Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO MARS 2014

 KOTA MAMA-TENE NI

Ye so Nzapa asara ndali ti mo

Ye so Nzapa asara ndali ti mo

“Nzapa andoye sese so tongaso, Lo mû Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue.”Jean 3:16, La Sainte Bible en sango.

So ayeke mbeni versê so azo mingi ahinga ni na ala yeke sara kusala na ni mingi. Mbeni versê nde so “afa tâ na nduru tënë songo so Nzapa ayeke na ni na azo nga na ye so lo sara ti tene ala wara salut” ayeke dä ape. Ni la, na ambeni kodoro, azo ayeke sû tënë ti yâ ti versê ni wala lo “Jean 3:16” ni mveni na ala zia ni dandara na ngoi ti ambeni matanga, na tere ti a-oto, agbagba wala na ambeni ndo nde.

Peut-être azo so asara kua na versê ni so apensé atene, so Nzapa andoye ala awe so, ala yeke wara ande fini ti lakue lakue ni. Ka ti mo? Ndoye ti Nzapa aye ti tene nyen ndali ti mo? Nga, ti mo, nyen la Nzapa asara so afa so lo ye mo?

“NZAPA ANDOYE SESE SO”

Azo mingi ayeda so Nzapa la asara dunia kue, atongoro, lâ, nze, akeke, anyama nga na e azo. Fason so a leke na aye so ayeke na fini ayeke ye ti dongo bê mingi, na ye so afa so mbeni zo so ayeke na kota ndara mingi la adoit ti sara aye ni so kue. Azo gbani gbani ayeke kiri singila lango oko oko na Nzapa ndali ti matabisi ti fini so lo mû na ala. Ala yeda nga so sân Nzapa ala lingbi ti ngbâ na fini ape ngbanga ti so lo la lo mû na ala pupu, ngu, kobe, lo la lo sara nga si ngu-nzapa ayeke pika. Aye so kue asara si e yeke na ngia.

A yeke nzoni e kiri singila na Nzapa ngbanga ti aye so kue ndali ti so Lo la lo sara e nga Lo la lo yeke bata e (Psaume 104:10-28; 145:15, 16; Kusala 4:24). Tongana e pensé na aye kue so Nzapa asara ti mû lege na e ti ngbâ na fini, e yeke hinga so lo ye e. Bazengele Paul atene: “[Nzapa] wani si amû na azo kue fini, mbö nga na aye kue. Teti na lege ti lo e yeke  na fini, e yeke tambela na e yeke dä.”Kusala 17:25, 28.

Me, e bâ ndoye ti Nzapa ni pëpe gi na mungo na e aye so e yeke na bezoin ni ti ngbâ na fini. Lo sara nga si e yeke nde na anyama na lege so lo zia na yâ ti e nzara ti vorongo lo nga lo mû maboko na e ti kaï nzara ni so (Matthieu 5:3). Na lege ni la si azo so amä yanga alingbi ti lï na yâ ti sewa ti Nzapa, ti ga “amolenge” ti lo.aRomain 8:19-21.

Tongana ti so Jean 3:16 atene, Nzapa andoye e na lege so lo tokua Jésus, Molenge ti lo na sese ge ti fa na e ye na ndo ti Nzapa ti lo so ayeke nga Babâ ti lo, nga ti kui ndali ti e. Me, azo mingi atene so ala hinga ti ala tâ ndani so a yeke lani kota ye ti tene Jésus aga akui ndali ti e azo so ape. Nga, so a tene kuâ ti Jésus afa so Nzapa aye e azo, ala hinga li ti ala na ni ape. Ni la, e yeke bâ fadeso ye so Bible atene na ndo ti ndani so a hunda ti tene Jésus akui nga na kota ti sandaga ti lo ni.

“LO MÛ MOLENGE TI LO NGENGELE OKO”

Zo kue ayeke tï kobela, ayeke ga mbakoro nga ayeke kui. Me a yeke ye so Jéhovah aleke lani na tongo nda ni la ape. Lo mû lani na Adam na Ève beku ti ngbâ na fini kpu na kpu na yâ ti paradis na ndo ti sese, me gi tongana ala mä yanga ti lo si. Nzapa atene tongana ala mä yanga ti lo ape, ala yeke kui (Genèse 2:17). Mawa ni ayeke so Adam ake komandema ti Nzapa, ni la lo ga na kuâ na ndo ti lo wani nga na ndo ti amolenge ti lo. Bazengele Paul atene: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.”aRomain 5:12.

Me Nzapa aye “fango ngbanga ti mbilimbili.” (Psaume 37:28). Ni la, atâa so Nzapa akanga lê pëpe na ndo ti kengo yanga so Adam ake, lo yeke zia gi azo kue na gbe ti pasi nga na kuâ ndali ti zo oko tongaso biani biani ape. Ti lingbi na ndia so atene “fini teti fini,” lo sara si balance ti ngbanga ni alingbi tere, na ye so amû lege ti tene azo so ayeke mä yanga ande akiri awara fini ti lakue lakue (Exode 21:23). Me hunda ni ayeke so, ‘A yeke sara tongana nyen ti kiri na fini ti zo ti mbilimbili so Adam agirisa ni so?’ Kiringo tënë ni ayeke so: A lingbi mbeni zo amû fini ti lo na sandaga, fini so alingbi tere na ti Adam kozo ti tene lo ke yanga, so ti tene fini ti zo ti mbilimbili.

Jésus wani ayeda ti ga na sese ge ti kui ti zi azo na gbe ti siokpari na kuâ

A yeke polele so, mbeni molenge ti yâ ti Adam oko so alingbi ti mû sandaga ni so ayeke dä ape, me Jésus la alingbi ti mû ni (Psaume 49:7-10). Teti so a dü Jésus sân siokpari, lo yeke ti lo mbilimbili-kue tongana ti Adam ândö. Ni la, tongana lo mû fini ti lo na sandaga, lo zi azo na gbe ti ngbâa ti siokpari. Ye so asara si lo mû na amolenge ti Adam na Ève pasa ti kiri ti wara oko fini ti zo ti mbilimbili so Adam na Ève ayeke na ni lani (aRomain 3:23, 24; 6:23). Tongana e ye ti bâ nzoni na peko ti pendere fä ti ndoye ni so, a yeke nzoni e sara nyen?

 “ZO SO AMÄ NA BÊ NA LO”

Tongana e kiri na Jean 3:16, e yeke bâ tënë so: “Zo so amä na bê na [Jésus] alingbi kui pëpe, me lo yeke na fini ti lakue lakue.” Tënë so aye ti fa so, ti wara matabisi ti fini ti lakue lakue ni, a ku na mbage ti e ti sara mbeni ye. Tongana e ye ti wara “fini ti lakue lakue” ni, a lingbi e mä na bê na Jésus nga e mä yanga ti lo.

Peut-être mo hunda tere ti mo, mo tene: ‘Tënë so andu tënë ti mango yanga ni tongana nyen? Jésus wani atene lani, atene “zo so amä na bê na lo” ayeke wara fini ti lakue lakue ape?’ Tâ tënë, ti mä na bê ayeke kota ye mingi. Me, a yeke nga kota ye ti girisa ape so na yâ ti Bible, gi mango na bê alingbi awe ape. Mbeni bakari (Vine’s Expository Dictionary of Old and New Testament Words) atene so tënë so Jean asara kua na ni na yanga ti kodoro so a sû na ni ândö aye ti sara tënë ti ziango bê kue na ndo ti mbeni ye, me pëpe gi senge mango na bê tongaso. Ti nzere na lê ti Nzapa, zo abezoin ti sara mbeni ye ahon gi ti yeda so Jésus ayeke Sauveur. Zo so amä na bê adoit nga ti sara kue ti sara ye alingbi na aye so Jésus afa. Tongana lo sara ni ape, mabe ti lo ayeke ye oko ape. Bible atene: “Mabe so ayeke na kusala pëpe akui awe.” (Jacques 2:26). E lingbi ti tene so, zo so amä na bê adoit ti sara ambeni ye so afa atene lo mä na bê biani na Jésus, so ti tene a lingbi lo sara ye alingbi na aye so lo mä na bê na ni.

Paul akiri azi yâ ti tënë ni, lo tene: “Ndoye so Christ ayeke na ni apusu e ti sara ye, ngbanga ti ye so e bâ ayeke so: zo oko [so ti tene Jésus] akui ndali ti azo kue; . . . na lo kui ndali ti azo kue si ala so ayeke na fini, ala lingbi ti ngbâ na fini ndali ti ala wani mbeni pëpe, me ndali ti lo so akui ndali ti ala na so a zingo lo na kuâ.” (2 aCorinthien 5:14, 15). A yeke nzoni e yeda na sandaga ti Jésus ni na bê oko si apusu e ti changé ambeni ye na yâ ti gigi ti e. E duti na fini gi ndali ti e wani ape, me ndali ti Jésus, lo so akui ndali ti e. So ti tene, na yâ ti gigi ti e, kozo ye so e doit ti sara ayeke ti sara aye so Jésus afa. Changement ni andu aye so na lê ti e ayeke kota ye, aye so e soro nga na aye kue so e yeke sara. Azo so amä na bê biani na Jésus ayeke wara ande nyen na pekoni?

“ALINGBI KUI PËPE, ME LO YEKE NA FINI TI LAKUE LAKUE”

Ndangba mbage ti Jean 3:16 afa zendo so Nzapa amû na zo so amä na bê na sandaga ni nga so asara ye alingbi na andia ti lo. Nzapa atene mara ti zo tongaso “alingbi kui pëpe, me lo yeke na fini ti lakue lakue.” Me, yâ ti beku ni so ayeke nde nde.

Na ambeni zo ni, Jésus amû na ala zendo ti fini ti lakue lakue na yayu. Lani, lo tene polele na adisciple ti lo so angbâ be-ta-zo na lo so lo yeke gue ti leke mbeni ndo na ala tongaso si lo na ala alingbi ti komande na yâ ti gloire (Jean 14:2, 3; aPhilippien 3:20, 21). Fade azo so a yeke zingo ande ala ti gue na yayu ayeke “duti aprêtre ti Nzapa na ti Christ na fade ala yeke komande tongana agbia legeoko na Christ na yâ ti ngu saki oko ni.”Apocalypse 20:6.

A yeke gi kete wungo ti adisciple ti Christ la ayeke wara pasa ni so. Jésus atene: “Kete kundu, ala sara mbeto pëpe, ngbanga ti so Babâ ti ala abâ so a yeke nzoni ti mû na ala royaume ni.” (Luc 12:32). Wungo ti “kete kundu” ni so ayeke oke? Apocalypse 14:1, 4, atene: “Mbi bâ ndo, na bâ, Molenge ti ngasangbaga [so ti tene Jésus Christ so a zingo lo na kuâ awe] ayeke luti na ndo ti Hoto ti Sion [na yayu], lo na azo saki ngbangbo oko na saki bale-osio na saki osio na tere ti lo; a sû iri ti lo na iri ti Babâ ti lo na ndo ti lê ti ala. . . . A vo lani azo so na popo ti azo ti sese tongana akozo li ti ye ndali ti Nzapa nga ndali ti Molenge ti ngasangbaga.” Tongana a haka wungo ni so na azo gbani gbani so ayeke na ndo ti sese ge, azo 144 000 ayeke gi “kete kundu”. Teti so a tene ala yeke agbia, ala yeke komande ande na ndo ti azo wa?

Jésus asara nga tënë ti ambeni zo ni nde so ayeke bâ nzoni na lege ti Royaume ti yayu. Na Jean 10:16, Jésus atene: “Mbi yeke na ambeni ngasangbaga so ayeke ti gbagba so pëpe. A lingbi mbi ga na ala so nga, na fade ala yeke mä go ti mbi na ala yeke ga kundu oko, berger oko.” “Angasangbaga” ni so ayeke ku ti wara fini ti lakue lakue na ndo ti sese ge, tongana ti so Adam na Ève ayeke lani na ni kozo ti tene ala sara siokpari. Me, nyen la afa na e  so abe-ta-zo so ayeke duti ande na fini na ndo ti sese ge?

Na yâ ti Bible, e yeke wara gbâ ti aversê so asara tënë ti Paradis so ayeke duti ande na ndo ti sese ge. Tongana mo ye ti bâ ni na lê ti mo wani, mo lingbi ti zi Bible ti mo ti diko aversê so ge: Psaume 37:9-11; 46:9, 10; 72:7, 8, 16; Ésaïe 35:5, 6; 65:21-23; Matthieu 5:5; Jean 5:28, 29; Apocalypse 21:4. Aversê ni atene so fade bira, kota nzara, kobela nga na kuâ ayeke hunzi ande. Ala sara nga tënë ti mbeni ngoi so ande anzoni zo ayeke duti na ngia ti sara da ti ala wani, ti fâ yaka nga ti bata amolenge ti ala na yâ ti siriri. * Atënë ni so anzere na mo? E hinga so nyen na nyen azendo ni so aga nduru ti ga tâ tënë awe.

NZAPA ASARA YE MINGI

Tongana mo gbu li ti mo kete na ndo ti aye kue so Nzapa asara ndali ti mo nga ndali ti azo kue, mo yeke bâ polele so lo sara ye mingi awe. Lo mû na e fini, hingango ndo, santé nga na aye so e yeke na bezoin ni ti ngbâ na fini. Na ndo ni kue, Nzapa ayeda ti mû Jésus ti kui ndali ti e, ye so aga na e gbâ ti anzoni ye tongana ti so e manda ni na Jean 3:16.

Fini ti lakue lakue na yâ ti siriri, nzoni duti so kobela, bira, nzara wala kuâ ayeke dä pëpe, alingbi biani ti zi na e lege ti duti na ngia nga ti wara anzoni ye kpu na kpu. Me sarango ye ti mo wani la alingbi ti mû lege na mo ti wara anzoni ye ni so wala pëpe. Kota hunda ni so angbâ fadeso ayeke so, Ti mo, nyen la mo yeke sara ti fa singila ti bê ti mo na Nzapa?

^ par. 24 Ti hinga ye mingi na ndo ti aprophétie ni, bâ chapitre 3 ti buku Bible afa nyen biani?, so aTémoin ti Jéhovah asigigi na ni.