Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO JANVIER 2014

 BIBLE ACHANGÉ FINI TI AZO

“Jéhovah agirisa mbi ape”

“Jéhovah agirisa mbi ape”
  • A DÜ LO NA NGU 1922

  • NA KODORO TI ESPAGNE

  • LO YEKE ÂNDÖ CATÉCHISTE

GIGI TI MBI ÂNDÖ:

A dü mbi na gbata ti Bilbao, na quartier ti azo so ayeke kamême na nginza, na banga ti Espagne. A dü e amolenge-wali osio, na mbi yeke use molenge ni. Sewa ti e ayeke akota Catholique, na mbi yeke manke Messe ape. Na ngoi so mbi wara ngu 23, mbi ga wafango mbeti, na mbi ye kua so mingi. Mbi sara kua ni teti angu 40. Ambeni ye so mbi ye fango ni lani ayeke aye so andu Eglize Catholique. Nga na alakui mbi fa catéchisme na amolenge-wali ndali ti kozo communion ti ala.

Na peko ti ngu 12 so mbi na koli ti mbi e sara, lo kui, na lo zia mbi na amolenge osio. Andâ mbi yeke gi na ngu 33 la! Mbi tara kue ti wara dengo bê na yâ ti eglize ti mbi ni, me lakue ambeni hunda ayeke ga na li ti mbi, ahunda tongana ti so ge: ‘So Jésus asö e awe so, ngbanga ti nyen azo angbâ gi ti kui? Tongana anzoni zo ayeke gue na yayu, ngbanga ti nyen e yeke sambela ti tene Royaume ti Nzapa aga?’ Na ndo ti aso kue, mbi yeke hunda tere ti mbi, mbi tene: ‘Tongana Nzapa afâ ngbanga ti e awe na lâ ti kuâ ti e, ngbanga ti nyen a tene na lâ ti fango ngbanga ti nda ni e yeke zia yayu, purgatoire wala enfer ti tene e gue a fa ngbanga ti e ni?’

Mbi hunda atënë ni so na ambeni prêtre. Mbeni prêtre ni atene na mbi, atene ni hinga ape, tongana mbi ye, mbi hunda évêque. Lo tene nga mbi ye ti hinga tënë ni so ngbanga ti nyen? Nga so mbi mä na bê na Nzapa awe so, a lingbi awe ape? Me mbi ngbâ ti gi akiringo tënë ni. Na ambeni ngoi, mbi gue mbi mä fango tënë ti aJésuite, ti aPentécotiste nga na ti aGnostique, me kue gbä.

LEGE SO BIBLE ACHANGÉ FINI TI MBI:

Lani tongana mbi yeke na ngu 60 na ndo ni tongaso, mbeni élève ti ngu 7 atisa mbi na mbeni bungbi ti aTémoin ti Jéhovah. Aye so mbi bâ na mbi mä kâ anzere na mbi mingi, me teti so mbi yeke na kua mingi, mbi wara lege ti kiri ti bâ tere na aTémoin ti Jéhovah ape. Ngu use na pekoni, mbeni koli na wali Témoin ti Jéhovah, so iri ti ala ayeke Juan na Maite, aga na yanga-da ti mbi. Mbi hunda gbâ ti atënë na ala, na ala yeke kiri tënë na mbi, na e sara tongaso teti anze ota. Na nda ni, e komanse ti manda Bible.

Lakue tongana a ga ti manda Bible na mbi, mbi yeke ku ni  kungo na nzara ni. Mbi yeke hasa yâ ti aye ni oko na oko, nga mbi mû mara ti aBible nde nde ota ti bâ wala aye so aTémoin ti Jéhovah ayeke fa ayeke tâ tënë. Hio, mbi ga ti bâ so depuis so mbi hinga Bible nzoni ape. Li ti mbi aga kirikiri ti bâ so kota kangbi ayeke na popo ti aye so mbi mä na bê na ni kozo nga na aye so Bible afa. Ye so asara mbi nzoni oko ape. Aye so mbi mä na bê dä ngangu so, a zi ni kue tongana ti mbeni keke so a zi ni na gunda ni kue.

Lani mbi hinga so mbi wara mbeni kota mosoro

Me na pekoni, tere ti use koli ti mbi ason sioni si lo kui. Na oko ngoi ni, mbi gue na retraite nga mbi zia gbata ti Bilbao teti mbeni kete ngoi. Juan na Maite kue ague na mbeni ndo nde. Ye so asara si mandango Bible ti mbi ni aluti. Me, na yâ ti bê ti mbi, mbi hinga so mbi wara mbeni kota mosoro, na mbi girisa ni lani ape.

Ngu 20 tongaso na pekoni, andâ mbi yeke na ngu 82 la, Juan na Maite akiri na Bilbao na ala gue na yanga-da ti mbi ti bâ mbi. So nzerengo tere na mbi so mbi kiri mbi bâ tere na ala! Mbi bâ so Jéhovah agirisa mbi ape, na mbi kiri mbi to nda ti mandango Bible ni. Juan na Maite ahinga ti kanga bê! A yeke si so mbi yeke hunda oko tënë na ala fani mingi ndali ti so mbi ye ti mä akiringo tënë ti Bible lege mingi si mbi zi na yâ ti li ti mbi angbene ye so mbi mä na bê na ni kozo. Mbi ye nga lani ti mä yâ ti Bible nzoni si mbi lingbi ti fa ni na akamarade ti mbi nga na afami ti mbi.

Mbi wara batême na ngoi so mbi yeke na ngu 87, na a yeke mbeni kota lango na mbi. Mbi wara batême ni na ngoi ti mbeni kota bungbi ti aTémoin ti Jéhovah. Mbeni ancien la amû mbeni diskur so aluti na ndo ti Bible na e so e ga ti wara batême. Diskur ni asara si ngu ti lê ti mbi aga. Mbi mä ni mo bâ mo tene Jéhovah wani la ayeke sara tënë na mbi. Na peko ti batême ni, gbâ ti aTémoin aga abara mbi, même ala so mbi na ala e bâ tere lâ oko ape.

NZONI YE SO MBI WARA NA PEKONI:

Depuis la mbi hinga so Jésus Christ ayeke “lege ni”. (Jean 14:6). Me mandango Bible amû maboko na mbi ti hinga Jéhovah, lo so Jésus ayeke gue na e na mbage ti lo. Fadeso mbi lingbi ti sambela Nzapa tongana Babâ ti mbi so mbi ye lo mingi nga tongana kota kamarade ti mbi. Na tango so mbi diko buku Ga ndulu na Jéhovah, * a sara ye mingi na yâ ti fini ti mbi. Mbi diko ni na mbeni bï oko tongaso a hunzi! Ti hinga so Jéhovah ayeke Nzapa ti nzoni bê, a ndu bê ti mbi mingi.

Tongana mbi kiri mbi bâ ngoi kue so mbi mû ti gi na tâ tënë, mbi pensé na tënë ti Jésus so, lo tene: “Ala ngbâ ti hunda ye, na fade a yeke mû ni na ala. Ala ngbâ ti gi ye, na fade ala yeke wara ni. Ala ngbâ ti pika yanga-da, na fade a yeke zi ni na ala.” (Matthieu 7:7). So fadeso mbi wara akiringo tënë so mbi yeke gi ni depuis so, a nzere na mbi mingi, na mbi ye ti fa nga ni na ambeni zo.

Atâa so mbi yeke na ngu 90, mbi bâ so mbi de kete na lege ti yingo. Lakue tongana mbi gue na mbeni bungbi na Da ti Royaume, a yeke tongana mbeni pasa la mbi wara ti manda mbeni ye nga ti duti na tere ti aita ti mbi ti koli na ti wali. Mbi yeke ku kungo ngoi so mbi yeke kiri ti fa ye na azo na yâ ti Paradis na ndo ti sese ge (Apocalypse 21:3, 4). Mbi yeke ku nga ngoi so mbi yeke kiri ti wara tere na azo ti mbi so akui awe nga ti tene mbi manda Bible na ala (Kusala 24:15). Mbi yeke ku kungo ti fa na ala ande pendere matabisi so Jéhovah amû na mbi na mbakoro ti mbi.

^ par. 15 A-Témoin ti Jéhovah la asigigi na ni.