Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Mai 2013

Angbanga so Nzapa afâ ândö afa so lo yeke sioni?

Angbanga so Nzapa afâ ândö afa so lo yeke sioni?

TI KIRI tënë na hundango ndo so, e yeke bi lê kete na ndo ti tënë ti angbanga use so Bible asara tënë ni. A yeke tënë ti Kota Ngu so apika na ngoi ti Noé nga futingo ti azo ti Canaan.

KOTA NGU SO APIKA NA NGOI TI NOÉ

TËNË SO AMBENI ZO ATENE: “Nzapa ayeke sioni, ndali ti so lani lo tokua kota ngu si afâ azo kue me a ngbâ gi Noé na sewa ti lo.”

YE SO BIBLE ATENE: Nzapa atene: “Mbi wara ngia pëpe na lege ti kui ti zo ti sioni; me Mbi ye zo ti sioni ti zia lege ti lo si lo wara fini.” (Ézéchiel 33:11). Ti bâ ni nzoni, a nzere na bê ti Nzapa oko pëpe ti futi lani azo na ngoi ti Noé. Me lo futi ala ngbanga ti nyen?

Bible atene so tongana Nzapa afâ ândö ngbanga na ndo ti asioni zo, a yeke ti zia na azo so akpe Nzapa pëpe “tapande ti aye so ayeke ga.” (2 Pierre 2:5, 6). Tapande ni so afa na e nyen?

Kozoni, a fa na e so atâa so a nzere na Nzapa pëpe ti futi azo, lo yeke bâ azo ti sioni so ayeke sara pasi na amba ti ala na ala yeke na tënë ti kiri na ni na lo. Tongana ngoi ni alingbi, lo yeke hunzi pasi nga na aye ti sioni kue.

Use ni, a fa na e so angbanga so Nzapa afâ ândö afa na gigi so, teti so lo ye nzoni ti azo, lo gboto mê ti ala kozoni si lo futi ala. Noé ayeke lani wafango tënë ti mbilimbili, me mingi ti azo amä tënë so lo fa na ala so ape. Bible atene: “Ala gbu li lani na ndo ti ye so ayeke si so pëpe juska kota ngu apika na ahon na ala kue.”​—Matthieu 24:39.

Nzapa achangé? Oko ape. Na tapande, lo gboto lani mê ti azo ti Israël so tongana ala mû peko ti asioni sarango ye ti amara so angoro ala, fade lo yeke zia lege na awato ti ala ti mû kodoro ti ala nga ti futi Jérusalem, li-kodoro ni, na fade awato ti ala ayeke gue na ala na kodoro-wande. Atâa so kue, azo ti Israël asara gi sioni, na ala mû même amolenge ti ala na sandaga. Jéhovah afâ ngbanga na ndo ti ala lani? En, me kozoni kue lo tokua aprophète ti lo fani mingi na mbage ti ala ti tene na ala ti zia sioni sarango ye ti ala ni. Na même lo tene: “Fade Seigneur L’Éternel asara ye oko pëpe tongana Lo fa tënë ti lingo ti bê ti Lo na aboi ti Lo aprophète kozoni pëpe.”​—Amos 3:7.

TËNË NI ABÂ NGA MO: Tapande ti angbanga so Jéhovah afâ ândö adë bê ti e. E yeke na beku so  Nzapa ayeke ga ti futi asioni zo so ayeke sara pasi na amba ti ala. Bible atene: “Fade A lungula azo so asara sioni . . . Me azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.” (Psaume 37:9-11). Ngbanga so Nzapa ayeke ga na ni ande ti zi na azo na gbe ti pasi so, mo pensé ti mo nyen na ndo ni? A fa so Nzapa ayeke sioni? wala lo yeke bâ mawa ti e azo?

FUTINGO TI AZO TI CANAAN

TËNË SO AMBENI ZO ATENE: “Futingo ti azo ti Canaan ayeke tongana ti mbeni bira so azo ayeke sara laso ti futi senge senge mbeni mara kue kue kue.”

YE SO BIBLE ATENE: “Lege ti [Nzapa] kue ayeke mbilimbili; Lo yeke Nzapa ti be-biani, Lo yeke na sioni oko pëpe.” (Deutéronome 32:4). A lingbi a haka pëpe fango ngbanga ti Nzapa so ayeke mbilimbili na bira so azo ayeke sara. Ngbanga ti nyen? Ngbanga ti so Nzapa ayeke na ngangu ti bâ ye so ayeke na yâ ti bê ti zo, me zo ape.

Na tapande, na ngoi so Nzapa aye ti futi Sodome na Gomorrhe, Abraham agi bê ti lo mingi na ndo ti ngbanga ni so Nzapa aye ti fâ so. Na lo, a yeke ngangu ti tene Nzapa so ayeke mbilimbili ‘afuti azo ti mbilimbili legeoko na azo ti sioni.’ Me yeke yeke Nzapa afa na lo so même tongana ni wara gi azo ti mbilimbili bale-oko na yâ ti gbata ti Sodome, ni yeke futi ni pëpe (Genèse 18:20-33). Biani, Nzapa abâ lani ye so ayeke na yâ ti bê ti azo ni na lo bâ so sioni ti ala ayeke mingi.​—1 Chronique 28:9.

A yeke nga tongaso na azo ti Canaan. Nzapa abâ ye so ayeke na yâ ti bê ti ala, ni la si lo mû yanga ti tene a futi ala kue. A hinga azo ti Canaan na sioni ti ala, ala yeke mû lani amolenge ti ala na sandaga na zongo ala na fini lê ti ala (2 aGbia 16:3). * Azo ti Canaan ahinga lani so Jéhovah amû yanga na azo ti Israël ti mû sese ti ala kue. Tongaso, azo so asoro ti ngbâ na ti tiri bira, ala soro na bê ti ala wani ti tiri bira gi na azo ti Israël ape, me na Jéhovah nga, lo so afa polele so lo yeke tiri na tere ti azo ti lo.

Nga, Nzapa asara nzoni bê na azo ti Canaan so azia lege ti sioni ti ala na ayeda ti bata andia ti Jéhovah so ayeke nzoni mingi ahon ti ala. Na tapande, Rahab, zo ti Canaan so lo yeke lani wali-ndumba, asö lani fini ti lo nga na ti sewa ti lo. Nga, na ngoi so azo ti Gabaon, mbeni gbata ti Canaan, ahunda lani ti tene Nzapa asara nzoni bê na ala, Nzapa abata ala na amolenge ti ala na fini.​—Josué 6:25; 9:3, 24-26.

TËNË NI ABÂ NGA MO: E lingbi ti manda mbeni kpengba ye na lege ti ngbanga so Nzapa afâ na ndo ti azo ti Canaan. E yeke pusu nduru nduru na “lango ti ngbanga nga ti futingo azo so akpe Nzapa pëpe”, lango so a sara tënë ni kozo awe (2 Pierre 3:7). Tongana e ye Jéhovah, fade e yeke bâ nzoni na ngoi so lo yeke hunzi pasi ti azo na lege so lo yeke futi ala so ake komandema ti lo so ayeke mbilimbili.

A hinga azo ti Canaan na sioni ti ala, na bê ti ala wani la ala ke Nzapa nga na azo ti lo

Na nzoni bê Jéhovah afa na e so ye so ababâ na amama ayeke soro ti sara ayeke kiri nga na ndo ti amolenge ti ala. Lo tene: ‘Mo kamata fini, si mo ngbâ na fini, mo na amolenge ti mo; mo ndoye L’Éternel Nzapa ti mo, mo mä yanga ti Lo, na mo zia bê ti mo na Lo.’ (Deutéronome 30:19, 20). So atënë ti yanga ti sioni Nzapa la? wala ti Nzapa so aye azo na so aye ti tene ala soro nzoni ye?

^ par. 15 Awandara so ayeke gi ye na gbe ti sese awara ambeni ye so afa atene mungo abébé na sandaga ayeke na yâ ti vorongo nzapa ti azo ti Canaan.