Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Juillet 2013

Bungbi ti Nzapa ti mo abâ nzoni sarango ye tongana nyen?

Bungbi ti Nzapa ti mo abâ nzoni sarango ye tongana nyen?

Sylvie so lo yeke sara kua na ndo so a yeke bata ambakoro dä atene: “Na da senda-gi, mbi hinga ambeni mba ti mbi mingi so ala tene ala ye tënë ti Nzapa mingi. Me ala yeke triché nga ala yeke nyon mbangi. Bungbi ti Nzapa ti ala achangé ye oko na yâ ti gigi ti ala ape.”

Mbeni koli so iri ti lo Lionel atene: “Amba ti mbi ti place ti kua ayeke tene mvene; même tongana tere ti ala ason ape, ala yeke iri ndo ti tene so tere ti ala ason. Ti ala, bungbi ti Nzapa ayeke gi tongana mbeni ye so zo azia na yâ ti da ti lo ti tene a bâ gi ni bango.”

Abungbi ti Nzapa so mingi ti azo ayeke gue dä ayeke pusu ala ti duti na nzoni sarango ye ape. Laso, azo mingi ayeke “sara ye mo bâ mo tene ala gbu tënë ti Nzapa ngangu, andâ ala ke ngangu ti tënë ni awe”. (2 Timothée 3:5). Akota zo ti abungbi ti Nzapa ni ayeke zia nga nzoni tapande ape; ala yeke mû Mbeti ti Nzapa ti mû na wango na azo ti ala ni ti fa na ala nzoni sarango ye pëpe. Ni la azo mingi abâ so même tongana ala sara ye na lege ni ape, a sara ye oko na Nzapa ape.

BIBLE ATENE TI LO NYEN?

Bible afa so sarango ye ti e alingbi ti zia ngia na bê ti Nzapa wala ti son bê ti lo. Na ngoi so ândö azo ti Israël asara lani kpengba-li na Nzapa, “ala mû vundu na Lo”. (Psaume 78:40). Me tongana mbeni zo achangé asioni sarango ye ti lo ‘ngia ayeke mingi na yayu’. (Luc 15:7). Na ngoi so mbeni zo ahinga anzoni sarango ye ti Babâ ti e so ayeke na yayu, lo yeke kiri ti ye Nzapa mingi, na a yeke pusu lo ti ndoye aye so Nzapa aye ni nga ti ke ati so lo ke.—Amos 5:15.

ATÉMOIN TI JÉHOVAH AYEKE SARA TI ALA TONGANA NYEN?

Mbeni mbeti-sango (Deseret News) na Amerika atene so aTémoin ti Jéhovah ayeke mû maboko na azo ti sewa ti mä tere nzoni, ti mû maboko na amba ti ala nga ti ga anzoni molenge ti kodoro. Mbeti-sango ni so akiri atene: “Ti aTémoin ti Jéhovah, a yeke kota ye ti tene zo aduti na nzoni sarango ye. Ti ala, nyongo manga, nyongo sämba ahon ndo ni, nyongo mbangi, angia ti nginza, lango-sioni nga bungbingo koli na koli wala wali na wali ayeke sioni mingi na lê ti Nzapa.”

Akota zo ti abungbi ti Nzapa ayeke fa nzoni sarango ye na azo ti ala la?

Ye so aTémoin ti Jéhovah ahinga na ndo ti Nzapa asara nyen na ndo ti ala? Sylvie, so e sara tënë ti lo fade awe, atene: “Sarango ye ti likisi ahon ndo ni na ndo so a yeke bata ambakoro dä so. Mbi kue mbi lingbi fade ti sara tongaso. Me so mbi hinga so Jéhovah * aye ni ape amû maboko na mbi ti sara ye na lege ni. Mbi yeke na ngia nga mbi yeke na siriri ti bê.” Sylvie abâ so sarango ye tongana ti so bungbi ti Nzapa ti lo afa na lo asara si gigi ti lo aga nzoni.

^ par. 9 Jéhovah ayeke iri ti Nzapa na yâ ti Bible.