Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Octobre 2015

A yeke nzoni na mbi ti ga nduru na Nzapa

A yeke nzoni na mbi ti ga nduru na Nzapa

NA NGOI so mbi yeke na ngu gumbaya, mbi yo encore ape. Laso mbi yeke na ngu 43, mbi yo gi mètre oko. Na ngoi so babâ na mama ti mbi abâ so mbi lingbi ti yo encore ape, ala wa mbi ti sara kua ngangu tongaso si mbi pensé lakue gi na ndo ti nduru ti mbi ape. Mbi kä alë ti keke na devant ti da ti e nga mbi leke ni pendere. Ye so asara si mbi wara gbâ ti aclient.

Ti tâ tënë ni, so mbi sara kua ngangu achangé aye kue ape. Mbi ngbâ lakue gi nduru, nga a yeke ngangu na mbi ti sara même akete kete ye, na tapande ti payé aye so mbi vo na magazin ndali so place ti payengo ye ni ayo ahon mbi. A yeke mo bâ mo tene a leke aye kue ndali ti azo so ayo ahon mbi fani use. Mawa ti tere ti mbi wani asara mbi, me aye achangé na ngoi so mbi yeke lani na ngu 14.

Mbeni lâ, ambeni wali use so ayeke aTémoin ti Jéhovah avo alë ti keke ti mbi nga na pekoni ala komanse ti manda Bible na mbi. Kete na pekoni, mbi bâ so so mbi hinga Jéhovah nga na ye so lo leke na bê ti lo ti sara ayeke kota ye mingi ahon kpale ti yongo so mbi yeke na ni. Ye so asara lani mbi nzoni mingi. Mbi ye lani versê ti Psaume 73:28 mingi. Kozo mbage ti versê ni atene: “A yeke nzoni na mbi ti ga nduru na Nzapa.”

Hio tongaso, sewa ti mbi alondo na Côte d’Ivoire ague na Burkina Faso. Ye so achangé aye mingi na yâ ti gigi ti mbi. Na Côte d’Ivoire, azo ayeke bâ ka mbi lani na tere ti alë ti keke ti mbi so mbi yeke kä ni. Me ge, mbi yeke lani wande, nga azo mingi agi li ti ala gbä na mbi. Azo aye ti bâ mbi mingi, a sara si mbi ngbâ na yanga-da teti ayenga mingi. Na pekoni, mbi dabe ti mbi so a yeke nzoni mingi na mbi ti ga nduru na Nzapa. Mbi sara mbeti na filiale ti aTémoin ti Jéhovah, na a tokua na mbi Nani, mbeni missionnaire so aga na moto ti bâ mbi.

Na ndo so e yeke lani dä, mbutu ayeke mingi na ndo ti alege asara si a yeke ngangu ti hon na ndo ni na moto nga na gbe ti ngu popoto ayeke mingi. Nani atï na moto fani mingi na ngoi so lo yeke ga ti sara étude ti mbi, me lo ngbâ lakue ti ga. Mbeni lâ, lo hunda ti gue na mbi na bungbi. Mbi bâ so a hunda ti tene mbi sigigi ti tene azo abâ mbi encore. Na ndo ni, a yeke lani ngangu na lo ti kpe na moto ni, me tongana lo yô mbi, moto ni ayeke ne encore mingi na lo yeke kpe na ni gbä. Me, mbi yeda, mbi dabe ti mbi na use mbage ti  versê ti mbi so mbi ye ni mingi, so atene: “Mbi zia bê ti mbi na [Jéhovah] Nzapa, Ndo Ti Bata tere ti mbi.”

Na ambeni ngoi mbi na Nani e tï na yâ ti popoto, me e bâ so a yeke nzoni e gue na abungbi. Na ndo so mbi lango dä, azo aye gi bango mbi me ye ni ayeke nde mingi na Da ti Royaume, azo ahe ngia na mbi. Nze gumbaya na pekoni mbi wara batême.

Ota mbage ti versê ti mbi so mbi ye ni mingi atene: “Si mbi lingbi fa na gigi kusala ti Mo kue.” Mbi hinga lani so a yeke duti ngangu na mbi mingi ti fa tënë. Mbi ngbâ ti dabe ti mbi na ngoi so mbi fa tënë da na da pan. Amolenge nga na akota zo ayeke bâ lani gi mbi, ala mû peko ti mbi, nga ala yeke haka peko ti tambela ti mbi. Ye so ason bê ti mbi, me mbi dabe ti mbi lakue so ala yeke na bezoin ti Paradis mingi tongana mbi, tongaso mbi ngbâ ti fa tënë.

Mbi vo mbeni vélo ti azo ti bubango gere ti mû maboko na mbi. Tongana e si na mbeni hoto, ita so mbi na lo e yeke fa tënë ayeke pusu mbi, me tongana e si na li ti hoto ni awe, lo yeke monté na ndo ti vélo ni na ngoi so e yeke descend. Atâa so na tongo nda ni a yeke lani ngangu na mbi ti fa tënë, a ninga ape mbi ye tënë ni mingi, a sara si na ngu 1998, mbi ga pionnier permanent.

Mbi sara lani gbâ ti a-étude, osio na popo ni awara batême. Na ndo ni, mbeni ita ti mbi ti wali ayeda nga na tâ tënë. Fani mingi, tongana mbi mä so azo so mbi sara étude na ala ague na li ni akpengba mbi tâ gi na ngoi so mbi yeke na bezoin ni. Mbeni lâ, na ngoi so palu asara mbi, mbi wara mbeni lettre so alondo na Côte d’Ivoire. Mbi komanse ti sara étude lani na mbeni wamandango mbeti na dasendagi na Burkina Faso na mbi mû étude ni na mbeni ita-koli. Na pekoni wamandango mbeti ni ague na Côte d’Ivoire. Mbi yeke lani na ngia mingi ti mä so lo ga wafango tënë so ade ti wara batême ape.

Nyen la mbi sara ti bâ lege ti abezoin ti mbi? Mbeni bungbi so ayeke mû maboko na azo so mbeni mbage ti tere ti ala abuba afa na mbi fungo bongo. Mbeni zo so ayeke fa lani na mbi fungo bongo abâ so mbi sara kua nzoni mingi, lo tene na mbi: “A yeke nzoni e fa na mo sarango savon.” Ala fa ni na mbi. Mbi sara savon ti sukulango na bongo nga na senge savon. Azo aye savon ti mbi mingi nga ala yeke tene na amba ti ala ti ga ti vo ni. Mbi yeke zia ni na ndo ti moto ti azo ti bubango gere na mbi wani la mbi yeke fono ti kä ni.

Mawa ni ayeke so, na ngu 2004, mbi zia kua ti pionnier ndali ti so peko ti mbi ason mbi ngangu. Me mbi ngbâ lakue ti fa tënë.

Azo atene so mbi yeke lakue na ngia na yanga ti mbi. A yeke tâ na lege ni ti tene mbi duti na ngia ndali ti so a yeke nzoni na mbi ti ga nduru na Nzapa.—Tënë ti Sarah Maiga.