Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Février 2013

 KOTA MAMA-TENE NI: TAPANDE TI MOÏSE AFA NA E NYEN?

Moïse ayeke lani zo wa?

Moïse ayeke lani zo wa?

Tongana mo mä iri ti Moïse, mo yeke pensé na zo wa? Mo yeke pensé . . .

  • na mbeni kete bébé so mama ti lo ahonde lo na yâ ti mbeni sakpa si azia lo na ndo ti ngu ti Nil?

  • na mbeni molenge so molenge-wali ti gbia Pharaon abata lo na Égypte, na so lo girisa lâ oko pëpe so lo yeke zo ti mara ti Israël?

  • na mbeni koli so abata ataba na kodoro ti Madian teti ngu 40?

  • na mbeni koli so Jéhovah * asara tënë na lo na tere ti mbeni kete keke so wâ agbi na yâ ni?

  • na mbeni koli so aluti lani na devant ti gbia ti Égypte si lo hunda lo sân mbeto ti zi azo ti Israël na ngbâa?

  • na mbeni koli so Nzapa atokua lo ti fa aye ti ngangu bale-oko so atï lani na ndo ti Égypte tongana gbia ni ake ti mä yanga ti tâ Nzapa?

  • na mbeni koli so asigigi na azo ti Israël na sese ti Égypte?

  • na mbeni koli so Nzapa amû ngangu na lo ti kangbi yâ ti Ngu-Bengba use?

  • na mbeni koli so Nzapa amû na lo aCommandement Bale-oko ti mû na azo ti Israël?

MOÏSE asara aye so ge so kue nga na ambeni nde nga. A yeke biani senge ape si aChrétien, aJuif nga na aMusulman abâ zo ti Nzapa so na nene ni mingi.

Biani, Moïse ayeke lani mbeni prophète so asara ‘aye so amû mbeto mingi’. (Deutéronome 34:10-12). Lo yeda si Nzapa asara kua na lo ti sara aye ti kpene mingi. Atâa so kue, Moïse ayeke lani senge zo tongana e. Legeoko tongana prophète Élisée, so asigigi lani na tere ti Moïse na ngoi so tere ti Jésus agbian, Moïse ayeke zo so ayeke lani “na abibe tongana ti e.” (Jacques 5:17; Matthieu 17:1-9). Moïse atingbi lani na gbâ ti akpale so e nga kue e yeke wara ni laso, na lo gbu lê ni.

Mo ye ti hinga ye so lo sara si lo gbu lê ni so? Zia e bâ anzoni ye ota so asigigi na yâ ti sarango ye ti Moïse nga ye so e lingbi ti manda na lege ti tapande ti lo.

^ par. 7 Jéhovah ayeke iri ti Nzapa na yâ ti Bible.