Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Mai 2013

Will You Trust God?

Will You Trust God?

BÂ SO mo yeke na mbeni kamarade so mo ye lo mingi, me lo sara mbeni ye so mo gi li ti mo na ni gbä. Ambeni zo akasa lo na ala tene so kamarade ti mo ni ayeke sioni. Fade mo yeke yeda na ala hio? wala mo yeke ku ti mä kamarade ti mo ni si? Ka tongana lo yeke na tere ti mo ape, fade mo yeke ku lo juska lo wani lo ga lo fa tënë ti ye so lo sara so si?

Peut-être kozoni si mo mä kiringo tënë ni, mo ye ti hinga ambeni tënë si. Na tapande, mo yeke hunda tere ti mo, ‘Mbi hinga tâ kamarade ti mbi so nzoni la? Nyen la anzere na mbi na mbage ti lo, nyen?’ A lingbi e hunda nga a-oko tënë so na ndo ti Nzapa. Lo yeke tâ biani sioni?

Hinga ape ambeni ye so Nzapa asara so, mo hinga ndani nzoni ape. Wala li ti mo akpe na aye so lo zia si ayeke si so. Azo mingi ayeke tene na mo so Nzapa ayeke sioni na so a lingbi mo nga kue mo bâ lo tongaso. Mo yeke yeda na ala hio? Wala mo yeke gi ti hinga ye na ndo ti lo nzoni si? Hunda tere ti mo, ‘Anzoni ye wa la Nzapa asara na mbi?’

Tongana mo wara gi akpale na yâ ti gigi ti mo, peut-être mo yeke duti nduru ti tene so Nzapa asara ye ti nzoni oko na mo ape. Me gbu li kete si. Nzapa la atokua aye ti sioni so na ndo ti mo? wala lo yeke mû gi na mo anzoni ye? Tongana ti so e bâ fade, Satan la ayeke “mokonzi ti dunia so”, me Jéhovah ape (Jean 12:31). Tongaso, Satan la ayeke na gbe ti aye ti vundu nga na aye ti kirikiri so ayeke si na yâ ti dunia so. Mbeni ye ni nga ayeke so e yeke azo so siokpari ayeke na tere ti e nga ambeni ye alingbi ti si gi gbagburu tongaso na e.

Nzapa la asara si mo yeke bâ pasi? wala lo yeke mû na mo gi anzoni ye?

Ka ti Nzapa, lo mû na e nyen? Bible atene so Nzapa la “asara ayayu na sese.” (Psaume 124:8). A tene nga so lege so Nzapa asara na e ayeke “ye ti kpene.” (Psaume 139:14). Na Daniel 5:23, a tene so Jéhovah ayeke “Nzapa so mbö ti mo” ayeke na tïtî lo. Atënë so kue so aye ti fa nyen la?

A ye ti tene so grâce na Nzapa la si e bâ gigi, si e yeke na fini (Kusala 17:28). A ye ti tene so aye kue so e yeke na ni, atâa fini ti e, apendere ye so e yeke bâ na ndo ti sese (afleur, ahoto, anyama), ngia so e yeke na ni tongana zo aye e, songo ti kamarade so e yeke na ni na ambeni zo, hingango nzerengo ti kobe, mango toto ti apendere ye, mango fion ti ambeni ye nga ndungo ambeni ye, aye so kue alondo gi na Nzapa (Jacques 1:17). Biani, apendere ye so kue asara si e bâ Nzapa tâ tongana mbeni nzoni Kamarade so e ye lo mingi. Ni la ape?

Peut-être a yeke lakue ngangu na mo ti bâ so Nzapa ayeke nzoni. Wala mo bâ so mo de ti hinga lo nzoni kue ape. A sara ye ape. E lingbi pëpe ti fa na yâ ti anduru article so aye kue so apusu ambeni zo ti tene so Nzapa ayeke sioni. Me e pensé so tongana mo gi ti hinga Nzapa nzoni, a yeke mû maboko na mo ande mingi. * Tongana mo sara tongaso, mo yeke hinga ande ye mingi na ndo ti Nzapa. Tongaso, Nzapa ayeke sioni? Oko ape. “Nzapa ayeke ndoye.”—1 Jean 4:8.

^ par. 8 Na tapande, tongana mo ye ti hinga ndani so Nzapa azia lege na aye ti sioni, gi ni na yâ ti chapitre 11 ti buku Bible afa nyen biani?, so aTémoin ti Jéhovah asigigi na ni.

 

TI HINGA AMBENI TËNË

NZONI TËNË SO ALONDO NA NZAPA!

Ngbanga ti nyen Nzapa azia lege na aye ti sioni nga na pasi?

Sioni abâ gigi tongana nyen, na ndali ti nyen si Nzapa azia lege na ni juska laso? Pasi ayeke hunzi ande la?