Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Septembre 2015

Tongana nyen la e lingbi ti fa so e ndoye Jéhovah?

Tongana nyen la e lingbi ti fa so e ndoye Jéhovah?

“Ti e, e yeke na ndoye, ngbanga ti so lo ndoye e kozoni.”—1 JEAN 4:19.

ABIA: 56, 138

1, 2. Tongana nyen la Jéhovah afa na e ti ndoye lo?

AZO mingi ayeda so nzoni lege so ahon atanga ni kue so mbeni babâ alingbi ti fa ye na amolenge ti lo ayeke ti zia na ala nzoni tapande. Bazengele Jean atene so “e yeke na ndoye, ngbanga ti so [Nzapa a]ndoye e kozoni.” (1 Jean 4:19). Tongaso, a yeke polele so Jéhovah azia na e nzoni tapande so ahon atanga ni kue so afa so lo yeke babâ ti ndoye na so apusu e ti ndoye lo.

2 Na lege wa la Nzapa “[a]ndoye e kozoni”? Bazengele Paul atene: “Nzapa azia ndoye ti lo na gbele e na lege so, tongana e ngbâ lani awasiokpari, Christ akui ndali ti e.” (aRom. 5:8). Jéhovah afa so lo ndoye e na lege so lo sara kota sacrifice, lo mû Molenge ti lo tongana ngere so a futa ti zi na azo so amä na bê. Ye so afa na e so ti tene e ndoye Jéhovah a lingbi e pensé gi na e wani ape nga e duti mbeni zo so ayeke mû ye mingi na zo. Ye so Nzapa asara so amû lege na e ti ga nduru na lo ti bâ nzoni na lege ti ndoye ti lo nga ti tene e ndoye lo.—1 Jean 4:10.

3, 4. Tongana nyen la e lingbi ti fa so e ndoye Nzapa?

3 Na popo ti asarango ye ti Jéhovah kue, ndoye la ayeke kota ahon atanga ni. Ye so amû lege na e ti hinga ngbanga ti nyen Jésus atene na mbeni koli so commandement so ayeke kota ahon atanga ni kue ayeke: “Mo ndoye Jéhovah Nzapa ti mo na bê ti mo  kue, na âme ti mo kue, na bibe ti mo kue nga na ngangu ti mo kue.” (Marc 12:30). Atënë ti Jésus so amû maboko na e ti hinga so ti ndoye Nzapa andu kozoni kue, bê ti e. Tongana e ndoye Jéhovah na bê ti e kue ape, a yeke nzere na lo ape. Ye oko, bâ so ti ndoye Nzapa aye nga ti tene ti ndoye lo na âme ti e kue, na bibe ti e kue nga na ngangu ti e kue. A ye ti tene so a lingbi tâ ndoye so e yeke na ni na mbage ti Nzapa angbâ gi na atënë ti bê ti e pëpe. Tongana e ndoye Nzapa na bê ti e kue, a lingbi e fa ni na lege ti asarango ye ti e, e sara kua na ngangu ti gbungo li ti e ti mä yâ ti aye so lo yeke fa na e nga e voro lo. Prophète Michée atene so a yeke ye so Jéhovah aye ti tene e sara la.—Diko Michée 6:8.

4 Tongana nyen la e lingbi ti fa biani so e ndoye Babâ ti e ti yayu? A lingbi e ndoye lo na bê ti e kue. Tongana ti so Jésus afa, a lingbi e ndoye Nzapa na bê ti e kue, na âme ti e kue, na bibe ti e kue nga na ngangu ti e kue. Na yâ ti article so ahon, e bâ aye osio so na lege ni Jéhovah afa so lo ndoye amolenge ti lo mingi. Zia e bâ fadeso tongana nyen la e lingbi ti fa so e ndoye Jéhovah mingi tongana ti so bê ti lo aye.

MÛ MERCI NA JÉHOVAH

5. Tongana e gbu li ti e na ndo ti aye kue so Jéhovah amû na e, a yeke pusu e ti sara nyen?

5 Tongana mbeni zo amû na mo cadeau, mo yeke tene nyen? Kite ayeke pëpe so mo yeke tene merci na zo ni. Nga, mo yeke sara kua na ni nzoni ndali ti so mo bâ ni na nene ni mingi. Disciple Jacques atene: “Nzoni matabisi kue nga na matabisi so alingbi kue alondo na nduzu si azu, teti a londo na Babâ ti alumière so ayeke na lê ti nduzu, lo so gbede ti lo ayeke ngbâ gi place oko awe.” (Jacq. 1:17). Jéhovah ayeke mû na e lakue aye so e bezoin ni ti ngbâ na fini nga ti duti na ngia. Ye so apusu e ti ndoye lo mingi, ni la ape?

6. Ti tene azo ti Israël angbâ lakue ti wara aye ti nzoni na mbage ti Jéhovah, a lingbi ala sara nyen?

6 Jéhovah asara aye ti nzoni mingi na azo ti Israël. Teti angu mingi, lo fa lege na ala na lege ti andia ti lo nga lo mû na ala aye kue so ala bezoin ni ti ngbâ na fini (Deut. 4:7, 8). Ye oko, ti tene ala ngbâ lakue ti wara aye ti nzoni so, a lingbi ala sara ye alingbi na Ndia ti lo. Na tapande, na ngoi so ala yeke sara sacrifice, lo hunda na ala ti mû “kozo le-kobe ti yaka” ti kodoro ni (Ex. 23:19). Na sarango tongaso, azo ti Israël ayeke fa so ala bâ na nene ni ndoye so Jéhovah andoye na ala nga na aye ti nzoni so lo sara na ala.—Diko Deuteronome 8:7-11.

7. Tongana nyen la e lingbi ti sara kua na “anzoni ye” ti e ti fa so e ndoye Jéhovah?

7 Ka ti e? Atâa so Nzapa ahunda na e laso pëpe ti mû mbeni nyama wala mbeni lë ti kobe ti mû na sacrifice, a yeke nzoni e fa so e ndoye Nzapa na lege so e yeke gonda lo na “anzoni ye” ti e (aProv. 3:9, FD). Tongana nyen la e lingbi ti sara ni? E lingbi ti mû a-offrande ti mû maboko na kua ti Royaume na yâ ti congrégation ti e nga na yâ ti dunia kue. So ayeke biani mbeni nzoni ye so e lingbi ti sara ti fa so e ndoye Jéhovah, atâa e yeke na ye mingi wala pëpe (2 aCor. 8:12). Ye oko, ambeni ye nde ayeke nga dä so e lingbi ti sara ti fa so e ndoye Jéhovah.

8, 9. Mbeni ye so e lingbi ti sara ti fa so e ndoye Jéhovah ayeke so wa? Nyen la Mike na azo ti sewa ti lo asara?

8 Dabe ti mo so Jésus atene na adisciple ti lo ti gi bê ti ala pëpe na ndo ti tënë ti kobe wala bongo, me a lingbi ala ngbâ ti gi Royaume kozoni. Babâ ti e atene so lo yeke mû na e aye so e bezoin ni (Mat. 6:31-33). E yeke na confiance na Jéhovah nga e hinga so lo yeke sara ye alingbi na tënë ti yanga ti lo so. Tongana e ndoye mbeni zo, e yeke sara confiance na zo ni. Tongaso, tongana e yeke na confiance na Jéhovah mingi, e yeke ye lo  nga mingi (Ps. 143:8). Ni la, a lingbi e hunda tere ti e: ‘Aye so mbi zia na gbele mbi ti sara nga na sarango ye ti mbi afa so mbi ndoye Jéhovah biani? Lango oko oko, mbi yeke zia bê ti mbi kue na Jéhovah ti bâ lege ti abezoin ti mbi?’

9 Mbeni ita so iri ti lo ayeke Mike afa so lo ndoye Jéhovah nga lo yeke na confiance na lo. Na ngoi so Mike angbâ kete, lo ye lani mingi ti gue na kodoro wande ti fa tënë. Même na peko ti so lo sara mariage nga lo dü amolenge use, lo ye gi ti gue na kodoro wande ti fa tënë. Na ngoi so Mike na azo ti sewa ti lo adiko ye na ndo ti aita so ague ti fa tënë na ando so bezoin ayeke dä mingi, ala mû desizion ti gi ti duti na aye mingi ape na yâ ti fini ti ala. Ala kä da ti ala na ala lango na yâ ti mbeni kete da. Na pekoni, lo kiri na wungo ti akua so lo sara na peko, nga lo gi ti bâ tongana nyen la na lege ti Internet lo na azo so a sara kua na gbe ti lo alingbi ti mä tere ti bâ lege ti tanga ti akua ni tongana lo hon na kodoro wande. Ye so amû maboko na Mike na azo ti sewa ti lo ti gue na kodoro wande. Na peko ti so ala fa tënë kâ nzoni teti ngu use, Mike atene: “E bâ so atënë ti Jésus so ayeke na Matthieu 6:33 ayeke tâ tënë.”

GBÛ LI TI MO NA NDO TI AYE SO JÉHOVAH AYEKE FA NA MO

10. Legeoko tongana David, ngbanga ti nyen a yeke nzoni e gbu li ti e na ndo ti aye so e yeke manda na ndo ti Jéhovah?

10 A sara angu 3000 tongaso awe, aye so Gbia David abâ na lê ti nduzu asara si bê ti lo adö. Lo tene: “Ayayu asara tënë ti gloire ti Nzapa; le-nduzu afa na gigi kusala ti tïtî Lo.” Na ndo ni, lo tene: “Ndia ti L’Éternel alingbi kue, a kiri ngangu na âme; tënë ti témoin ti L’Éternel ayeke tâ tënë, a sara si zo so li ti lo ayeke dä pëpe aga zo ti ndara.” Na ngoi so David agbu li ti lo na ndo ti andia ti Jéhovah nga na apendere ye so lo créé, David aga nduru mingi na Jéhovah nga lo ye ti fa ndoye ti lo na mbage ti Jéhovah. Lo tene: “Zia tënë ti yanga ti mbi na bibe ti mbi amû ngia na Mo, O L’Éternel, Tênë ti mbi na Zo Ti Ton mbi.”—Ps. 19:2, 8, 15.

11. Tongana nyen la e lingbi ti sara kua na hingango ye so Jéhovah amû na e ti fa so e ye lo? (Bâ foto so ayeke na tongo nda ti article ni.)

11 Laso, Jéhovah afa na e gbâ ti aye na ndo ti lo, ye so lo leke na bê ti lo ti sara, aye so lo créé nga na Bible. Dunia so ayeke pusu azo ti manda mbeti ayo. Ye oko, aye so asi na azo so amanda mbeti ayo afa na e so fani mingi mandango mbeti ayo asara si zo ayeke na mabe encore na Nzapa ape nga lo yeke ndoye Nzapa encore ape. Me, Bible awa e ti hinga ye, ti wara ndara nga ti hinga nda ti ye. So aye ti tene so a lingbi e hinga tongana nyen ti sara kua na hingango ye so Nzapa amû na e tongaso si e na amba ti e kue e bâ nzoni dä (aProv. 4:5-7). Nzapa “aye si mara ti azo nde nde kue asö fini ti ala na ala si na tâ hingango ye na ndo ti tâ tënë.” (1 Tim. 2:4). E yeke fa so e ye Jéhovah tongana e fa na azo kue nzoni tënë ti Royaume ti lo na bê ti e kue nga e mû maboko na ala ti hinga ye so Nzapa aleke na bê ti lo ti sara ndali ti azo.—Diko Psaume 66:16, 17.

12. Tënë wa la mbeni molenge-wali atene na ndo ti cadeau so Jéhovah amû na lo?

12 Même amolenge nga na amaseka alingbi ti fa so ala ndoye Jéhovah tongana ala kiri singila na lo ndali ti aye so lo sara na ala nga na aye so lo fa na ala. Shannon atene so na ngoi so lo yeke na ngu 11, lo na ngambe ti lo so ayeke na ngu 10 nga na babâ na mama ti lo ague na kota bungbi so a sara ni na Anglais so mama-tene ni ayeke: “Batango tënë ti Nzapa”. Na mbeni lango ti assemblée ni, a hunda na amolenge nga na amaseka ti duti na mbeni place so a zia ni ndali ti ala. Mbeto asara lo me lo gue. Na pekoni, bê ti lo adö na ngoi so a mû na ala oko oko kue  buku Les jeunes s’interrogent — Réponses pratiques. Pendere cadeau so asara si Shannon abâ Jéhovah tongana nyen? Lo tene: “A yeke na ngoi ni so la mbi ga lani ti hinga so Jéhovah ayeke dä biani nga lo ndoye tâ mbi mingi.” Shannon atene nga atene: “E yeke na ngia so Jéhovah, Nzapa ti e, amû na e pendere cadeau so senge senge.”

YEDA NA WANGO NGA NA SENGO NDO TI JÉHOVAH

13, 14. A lingbi e sara ye tongana nyen tongana Jéhovah ase e? Ngbanga ti nyen?

13 Bible adabe ti e, a tene: “Zo so L’Éternel andoye lo, Lo se lo, legeoko tongana babâ ase molenge so amû ngia na lo.” (aProv. 3:12). Tongaso, a lingbi e sara ye tongana nyen tongana a se e? Bazengele Paul asara tënë na lege ni na ngoi so lo tene: “A lingbi ti bâ sengo ndo kue na ndembe ni tongana ye so amû ngia na zo pëpe, me ye so amû vundu.” So Paul atene tongaso, a ye pëpe ti tene so lo bâ lani sengo ndo tongana senge ye ndali ti so lo kiri lo tene: “Ye oko, gbändâ ala so sengo ndo ni asara kua na ndo ti ala, sengo ndo ni ayeke lë lengo ti siriri, so ti tene mbilimbili.” (aHéb. 12:11). Tongana e ndoye Jéhovah, e yeke sara sanka ti awango ti lo pëpe nga e yeke sara ngonzo pëpe tongana lo mû na e wango. A yeke ngangu na ambeni zo ti sara ni. Me, tongana e ndoye Nzapa e yeke sara ni.

14 Na ngoi ti Malachie, aJuif mingi amä wango ti Jéhovah ape. Ala hinga lani Ndia so Jéhovah amû na ndo ti aye so a lingbi ala mû na sacrifice, me ala sara sanka ni, na Jéhovah amû na ala kpengba wango. (Diko Malachie 1:12, 13.) A yeke lani mbeni ngangu kpale? Mä tënë so Jéhovah atene: “Fade Mbi to zonga ni na ndo i, na fade Mbi zonga ye so asara nzoni na i; biani, Mbi zonga ye ni so awe fadeso, teti i bata komandema [ti mbi] na bê ti i pëpe.” (Mal. 2:1, 2). A yeke polele so tongana e ke lakue ti sara ye alingbi na awango ti Jéhovah wala e sara sanka ti awango ni, e yeke wara akpale mingi na pekoni.

Sara ye alingbi na awango ti Nzapa ahon ti sara ye tongana ti azo ti dunia so (Bâ paragraphe 15)

15. Bango ndo wa la azo ti dunia so ayeke na ni so a lingbi e kpe ni?

15 Dunia ti Satan so ayeke pusu azo ti sara baba nga ti pensé gi na ala wani. Azo mingi aye pëpe ti tene a mû wango na ala wala a fa  na ala ye ti sara. Même ambeni zo so ayeke mä wango, fani mingi ala yeke sara ni na bê ti ala kue ape. Ye oko, Bible awa aChrétien ti “zia ti sara ye akpa ti aye ti ngoi so”. A lingbi e hinga “ye so bê ti Nzapa aye” nga e sara ye alingbi na ni (aRom. 12:2). Jéhovah ayeke sara kua na bungbi ti lo ti mû na e awango na ndo ti aye nde nde na ngoi so alingbi. Na tapande, lo fa na e tongana nyen la a lingbi e sara ye na mbage ti mbeni zo so ayeke koli wala wali ti e ape, tongana nyen la e lingbi ti soro anzoni kamarade nga tongana nyen la e lingbi ti soro anzoni ngia. Tongana e yeda na bê ti e kue na mara ti awango so nga e sara ye alingbi na ni, e yeke fa so e mû merci mingi na Jéhovah nga e ndoye lo biani na bê ti e kue.—Jean 14:31; aRom. 6:17.

ZIA BÊ TI MO KUE NA JÉHOVAH TI MÛ MABOKO NA MO NGA TI BATA MO

16, 17. (a) Ngbanga ti nyen a yeke nzoni e gi ti hinga atënë ti bê ti Jéhovah na ngoi so e yeke mû adesizion? (b) Tongana nyen la azo ti Israël afa so ala ndoye Jéhovah ape nga ala yeke na confiance na lo ape?

16 Tongana akete molenge abâ so ala yeke na yâ ti kpale, hio ala yeke kpe na mbage ti ababâ na amama ti ala. Tongana amolenge ni ayeke kono, ala komanse ti zia bê ti ala mingi na ndo ti ala wani nga ala yeke mû adesizion ala wani. Ye so afa so ala kono awe. Ye oko, amolenge so ayeke na kpengba songo na ababâ na amama ti ala ayeke gi wango na mbage ti ala nga ala yeke gi ti hinga atënë ti bê ti ala kozo si ala mû mbeni desizion. A yeke nga tongaso na lege ti yingo. Jéhovah amû na e yingo ti lo so ayeke pusu e ti duti na “nzara ti sara ye”. Ye oko, tongana e mû desizion sân ti gi ti hinga tënë ti bê ti Jéhovah na ndo ni, a fa so e ndoye lo ape nga e yeke na confiance na lo ape.—aPhil. 2:13.

17 Mbeni lâ na ngoi ti Samuel, azo ti Israël atiri bira na aPhilistin na aPhilistin ahon ala na ngangu. Azo ti Israël ayeke lani na bezoin ti tene a mû maboko na ala hio nga a bata ala. Ala mû desizion ti sara nyen? Ala tene: “Zia e tokua ti ga na Arche ti Mbele ti L’Éternel so ayeke na Silo, si Arche ni ayeke na popo ti e ti zi e na tïtî awato ti e.” Nyen la asi na pekoni? “A fâ ala mingi même aturugu [saki] bale-ota ti Israël akui. Na aPhilistin akamata Arche ti Nzapa”. (1 Sam. 4:2-4, 10, 11). So azo ti Israël amû Arche ti Nzapa, a yeke lani mo bâ mo tene ala ye ti tene Jéhovah amû maboko na ala. Me, ti tâ tënë ni, ala gi lani fango lege ti Jéhovah ape, ala yeke sara lani gi ye ti bê ti ala wani. Ye so asara si ala bâ pasi mingi.—Diko aProverbe 14:12.

18. Bible atene na e nyen na ndo ti tënë ti ziango bê kue na Jéhovah?

18 Mbeni zo ti sungo psaume so andoye Jéhovah lani mingi nga ayeke na confiance na lo, a tene: “Mo ku gi Nzapa, teti fade mbi kiri mbi sepela Lo mbeni. Lo yeke Salut ti mbi na Nzapa ti mbi. O Nzapa ti mbi, âme ti mbi ane na yâ mbi, teti so, mbi dabe mbi na Mo.” (Ps. 42:6, 7). Atënë ti bê ti mo nga kue ayeke tongaso? Mo ndoye Jéhovah mingi nga mo yeke na confiance na lo? Même tongana kiringo tënë ti mo ayeke En, mo lingbi ti kiri ti zia bê ti mo kue na lo ahon ti kozo. Bible atene: “Zia bê ti mo kue na L’Éternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sara si lege ti mo aga mbilimbili.”—aProv. 3:5, 6.

19. Aye wa la mo ye ti sara effort ti sara ti fa so mo ndoye Jéhovah?

19 So Jéhovah andoye e kozoni, lo fa na e tongana nyen e lingbi ti ndoye lo. Zia e ngbâ lakue ti gbu li ti e na ndo ti kota ndoye so lo fa na mbage ti e. Nga, zia si e ngbâ lakue ti fa so e ndoye lo ‘na bê ti e kue, na âme ti e kue, na bibe ti e kue nga na ngangu ti e kue.’—Marc 12:30.