni.

na ngu 2003

Na yâ ti angu so ahon, yâ ti atere ti mbi ni akiri ason sioni nga kuâ ti babâ ti mbi akiri azia gi mbeni vundu ni na ndo ni. Me so kue, mbi ngbâ ti duti na nzoni bango ndo. Na lege wa? Na lege so tongana mbi yeke na ngangu kete, mbi yeke sara kue ti duti gi na akamarade nga na afami, na ye so amû maboko mingi na mbi ti pensé na ndo ti kpale ti mbi ni ape. Nga, tongana mbi yeke gi mbi oko, mbi yeke diko Bible nga mbi yeke manda ni, wala mbi yeke fa tënë na azo na téléphone.

Mingi ni mbi yeke kanga lê ti mbi na mbi yeke tara ti bâ tere ti mbi na yâ ti fini dunia so Nzapa amû zendo ni

Mbi yeke gi nga ti wara ngia na yâ ti ambeni kete kete ye: pendere pupu so ayeke ya wala pendere fion ti afleur. A sara si mbi bâ so mbi doit ti kiri singila na Nzapa. Ti duti nduru ti he ngia ndali ti ambeni ye so ayeke si ayeke mû maboko na mbi mingi. Na tapande, mbeni lâ na fango tënë, kamarade ti mbi so ayeke pusu mbi aluti kete ti sû mbeni ye na mbeti. Mo ye ti bâ! puse ni ahon na mbi ague akpo mbeni oto so aluti. Bê ti e afâ! me tongana e ga ti bâ so ye ti sioni asi na mbi ape, e kue e tï na ngia.

Aye mingi ayeke dä so mbi peut ti sara ni ape. Mbi yeke ku kungo ti sara ande aye ni so. Mingi ni mbi yeke kanga lê ti mbi na mbi yeke tara ti bâ tere ti mbi na yâ ti fini dunia so Nzapa amû zendo ni (2 Pierre 3:13). Mbi bâ so mbi yeke na nzoni seni, mbi yeke fono nga mbi yeke sara ye kue so bê ti mbi aye. Atënë ti Gbia David so anzere ka na mbi mingi, so lo tene: “Zia beku ti mo na L’Éternel! Mo gbu ngangu, zia bê ti mo akpengba dä.” (Psaume 27:14). Atâa so ngangu ti tere ti mbi ayeke kiri kiringo na peko, Jéhovah angbâ ti mû na mbi ngangu. Mbi ngbâ lakue ti wara ngangu atâa so mbi woko.