Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Novembre 2013

 KOTA MAMA-TENE NI | ATËNË TI MVENE SO ASARA SI AMBENI ZO AYE NZAPA APE

Tënë ti mvene so asara si azo atene Nzapa ayeke sioni

Tënë ti mvene so asara si azo atene Nzapa ayeke sioni

YE SO AZO MINGI AMÄ NA BÊ DÄ

“Tâ gi na peko ti kuâ ti ala, âme ti azo so akui na yâ ti siokpari ayeke gue na enfer; kâ, ala yeke bâ pasi na lê ti ‘wâ so ayeke mingo lâ oko pëpe.’” (Catechism of the Catholic Church.) Akota zo ti eglize atene so azo so ayeke na yâ ti enfer, popo ti ala na Nzapa akangbi biaku biaku.

TÂ YE SO BIBLE AFA

‘Âme so asara siokpari, fade a kui.’ (Ézéchiel 18:4). Akuâ “ahinga ye oko pëpe”. (Zo-ti-fa-tene 9:5). Tongana âme ayeke kui nga lo hinga ye oko ape, lo yeke kiri ti bâ pasi na yâ ti “wâ so ayeke mingo lâ oko ape” tongana nyen? Wala Nzapa ayeke punir lo ni tongana nyen?

Na yâ ti Bible, mingi ni tënë ti Hébreu nga na ti Grec so a kiri pekoni na “enfer” aye ti sara tënë ti dû ti kuâ. Na tapande, na ngoi so Job ayeke bâ pasi lani na mbeni sioni kobela, lo tene na Nzapa, lo tene: “A yeke nzoni mo bata mbi na yâ ti dû ti kuâ [“a-enfer,” TOB].” (Job 14:13, Tene ti Nzapa, Kozo Mbouki). Job aye lani ti wu tere ti lo na yâ ti dû ti kuâ, me pëpe na mbeni ndo so ayo na Nzapa wala so a yeke sara pasi na azo dä.

NDANI SO A YEKE KOTA YE TI HINGA NI

Tongana a tene so Nzapa ayeke sara sioni na zo ayeke sara si bê ti e ake lo. Yapakara Rocío, so ayeke na Mexique, atene: “Na kete ti mbi a fa na mbi tënë ti enfer ti wâ, na a sara mbi mbeto mingi. Mbi tene ti mbi, mbi tene, Nzapa ayeke gi sioni, lo ye ngonzo nga lo yeke bâ mawa ti zo ti kete ape.”

Ye so Bible atene polele na ndo ti afango ngbanga ti Nzapa nga na ndo ti dutingo ti akuâ achangé bango ndo ti Rocío na ndo ti Nzapa. Lo tene: “Bê ti mbi adë fadeso, mo bâ mo tene a zi mbeni nengo ye na ndo ti mbi. Mbi bâ so Nzapa aye nzoni ti e, lo ye e, na so mbi nga kue mbi lingbi ti ye lo. Lo yeke tongana mbeni babâ so agbu tïtî amolenge ti lo na so aye nzoni ti ala.”​—Ésaïe 41:13.

Azo mingi ayeke sara effort ti sara na Nzapa ndali ti so ala yeke na mbeto ti enfer, me Nzapa aye pëpe si mo voro lo ngbanga ti so mbeto ti lo asara mo sioni. Jésus atene: “Mo ndoye Jéhovah Nzapa ti mo.” (Marc 12:29, 30). Tongana e ga ti hinga so Nzapa ayeke sara sioni na zo ape, e yeke sara nga confiance na angbanga so lo yeke fâ kekereke. Tongana ti Elihu, kamarade ti Job, e lingbi ti tene na bê ti e kue: “Nzapa alingbi sara sioye kete pëpe, Lo Ti Ngangu Ahon Kue alingbi sara sioni oko pëpe.”​—Job 34:10.