Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Juillet 2013

 AYE SO AYEKE SARA SI MARIAGE ADUTI NA NGIA

Lege ti sara si fini mariage ti mo aduti na ngia

Lege ti sara si fini mariage ti mo aduti na ngia

HERMAN atene: * “Kozo wali ti mbi akui na cancer na peko ti so mariage ti e aninga ngu 34. Na ngoi so mbi sara mariage na Linda, ti lo, lakue mbi yeke haka lo na kozo wali ti mbi. Mbeni ye so asara si kpale ni akiri akono ayeke so akamarade ti mbi ayeke fa gi anzoni sarango ye ti kozo wali ti mbi, na a son bê ti Linda sioni.”

LINDA atene: “Na peko ti mariage ti mbi na Herman, mbi bâ so azo ni ayeke tene gi nzoni tënë ti kozo wali ni ahon ti mbi. Ala ye lo mingi nga ala yeke fa gi anzoni sarango ye ti lo. Na ambeni ngoi, mbi yeke hunda tere ti mbi wala lo yeke ye ande mbi tongana kozo wali ti lo ni la?”

Linda asara divorce na kozo koli ti lo. Warango tere ti lo na Herman ayeke mbeni ye so anzere na ala mingi. Ye oko, tongana ti so a si na Linda na Herman, na yâ ti fini mariage, zo alingbi ti wara akpale so lo wara lâ oko ape na yâ ti kozo mariage ti lo. *

Tongana mo kiri mo sara fini mariage, tënë ti bê ti mo na ndo ni ayeke so wa? Mbeni wali so iri ti lo Tamara, so lo sara mariage ngu ota na peko ti divorce ti lo, atene: “Tongana mo sara mariage kpâ, ye so ayeke na li ti mo ayeke so mariage ni ayeke ngbâ ande lakue lakue. Me na fini mariage, pensé ni so ayeke dä encore ape ndali ti so lakue mo yeke pensé na ye so asi na kozo mariage ti mo so.”

Atâa so kue, akoli na awali mingi so asara fini mariage ayeke na ngia na yâ ti mariage ti ala. So ala yeke na ngia na yâ ti mariage ti ala afa so mo kue mo lingbi ti duti na ngia na yâ ti mariage ti mo. Me mo yeke sara tongana nyen? E yeke fa akpale ota so ayeke  si ka, nga awango ti Bible so alingbi ti mû maboko na mo. *

KOZO KPALE NI: A YEKE NGANGU NA MO TI ZI BÊ TI MO NA NDO TI NGBENE MARIAGE NI.

Ellen so ayeke na Afrika ti Mbongo atene: “A yeke ngangu na mbi ti girisa asouvenir ti ngbene mariage ti mbi, mbilimbili na ngoi so e gue na a-oko place so mbi na kozo koli ti mbi e yeke gue ka na congé dä. Na ambeni ngoi, a si so mbi yeke haka fini koli ti mbi na kozo koli ti mbi.” Ti ambeni nga, tongana koli wala wali ti mo asara mariage kozo, ngonzo alingbi ti sara mo na ngoi so lakue lo yeke sara tënë ti ngbene mariage ni.

Gi ti sara anzoni ye so asouvenir ni ayeke kpengba songo ti mo na koli wala wali ti mo

YE SO MO LINGBI TI SARA: Hinga so a yeke ti lo ngangu ti tene zo agirisa gi yeke tongaso ngbene mariage ti lo, mbilimbili tongana ngbene mariage ni aninga. Ambeni zo atene so a yeke si so, gi tongaso, ala yeke iri koli wala wali ti ala na iri ti ngbene koli wala wali ti ala ni. Na mara ti ye tongaso, mo lingbi ti sara nyen? Bible atene: “Ala hinga ti zia tere ti ala na place ti mba ti ala.”​—1 Pierre 3:8.

Zia pëpe si mbanda ague na mo ti ke ti tene mba ti mo asara tënë ti ngbene mariage ti lo. Tongana mba ti mo ni aye ti sara tënë ti gigi ti lo na ngbene koli wala wali ti lo ni, zia tere ti mo na place ti lo nga mä lo na nzoni bê. Nga, tene hio pëpe so lo yeke haka mo na ngbene koli wala ngbene wali ti lo la. Ian, so lo kiri lo sara mariage a sara ngu bale-oko awe, atene: “Wali ti mbi Kaitlyn ake na mbi ape ti sara tënë ti ngbene wali ti mbi. Lo bâ ni tongana mbeni ye so alingbi ti mû lege na lo ti hinga ngbanga ti nyen mbi ga tongaso.” Mo lingbi même ti bâ so mara ti lisoro tongaso ayeke mû maboko na mo ti kpengba songo ti mo na fini koli wala fini wali ti mo.

Gi ti bâ gi anzoni sarango ye ti koli wala wali ti mo. Biani, ngbene koli wala ngbene wali ti mo alingbi ti duti na ambeni sarango ye so fini ni so ayeke na ni ape. Me fini koli wala fini wali ti mo alingbi nga ti duti na ambeni sarango ye so ngbene zo ni ayeke na ni ape. Ye oko, gi ti sara si songo ti mo na lo akpengba. Ahon ti haka lo na mbeni zo nde, gi ti bâ aye so anzere na mo mingi na mbage ti lo (aGalate 6:4). Edmond so lo sara mariage lege use awe atene: “Tongana ti so kamarade so mbeni zo asara kozo ayeke nde na ti so lo sara na mbeni fini zo, ngbene mariage ti mo ayeke nde na fini mariage ni.”

Mo yeke sara tongana nyen ti tene anzoni souvenir ti ngbene mariage ti mo abuba yâ ti fini mariage ti mo ape? Jared atene: “Mbeni lâ, mbi tene na wali ti mbi so ngbene mariage ti mbi ayeke tongana mbeni pendere buku so mbi na kozo wali ti mbi la e sû ni. Na ambeni ngoi, mbi lingbi ti diko ni ti dabe ti mbi na anzoni souvenir so e vivre ni. Me gigi ni kue la ape. Ti ndembe so, mbi na wali ti mbi e yeke na ngia, na a yeke tongana mbeni fini buku la e yeke sû so.”

TARA TI SARA YE SO: Hunda koli wala wali ti mo ti bâ wala tere ti lo anzere ape tongana ala komanse ti sara tënë ti ngbene mariage ti ala. Gi ti hinga ngoi wa la a yeke nzoni oko ape ti sara tënë ti ngbene mariage ti mba.

USE KPALE NI: A YEKE NGANGU NA MO TI SARA SONGO NA ANGBENE KAMARADE TI FINI KOLI WALA FINI WALI TI MO.

Javier so lo sara mariage ngu omene na peko ti divorce ti lo atene: “Teti ambeni ngoi na peko ti mariage ti e, wali ti mbi abâ ti lo so ambeni ngbene kamarade ti mbi ayeke tara lo ti bâ wala lo yeke tongana nyen.” Ti Leo ayeke ti lo nde. Lo tene: “Ambeni zo ayeke tene na wali ti mbi so ala ye ngbene koli ti lo mingi nga lo manke ala mingi; na ala yeke tene ni tâ na lê ti mbi.”

YE SO MO LINGBI TI SARA: Tara ti zia tere ti mo na place ti akamarade ti mo. Ian, so e sara tënë ti lo fade awe, atene: “Mbi pensé so ayeke kete ye ape nga a nzere kue pëpe na akamarade ti mbi ti sara kamarade na mbeni zo so kozo ala hinga lo ape tongana wali ti mbi.” Ni la e wa mo ‘ti sara ye na lege ni, ti sara ye biani na ngangu pëpe na azo kue.’ (Tite 3:2). Zia ngoi na akamarade ti koli wala wali ti mo wala afami ti lo ti gi ti lë songo na mo. So mo sara fini mariage, a ye ti tene so mo yeke sara kamarade na afini zo. Javier, so e fa peko ti ambeni tënë ti lo awe, atene so tongana ngoi ayeke hon, lo na wali ti lo alë kpengba songo na angbene kamarade ti mba. Lo kiri lo tene: “Me mbi na lo e gi nga ti wara afini kamarade, na ye so amû nga maboko na e.”

Pensé na koli wala wali ti mo na ngoi so mo na angbene kamarade ti mo ayeke sara lisoro. Na tapande, tongana mbeni zo asara tënë ti ngbene koli wala  wali ti mo, a yeke nzoni mo sara ye na ndara nga mo gbu li nzoni tongaso si mba ti mo abâ pëpe so a zia lo yamba. Bible atene: “Tënë senge ti ambeni zo [wala “tënë so zo atene sân ti gbu li”, FD] akpo tongana épée, me menga ti wandara asara si ye aga nzoni.”​—aProverbe 12:18.

TARA TI SARA YE SO: Gbu li kozoni na ndo ti ambeni ngoi ti warango tere so akamarade ti mo alingbi peut-être ti sara si koli wala wali ti mo aduti nzoni ape. Gbu li kozoni na ndo ti lege so mo lingbi ti sara ye tongana akamarade ti mo ahunda tënë nga ala tene tënë na ndo ti ngbene mariage ti mo.

OTA KPALE NI: A YEKE NGANGU NA MO TI SARA CONFIANCE NA FINI KOLI WALA FINI WALI TI MO NDALI TI SO NGBENE NI SO ADUTI BE-TA-ZO NA MO APE.

André, so ngbene wali ti lo azia lo ahon, si na pekoni lo sara mariage na Rita, atene: “Mbi yeke na mbeto ti tene mbeni wali akiri asara mara ti ye ni so na mbi. Mingi ni, mbi yeke hunda tere ti mbi wala mbi yeke duti nzoni koli tongana kozo koli ti Rita? Mbi yeke gi bê ti mbi so peut-être lo lingbi ti bâ so mbi yeke tâ tongana ti so lo ye ape, na lo yeke ke mbi ti mû mbeni koli nde.”

YE SO MO LINGBI TI SARA: Fa agingo bê ti mo polele na koli wala wali ti mo. Bible atene: “Ye so azo aye ti sara aga ye pëpe tongana ala wa tere ti ala pëpe”. (aProverbe 15:22). Dutingo ndo oko ti sara lisoro amû maboko na André na Rita ti sara confiance na mba. André atene: “Mbi tene na Rita mbi tene tongana akpale ayeke dä, mbi yeke bâ divorce lâ oko pëpe tongana mbeni lege ti leke na akpale ni hio. Rita nga kue atene na mbi tongaso. Yeke yeke, mbi mû bê ti mbi kue na lo.”

Tongana koli wala wali ti mo ayeke mbeni zo so ngbene zo ti lo ni aduti lani be-ta-zo na lo ape, sara kue ti tene lo sara confiance na mo. Na tapande, Michel na Sabine, so angbene mariage ti ala ahunzi na divorce, amä tere ti tene tongana mbeni oko awara tere na ngbene koli wala wali ti lo, a yeke nzoni lo tene na mba ti lo. Sabine atene: “Mango tere ni so asara si zo agi bê ti lo na ndo ti mba ti lo ape.”​—aÉphésien 4:25.

TARA TI SARA YE SO: Tongana mo yeke sara lisoro gi mo oko na mbeni zo so ayeke koli wala wali ti mo ape, atâa lê na lê, wala na téléphone wala na lege ti Internet, sara hange si ahon ndo ni ape.

Azo mingi aduti na ngia na yâ ti fini mariage ti ala; ti mo nga kue alingbi ti duti tongaso. Tongana mo haka ngbene mariage ti mo na ti fadeso, mo yeke hinga dutingo ti mo nzoni ahon ti kozo. André, so e sara tënë ti lo fade awe, atene: “Mariage ti mbi na Rita adë bê ti mbi mingi. Ngu 13 so e sara na yâ ti mariage, songo ti e akpengba nzoni, na e ye ti girisa mara ti songo ni so lâ oko ape.”

^ par. 3 A changé ambeni iri ni.

^ par. 5 Ti tâ tënë ni, zo so ngbene mariage ti lo ahunzi na divorce na zo so koli wala wali ti lo akui kuingo, pensé ti ala nga na dutingo ti ala ayeke nde nde. Ni la, article so ayeke mû ande maboko na mara ti azo tongaso ti sara si fini mariage ti ala aduti na ngia.

^ par. 7 Tongana mo ye ti hinga ambeni ye so a lingbi mo sara, diko a-article ti Réveillez-vous! ti avril 2012, so li ni atene, “Des familles recomposées épanouies,” so aTémoin ti Jéhovah asigigi na ni.

HUNDA TERE TI MO  . . .

  • Ambeni pendere sarango ye ti koli wala wali ti mbi so agbu bê ti mbi ayeke so wa?

  • Tongana mbeni zo asara tënë ti ngbene mariage ti mbi, mbi yeke sara tongana nyen ti tene fini koli wala fini wali ti mbi awara vundu ape?