Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Mai 2013

 BIBLE ACHANGÉ FINI TI AZO

“Mbi ye lani ti ga prêtre”

“Mbi ye lani ti ga prêtre”
  • NGU SO A DÜ LO NA NI: 1957

  • KODORO SO A DÜ LO DÄ: MEXIQUE

  • MBAÏ TI LO: NGBENE SÉMINARISTE; BÊ TI LO AYEKE WÂ MINGI

GIGI TI MBI ÂNDÖ:

A dü mbi na kete gbata ti Texcoco. Lani kâ, mingi ti alege ti gbata ni ayeke na goudron ape nga poussière ayeke mingi. Azo ti akete kodoro ti tere ti gbata ni ayeke ga ka lani na akungba ti kango ni na ndo ti akororo ti ala. A dü e gumbaya, na mbi yeke mbasambala molenge ni. Sewa ti e ayeke na ye mingi ape. Babâ ti mbi ayeke fü aporo si lo yeke bata na e. Me lo kui na ngoi so mbi yeke lani na ngu mbasambala. Ti londo na ngoi ni so ti ga na ni, mama ti e la ayeke pika li ti lo ti bata e.

Âta ti mbi ti koli ahinga ti pika violon, mbeni ye ti pikango mozoko, na lo yeke na li ti mbeni orchestre so ayeke he gi abia ti nzapa. Mingi ti azo ti sewa ti e ayeke pika mozoko. Mama ti mbi ayeke he bia na yâ ti chorale ti eglize. Koya ti mbi ayeke he bia na lo yeke pika nga piano na kota ndo ti hengo abia. E ye tënë ti Nzapa mingi, a sara si mbi yeke lani servant, na mbi ye lani ti ga missionnaire Catholique. Mbi ye afilm ti karaté mingi. Na teti so mbi yeke bâ ni mingi, a sara si mbi ye ngonzo mingi.

Na gbata ti Puebla, mbi lï na mbeni ekole so ayeke tongana mbeni seminaire. Mbi ye lani ti ga prêtre Catholique. Me na ndangba ngu ti mbi na ekole ni, nzara ti Eglize Catholique ni asigigi na yâ ti mbi, ngbanga ti so mbeni maseka masoeur ni asara nzara ti mbi. Mbi ke, me ye so lo sara azia nzara ti mungo wali na yâ ti mbi. Na mbage, mbi bâ sarango ye ti tere ti mingi ti aprêtre ni ayeke gi ti handa lê ti azo. Tongaso, mbi dö lege ti gango prêtre ni mbi zia.

So mbi yeke lani servant, mbi ye ti ga missionnaire Catholique, me mbi ye nga lani afilm ti karaté mingi. Ye so asara si mbi ye ngonzo mingi

Mbi gue na Mexico, li-kodoro ti Mexique, ti manda pikango mozoko na mbeni kota ndo so a yeke fa na azo pikango mozoko  dä. Na peko ti so mbi wara diplôme ti mbi awe, mbi sara mariage, a ninga ape e dü amolenge osio. Mbi yeke he ka bia lani na yâ ti Chorale ti Eglize Catholique ti ndo so mbi yeke dä ti wara na nginza ti bata na sewa ti mbi.

Gi kete na peko ti so e sara mariage, mbi na wali ti mbi e mä tere ape. E yeke sara ye na tere ti mba na ngangu, na mingi ni a yeke ka gi mbanda. E komanse ka gi na papa, me na pekoni e gbu tere na tiri. Ni la, ngu13 na pekoni e kangbi tere na e sara divorce.

LEGE SO BIBLE ACHANGÉ FINI TI MBI:

Kozo tingbingo tere ti mbi na aTémoin ti Jéhovah ayeke na ngoi so mbi de mbi kangbi na wali ti mbi ape. Lani aTémoin ti Jéhovah use asi na yanga-da ti e na ala ye ti sara lisoro na mbi na ndo ti Bible. Mbi pensé ti mbi mbi tene mbi hinga tënë ti Nzapa mingi, na mbi yeke sigigi na nda ti mvene ti ala na gigi. Mbi hunda angangu tënë na ala, so na mbi kiringo tënë ni ayeke ti lo dä ape. Me li ti mbi akpe ti bâ so lakue ala yeke fa na mbi tâ nzoni kiringo tënë ni gi na yâ ti Bible. Mbi ga ti bâ so mbi hinga tënë ti Nzapa mingi ape. Me sarango ye ti wali ti mbi na mbage ti aTémoin ni akpa oko ape, nga mbi yeke na kua mingi. Ye so asara si yâ ti mbi na aTémoin ni akangbi.

Ngu oku na pekoni, mbi na mbeni wali nde la e yeke vivre. Iri ti lo ayeke Elvira. Mbi kiri mbi tingbi na aTémoin. Elvira ake tënë ti aTémoin ti Jéhovah ape, tongaso mbi bâ so a yeke ngangu na mbi ape ti manda Bible lakue. Atâa so kue, ti zia lege ti asioni ye so mbi yeke sara, a hunda na mbi angu mingi.

Mbi bâ so tongana mbi ye ti voro Jéhovah na bê ti mbi kue, mbi yeke na bezoin ti changé aye mingi na yâ ti fini ti mbi. Kozoni kue, a lingbi mbi zia lege ti hengo bia na yâ ti Chorale ti Eglize Catholique, so ti tene a lingbi mbi gi mbeni kua nde ti bata na sewa ti mbi (Apocalypse 18:4). Nga, a lingbi mbi sara mariage na Elvira.

Teti so bê ti mbi ayeke ka wâ mingi, a lingbi mbi zia nga lege ni. Me a yeke lani kete ye ape. Ye oko, aversê use amû maboko na mbi dä mingi. A yeke versê ti Psaume 11:5, so atene Jéhovah ake azo so andoye sarango ye ti ngangu. Use ni ayeke 1 Pierre 3:7, so afa na mbi so tongana mbi ye ti tene Jéhovah amä asambela ti mbi, a lingbi mbi ne wali ti mbi. Na ngoi so mbi yeke gbu li na ndo ti aversê so nga mbi yeke sambela Jéhovah ti mû maboko na mbi, yeke na yeke mbi wara lege ti pete ndo ti ngonzo ti mbi.

Bible afa na mbi so tongana mbi ye ti tene Jéhovah amä asambela ti mbi, a lingbi mbi ne wali ti mbi

NZONI YE SO MBI WARA NA PEKONI:

Fadeso sewa ti mbi ayeke na ngia. Mbi yeke sara ngangu ti leke songo ti mbi na amolenge ti mbi ti koli so mbi dü ala na ngbene wali ti mbi nga mbi yeke mû maboko na fini sewa ti mbi ti ngbâ be-ta-zo na Nzapa.

Tongana mbi dë lani molenge, mbi ye ti ga prêtre ti mû maboko na azo. Fadeso mbi yeke na ngia na yâ ti gigi ti mbi. Mbi yeke fa na azo pikango mozoko si mbi yeke wara nginza ti bata na sewa ti mbi. Mbi kiri singila mingi na Jéhovah so akanga bê ti lo na mbi na so asara si mbi changé mbi ga tâ mbeni nzoni zo laso!