Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Février 2013

 BIBLE ACHANGÉ FINI TI AZO

“Ala ye si mbi wani mbi hinga ye so Bible afa”

“Ala ye si mbi wani mbi hinga ye so Bible afa”
  • NGU SO A DÜ LO NA NI: 1982

  • KODORO SO A DÜ LO DÄ: RÉPUBLIQUE DOMINICAINE

  • MBAÏ TI LO: LO YEKE ÂNDÖ MORMON

GIGI TI MBI ÂNDÖ:

A dü mbi na Saint-Domingue, na République dominicaine. A dü e amolenge osio, na mbi yeke tanga ni. Babâ na mama ti mbi ayeke azo so amanda mbeti ayo, tongaso ala ye si amolenge ti ala akono na nzoni ndo. Ngu osio kozoni si ala dü mbi, ala tingbi na amissionnaire Mormon. Fason so amaseka ti Églize Mormon aleke na tere ti ala pendere anzere na ala mingi, tongaso ala mû desizion ti tene sewa ti ala aduti na popo ti akozo sewa na ndo ti zoa ni ti lï na yâ ti “Église de Jésus-Christ des saints des derniers jours,” wala Églize Mormon.

Tongana mbi yeke kono, mbi mû mbage ti mbi mingi na akusala ti églize ni. Mbi sara nga lani ye alingbi na andia ti aMormon so aluti mingi na ndo ti gigi ti sewa nga na ndo ti nzoni sarango ye. A nzere lani na mbi mingi ti duti Mormon, na mbi leke na bê ti mbi lani ti ga missionnaire.

Na ngu 18, sewa ti mbi ague na États-Unis ti tene mbi sara nzoni université kâ. Ngu oko tongaso na pekoni, mama-kete ti mbi na koli ti lo, so ala yeke ti ala aTémoin ti Jéhovah, aga abâ e na sese ti Floride. Ala hunda na e ti ga na mbeni kota bungbi legeoko na ala. Ye so mbi bâ kâ apika bê ti mbi mingi. Mbi bâ azo kue ayeke zi yâ ti Bible ti gi aversê ni nga ala yeke mû note. A sara nga si mbi nga kue mbi hunda ti tene a mû na mbi mbeni feuille na mbi mû nga note.

Na peko ti kota bungbi ni, mama-kete ti mbi nga na koli ti lo atene na mbi so, teti so mbi ye ti ga missionnaire, ala lingbi ti mû maboko na mbi ti hinga ye so Bible afa. Tënë ni anzere na mbi, ngbanga ti so na ngoi ni so mbi hinga ye na ndo ti Livre de Mormon mingi ahon Bible.

LEGE SO BIBLE ACHANGÉ FINI TI MBI:

Na ngoi so mbi na mama-kete ti mbi nga na koli ti lo e yeke manda Bible ni na téléphone, ala wa mbi lakue ti haka ye so mbi mä na bê na ni na ye so Bible afa. Ala ye si mbi wani mbi hinga ye so Bible afa.

 Mbi mä na bê lani na gbâ ti aye so a fa na yâ ti Églize Mormon, me mbi hinga lani ape wala atënë ni ague oko na ye so Bible afa. Mama-kete ti mbi atokua na mbi Réveillez-vous! ti 8 novembre 1995, so aTémoin ti Jéhovah la asigigi na ni. Na yâ ni, a sara tënë ti mabe ti aMormon. Li ti mbi akpe kue ti bâ so mbi hinga ye mingi ape na ndo ti afango ye ti aMormon. A sara si mbi gue na ndo ti Internet ti aMormon ti gi ye dä. Ye so mbi diko dä ayeke tâ gi tongana ti Réveillez-vous! ni. Nga, na ngoi so mbi sara vizite ti Musée ti aMormon so ayeke na sese ti Utah, mbi kiri mbi bâ so aye ni ayeke tâ tënë.

Na mbi lani, mbi pensé so Livre de Mormon na Bible amä tere nzoni. Me na ngoi so mbi komanse ti diko Bible tâ nzoni, mbi bâ so ambeni fango ye ti aMormon ni ayeke nde na ti Bible. Na tapande, na Ézéchiel 18:4 Bible atene so âme ayeke kui. Me, ti Livre de Mormon, na Alma 42:9, atene: “Âme alingbi ti kui lâ oko pëpe.”

Gi so ape, me nga mbi gi li ti mbi gbä na tënë ti yengo kodoro so aMormon ayeke fa ni. Na tapande, aMormon afa so yaka ti Eden ayeke lani na kete gbata so iri ni ayeke Jackson, na États-Unis. Aprophète ti Églize ni atene nga so Royaume ti Nzapa ayeke komande ande sese kue gi na lege ti ngorogbia ti États-Unis.

Mbi hunda tere ti mbi, mbi tene, ka ti kodoro ti mbi so a dü mbi dä wala ti mbeni kodoro nde, a yeke duti tongana nyen? Mbeni lâ, mbeni mba ti mbi maseka so ayeke nga Mormon na so lo ngbâ ti sara ekole ti gango missionnaire apika singa na mbi. Mbi hunda lo droit, mbi tene, Tongana kodoro ti lo ayeke na bira na mbeni kodoro nde, lo yeke duti nduru ti tiri na amba ti lo Mormon ti kodoro wande ni so? Lo tene, En, li ti mbi akpe kue. Mbi kiri mbi gi ti bâ yâ ti afango ye ti aMormon nzoni na mbi hunda nga atënë mingi na ndo ni na akota zo ti Églize ni. Ala tene na mbi atene so tënë ni ayeke mbeni “mystère” so mbeni lâ tongana lumière aza ngangu mbi yeke hinga ndani.

Kiringo tënë ti akota zo ti Églize ni anzere na mbi ape. Tongaso, mbi kiri mbi bâ yâ ti raison so apusu mbi ti ga missionnaire Mormon. Mbi ga ti bâ so ye so anzere na mbi lani na kua ti missionnaire ni ayeke gi ndali ti sarango nzoni na azo nga ndali ti tene azo ane mbi. Me tongana a ndu tënë ti Nzapa, ti tâ tënë ni mbi hinga lani ye mingi na ndo ti lo ape. Atâa so mbi diko lani Bible fani mingi, mbi bâ ni na nene ni ape. Lâ oko mbi mä mbeni tënë na ndo ti ye so Nzapa aleke ti sara ndali ti sese wala ndali ti azo pëpe.

NZONI YE SO MBI WARA NA PEKONI:

So aTémoin ti Jéhovah amanda Bible na mbi, mbi manda aye mingi. Na tapande, iri ti Nzapa ayeke nyen? Nyen la ayeke si na peko ti kuâ, nyen? Nga kusala wa Jésus ayeke sara na ngoi so Nzapa ayeke sara ye so bê ti lo aye? Fadeso mbi hinga ye mingi na ndo ti pendere mbeti so, na a nzere na mbi ti fa na azo atâ tënë so mbi manda dä. Depuis kete ti mbi la mbi hinga so Nzapa ayeke dä, me fadeso mbi lingbi ti sara lisoro na lo na yâ ti sambela tongana mbeni kota Kamarade ti mbi. Na 12 juillet 2004, mbi wara batême. Nze omene na pekoni, mbi bi tere ti mbi na yâ ti kusala ti fango tënë na azo teti l’heure mingi.

Teti ngu oku, mbi sara kua lani na kota ndokua ti aTémoin ti Jéhovah, so ayeke na Brooklyn, na New York. A nzere na mbi lani mingi ti mû maboko na kua ti petengo aBible nga na ambeni mbeti ti Nzapa nde so azo kutu mingi na ndo ti sese mobimba ayeke bâ nzoni dä. Laso nga, mbi ngbâ ti mû maboko na azo ti hinga ye na ndo ti Nzapa.