Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO FÉVRIER 2014

 BIBLE ACHANGÉ FINI TI AZO

“Zendo ti paradis na ndo ti sese achangé fini ti mbi!”

“Zendo ti paradis na ndo ti sese achangé fini ti mbi!”
  • A DÜ LO NA NGU 1974

  • NA KODORO TI LETTONIE

  • LO YEKE ÂNDÖ ZO TI SARANGO MANDAKO TI MOTO

GIGI TI MBI ÂNDÖ:

A dü mbi na Riga, li-kodoro ti Lettonie. Mama la abata mbi na yaya ti mbi ti wali. Atâa so mama ayeke Catholique, e yeke gue na eglize gi na alango ti fête ti eglize ni. Mbi hinga so mbeni Nzapa ayeke dä, me lani so mbi ngbâ maseka, gbâ ti aye agbu bê ti mbi mingi.

Na ngoi so mbi yeke kono, mama ti mbi abâ so mbi ye ka ti zi yâ ti aye na ti kiri ti leke ni na place ni. Teti so na yanga-da, e yeke na gbâ ti aye so zo alingbi ti zi yâ ni tongaso, mama ayeke na mbeto ti zia gi mbi oko na yanga-da. Ni la, lo mû na mbi mbeni jouet so a leke na wen, so mbi ye ka ti zi yâ ni na ti kiri ti leke ni na place ni. Na ndo ti kode ni so, mbeni ye nde ayeke dä so agbu nga bê ti mbi mingi: a yeke kpengo na moto. Mama azia iri ti mbi na yâ ti mbeni ngia ti kpengo na amoto so a iri ni Zelta Mopēds (Mobylette ti lor). Na tongo nda ni, mbi kpe gi na amobylette, na pekoni, mbi kpe na amoto.

Mbi yeke manda ye lani hio mingi, a sara si mbi yeke kpe na moto ka hio mingi, me mbi lingbi ti wara sioni dä. Fani ota mbi sö benda na yâ ti angia ti wanguru so a sara na kodoro ti Lettonie, nga fani use na ala ti so akodoro ti Balte atingbi tere dä.

LEGE SO BIBLE ACHANGÉ FINI TI MBI:

Na tango so iri ti mbi awu, kete ndeko ti mbi Evija (so na pekoni lo ga wali ti mbi) awara lani mbeni mbeti ti aTémoin ti Jéhovah so na yâ ni lo lingbi ti hunda ti tene a ga a manda Bible na lo. Lo sû mbeti na yâ ni nga lo tokua ni. Hio na pekoni, aTémoin ti Jéhovah use aga abâ lo, na lo yeda ti tene ala manda Bible na lo. Mbi ke na lo ape, me na ngoi ni so, tënë ti Nzapa ade ti gbu bê ti mbi kue ape.

Mbeni lâ, aTémoin ni ahunda na mbi ti ga na mandango Bible ti Evija ni ti duti na tere ti lo na ti mä gi ni mango. Mbi yeda, na ye so mbi mä lani anzere na mbi mingi. Mbeni ye ni so anzere na mbi mingi ayeke zendo so Bible amû na ndo  ti paradis na ndo ti sese ge. Na tapande, ala fa na mbi tënë so ayeke na Psaume 37:10, 11, so atene: “A ngbâ kete, na fade azo ti sioni ayeke mbeni pëpe; fade mo bâ ndo so ala duti dä, na ala yeke mbeni pëpe. Me azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.” Zendo ni so anzere na mbi mingi.

Tënë ti Nzapa ni angbâ gi ti nzere na mbi. Mbi ga ti bâ so a-eglize ayeke tene mvene mingi. Me, aye so Bible afa adö bê ti mbi mingi ngbanga ti so atënë ni ayeke na lege ni nga polele.

Teti so mandango ye ti mbi ni ayeke gue na li ni, mbi manda so Jéhovah abâ fini na nene ni mingi (Psaume 36:10). Ye ni so achangé bango ndo ti mbi na ndo ti ngia ti kpengo na moto so mbi yeke sara. Mbi ye encore ti zia fini ti mbi na lê ti kuâ ape. Me, mbi ye ti mû fini ti mbi ti gonda na Jéhovah. Yango-iri na gonda nga na nzerengo tere so mbi yeke wara ka na sarango ngia ti kpengo na moto ni ayeke kota ye encore na lê ti mbi ape.

Mbi ga bâ so mbi yeke na tënë ti kiri na ni na Jéhovah, Nzapa so amû fini na zo

Na ngu 1996, mbi gue na mbeni assemblée internationale ti aTémoin ti Jéhovah na Tallinn, mbeni gbata ti Estonie, nduru na ndo so mbi yeke sara ka lani ngia ti kpengo na moto ni dä. Na kota bungbi ni, mbi bâ so a yeke azo so alondo na ando nde nde la abungbi ndo oko nga na siriri. Na tapande, na ngoi so mbeni Témoin ni agirisa bozo ti nginza ti lo, mbi pensé ti mbi mbi tene lo yeke wara ni encore ape. Andâ kete na pekoni, mbeni Témoin ni awara ni na lo kiri na ni na lo. Ye oko amanke dä ape! Li ti mbi akpe kue! Mbi ga ti bâ so aTémoin ayeke sara ye biani alingbi na ye so Bible afa. Mandango ye ti mbi na Evija ni angbâ gi ti gue na li ni, ni la na ngu 1997, e wara batême, e ga aTémoin ti Jéhovah.

NZONI YE SO MBI WARA NA PEKONI:

Ambeni kamarade ti mbi akui ndali ti sioni fason ti kpengo na moto ti ala. So mbi manda Bible, mbi ga ti bâ so mbi yeke na tënë ti kiri na ni na Jéhovah, Nzapa so amû fini na zo. Ye so la asara peut-être si mbi ngbâ na fini.

Mbi na Evija e wara pasa ti sara kua lani, teti ngu osio, na bureau ti aTémoin ti Jéhovah ti Riga. Laso, e yeke na ngia ti bâ lege ti molenge ti e ti wali so iri ti lo ayeke Alise, nga ti mû maboko na lo ti ye Jéhovah. Na yenga oko oko, mbi yeke mû ka lango oko ti leke a-oto nga na ambeni ye nde so abuba na ndo so a yeke sara traduction dä. A nzere na mbi mingi so mbi mû kode so mbi manda na aye na kete ti mbi ti sara na nzoni kua so! Juska laso, mbi ngbâ ti zi yâ ti aye na ti kiri ti leke ni na place ni.

Mbi bâ na nene ni mingi pasa so mbi na sewa ti mbi e yeke na ni ti fa tënë ti oko tâ Nzapa na azo. So kue gi grâce na aye so mbi manda na yâ ti Bible. Biani, zendo ti paradis na ndo ti sese achangé fini ti mbi!